Matio 5 - ŊWÀʼ NYÙY

Vijuŋ ve ru ví

¹ Jesus yén màŋgòŋ və̀y, e kòʼ, e dzə̀ʼə̀m e gwan. Aŋgaà və́ ŋgoo wìy, e kaàrí fo,

² wù nèn kèʼ, a yeʼéy áwune, a suúy jii:

³ «Bòŋ ké wìr ve á yén ji á tan fo Nyùy si, bìʼ fo dzəə̀n áwune ve á sí yú vijuŋ ve saʼ Nyùy.

⁴ Bòŋ ké wìr ve á diy lèn, bìʼ fo Nyùy wíy səmér áwune.

⁵ Bòŋ ké wìr ve á bórkir e Nyùy si, bìʼ fo áwune wíy yòv kitú ke nsay.

⁶ Bòŋ ké wìr ve jìŋ yár áwune ji á wáa yiì mo Nyùy taʼà, bìʼ fo Nyùy wíy yiì kinyo ke áwune diyì.

⁷ Bòŋ ké wìr ve á rə́r mendzən me wíri, bìʼ fo Nyùy wíy rər sa méev.

⁸ Bòŋ ké wìr ve á kér melív me juŋ mè, bìʼ fo áwune wíy yen sí Nyùy.

⁹ Bòŋ ké wìr ve á mán vinyo, bìʼ fo Nyùy wíy a yòŋ áwune ji wón və́.

¹⁰ Bòŋ ké wìr ve á yii vinyo ve Nyùy taʼà, aá ban áwune, bìʼ fo dzəə̀n áwune ve á sí yú vijuŋ ve saʼ Nyùy.»

¹¹ Jesus kfə́n a suúy jii, «Wíri lóo kuùrì ven, lóo ròn wúu yén, lóo lor vinyo e věn wùn bìʼ fo vèn dzəə̀n wír vém, bo bòŋ vishí vén.

¹² Á lóo lovtí e vèn bey, vèn wàa sheʼrí sheʼrín, bìʼ fo vèn kiìn ji Nyùy lèm ne vilaámé vén é yuv vigháʼán. Vèn wáa kuumé jii, dzə̀ sá mo vé‑eè lóvti aàŋgàa ntum Nyùy vee fó ŋgùʼú bey.

Á wáa nyòm moo shiŋgwáŋ, a ban moo kikaʼày

¹³ «Vèn dzə̀ e wírí mvəm moo shiŋgwáŋ she á fór nyóo shó. A shiŋgwáŋ shi lò, e səə̀rí, á kfə̀n yèe shó, bo shí nyom? Bo shí lày ne kisáŋ, aá sər, é wíri wáa nyèŋrì e wuú.

¹⁴ «A vèn kfə̀n dzə̀ moo kikaʼày ke kí kaʼày wír veé ndzə. Vèn kì sá jii, láʼ ye á bàʼrìn é kitu ke gwane yòʼ yii laynìnè.

¹⁵ A bó wìr yòʼ yii səʼ sa lam, wù kfə̀n lì mbìʼ, e sùm sho. Wù kù yii tiir a dzə̀ é kitu ke kifa ji wú fíʼ a kàʼày wír ve á dzəə̀n é lav adzə̀m.

¹⁶ Kù dzə̀ sá mo vèn wáa fo rán e wíri. Vèn wáa dìn wíri a dzə̀ vinyo ve ru ví, á lóo yen, aá wáa burí Tàr won wo wù dzəə̀n é yuv.

Jesus wùn à Nsər Mooser

¹⁷ «Lá vèn yòʼ a kwàʼtì ji m wìy ji m laar vinyo veé Ŋwàʼ Nsər Mooser wùn à vinyo ve aŋgàa ntum Nyùyi‑iì saŋen. M wìy ji m yii, é vinyo ve vé‑eè saŋen vidzə̀m vi koóy, e kfə̀n màysì, e dìn rú mo ví dzəə̀n.

¹⁸ Vèn wáa kiíy rú jii, kèʼ mo yúv wùn à nsay wíy a dzə sho, e dù, e meé e ghan se ndzə wíy mày, bó yòʼ dzə̀ shinyorìn she nsər rə̀n dinè, a shí fə̀m dòr moó le, shí wìy tùm fó nsay, a bó kí yoʼ ghèén mo yì suuyì.

