Matio 4 - ŊWÀʼ NYÙY

Satan múm Wan Nyùy ji wù ŋwáy kinyo ke Tàr wov

¹ Mo Kiyoy ke Nyùy ki wìyìn fo Jesus, e nèn tsə̀nsí ji wù du é kwaʼ, é Satan mum wun fo.

² Jesus dù, a shiíy fo e jìŋ. Kishiíy kí meé mkweè, a jìŋ sí yúy wun yúyín,

³ Satan woo ŋgaà mùm wìy, e sùúy sho jii, «Mo à dzəə̀n Wan Nyùy, suúy ri, é tíy sin si binkir ji ntuʼ se kiban, áà yí.»

⁴ Jesus bìnèr jii, «Á sàŋ é Ŋwàʼ Nyùy jii: « ‹Bó yòʼ jòʼsì ji wìr yí kibán, e bóo lùŋ. A dzə̀ wìr kù lùŋ a dzə̀ fó jì se sí fəə́ fo Nyùy shuù simòʼón simòʼón.› »

⁵ Kee shooy ki gháʼ, Satan nèn kfə̀n lì wun, e dù sho e Jerusalem, e kòʼ, e tìír e ntoò kitu ke *lav cù. Wù tiím fó,

⁶ Satan suúy jii, «Mo à dzəə̀n Wan Nyùy, líy ri fo fèn, e tìím fo nsay. Vé‑eè sàŋ é Ŋwàʼ Nyùy jii: « ‹Nyùy wíy suúy, é nsheèlav sə́ sí wáa shìy wò. Sí wíy a ker wò e kiwo fo à tín kiwuú é tiy.› »

⁷ Jesus bìnèr kfə́ jii, «Vé‑eè sàŋ sá jii, ‹Lá wìr yòʼ a ghiʼ Nyùy Tàr woo Nyùy və ghíʼín ji wù yii kinyo.› »

⁸ Satan kfən lì Jesus fo fo, e kòʼ shó lèn e kitu ke gwan wo da wùmòʼ, e dìn vitúm veé kitu ke nsay sho vidzə̀m, e kfə̀n dìn bùʼ wo wù dzəə̀n shó.

⁹ Wù dìn bèy, e sùúy jii, «M yíi fo wò vifá vìn vidzə̀m, kù dzə̀ cáʼ ji à gbu e mǒ si, e ghvə̀m mo ji Nyùy.»

¹⁰ Jesus wám jii, «Satan, kóʼtí fo mǒ ghaŋ. Vé‑eè sàŋ é Ŋwàʼ Nyùy jii: « ‹Wìr wáa ghvəm a dzə̀ Nyùy Tàr woo Nyùy və, a yu a dzə̀ fo wun cáʼ.› »

¹¹ Satan nèn màʼtì Jesus, e lò. Nshèelav se Nyùy si siíy, e wìy, a leéy fo wun.

Jesus sí keʼ yéʼey rə́ é Galeli

¹² Jesus lòo yu, e yù ji á koò ne a Joon, e wày é sháŋ, wù nèn lò fo wù‑uù dzə́, e kfə̀n é mbìv wòŋ yee Galeli.

¹³ Yii bèy, e làa yòʼ a dzə aáwuné ntèʼ yee Naasarer. Wù dù, a dzə e Kapeenahum, e ghaa kibaŋ keé Galeli. A ntèʼ yee shooy dzə̀ é ghaa njàvìn rám Sebulun wùn à rám Navtali.

¹⁴ Wù wáa dzə fo bèy ji kinyo ke Aysaya woo ŋgaà ntum Nyùy‑iì suuyin kí fiʼ ghèén. Wù‑uù sùúy jii:

¹⁵ «Woŋ rám Sebulun wùn à wó rám Navtali, woŋ wo wú taʼamen, e dù, e mèé e rìbà ndzə̀v, aá túmsín ne ndzə́v yee Jordan, kirə́ʼ, a dzə̀ nsay Galeli, fo vitúm ve bó ví yòʼ kiìn Nyùy vi dzə́,

¹⁶ wír vìn ve vé‑eè dzə́ e ndzə vitsə̀ʼə́ yèn ne rán ye ghaʼáné. Wír ve kpúu‑uù sùmèn, á wáa dzə e ndzə vitsə̀ʼ, shùy tò ne áwune.»

¹⁷ Kèʼ fo ghan se Jesus‑eè kfənen é Galeli sìn, wù nèn kèʼ, a fìʼtì kinyo kfə́, a suúy jii, wíri wáa bìnèr a melív mev, ghán se Nyùy sí lo, a saʼ vifon və́ sí sì á fo mentsə̀m.

Jesus lí wón lìm akweè

¹⁸ Wìy lòo dzə e kishiíy kímóʼ kí, Jesus wáa ghan e ghaa kibaŋ keé Galeli, e yèn wír abaà, a dzə̀ fə́r wùn fə̀r. Wùmòʼ‑oò dzə̀ Simon wo á yoŋ yír yímóʼó ji Pita, wùmòʼ Andru, aá maʼ lálán, bìʼ fo kéŋ yéví‑iì dzəə̀n sə́.

¹⁹ Jesus jàŋ áwune jii, «Vèn wiy, é vèsən wáa ghan, é m yii, é vèn wáa baʼtí lèn a dzə̀ wíri.»

²⁰ Áwune ku nèn shwèy alálán vév, wùn à Jesus wáa ghan.

²¹ Wù lòo koʼtí shishàr, e nèn kfə̀n yèn afə́r ámóʼó abaà, a dzə̀ Jeem wùn Joon vee wón Sebedi, a wùn à tàr wov dzə́ e kikoŋ, náŋsin alálán vév. Wù kfən jàŋ sa áwune.

²² Áwune ku nèn fəə̀, e màʼtì kikóŋ e tàr wov, e lò, wùn à Jesus wáa ghan.

Jesus yéʼey wíri, fer vé yàsíi

²³ Jesus nèn lò, a ghan Galeli e dzə̀m, a fìʼtì sáʼka Nyùy wo juŋ e ŋgày se bùnrì, a naàrì mo sáʼ Nyùyi dzəə̀n. Wù kfə́n a fèr kfəə́ se yàsí wùn à ndzə́m e dzə̀m.

²⁴ Leŋ vəə́ nèn sàmèr, e dù, e mèé e wòŋ Siiria. Wíri wáa yu, a lì vé yàsíi, a wìy, a yen wun sho. Kìn wìr joy kfə́ə yàsí a dzə̀ woo ka, á kù wìy sho, wù fèr áwune adzə̀m. Kìn dzə̀ wír ve *anyùyi jívir áwune, kìn ve á gbu kimgbù, kìn ve virə́ʼ ví kpuun ne.

²⁵ Wù lóo dù e kirə̀ʼ ke wù du sho, màŋgòŋ wàa nyòrnìn fo bàm, aá wiykìr virə́ʼ vidzə̀m. Ámóʼó fó mbìv wòŋ yee Galeli, ámóʼó fó mbìv ye á yoŋ ji Ntèʼghvə̀m, ámóʼó fó Jerusalem wùn à fó ntèʼ seé Juda símóʼ sí, aámóʼó wiy fo ndzə̀n ndzə̀v yee Jordan.