Matio 19 - ŊWÀʼ NYÙY

Dzəʼə̀m wiíy wùn lum

¹ Mo Jesus fèrìn vinyo vìy, e màysì, e nèn lò fo mbìv wòŋ yee Galeli, e dù e mbìv Juda ye yì dzəə̀n é ndzə̀n ndzə̀v ye á yoŋ ji Jordan.

² Wù lòo dù, màŋgòŋ lò e wùn bàm nyanyày, wù dù, a fèr vé yàsíi.

³ Wír veé mbìv *Farasi ámóʼó nèn dù wìy, a woóy wun, a dzər sho jii, «Nsər yèsən biíme ji dzə̀ wír, wù fə̀ə́r wiíy və bìʼ kinyo kímóʼ kí gheéy á?»

⁴ Jesus bìnèr jii, «Vèn yòʼ yii yoŋ Ŋwàʼ Nyùy, yú à? Vé‑eè sàŋ jii, ‹Yì‑iì dzə̀ é ghan se Nyùy‑iì kèʼèn ndzə, wù‑uù bòm wír abaà ji lumèn wùn wiíy,

⁵ e sùúy jii, á kinyo ke kí yiìn, é bo lùmèn maʼti tàr wov wùn yè wov, e tàtí wùn wiiy və, áwune vee wír abàá nén a dzə wún e mòʼón.›

⁶ Mo kí dzəə̀n bey, bo áwune vee wír abaà víne yòʼ dzə̀ə́ wír jeéy jeéy, á sì rú kitú kimòʼón. Kí nén a dzə jii, wìr wáa yen fó jàvsìn a kifá ke Nyùy tatin ne.»

⁷ Wír vìyi nèn dzə̀r e Jesus jii, «Kfən yiì ka lèn, bo Mooser wáa suúy ji a dzə̀ wìr fə̀ə́r wiíy və, lóo fəə́r, wù sàŋ ŋwàʼ njàvsìn, e fò shó?»

⁸ Jesus bìnèr jii, «Mooser‑iì lo biìmé bèy, a dzə̀ bìʼ kitú kén ke tavín kí. Bó yòʼ dzə̀ mo kí‑iì dzəə̀n fó kèʼ.

⁹ M nén a suúy kém ke suuy mo jii, a wìr lòo dzə, e fə̀ə́r wiíy və, e lì wo sən, a bó dzə̀ ji wiíy kì ghán viŋkar, bo wù yiì kinyo ke bi kí réŋréŋ mo wù lì a dzə̀ wiiy wìr.»

¹⁰ Wón və́ lìme yuúrí, e nèn sùúy jii, «A dzə̀ ji á mo dzəʼə̀m wiíy wùn lume dzəə̀n bey, bo kí bòŋ ji wìr goʼ là wiíy.»

¹¹ Jesus bìnèr jii, «Bó yòʼ dzə̀ wìr dzə̀m biìmé kee shooy. A dzə̀ kù biìmé wír ve Nyùy tóm áwune, aá dzə́ bèy.

¹² A kí dzə̀ jii, wír ámóʼó dzə̀, a bó á yòʼ kér shií fó vikìy, aá kù‑uù dzə̀ə́ áwune bey. Ámóʼó, ve á yiìn yíin e wóo. Ámóʼó nén a dzə kév ve á tenen ji á fíʼ a lìm a dzə̀ kinyo kee kùm sáʼ Nyùy. M nén a suúy jii, wìr wo dzə̀ wù biìmé kee shooy, ŋgaàŋ yii á kinyo ke m suuyin kin.»

Jesus bunrì fo wón ve terií

¹³ Wír ámóʼó nèn dù wìy e wóné, e yèn Jesus sho ji wù neer á wó rə́ e wón vee shooyí vitu, e bùnrì fo fo. Á wìy, wón və́ lìme nèn a shèm.

¹⁴ Jesus suúy jii, «Vèn maʼti, é wón ve terií wáa wìy, a yen mo. Lá vèn yòʼ a shèm, bìʼ fo wír ve á wíy nəə́ e vijùŋ ve dzəə̀n vé saʼ Nyùyi kù dzə̀ wír vee moo wón vin.»

¹⁵ Wù nèn neèr wó rə́ e wón viyí vitu, e bùnrì fo fo, e nèn lò, a dù.

