Matio 18 - ŊWÀʼ NYÙY

Dzə̀ la wír wo kuʼùn?

¹ Wáa dzə e ghan see shooy, wón lìm Jesuse wìy, e dzə̀r shó jii, «Wìr fo vèr wo wù wíy a tiy vitú e Nyùy mvə̀m saʼ dzə̀ la?»

² Jesus nèn jàŋ wán wo terí, e tìír fo ntìntìn,

³ e sùúy jii, «M suuy kinyo ke ru kí e vèn jii, a vèn dzə̀ là fó kuvsín, e kfən moo wón ve terií, bo bó yòʼ dzə̀ féyì vèn wìy nə̀ə́ e vijùŋ ve dzəə̀n vé saʼ Nyùy.

⁴ Wìr wo wù liìn kitú kfə́ shishàr, e kfə̀n moo wán və̀n, dzə̀ wo wù wíy a tiy vitú e Nyùy mvə̀m saʼ.

Wìr wáa yen fó way wír e jay

⁵ «Kí nén a dzə jii, a wìr yén wán wo terí moo və̀n bèn ji wír bìʼ mo, bo ŋgaàŋ yén a dzə̀ mo.

⁶ A sì ji wìr yii, é wìr fo ve á wáy shilív e mǒ wùn moo wón ve terí víne jáy dzə́ə, bo kí bòŋ ji á səə́y lúm tíy kiban e ŋgaàŋ kilòŋ, e màʼ e ndzəv, é wù lay.

⁷ Éè mò, mendzən me wìr veé ndzə fèn mè rə́r mo féyì. Vinyo ve ví lévti áwune, aá jáy dzə́ə ví dzə̀ vinín. Kù dzə̀ mo kí yii dzə́. Yii bèy, a ŋgeʼ dzə̀ ye wìr wo wù lévti wír, wù jày dzə́ə.

⁸ «Kí nén a dzə jii, kìn lò kiwó ke wìr, kìn lò kiwuú, a levtí ŋgaàŋ ji wù jáy dzə́ə, wù waà tìn, e màʼày. Kí bòŋ ji wù wáa ker kiwó kimòʼón, kìn dzə̀ kiwuú kimòʼón, e nə̀ə́ e dzə̀ʼə̀m yee là may, e shaà fó a ker viwó vibaà, kìn viwuú vibaà, e dù e və̀y wo wú bo ghán sidzə̀m, là may.

⁹ Sí wìri kfən lò, a levtí wír ji wù jáy dzə́ə, ŋgaàŋ mèn, e màʼày. Kí bòŋ ji wù wáa ker sí e mòʼón, e nə̀ə́ e dzə̀ʼə̀m yee là may, e shaà fó a ker sí e baà, aá maʼ wun e kirə̀ʼ ké və̀y.

Wìr wáa sə ŋgaà jay

¹⁰ «Vèn wáa yen fó a kay wír fo wón ve terí víne. Vèn wáa kiíy jii, nshèelav se Nyùy se sí leey fo áwune sí meéri e Tàr wor wo wù dzəə̀n é yúv si ghán sidzə̀m. [

¹¹ A ŋgaà wo yírí dzəə̀n Wanwìr və̀n wìy ji wun tàʼ wír ve vé‑eè làykìn ne, e lùŋèr.]

¹² «A wìr kér njiì və wií, wo mòʼón lay, vèn wàa kwàʼtì ji dzə̀ ŋgaàŋ yèe le? A dzə̀ la wù yòʼ màʼtì woo nshòv bvə̀ʼə̀ e mbvə̀ʼə̀ e gwan, e dù, a tàʼ woo mòʼón wo wù làyìn və̀y à?

¹³ M suuy kinyo ke ru kí e vèn jii, a wù tàʼ, e yèn, bo wù yíi a sheʼrí woo shooy, e shaà vee nshòv bvə̀ʼə̀ e mbvə̀ʼə̀ ve bó á yoʼ lò làykìr.

¹⁴ A dzə̀ sá réŋréŋ mo Tàr wor wo wù dzəə̀n é yuv yòʼ taʼ ji wàn mòʼón lay fo wón ve terí víne.

Kimán ke fə̀r wùn fə̀r

¹⁵ «A fə̀r wìr jày kinyo e wìr, wù dù, e yèn wùn wun abaà, e sùúy sho jii, wù kì jày á kinyo kìy jáyín. Wù yú jí rə, bo wù kfə̀n kòóy ne fə́r və.

¹⁶ Wù tén fó biimé jay və, wù lì wír e mòʼón, kìn abaà, wùn áwune kfə́n fo, wù lóo suúy kinyo ke wù suuyì, áànjen vee abaà vine wáa yu sa, bìʼ fiʼtì.

