Matio 22 - ŊWÀʼ NYÙY

Ŋgàn yee kùm kiŋkàʼ ke vijin

¹ Jesus kfə́n a yòv símóʼ see ŋgàn sinín, a yìmòʼ dzə̀ jii,

² «Sáʼ Nyùyi dzə̀ moo kinyo ke fòn wo wù‑uù kàʼàn vijín vé wiiy wàn.

³ Kishiíy kí gheén, wù túm nshèelav sə́ jii, ‹Vèn ghán, e tòóy wír ve vé‑eè biiné.› Á toóy, la wìr yòʼ wìy.

⁴ Wù kfən tùm ámóʼó jii, ‹Vèn kfən ghàn, e tiìsí e wír vee shooyi jii, m bàʼtí ne vifá vidzə̀m. M gwàr vinsòŋ ve nàʼ, e kfə̀n gwàr wón nàʼ ve faŋkìné. Áwune wiy ri, a yi a vijín vé wan.›

⁵ «Á nèn lò, a ŋway ŋwayín. Wìr wáa dù e wùn sum, wùmòʼ wáa jùm wáy və́.

⁶ Ámóʼó màysì, e koò nshèelav sìy, e bùʼ, e yùyrí ámóʼó.

⁷ Fòn və̀y yén bey, wún vəə́ kìn, wù fəə́r vé rərí, á dù, e teè sa wír ve á kì yuyrin aŋgaà və́ ntum vìy, e tòn ntèʼ yev.

⁸ Wù yiì bèy, e nèn sùúy e nshèelav sə́ sí jii, ‹M bàʼtí vijín, e bì wíri, a yen ji dzə̀ wíri, a bó yòʼ dzə̀ wíri.

⁹ Vèn fəə́ lèn, a ghan mentàrnín medzə̀m, yén wír wo á yenen, vèn jàŋ ji wù wáa wìy a fo vijin.›

¹⁰ Áwune nèn fəə̀, e bàʼtí wír ve vé‑eè yenen adzə̀m, kìn dzə̀ wo juŋ, kìn dzə̀ wo bi, e wìy sho, ŋgày vijìn rún.

¹¹ «Fòn yiì nə̀ə́ ji wun shaʼtì vé vijiné, e yèn, a wìr wùmòʼ dzə́ fo, a bó wù yoʼ màʼ ndzə̀y sé vijin.

¹² Wù dzə́r shó jii, ‹Ŋkar yèm, kí ghàn é le, bo à nəə́ fen là ndzə̀y sé vijin?› Wìr və̀y nèn mèŋ kinyo kée suúy.

¹³ Fòn suúy e nshèelav sə́ sí jii, ‹Vèn kúr kóy, e kùr shwín, e fəə̀, e màʼ fo ndzə, é wù wáa neŋ e ŋòròʼ fo wíri tóŋ, ŋéyti sóŋ.› »

¹⁴ Jesus fèr bèy, e màysì jii, «Vèn wáa kiíy jii, Nyùy bí wír anín, wù shòʼ ashàr.»

Á wooy Jesus fo mbàm se bàràʼ

¹⁵ Wír veé mbìv *Farasii yuúrí ŋgàn rə̀y, e nèn fəə̀, e dù, a sìysì mo dzə̀ áwune gòvtì Jesus, é wù jáy lám, aá fiʼ koò.

¹⁶ Á nèn tùm wír vév wùn à wír Fòn Heror ámóʼó ji á du, a woóy a wun. Á dù, e yòŋ jii, «Ŋgaà Yèʼey, vèr kì jii, à kù yii suuy a dzə̀ kinyo ke ru kí, aà kfə̀n yéʼey wíri kinyo ke Nyùy réŋréŋ mo kí dzəə̀n, e làa yòʼ a leéy sí wìr, kìn ŋgaàŋ dzə̀ la.

¹⁷ Vèr nén a tàʼ fó yu fo wò jii, nsər yèsən sa biìmé ji vèsən wáa màʼ mbàm, a shwi Fon woó *Rom sho, moo ŋgáŋ á?»

¹⁸ Jesus kiíy kinyo ke vé‑eè woóne sho, e yòŋ aáwune jii, «Abìnbìnteʼnsə́m vin, vèn taʼ, a woóy mo ji ka?

¹⁹ Vèn wiy e sí mbàm ye á yii maʼà, e fò shan. Á wìy sho.

²⁰ Wù sə́, e dzə̀r jii, kitú ke kí dzəə̀n shó ki dzə̀ ké la? Yírí dzə̀ yé la?»

²¹ Á bìnèr jii, «Dzə̀ ké Fòn woó Rom, a yírí kù dzə̀ rə́.» Jesus nèn sùúy jii, «Kifá ke dzə̀ vèn kù fò e Fòn woó Rom, vèn wáa fo sho, a fo ké Nyùy e Nyùy.»

²² Áwune yú bey, sí yéví sə́n, á nèn lò, a dùkìr.

Á wooy Jesus, dzə́ti fəə́ yee fó kpu

²³ Kú a dzə e kishiíy fóo fèy, wír veé mbìv *Sadusi ámóʼó wìy ji á dzə́r a kinyo e Jesus. A dzə̀ mbìv wìr ve á yii yéʼey ji wíri yòʼ wíy fəə a fo kpu.

