Matio 20 - ŊWÀʼ NYÙY

Ŋgàn yee kùm ŋgaà sùm wùn à vé lìme

¹ Jesus kfə́n a suúy jii, «Sáʼ Nyùyi dzə̀ moo kinyo ke ŋgaà sùm wo wù‑uù fəən kijàvaʼndzə, a tàʼ vé lìme ji á du, a lìm e wùn súm vitiír vé *vayin.

² Wù yén ámóʼó, wùn áwune kávnín. Wù biímé ji wun yíi làʼ kishiíy á sí mbàm sí mbàm, mo á yii laʼà, e nèn tsə̀nsí, á dù, a lìm e wùn sum.

³ Yiì lòo dzə shúy bvə̀ʼə̀, wù wáa karkár, a dù e kirə̀ʼ ké way, e yèn, a wír ámóʼó tíy fo kisáŋ.

⁴ Wù nèn sùúy sa e vee shooyi ji á du, a lìm a e wùn sum, é wun yiì làʼ áwune mo dzə̀ á làʼ. Áwune dù.

⁵ Yiì lòo dzə e ntìntìn shùy, wù kfən yèn ámóʼó, e tsə̀nsí fo, e kfə̀n tsə̀nsí ámóʼó shúy sitaár.

⁶ Wáa dzə shúy sitàn e ŋkuùr, wù kfən fəə̀, a dù e kirə̀ʼ ké way fey, e yèn ámóʼ vee wír, aá tíy, jaay fo kisáŋ. Wù dzə́r aáwune jii, ‹Vèn rə̀sí, a tiy fèn kisáŋ, a yiì ka?›

⁷ Á bìnèr jii, ‹Bó wìr yoʼ lò fò ver lim ye vèr wáa lìm.› Wù nèn sùúy e wír vìyi jii, ‹Vèn du ri, a lìm sa e mǒ sum.›

⁸ «Ghán se á yii shóʼ lim si gheén, wù suúy e ŋgaà və kitàv ji wù jaŋ á vé lìm vìy, e làʼtì áwune. Wù lóo làʼ, wù tòmbìy kèʼ fo ve á kì laŋen bámé, e bóo màysì a e vé mbìyi.

⁹ Wù nèn yiì bèy, e làʼ wír ve vé‑eè kèʼèn lim shúy sitàn vìy sí mbàm sí mbàm.

¹⁰ Á lòo làʼ wír ve vé‑eè kèʼèn lim kijàvndzə, á nèn a kwàʼ jii, áwune yíi lì a mbàm e shaà vee ŋkuùr vìy. Á ku làʼ áwune sí mbàm sí mbàm yee shó.

¹¹ Áwune ghár mbàm, e nèn kèʼ, a ghvə̀vrì ŋgaà sùm woo shooy,

¹² a suúy jii, ‹Vèr kì rə̀sí kishiíy kifur, a gvəsín e lìm, shùy wáa tòn ver, á ku làʼ vèr à vé bàmé réŋréŋ, aá lím kév hawa e mòʼón mòʼón cáʼcáʼ.›

¹³ Ŋgaà sùm və̀y yòŋ wùmòʼ woo wír jii, ‹Ŋkar yèm, m bòʼ wò e gha? Wòsò kì kàvnín jii, à lim lim kishiíy kifur, é m laʼ wò sí mbàm.

¹⁴ Lì mbàm sé si ben, a dù. A m yèn ji m laʼ vé bàmé réŋréŋ moo vé mbìyi, bo kù kì mo.

¹⁵ A dzə̀ m yiì kinyo ke m koŋ yiì e mbàm sém sí. À rə̀sí, a ŋeèy bèn ji bìʼ fo m shám wír ámóʼó ji ka?› »

¹⁶ Jesus fèr bèy, e sùúy jii, «Kù dzə̀ mo vé mbìyi wíy lò, e kfən ji vé bàmé, é vé bàmé kfə́n ji vé mbìyi.»

Jesus kfə̀n naarì kfə́ə kpu ye yí wíy lì wun

¹⁷ Jesus lòo dù e Jerusalem, wùn à wón və́ lìm vee nshòv sibaà e ghvə̀me fəə́ é dzəə, wù lì, wùn áwune bàr wún, wù wáa suúy jii,

¹⁸ «Vèn yuúrí, vèsən sí du e Jerusalem, a dzə̀ fo á sí du, e way ŋgaà wo yírí dzəə̀n *Wanwìr və̀n e vitú ve atàá cù wùn à wír ve á duŋrì nsər Nyùyí wo, aá sáʼ nsaʼ rə, e bìn ji á yúy.

