Mayka 3 - ŊWÀʼ NYÙY

Vilìmbìy veé Juda vi dzə̀ vé kinshwìvi

¹ Á bèy, Mayka wáa tiisí jii: «Ven vee atǎr saʼ rám Jakov, ven ve á sáʼ kitúm kee Isray, vèn yuúrí kinyo ke m lo, a suúy ki. Bó yòʼ dzə̀ kilíŋ kén fó a yiì kijuŋ e wíri a?

² Yii bèy, vèn ban kén kinyo ke ru kí bánen, kóyti a dzə̀ ké kisaŋ ki. Yìiy, vèn yuv júv fo wír vémé wùn, aá dzə̀ə́ atin. Vèn kfə̀n ne ji aŋgwàrnyàm, shóʼoy jáv fo wírí vighvər.

³ Vèn kfə̀n ne ji akoosàʼ, a kfər wír vém. Vèn béʼti vighvə́r vév, shamè. Vèn tínri áwune, kù moo nyám ye á sí naa e ntòn.

⁴ Njiìn won kù dzə̀ wo yiì ye bií. Bìʼ bey, kishiíy kí kù wiyì, ke vèn wíy a toŋ, a kàn Nyùy Tàr, yii bèy, é la wù yòʼ yù tóŋ yén. Wù kù wíy bìn ndzə̀m bínen e vèn.»

⁵ Nyùy Tàr nén a suúy kùm aŋgàa ntum kimboʼtìi jii: «Áwune taʼ kév ji wír vémé jáy dzə́ə. Wìr wáy shuu wóv, á nèn a kàʼ mo Nyùy yíi səə̀vì ŋwérín, é wù wáa dzə e vijùŋ. Wìr tén fóo fo kòyàr, á nèn a fìʼ rə́mrə́m kinyò wo Nyùy yíi yiì e ŋgaàŋ.

⁶ Bìʼ bey, ven vee aŋgàa ntum vìn, ghán sén sí shaà ne. Bó vèn yòʼ dzəə́ wìy neèm vitsə́ʼ, é Nyùy ghém ndzə, e dìn e vèn. Yì yíi sən ven, e làŋsìn, a bó ŋgám won yòʼ dzəə́ yiì a taŋ. Kén kí kù mày ne bèy, a bó vèn yòʼ dzəə́ yiì a suúy kinyo ke kí dzəə́ bvəə́shi, e bó a koóy.

⁷ Wír ve á tiísi kinyo ke kí dzəə́ bvəə́shi, a koóyi wíy a woomé, a wír ve á shwéŋ ŋgámé wíy a dzə e nshoórmé. Nshoórmé wíy sətí shuu wóv, bìʼ fo Nyùy yòʼ wíy yu tóŋ yév.»

⁸ Yii bèy, fo ké mo woo Mayka ki, vitaáví vé Kiyòy ke Nyùy Tàr ví rùn ne e mǒ wùn, e fò mo vifií ve m wáa tinén kinyo e nsànloŋ, e tàvír mo ji m tóʼ jay rám Jakov, e tòʼ kinyo ke bi ke wír veé Israyi yii.

⁹ Ven vee atǎr saʼ rám Jakov, vèn yuúrí, ven ve á sáʼ kitúm kee Isray. Vèn ŋwáy kinyo kee tínén é nsànloŋ, kù jwivrì kinyo ke ru kí jwívrin.

¹⁰ Vèn bàʼrì ne ŋkàlaʼ yee Sion, a dzə̀ é kinsə̀ŋ, aá yúyrí a dzə̀ wíri, e bóo way, e bàʼrì ŋkàlaʼ yee Jerusalem rə̀n a dzə̀ e njiìn wo bi.

¹¹ Atǎr saʼ vee fóo kù sə́ a dzə̀ kòyàr, e bó a saʼ, aàtàá cùu sə́ mbvə́nkíwó, e bó a toʼtí nsər se Nyùy, aàŋgàa ntum Nyùyi kù maʼ sa kiwó, e bó a tiisí vinyo ve ví yíi a koóy. Áwune sə́ bèy, dzəv nsaŋ, suuy jii, «Nyùy Tàr dzə̀ vèr áwune, a dzə̀ sə̀ʼ ka ver.»

¹² Kí nén a dzə jii, bìʼ liì won kisaŋ, á yíi lìm Sion e njà sùm, é Jerusalem və̀n kfə́n é vifə̀m, é gwan woo fo lav cù Nyùy Tàr dzəə̀n kwiíy, e rə̀ŋsìn.