Matio 3 - ŊWÀʼ NYÙY

Kinyo ke Joon woo Ŋgaà Wáyndzəv

¹ Wáa dzə e ghan fóo fèy, Joon woo Ŋgaà Wáyndzəv nèn fəə̀, e dù, a fìʼtì e woʼ ye yí dzəə̀n é mbìv wòŋ yee Juda jii,

² wíri biner á melív mev. Ghán se Nyùy sí lo, a saʼ vifon və́ sí sì á fo mentsə̀m.

³ A dzə̀ wun woo Joon wo Aysaya woo ŋgaà ntum Nyùy‑iì fiʼtì jii: «Jì wìr fúŋ fo kwaʼ jii, ‹Á náŋsín dzə́ə Tàr, e naàrì, é bo wù wáa wìy.› »

⁴ Joon‑eè dzə́ e kwaʼ, kúr ndzə̀y se vé‑eè baan e wuy nyàm ye á yoŋ ji *kamer, síŋ e kikuúví kí. Vifá və́ vé yi vi‑iì dzə̀ ŋguùmé, a wù kfə́r, lá dòŋ.

⁵ Wù lóo fìʼtì kinyo kfə́ é kwaʼ, wír veé Jerusaleme nèn a fəəkír adzə̀m, a yuurí. Wíri kfə́n a wìy fo ntèʼ seé Juda foo fèy símóʼ sí sidzə̀m, a wìy sa fo mbìv wòŋ yeé ghaa ndzəv ye á yoŋ ji Jordan.

⁶ Á wáa wìy bèy, a tuuné ajay vév, Joon wáa way áwune é ndzəv ye á yoŋ ji Jordan.

⁷ Wù lòo yen, a wír veé mbìv *Farasi wùn à veé mbìv *Sadusìi wiy sa ji wù wáy áwune é ndzəv, wù yòŋ aáwune jii, «Abúv vìn, tìr la ven, bo vèn wáa wìy, a kwàʼ ji dzə̀ vèn bòy fó ŋgeʼ ye Nyùy wíy màʼ e věn kitu?

⁸ A dzə̀ vèn kù tòmbìy, a yiì vinyo ve ví wáa dìn ji vèn bìnèr ne rú melív men.

⁹ Lá vèn yòʼ a kwàʼ kwàʼàn ji vèn kù sì wír Nyùy ji bìʼ fo vèn dzəə̀n rám Abraham. A dzə̀ Nyùy lì tíy sin, e bìnèr ji rám Abraham.

¹⁰ Vèn wáa kiíy jii, á nàn ne njàm ji á sí gwar vicí ve bó ví yòʼ koom vifá ve juŋ vi vidzə̀m. Aá yíi mèn, à gháŋé shó, e tòn e və̀y.»

¹¹ Joon kfə́n a suúy jii, «M wáy wíri é ndzəv lèn ji á bìnèr ne melív mev. Yii bèy, wìr wùmòʼ wiy fo mǒ bàm, a wù kùʼ, e shaà mo, a bó m yoʼ fə̀m ghèén fó keerí alábáʼ ŋgaàŋ. Wù yíi wìy, é wù wáa way kfə́ wíri a dzə̀ e Kiyoy ke Ranén kí kiwo, a way ámóʼó é və̀y.

¹² Wù wíy lòo wìy, é wù wáa ker júy rə e wùn kiwo, e fetí sáŋ shó. Wù féti, é wù báʼtí sáŋ, e lèm, e yèr mvə́y, e tòn e və̀y wo wú bo ghán sidzə̀m.»

Joon wáy Jesus e ndzəv

¹³ Wáa dzə e ghan see shooy, Jesus lò fo mbìv wòŋ yee Galeli, e dù, e yèn Joon é ghaa ndzəv yee Jordan ji wù wáy á wun e ndzəv.

¹⁴ Joon nèn a shaʼnín, a suúy jii, «Kì yíi way wò mo é ndzəv, kfən wìy wò ji m wáy wò e ndzəv moó le?»

¹⁵ Jesus bìnèr jii, «Wòsò ku yiì ke kí dzəə̀n ji á yii lèn, e fíʼ yiì kinyo ke Nyùy taʼ kidzə̀m, é kí wáa dzə réŋréŋ.» Wù suúy bey, Joon nèn biìmé,

¹⁶ e wày wun e ndzəv. Kù mo Jesus fəə́ fo ndzəv, shúu yuví mvə̀ʼə̀m, wù yén, a Kiyoy ke Nyùy ki sə́ʼəy fo fo e njà kibìŋ. Kí wìy, e dzə̀ʼə̀m e wùn kitu.

¹⁷ Jì wìr súŋnín fó yuv jii, «Və̀n dzə̀ Wán wom, m koŋ wun feyì, m shéʼri wun e ŋàŋ.»