¹⁹ Á tínen bèy, aá nèn wày wun e vitúm ve ví sáʼ woŋ və̀n ví wo, aá wáa shoór wun, e tam e ŋgwàne, e lì, e dù, e ta e kintam. Wù kpú, vishiíy ví wíy mee vitaár, é Nyùy fəə́r wun fo fo.»

Yìy à Joon wùn Jeem lón kirə́ʼ ké won və́

²⁰ Yìy à wón Sebedi nèn wìy e wón vəə́, e tsə̀m e Jesus si ji wun lón a kifá.

²¹ Jesus dzə́r shó jii, «Kì dzə̀ ji ka?» Wù bìnèr jii, «Ku kàʼ ji lóo wìy dzə e ghan se à wíy a saʼ vifon vé, áà dzəʼər wón vém vee abaà vin vitú ve ntaʼ e wò ghaa kàvàʼ.»

²² Jesus bìnèr jii, «Wón vée yòʼ kì kifá ke á lón kìn. A dzə̀ áwune nò fó bàr ŋgeʼ wo m wíy no fo fo a?» Áwune biímé jii, «A dzə̀ vèr nò.»

²³ Wù nèn sùúy jii, «Bo vèn wíy no rú fó bàr foo fèy. Yii bèy, a bó yòʼ dzə̀ vitaáví vém fó lì wír ve á wíy a dzə vitú ve ntaʼ e mǒ ghaŋ. Antaʼ vee shooyi sì vé wìr ve Tàr wor‑iì sìysìn ne, e lèm sho.»

²⁴ Kibér ke wón lìm Jesus vee ghvə̀me yú kinyo kee shooy, e nèn a shwiíy kilòŋ fo Jeem wùn Joon.

²⁵ Jesus yòŋ áwune adzə̀m. Á wìy, wù suúy jii, «Vitúm vímóʼ ví dzə̀, a wír ve á sáʼ woŋe táy wíri féyì. Wír ve á kér antaʼa nén a koʼrí aàlàghayí vitu.

²⁶ A bó yòʼ dzə̀ kí wàa dzə bèy e věn mvəm. A wìr taʼ ji wun wáa dzə wír wo kuʼùn e věn mvəm, ŋgaàŋ kù neèr kitú kfə́, a lìm fo wìr dzə̀m.

²⁷ Wìr wáa tàʼ ji wun wáa tiy mbìy, ŋgaàŋ kù lì kitú kfə́ ji kwǎn wìr dzə̀m.

²⁸ A dzə̀ réŋréŋ sá mo ŋgaà wo yírí dzəə̀n *Wanwìr və̀n yoʼ wìy ji wíri wáa lìm fo wun. Wù wìy ji wù wáa lìm fo wíri, e fo kitú kfə́, e fíʼ tin wír anín fo lòn.»

Jesus mvə́ʼ sí amfìr abaà

²⁹ Jesus wùn à wón və́ lìme meé é ntèʼ yee Jeriko, e lòo lò, màŋgòŋ lò fo bàm nyanyày.

³⁰ Wù wáa dù, aàmfìr ámóʼó dzə́ e ghaa dzəə abaà. Áwune yú ji shaa a Jesus, e nèn kèʼ, a rəəmé jii, «Jesus woo Wan Fòn Davir, ku shàm mendzən mer mè.»

³¹ Wíri nèn a wamrí jii, áwune bér á njèʼèr. Aá kù waáme waàmén kitávín jii, «Tàr, wò woo Wan Fòn Davir, ku shàm mendzən mer mè.»

³² Jesus yú, e tìím, e yòŋ áwune, e dzə̀r jii, «Vèn taʼ ji m yée le e vèn?»

³³ Á bìnèr jii, «Tàr, vèr taʼ ji sí yérí ku mvə̀ʼə̀m.»

³⁴ Jesus rə́r mendzən fo áwune, e kùm sí yév, yí ku nèn mvə̀ʼkìr, á wáa yen virə́ʼ, e nèn lò, a dù a dzə̀ e Jesus bàm.