Matio 9 - ŊWÀʼ NYÙY

Jesus fér ndzə́m

¹ Jesus nəə́ é kikoŋ, a tumsín kibáŋ, a kfən e mvə̀mlaʼ yee Kapeenahum fo wù‑uù bee.

² Wù meé fó, wír ámóʼó toór wír, a shwín sí ndzə́m ne, e wìy, e yèn wun sho. Jesus yén mo wír vìyi wayin shilív e wun wùn é ŋàŋ, e yòŋ e ndzə́m və̀y jii, «Ŋkar yèm, vishí vé vi bòŋ ne. Á làysìn ne vinyo vé ve bi ví.»

³ Wír ve vé‑eè duŋrì nsər Nyùy ámóʼó wáa dzə fo. Á yú bey, e nèn a ghvə̀vrì jii, «Wìr və̀n táŋ a kilíŋ ke dzəə̀n ké Nyùy.»

⁴ Jesus kiíy kinyo ke áwune kwaʼtì, e dzə̀r jii, «Vèn kér kwaʼtì ye bií e věn meliv bìʼ ka?

⁵ Vèn yén ji m mèér a dzə̀ ké cér ki fó shuù ji Nyùy laysin ajay wìr və̀n, a bó yòʼ dzə̀ m sùúy ji wù lo é yuv, a ghan à?

⁶ A m kù suuy lèn, é vèn yén ji ŋgaà wo yírí dzəə̀n *Wanwìr kér vitaáví é nsay fèn fó làysìn ajay wìr.» Wù nèn sùúy e ndzə́m və̀y jii, «Nànèn é yuv, e lì kifá ke à néŋ sho kìy ki, a dù fo laʼ.»

⁷ Wù ku nèn nànèn, a dù fo laʼ.

⁸ Màŋgòŋ wo wù‑uù dzəə̀n fó yén kinyo ke kí kooyin, a ker gháʼ, a burí Nyùy wo wù foon vitaáví vee ben e wìr.

Jesus lí Matio ji wán və lìm

⁹ Jesus lò fo fo, e lòo dù, e yèn wír wùmòʼ, aá yoŋ ji Matio, a dzə̀ wír wo wù‑uù báʼti mbàm se bàràʼ, a wù dzə́ e wùn kirə̀ʼ ké lìm. Jesus suúy shó jii, «Wìyi, é wòsò wáa ghan.» Matio nèn lò, wùn wun wáa ghan.

¹⁰ Wáa dzə e kishiíy kímóʼ kí, Jesus dù, e lòo yikír e Matio lav, wír ve vé‑eè koó mbàm se *bàràʼ ámóʼó wáa yikír wùn áwune anín, à wír ámóʼó ve wír veé Judàa yii nyaysì nyàysìn sá ji ve bií.

¹¹ Wír veé mbìv *Farasi ámóʼó yén bey, e dzə̀r e wón lìm Jesuse jii, tàr wov sà yíkir wùn à kfə́ə wìr vee béne bìʼ ka á?

¹² Á lòo dzər, Jesus yú, e yòv lám wúmóʼó jii, «Wír ve tavkíné yòʼ yii taʼ ŋgaà shìv, kù yii taʼ vé yàsíi.»

¹³ Wù kfən sùúy jii, «Vèn du, e yèʼéy nsàv kinyò ke vé‑eè saŋen é Ŋwàʼ Nyùy ji Nyùy suuy a jii, ‹Ke m koŋ ki dzə̀ ji wìr wáa sham wùmòʼ woo wír, e shaà fó a rəsí, a seerí a dzə̀ nyám si, a cù mo shó.› Mo Nyùy suuy bèy, kém kí nén a dzə, a bó m yòʼ wìy ji m kfə́n a bi wír ve á yén vitú vév ji vé Nyùyi. M wìy ji m bí a dzə̀ vé jayi.»

Á dzə́tí kinyo kee kùm jíŋ ye á lem bìʼ Nyùy

¹⁴ Wón lìm Jooné wìy lò, e wìy, e dzə̀r e Jesus jii, «Vèr à wír veé mbìv *Farasii lo, á wàa lèm jíŋ bìʼ Nyùy, la vé vee wóné yòʼ a lèm bìʼ ka?»

¹⁵ Jesus bìnèr jii, «Vèn kwaʼ ji dzə̀ wíri dù vijín, wùn à lùm jìn wàa dzə, á kfə̀n a ser e vifù á? Yii bèy, vèn wáa kiíy jii, ghán sí wíy gheén, á faasì lum jìn və̀n fo vé vijiné, aáwune nèn a dìy, a lèm jíŋ.

¹⁶ «Bó wìr yòʼ yii li kinsàr ke ndzə̀y ke fíy ki, tsə́mri ndzə̀y se mvə sí shó. A wù yiì bèy, bo se fíy sìy si yíi màysì, e saàsì se mvə sí mo sí ŋwaan ne, é kirə́ʼ kiy ki bír, e shaà mo kí‑iì dzəə̀n.

¹⁷ «A bó yòʼ dzə̀ sá, á wày meluʼ me fíy mè e vitem vee júv ve mvə ví. A wìr wày shó, bo meluʼ mè yíi fə̀ʼ, e waarí vindzə̀n ve jùv vìy, é meluʼ mè lay kisáŋ, é vitém vi kfən bìrkír. Á yii wáy meluʼ me fíy mè a dzə̀ é vitem ve fíy vi, la meluʼ wùn à vitém vi yòʼ dzəə lày kisáŋ.»