²⁴ Á wìy, e yòŋ jii, «Ŋgaà Yèʼey, Mooser‑iì sùúy jii, ‹A wìr kér wiíy, e kpù, a bó wù yòʼ kér wán, bo fər və kù kér a fó lèm wiíy woo shooy, a dzəə́ wón shó, e fíʼ lèm kitsə́ʼ ké ŋkfə fər və.›

²⁵ Kí nén a dzə jii, yì‑iì dzə̀ é ghan símóʼ sí, wíri wáa dzə saàmbà, kitàr kimòʼón. Wo mbìy wáa ker wiíy, e kpù, là wán. Fər və wo wù batin siíy, e lèm wiíy woo shooy, e kfə̀n kpù sá là wán.

²⁶ Kí ku kòóy wír woo saàmbà réŋréŋ bey.

²⁷ Fo bàm, wiíy woo shooy kpú sá.

²⁸ Vèr nén a tàʼ, e kiíy jii, wíri sà wíy fəə fo kpu lèn, a wìr woo saàmbà və̀n‑eè sí kér wiíy və̀n, é wáa dzə wo la á?»

²⁹ Jesus bìnèr jii, «Vèn jáy vinyo feyì, a dzə̀ bìʼ fo vèn yòʼ kiìn vinyo ve ví dzəə̀n é Ŋwàʼ Nyùy, a bó á yòʼ kì sá mo vitaáví vé Nyùy vi dzəə̀n.

³⁰ Ke kí dzəə̀n kí dzə̀ jii, wíy lòo dzə e ghan se wíri fəən ne fo kpu, é la lùmèn yòʼ a ker wiíy, é la wiíy yòʼ a ker sa lúm. Á wíy a dzə réŋréŋ moo nshèelav se Nyùy se sí dzəə̀n é yuv.

³¹ Mo vèn kinèn ji wíri yòʼ wíy fəə fo kpu, vèn yòʼ‑oò yiì ne yòŋ kinyo ke Nyùy‑iì suuyin e vèn e wùn ŋwàʼ kùm kee shooy à? Wù‑uù suuy jii,

³² ‹M dzə̀ Nyùy Abraham, à wo Aysi, à wo Jakov.› Wù wáa yòŋ aŋkfə vìn moo wíri, bìʼ fo Nyùy yòʼ yii dzə́ Nyùy aŋkfə, dzə̀ wo wìr ve tine.»

³³ Màŋgòŋ wo wù‑uù tíy fo, yú kinyo ke Jesus bìnèrìn e wír vìyi, a ker gháʼ fo kinyò ke wù naàrìn.

Nsər ye yì tíy vitú

³⁴ Wír veé mbìv Farasii yú mo Jesus sətin shúu wìr veé mbìv Sadusi, e nèn bàʼtí kév kee kinyo, a wìy sho.

³⁵ Wìr wáa dzə e mvə̀m ŋgoo fèy, a wù yéʼéy ne nsər feyì. Wù nèn wòór kinyo, a dzər e Jesus jii,

³⁶ «Ŋgaà Yèʼey, nsər ye yì tíy vitú e Ŋwàʼ Nyùy dzə̀ rəné?»

³⁷ Jesus bìnèr jii, «Yì dzə̀ jii, ‹Wìr wáa kòŋ Nyùy Tàr woo Nyùy və shilív shidzə̀m, e fò kitú kfə́ shó kidzə̀m, e tìír vifií a dzə̀ é wùn wó.›

³⁸ Á nsər ye yì tíy mbìy, e kfə̀n kùʼ, e shaà nsər sidzə̀m.

³⁹ Ye yì batin nen shèmsín wùn à yee shoon, a yì dzə̀ jii, ‹Wìr wáa kòŋ fə́r və mo wù koŋ kitú kfə́.›

⁴⁰ Nsər see sibaà sin si tàtí kinyo ke Ŋwàʼ Mooser wùn à Ŋwàʼ Aŋgàa Ntum Nyùyi suuy kidzə̀m.»

Jesus dzə́r kinyo, á méŋ binèr

⁴¹ Jesus nèn lò, e dzə̀r kfə́ kee kinyo e wír veé mbìv *Farasi ve vé‑eè baʼtin e wùn ghaŋ vìyi jii,

⁴² «Vèn shu ó ji *Mfə̀ə́r wo Nyùy‑iì kàʼàn ven shó sà wíy a dzə wan la á?» Á bìnèr jii, kí‑iì dzə̀ jii, «Wíy a dzə a wán woo Fòn Davir ram.»

⁴³ Jesus kfən dzə̀r jii, «A Mfə̀ə́r dzə̀ wan Davir, bo yì‑iì yiì ka, bo Kiyoy ke Ranén kí yii, é Davir kfən yòŋ Mfə̀ə́r ji Tàr wov? Davir‑iì sùúy jii:

⁴⁴ « ‹Nyùy Tàr‑iì sùúy e Tàr wor jii, «Dzə̀ʼə̀m e mǒ koy yìyí, e meé e ghan se m wíy neèr aŋgaà vé vibàn e wò si, áà tiír wúu yé sho.»›

⁴⁵ Mo Fòn Davir‑iì yòŋèn Mfə̀ə́r woo shooy ji Tàr wov, bo Mfə̀ə́r kfə̀n wíy a dzə wán və́ moó le?»

⁴⁶ Jesus dzə́r bey, la wìr yòʼ a ker kinyo kimòʼón ke dzə̀ wù bìnèr gheéy. Kèʼ fo kishiíy foo fèy, la wìr yòʼ dzə́ə a mùm ji wun yuti á shúu Jesus.