Matio 6 - ŊWÀʼ NYÙY

Fómo woo réŋ

¹ Jesus kfə́n a suúy jii, «Vèn lóo yiì kinyo ke á yii bìʼ Nyùy, vèn wàa yen fó a fəə sho ji wíri fíʼ a yen. A vèn lò, a yiì bèy, é la vèn yòʼ dzəə wìy a ker vilaámé fo Tàr won wo wù dzəə̀n é yuv gheéy.

² «Kí nén a dzə jii, vèn lóo fo kifá e ŋgaà ŋgeʼ, lá á yòʼ a toŋ sóŋ mo vé kindìnwùné yii yii e ŋgày se bùnrì, kfə̀n yii e màdzəə̀ ji wíri fíʼ a yen, a burí áwune. Vèn wáa kiíy rú jii, búrí yee shooyi sì vév vee vilaámé bey.

³ Ke dzə̀ vèn wàa yiì ki dzə̀ jii, wìr lóo fo kifá e ŋgaà ŋgeʼ, lá wù yòʼ yiì, é kóy və́ ŋkoòvìi kiíy kinyo ke wó yìyí yii.

⁴ Vèn lóo fo kifá e wìr, vèn wàa lìtì, a kiíy jii, Tàr won wo wù yii yén vinyo ve á yii e kilìr vidzə̀m wíy laamé ven.

Bunrì yee réŋ

⁵ «Vèn lóo bùnrì, lá vèn yòʼ a yiì mo vé kindìnwùné yii yii. Wír vee shooyi yii koŋ ji á wáa bùnrì, é wíri wáa yen áwune, a burí. Á lo, á nèn a shaà, a tiím fo mbìy e ŋgày se bùnrì, e bó a bùnrì, e kfə̀n a tiy, a bùnrì e mentàrnín. Vèn wáa kiíy rú jii, búrí yee shooyi sì vév vee vilaámé bey.

⁶ Lá vèn yòʼ a yiì bèy. Wìr lóo bùnrì, wù nə̀ə́ e wùn mvə̀m lav, e sə̀tí shúu lav, e bó a suŋnín e Tàr wov wo bó á yòʼ yii yéné, é wun woo Tàr wov wo wù yén vinyo ve á yii e kilìr vidzə̀m wìy laàmé wun.

⁷ «Kímóʼ kí nén a dzə sa jii, vèn lóo bùnrì, lá vèn yòʼ rə̀sí, a rèr kinyo kee shó kimòʼón mo wír ve bó á yòʼ kiìn Nyùyi yii yii. Aá yii bèy, kwaʼtì ji dzə̀ Nyùy kù yù bunrì yév, bìʼ fo áwune rəsin, a rèr kinyo ntàmda.

⁸ Lá vèn yòʼ a yiì bèy. Vèn wáa kiíy jii, vèn lóo lon kifá, a Tàr won kì kìíy ne kifá ke kí gháʼ ven.

⁹ Vèn lóo bùnrì, vèn wàa suúy jii: « ‹Tàr wor woó yuv, ku yiì, é wíri wáa ghvəm yír yé,

¹⁰ e kfə̀n yiì, é sáʼ yee wiy é nsay fèn, aá wáa yu mo á sí yú e yuv.

¹¹ Ku fò ver vifá ve yi veé kishiíy ké lán ki,

¹² a làysìn ajay vér mo vèr laysìn vé wìr ve á jáy e vèr.

¹³ Lá à yòʼ màʼtì, é vinyo ve ví mum ver ví gháʼ ver. Kìŋsìn ver fo Satan woo ŋgaà vinyò ve bi ví.›

¹⁴ Vèn kú a bùnrì bèy, bìʼ fo, a vèn fèn laysìn vinyo ve wíri jáy e vèn, bo Tàr won wo wù dzəə̀n é yuv yíi a làysìn sa vén vee ajay.

¹⁵ Yii bèy, a vèn tèn fó a làysìn, bo bó yòʼ dzə̀ sá Tàr won woó yuv làysìn vén.

Mo dzə̀ á lèm jíŋ yee bìʼ Nyùy

¹⁶ «Vèn lóo lèm jíŋ ye á lem bìʼ Nyùy, lá vèn yòʼ a sənrí e síi mo vé kindìnwùné yii yii. Áwune lo, á wàa ghan, a kur vishí ji wíri fíʼ a yen ji áwune lem jíŋ. Vèn wáa kiíy rú jii, sì vév vee vilaámé bey.

¹⁷ M nén a suúy e vèn vin jii, vèn lóo lèm jíŋ, vèn sù á sí yén, e nàŋsín, e sòr, e kfə̀n saà kitú.

¹⁸ Vèn lóo yiì bèy, é la wíri yòʼ a kiíy ji vèn lem jíŋ, é kú a kiíy Tàr won wo bó wìr yòʼ yii yéné, é wun wo wù yén vinyo ve á yii e kilìr vidzə̀m laámé ven.