Jesus fér wiíy woo ŋgaà yàsí wùn wàn wìr wo kuʼùn

¹⁸ Mo Jesus fer vinyo vìn bèy, taà laʼ wùmòʼ wìy, e tsə̀m e wùn si, a lon jii, «Wan wom woo wiíy kù kpù lèn bèn. Yii bèy, a m kì jii, aà wìy, e màʼ kiwó ké e wùn wó, wù kòʼór.»

¹⁹ Jesus nèn lò, wùn wun wáa dù, wón və́ lìme wáa dù sa fo bàm.

²⁰ Á lòo dù, wiíy wùmòʼ wáa dzə fo, a wù joyì, a sì kiyá nshòv sibaà e ghvə̀m mo wù‑uù kèʼèn, a shaà. Wù nyáʼtí, e shèm e Jesus bàm, e kùm shuu və́ ndzə̀y.

²¹ A wù kum bèy, bìʼ fo wù‑uù suuyin fo wùn shiliv jii, «A m fə̀m kùm a dzə̀ shúu kikúm Jesus, m kù bònén.»

²² Mo wù kùmèn, Jesus bìnkìr, e yèn, e yòŋ jii, «Yaà, vishí vé vi bòŋ ne. Mo à wayin shilív e mǒ wùn, à bònén ne.» Wù ku nèn bònén fo ghan see shooy.

²³ Jesus wùn taà laʼ və̀y ku nèn a dù. Á dù, e mèé e laʼ, a vé sàyi báʼtí ne vintsəy, a shìy shìyìn, wíri wáa toŋnín, a bvəə́r virə́ʼ.

²⁴ Wù suúy jii, «Vèn lokir, wàn buúne buùnén, bó wù yoʼ kpù.» Wù suúy bey, á nèn a kèŋ kèŋèn.

²⁵ Wíri fəə́kír fó lav adzə̀m, Jesus nəə́, e shaà fo wàn‑eè néŋé, e ghàr kiwó ke wan, wù nànèn.

²⁶ Mo Jesus yiìn kiŋgaʼnìn ke kinyò kìn, kí nèn sàmèr mbìv wòŋ yee shooy e dzə̀m.

Jesus mvə́ʼ sí amfìr

²⁷ Jesus lò fo taà laʼ və̀y lav, e lòo dù, amfìr ámóʼó wáa jùmrì fo bàm abaà, a jàŋ kitávín jii, «Wàn Fòn Davir, ku shàm mendzən mer mè.»

²⁸ Jesus dù, e nə̀ə́ e lav, wír vìyi ku nə̀ə́ fo bàm. Wù dzə́r jii, «Vèn biímé rú ji dzə̀ m yiì kinyo ke vèn tóŋ, kan mo shó kìn a?» Áwune biímé jii, «Tàr, a dzə̀ à yiì.»

²⁹ Jesus nèn kùm sí yév, e sùúy jii, «Kí koóy ri mo vèn biimen.»

³⁰ Sí yéví ku nèn mvə̀ʼə̀m. Jesus kàntì feyì ji á wáa yen a fó suúy e wìr.

³¹ Yii bèy, á ku dù, a fèr kinyo kee shooy. Léŋ Jesuse nèn ghànén mbìv wòŋ yee shooy e dzə̀m.

Jesus fér kindzə̀mer

³² Amfìr vìyi lòo lò, wír ámóʼó wìy e kindzə̀mer ki, a jívir nyùy wùmòʼ fo wù wáa suŋnín.

³³ Jesus kàntì nyùy woo shooy, wù màʼtì, wù nèn kèʼ, a suŋnín. Màŋgòŋ wo wù‑uù dzəə̀n fó yén, a ker gháʼ, a suúy jii, bó á yòʼ‑oò yiì yèn á rá kinyò kee moo kin e wòŋ Isray.

³⁴ Yii bèy, a wír veé mbìv *Farasii suuy kév jii, fó a fon anyùy vitaáví e Jesus, bo wù wáa kàntì *anyùy, aá wáa màʼtì wíri.

Jesus rə́r mendzən fo wíri

³⁵ Jesus nèn lò, a ghan e mvə̀m sé laʼ, e kfə̀n a ghan ntèʼ see fó sidzə̀m, a yeʼéy wíri é ŋgày se bùnrì, a fìʼtì sáʼka wo juŋ woo kùm sáʼ Nyùy. A wù ghán bèy, fer kfəə́ se ayàsí wùn à ndzə́m e dzə̀m.

³⁶ Wù mee e kirə̀ʼ, yén mo màŋgòŋ baʼtin, kitú ki lùm wun, bìʼ fo vé‑eè dzə́ moo njiì woo là nshìy wo wù ján, gbukìr, kívkir e kwaʼ.

³⁷ Wù nèn lò, e sùúy e wón və́ lìme jii, «Vifá ve á wáa kav fo kwaʼ vi kùʼ e ŋàŋ, a vé kavi dórninè.

³⁸ Vèn ku nèn a lon fo taà sùm ji wù tsə́nsí vé lìme, aá káv vifá və́ vee shooy.»