¹⁹ Kí nén a dzə jii, a wìr lò, a kay nsər yìmòʼ e mòʼón fo nsər fèn, a wù fə̀m yén ji yì dòr é le, kfə̀n yéʼey wír ámóʼó ji á wáa kay sa bèy, bo ŋgaàŋ wíy a dzə e Nyùy mvə̀m vifòn là ghay. Yii bèy, wìr wo wù lem nsər se Nyùy foon, kfə̀n yéʼey wíri ji á wáa lèm sa bèy, ŋgaàŋ wíy a dzə wír wo kuʼùn e Nyùy mvə̀m vifòn.

²⁰ Vèn wáa kiíy kijuŋ jii, a yii yéné dzə̀ là fó bòŋ, e shaà yé wìr ve á duŋrì nsər Nyùy wùn à yé wìr veé mbìv *Farasi, bo bó yòʼ dzə̀ féyì vèn wìy shòv sáʼ Nyùy e si.

Duŋrì ye mvə wùn à ye fíyi

²¹ «Vèn kì ji vé‑eè duŋrì nsər aàtàr vén vee fó mbìyi jii, ‹Lá wìr yòʼ yùyrí a wír. A wìr yùyrí wír, bo á kù wíy saʼ ŋgaàŋ mo nsər dzəə̀n.›

²² M nén a dùŋrì kém jii, a wìr lò, a shwiíy kilòŋ wùn fər və, bo wù kù dzə̀ sá e mvə̀m nsaʼ foo fèy. A kù dzə̀ réŋréŋ mo wìr wo wù kuùn fə́r və kúun kér sa nsaʼ. Wìr maysi, e yòŋ fə́r və ji kiŋgà ké kifa ke Nyùy, bo wù sí bin a dzə̀ é dzəə̀ və̀y.

²³ Kí nén a dzə jii, a wìr lì fómo və, e dù sho e ghaa kiy cù ji wun cu Nyùy sho, wù tiím fó, e kuùmé ji wun jày kinyo e fər və,

²⁴ wù màʼtì vifá vee shooy fo, e dù, é wùn fər və mán nsaʼ, é bo wù kfə́n, e yiì cu rə́.

²⁵ «A wìr kér kaá wùn wìr, wù li, a dù sho e lav nsaʼ, kí bòŋ ji ŋgaàŋ kú a boòrì ŋgaà və nsaʼ, é wùn wun siysi, aá dzəə́ du duùn é dzəə, fo wù li wun, e dù sho fo ŋgaà saʼ, é wù tsə́nsí, é wìr nsər fin é sháŋ.

²⁶ Ŋgaàŋ wáa kiíy rú jii, a dzə̀ wù kù wìy màysì, e làʼ kaá yee shooy e dzə̀ə́dzəədzə̀m, e bóo fəə fo sháŋ.

²⁷ «Vèn kfə̀n kì sá ji vé‑eè duŋrì jii, ‹Lá wìr yòʼ lì wiiy wìr, kìn ji wiíy wáa ghan viŋkar.›

²⁸ Yii bèy, a m duŋrì kém e vèn jii, a wìr lèéy wiiy wìr, e siìmé, bo ŋgaàŋ kù lì ne a wiíy woo shooy bèy fo wùn kwàʼtì.

²⁹ Kí nén a dzə jii, a sí yée lò, a levtí wò ji à jáy dzə́ə, à mèn, e màʼày, a fə̀m dzə̀ ye yí yén virə́ʼ kijuŋ. Kí bòŋ ji wìr rán kirə́ʼ ké wùn kímóʼ kí, e shaà fo wúné bír e dzə̀m, aá tátí, e màʼ e və̀y.

³⁰ A kù dzə̀ réŋréŋ sá moo, a kiwó ké ki lò, a levtí wò ji à jáy dzə́ə, à tìn, e màʼày, a fə̀m dzə̀ ké yìy kí. Kí bòŋ ji wìr rán kirə́ʼ ké wùn kímóʼ kí, e shaà fo wúné bír e dzə̀m, aá tátí, e màʼ e və̀y.

³¹ «Á kfə̀n‑eè duŋrì sa jii, ‹Wìr lóo fəə́r wiíy və, wù sàŋ ŋwàʼ njàvsìn, e fò shó.›

³² Yii bèy, m nén a dùŋrì kém ke duŋrì mo jii, a wìr lòo dzə, e fə̀ə́r wiíy və, la wáa dzə ji wù kì ghán viŋkar, wù du, e nə̀ə́ e wìr lav, bo wù yiì ne, wiiy və dú a dzə̀ viŋkar. Wír wo wù wayin é lav lí sá a dzə̀ wiiy wìr.