¹⁷ Wù du, e tèn fó yu kinyo ke áwune suuyì, wù lì kinyo kee shooy lèn, e dù, e neèr e kintatì kí si. Wù kfə́n du, kinènè, á màʼtì dzə́ə rə, a leʼ wun léʼén moo wir kitum, kìn wír wo wù sov mbàm se *bàràʼ.

¹⁸ «M suuy kinyo ke ru kí e vèn jii, kinyo ke vèn wáy e nsay fèn ki wíy a dzə ke kí siìn kiwáyín é yuv, é ke vèn sháʼnin e nsay fèn ki wáa dzə ke kí siìn kisháʼnín é yuv.

¹⁹ M nen kfə̀n a suúy e vèn jii, a fə̀m lò wír abaà fo věn mvəm é nsay fèn, a bùnrì, a lon kifá, a ker shuu wóv e mòʼón, bo Tàr wor wo wù dzəə̀n é yuv kù yíi yiì kinyo ke áwune lóné.

²⁰ A wíri dzə̀ʼə̀m abaà, kìn ataár e mo woo Jesus yir, bo m kù dzə̀ aáwuné nsàn.»

Ŋgàn yee kùm ŋgaà kaa woo mbuù mendzə̀n

²¹ Pita nèn kòʼtí, e dzə̀r e Jesus jii, «Tàr, a fər wom rə́si jáy vinyo e mò, a m laysìnè, bo m kér fó làysìn bèy, e dù, e meé akàŋ asìʼ? Kàŋ saàmbà mo vé‑eè saŋen a?»

²² Jesus bìnèr jii, «Bó yòʼ mày bèy cáʼ. Ku làysìn kàŋ msaàmbà, kirə́ʼ saàmbà.

²³ «M suuy bèn, bìʼ fo kinyo ke saʼ Nyùy ki dzəə̀n moo ké fòn wùmòʼ wo wù‑uù taʼ ji və́ vé lìme siir mbàm sə́ se sí‑iì dzəə̀n aáwune.

²⁴ Wù kèʼ, e lòo kiv kicí, á nèn a wìy e wùmòʼ woo wír, a wù‑uù foò mbàm fo wun kibam nsə̀kì kirə́ʼ e ghvə̀m,

²⁵ sí gháʼ fo wù laʼ. Fòn suúy jii, á li, e dù, e fiìnè wùn à wiíy, à wóné, à kéŋ rəə́ e dzə̀m, e bàʼtí mbàm, e wìy a sho.

²⁶ Fòn suúy bey, wìr woo shooy nèn gbù e si wo, a buʼ wó jii, ‹Ku rə̀r mendzən mem mè, e fò mo ghán, é m wìy làʼ mbàm see shooy sidzə̀m.›

²⁷ Fòn yén mo wù búʼ wó, mendzən mè rə́r wun e ŋàŋ, wù màʼtì mbàm see shooy sho máʼtin sidzə̀m, wù bòy fo sháŋ.

²⁸ «Wìr və̀y fəə́, e lòo dù, e tò e wìr wùmǒʼ wùn, a dzə̀ wo wùn áwune‑eè lim fo fòn, a wù‑uù foòr wír woo shooy mbàm wií. Mo wù yenen, e nèn ghàr fó asìʼ, a kam ji wù kù kér fó làʼ a kaá rə́.

²⁹ Wìr və̀y gbù e si wo, a lon jii, wù ku rə̀r á mendzən mvə, e fò wun ghán, é wun wìy làʼ mbàm sə́.

³⁰ Wù sháʼnín, e lì wír və̀y, e fò, á wáy é sháŋ ji wù kù wíy làʼ a mbàm sə́ sidzə̀m, e bóo fəə.

³¹ Kí wáa koóy bèy, aàŋgàa lìm fòn ámóʼó kì dzə̀ fó. Áwune yén kinyo kee shooy, kí nyár áwune, á nèn dù, e bùn fon, e fìʼtì kinyo kidzə̀m.

³² Fòn toóy ŋgaà və lìm və̀y, wù wìy, wù suúy shó jii, ‹À dzə̀ nyam kwaʼ. M kì màʼtì yé yee kaá nyanyày, bìʼ fo à kì buʼun wó.

³³ Yií ka fo à rə́r sá mendzən me wo woo ŋgaà kaa, a kfə̀n dzə̀ ŋkar ye, mo m kì rərin me?›

³⁴ Kinyo kìy ki nyár fon e ŋàŋ, wù fó wír və̀y ji á wáy é sháŋ, a nyàvrì a sho kijuŋ, é wù wìy làʼ kaá yee shooy e dzə̀m, e bóo fəə.»

³⁵ Jesus lòo màysì, e sùúy jii, «A wìr mòʼón mòʼón fo vèn dzə̀ là fó a làysìn jay fər və, a fəə́r fo shiliv, bo Tàr wor wo wù dzəə̀n é yuv kù wíy lovtí e vèn réŋréŋ mo fòn‑eè lovtin e ŋgaà və kaa və̀y.»