Bùʼ wùn à sáʼ Nyùyi

¹⁶ Wìr wùmòʼ nèn dù wìy, e yèn Jesus, e yòŋ jii, «Ŋgaà Yèʼey, lim ye juŋ ye dzə̀ m yiì, é bo Nyùy fó mo dzəʼə̀m yee là mayi dzə̀ ka?»

¹⁷ Jesus dzə́r shó jii, «À dzə́r lim ye juŋe a dzə̀ e mò bìʼ ka? Wìr wo juŋ kù jòʼsì Nyùy. Aà taʼ, e wìy nəə́ e dzə̀ʼə̀m yee là may, à wàa lèm nsər se Nyùy.»

¹⁸ Wìr və̀y dzə́r jii, «Nsər siné sí?» Jesus bìnèr jii, «Dzə̀ nsər see jii, ‹Lá wìr yòʼ yùyrí wír. Lá wìr yòʼ lì wiiy wìr, kìn ji wiíy wáa ghan viŋkar. Lá wìr yòʼ a shoŋ vishóŋ. Lá wìr yòʼ tìím vinjen ve kisaŋ vi,›

¹⁹ à nsər yee jii, ‹Wìr ghvə́m tàr wov wùn yè wov,› e lì yee jii, ‹Wìr koŋ fə́r və mo wù koŋ kitú kfə́.› »

²⁰ Wánlè nsùm və̀y nèn bìnèr jii, «Mò‑oò sí lem nsər see shoon sidzə̀m, kfə̀n bèr ka?»

²¹ Jesus suúy shó jii, «Aà taʼ rú ji à gheén fo Nyùy, à dù, e fiìnè kéŋ yé e dzə̀m, e jàv mbàm e vé ŋgeʼe, e wìy, é wòsò wáa ghan. À yii bèy, áà nèn wìy a ker bùʼ a dzə̀ é yuv.»

²² Wánlè nsùm və̀y yú bey, e rə̀ə́y, bìʼ fo wù‑uù kér kéŋ e ŋàŋ, e nèn lò, a dù e wún vəə́, a sòv kitú.

²³ Jesus siíy, e sùúy e wón və́ lìme jii, «Dzə̀ kinyo kitávín féyì fo ŋgaà mbàm nəə́ é vijùŋ ve dzəə̀n vé saʼ Nyùy.

²⁴ A m kfə̀n suuy, lo lì jii, a fə̀m dzə̀ ji nyàm yee moo *kamer tósín é si ntar, bo bó yòʼ dzə̀ ŋgaà kav tàv nə̀ə́ e vijùŋ ve dzəə̀n vé saʼ Nyùy.»

²⁵ Jesus suúy bey, shúu yúm wón və́ lìm, á wáa ghay jii, «Bo dzə̀ wìy nə̀ə́ la é dzə̀ʼə̀m yee là may lèn?»

²⁶ Jesus túy sí aáwuné wùn, e bìnèr jii, «Kí gháʼ a dzə̀ fo wìr, bó kí yòʼ gháʼ fo Nyùy, bìʼ fo dzə̀ Nyùy, wù yiì vinyo vidzə̀m.»

²⁷ Pita nèn a bi sho jii, «Ku yèn ri mo vèr màʼtìn ne vifá vidzə̀m, a ghan e wò bàm. Kér kí wíy a dzə ka?»

²⁸ Jesus bìnèr jii, «M suuy kinyo ke ru kí e vèn jii, ndzə ye fíy wíy wìy, a ŋgaà wo yírí dzəə̀n *Wanwìr və̀n kóʼ ne e wùn kàvàʼ wo Nyùy foon, é wù nèn fò sá kàvàʼ nshòv sibaà e ghvə̀m, é ven ve vèn áwune ghán e nsay fène wáa dzə sa sho, a saʼ rám yeé Isray yee nshòv sibaà e ghvə̀m.

²⁹ A wìr màʼtì láʼ rə́, kìn lùmér sə́, kìn jemèr sə́, kìn yè wov wùn tàr wov, kìn wón və́, kìn súm sí bìʼ mo, bo ŋgaàŋ wíy a ker wír wùn à vifá vi kàŋ wií, e shaà mo ví‑iì dzəə̀n. A wù kfə̀n wíy nəə́ sa e dzə̀ʼə̀m yee là may.

³⁰ Yii bèy, a wír anín ve á yénsin lèn ji vé mbìyi wíy kfən ji vé bàmé, é vé bàmé kfə́n ji vé mbìyi.»