Mayka 2 - ŊWÀʼ NYÙY

Nyùy Tàr wíy màʼ ŋgeʼ e vé bùʼ ve á nyavrì e vé kitàne

¹ Ŋgeʼ dzə̀ ye wìr ve á táŋ a dzə̀ kinyo ke bi kí. Wír ve á lóo neŋ e kikun, á kù a baʼtí a dzə̀ kighèʼ, ndzə javì, á nèn kèʼ a bùʼtì vinyo ve vé‑ee siyin, a ba vitsə́ʼə́, bìʼ fo áwune kér vitaáví ve dzə̀ á yiì kinyo ke áwune koŋè.

² Á yén súm wìr, wú gheen áwune, á faàsì fáasin e vitaáví ví. Lav wìr boŋè, á kù sùm sùmèn. Á lo, á tàtí wír wùn à kfə́ə rəə́, e kù nyàvrì sho nyávrin. Yén vitsə́ʼ vé wìr, á kù faàsì faàsìn.

³ Bìʼ bèy, Nyùy Tàr ló kfə́, e sùúy jii: «M sí báʼti ji m yíi màʼ ŋgeʼ e ven vee aŋgàa vinyò ve bi vií kitu. Yì yíi ghar ven fó vilòŋ moo fáŋ, a bó yòʼ dzə̀ wìr yù fóo fəə́r kitú fo fo. A bó vèn yòʼ kfə̀n wíy yu fó a ghan, a koʼór wún. Ghán sin si wíy a dzə sé ŋgeʼ ye tavín e věn wùn.

⁴ Kishiíy kin ki wíy gheén, é wíri wáa yòv luŋ kùm vinyo vìn, a tinsín ven shó. Á wíy a toŋ, a te lám, a bìʼtì ven jii, ‹Á laàr ne ver ŋkuuŋkùŋ. Nyùy Tàr faàsì ne nsay yer yee vitsə́ʼ vér, e fò e wír ve vé‑eè tònèn verí, wír ve vé‑eè tònèn ver é kwaʼ rər.› »

⁵ Kí kooy ven bey, á kfə́n wíy lóo jàv nsay e wír Nyùy Tàrí, é la wìr yòʼ tùy kidzəm e kirə̀ʼ ji kén kee kirə́ʼ.

Á nyaysì ntum Mayka

⁶ Á bèy, wír ve vé‑eè yuurí kinyo kémé nèn lò, e sàyín ji m bér á njèʼèr. Lá m dzəə fìʼtì a kfə́ə kinyò kee bey. Bó yòʼ dzə̀ Nyùy yiì màʼày ver ji vèr wáa woomé.

⁷ Òó mbaà, ven vee rám Jakov, a dzə̀ vèn wàa shaʼnín rú ji bó Nyùy Tàr yòʼ yii shwiiy kilòŋ, a shaʼnín ji bó yòʼ dzə̀ wù mùm kinyo kee bey a? Vèn yèe, e bó a yòŋ jii, «Bó Nyùy Tàr yòʼ lo, wù wàa suŋnín e wìr wo wù yúnin wun, din a dzə̀ koŋ?»

⁸ Nyùy Tàr nén a bìnèr e vèn vin, a suúy jii: «Vèn lò ne kén, e bìnkìr, e kìʼ wír vém moo aŋgàa vibàn. Wír, aá kfə́n fo kwaʼ rər, kwaʼ ji á bòy ne, vèn ló kén, e ghàr, e kweèy a dzə̀ ndzə̀y fo áwuné wùn.

⁹ Vèn jum vikǐy ŋkfə wìr vém fo áwuné melav, melav mev, a dzə̀ fo áwune sí koŋ a teʼ kitú. Vèn yii bèy, jívir wón vév jivirín, fo á wiy, e kòóy kisəəvì, kisəəvì, ke a kì dzə̀, m fò aáwune.

¹⁰ Ven vé kifàʼa, vèn lo, a dùkìr. Féne yòʼ dzə̀ kirə́ʼ kén ké meèmè, bìʼ fo vinyo vén ve bi ví yiì ne, a kirə́ʼ kin ki yíi lày, e dù e kibvə.

¹¹ Vé kifàʼ vìne dzə̀ ben, aá koŋ ntum a dzə̀ ye kimboʼtì. A wìr lò, e sàsìn, e bvə̀y, a ghan, a levtí wíri jii, wun yíi yiì, aá wáa tsəə̀tìn tsəə̀tìn e meluʼ me tavkín mè, bo wír vìne kù yíi a gbù gbuùn é wùn wó ji á ŋgaà ntum wov.»

Nyùy wíy siìr wír və́ aáwuné nsay

¹² «Ven vee rám Jakov, rúrú, m wíy baʼtí ven kirə́ʼ kimòʼón. M wíy baʼtí wír ve á wíy a ber fo Isray adzə̀m, e baʼtí moo njiì wo wù kfə́n e wun kibìn. Wíri kfə̀n wíy run e věn nsay, é kiyor ki wáa koʼ, a koʼ, moo ké njiì wo á danèrì.»

¹³ Kí nén a dzə̀ jii, Nyùy wíy mvə̀ʼ dzə́ə, aáwune fəə́ fó kwaʼ vikwàn. Áwune wíy kiv shúu kày woó ŋkàlaʼ, a dù là kindzə́m, a Fòn wov woo Nyùy Tàr wíy shem mbìy, a tsəəné áwune, a fəə sho.