Bùʼ wo ru dzə̀ liì wo Nyùy taʼà

¹⁹ «Wìr wáa yen fó a baʼtí bùʼ, a lèm a dzə̀ é nsay fèn. Féne dzə̀ fo dzə̀ séʼ wùn à nyàŋ bìvír, kìn kív shóŋ kitáv, e shoŋ bùʼ woo shooy.

²⁰ Wìr lóo lèm bùʼ, wù lèm a dzə̀ é yuv fo bó yòʼ dzə̀ séʼ si là, a bó yòʼ dzə̀ nyàŋ bìvír, a bó yòʼ dzə̀ sá shòŋ kìv, e nə̀ə́, e lì.

²¹ Vèn wáa kiíy jii, wìr yii lem lem e kirə̀ʼ, bo dzə̀ fo shilív sə́ shí yíi a tiy.

Wìr wo wù ghán e Nyùy mvə̀m ran dzə̀ ŋgaà fómo

²² «Sí wìri dzə̀ kikaʼày ke kí fó rán e wìr. Sí wìri lóo dzə, a yí rán e mbòŋ, bo dzəʼə̀m rəə́ yíi a ran ranén e dzə̀m, a wù kér wó rə́ tèéter.

²³ Yí lóo səəné, bo dzə̀ mo dzəʼə̀m rəə́ yíi a sən sənén e dzə̀m, a wù gímti. Wáa dzə, a sí rəə́ sí sə́n sənén bey, bo dzəʼə̀m rəə́ màysì ne, e sə̀n ji dzə̀v.

Nyùy leey fo wír vəə́

²⁴ «Bó yòʼ dzə̀ wìr wàa lìm atàr abaà. A wù lò, a lìm bèy, bo wù yíi a bàn wùmòʼ, a kòŋ wùmòʼ, a yu kinyo ke wùmòʼ woo wír, a kay wùmòʼ. Bó yòʼ dzə̀ vèn wàa lìm fo Nyùy, e kfə̀n a lìm fo mbàm si.

²⁵ «Mo Tàr won siìn Nyùy, lá vèn yòʼ a dìy wún jii, á sà wíy a yi ka, a no ka, a kur ka moo ndzə̀y á? Vèn wáa kiíy ji dzəʼə̀me shaà vifá ve yi, wúné shaá ndzə̀y.

²⁶ Vèn li mfìʼ fo menə́n mè. Bó mè yòʼ yii lim vifá ve yi, e bó a kav ji á wáy é vitàv. Yii bèy, a mè yíkir a dzə̀ mo Tàr won wo wù dzəə̀n é yuv yiir áwune, a vèn kùʼkìr fo wùn si feyì, e shaà menə́n.

²⁷ Vèn yáŋri vifá veé dzə̀ʼə̀m yeé nsay vìn, a bó yòʼ dzə̀ wìr dzə̀sì shifarìn e wùn dzə̀ʼə̀m ji yí dar.

²⁸ «Mo kí dzəə̀n bey, yiì ka, bo vèn wáa dìy ndzə̀y? Vèn leéy mo vibuushì veé kwaʼ vi teʼ, boŋkìrì. Bó vikwiíy ví yòʼ yii lim lim, a bó ví yòʼ yii bá ndzə̀y.

²⁹ A m suuy e vèn jii, mo Fòn Solomon fə̀m‑eè kér bùʼ e gháʼán, bó wù yòʼ‑oò yiì ne màʼ ndzə̀y se sí wáa to, a bòŋkìr moo sé vikwiíy vin.

³⁰ Vèn dzə̀ ben, a bó á yòʼ lo, á wày shilív e Nyùy wùn. Mo Nyùy kúr ndzə̀y e vikwiíy ví wùn, a ví teʼ lèn, yì rán kibvəə́shí, á kaàsì, e tòn, bo bó yòʼ dzə̀ wù màʼ se sí shaàn see shooy e věn wùn a?

³¹ «Kidzə̀m ki nén a dzə jii, lá vèn yòʼ a yaŋyáŋ a ji vèn sà wíy a yi ka, a no ka, a kur ka á?

³² Wír ve á yii wáy vifií é vinyò foo fèyi dzə̀ ve bó á yòʼ kiìn Nyùy. Vèn dzə̀ kén, a Tàr won wo wù dzəə̀n é yuv kìíy ne ji vèn kér shií é vifa foo fèn vidzə̀m.

³³ Vèn ku nèn a tiír a dzə̀ Nyùy fo mbìy ji vèn wáa yu sáʼ rə́, a yiì réŋ mo yí dzəə̀n, é Nyùy nèn fò ven vifá vìn vidzə̀m.

³⁴ Kí nén a dzə jii, lá vèn yòʼ a yaŋrí a kifá ke kí bvəə́shi, a dzə a dzə̀ kibvəə́shí. A dzə̀ á kù a kiíy kee shooy, a sì kibvəə́shí. Lá vèn yòʼ a lì kinyo keé kishiíy ke sən kí, a dzə̀sì e ke sən kí kitu. Ŋgeʼ yeé kishiíy fó kù ghèén a dzə̀ é kishiíy fóo fèy.