³³ «Aá kfə̀n‑eè duŋrì aàtàr vén vee fó mbìyi jii, ‹Lá wìr yòʼ shòʼór ŋkàʼmé wo wù lìʼìn wùn Nyùy. Wù kér a fó yiì kinyo ke wù‑uù kàʼàn.›

³⁴ M nén a dùŋrì kém e vèn jii, lá wìr yòʼ a kàʼ kinyo kfə́, a kàn yír Nyùy gheéy. A wù kan yúv, bo wù kan a dzə̀ Nyùy, bìʼ fo yúví dzəə̀n kàvàʼ Nyùy.

³⁵ Kìn wù kan a dzə̀ nsay, bo wù kù kan Nyùy. Nsay dzə̀ kibur ke wù tiir wúu rə́ shó. A bó yòʼ dzə̀ wù kàn sá Jerusalem. Jerusalem dzə̀ ntoʼ Nyùy woo Fon afòn.

³⁶ Lá wìr yòʼ a kàn sa kitú kfə́, kér Nyùy, a bó yòʼ dzə̀ ŋgaàŋ bìnèr ŋgay nəŋ e mòʼón ji fúv, kìn ye fuv ji nə́ŋ.

³⁷ Vèn lóo suúy kinyo ke á suuy kidzə̀m, kí kù a dzə ji eè, kìn ji àáy. A wìr suuy kinyo e shaà kin, bo kee shooy ki lò a dzə̀ fo Satan woo ŋgaà vinyò ve bi ví.

³⁸ «Á kfə̀n‑eè duŋrì ven jii, ‹Ŋkfə́tir si kú a dzə sí, é wo sòŋ kú a dzə sóŋ.›

³⁹ Yii bèy, m nén a dùŋrì kém e vèn jii, lá vèn yòʼ a siìr a ŋkfə́tír. A wìr dzə̀v búbuʼ yè yeé koy yìyí, à bìnèr yeé koy ŋkoòvìi, é wù maysi.

⁴⁰ Wìr govti wò, e wày é nsaʼ ji wun fíʼ faàsì kikúm ké ke terí kí, à màysì ke kuʼùn kí, e fò shó.

⁴¹ Wìr nsər kan wò ji à beʼey kibam kfə́, e ghàn shó shintàm, à yàʼár gwan sho.

⁴² Wìr lón kifá fo wò, à fò shó. Wìr lóo foò kifá, à foòr wun sho, lá à yòʼ ŋwèy.

⁴³ «Vèn kì sá kinyo ke vé‑eè duŋrì jii, ‹Wìr wáa kòŋ ŋkar rə, a bàn aŋgaà və́ vibàn.›

⁴⁴ Yii bèy, a m duŋrì kém jii, vèn wáa kòŋ aŋgaà vén vibàn, a bùnrì a fo wír ve á nəʼsì vené.

⁴⁵ Vèn lóo yiì bèy, é vèn nèn a dìn ji vèn dzə̀ rú wón Tàr won wo wù dzəə̀n é yuv. Dzə̀ wun wo wù yii, a ndzə rán wír adzə̀m. Yì rán sa wír ve á yii vinyo ve bi ví réŋréŋ mo yì rán ve á yii ve juŋ vi. A kù dzə̀ mo wù yii, a wuú ló e wír ve á méŋ wuné sum réŋréŋ mo yí ló e ve á yú wuné sum.

⁴⁶ A vèn lò, a kòŋ a dzə̀ wír ve á koŋ ven, vèn wàa leéy ji Nyùy wíy laamé ven fó gha? A fə̀m dzə̀ wír ve á sov mbàm se *bàràʼ, a wìr dzə̀m ban áwune, bo á kù yii sa bèy.

⁴⁷ A vèn lò, a shàʼtì a dzə̀ ŋkar sén, vèn wàa kwàʼtì ji vèn yii ka ke juŋ kímóʼ kí? Wír ve bó á yòʼ kiìn Nyùyi yii sa bèy.

⁴⁸ Kidzə̀m ki wáa dzə jii, vèn wáa yiì vinyo vén tìítiy, é ví wáa ran réŋréŋ mo Tàr won wo wù dzə́ e yuv ráné.»