Matio 17 - ŊWÀʼ NYÙY

Jesus dìn vitaáví ve wù kér e yuv

¹ Kishiíy kí shaà ntuùfú, Jesus lì Pita wùn à Joon, à Jeem woo fər Joon, wùn áwune bàr wún, e kòʼ é kitu ke gwan wo da wùmòʼ.

² Á lòo yen, a Jesus kúvsín ne, a kìʼ jeéy. Sí rəə́ wáa ban moo shúy, ndzə̀y sə́ sí wáa fər, e kfə̀n a tokír moo sí shùy.

³ Áwune lòo sìn, e yèn Elija wùn Mooser, aá wíy, wùn à Jesus wáa suŋnín.

⁴ Pita nèn tùʼtìn, e sùúy e Jesus jii, «Tàr, kí bòŋ feyì mo vèsən à wír vìne dzəə̀n fen. Aà fèn koŋè, é m baʼri táv fen e taár, wúmóʼó ji wó, wúmóʼó wó Mooser, wúmóʼó wó Elija.»

⁵ Kù mo wù suuy bèy, mbàʼ yìmòʼ nèn wìy, a yì rán ji rèké rèké, e tìím aáwuné kitu. Jì wìr súŋnín fó fo jii, «Və̀n dzə̀ Wán wom, m koŋ wun feyì, wù bòŋ mo é ŋàŋ. Vèn wáa yuurí kinyo a dzə̀ kfə́.»

⁶ Wón lìm Jesus vìyi yú mo jì rə̀y suŋnin bey, e nèn gbù, e tsə̀m sí yév é nsay, a yàʼ yàʼàn.

⁷ Jesus dù, e kùm áwune, e sùúy jii, «Vèn lo é yuv, lá vèn yòʼ a fàn.»

⁸ Áwune nànèn, e lòo leéy, e làa yòʼ dzə́ə yen wír, e shaà Jesus.

⁹ Wùn à Jesus lòo kaày fo gwan fèy, wù kàntì áwune jii, «Vèn wáa yen fó wìy suúy kinyo ke vèn yenen e wìr, e meé e ghan se ŋgaà wo yírí dzəə̀n *Wanwìr və̀n wíy kpu, é Nyùy fəə́r wun fo kpu.»

¹⁰ Wón və́ lìme dzə́r shó jii, «Yiì ka, bo wír ve á duŋrì nsər Nyùyi wáa yeʼéy jii, ŋkfə Elija kér fó kfən ŋkuŋén, é bo Mfə̀ə́r siíy, e jùmrì?»

¹¹ Jesus bìnèr jii, «Vé nsər vee shooyi suuy rú. Elija kù‑uù kér fó tòmbìy wìy, e naŋsín vinyo vidzə̀m, é ví kfə́n vifíy.

¹² A m suuy e vèn jii, Elija‑aà wìy ne, la wíri yòʼ kìíy. Á nèn lòvtí sho mo vé‑eè koŋè. A kù dzə̀ réŋréŋ sá mo ŋgaà wo yírí dzəə̀n Wanwìr və̀n wíy yen ŋgeʼ aáwuné wo.»

¹³ Wù suúy bey, wón və́ lìme yú, e kìíy jii, wù suuy Elija wo wù‑uù wìyìn, a dzə̀ á Joon woo Ŋgaà Wáyndzəv.

Jesus fér wán wo *nyùy wùmòʼ jívir, a wù gbu kimgbù

¹⁴ Wùn à Jesus kaày, e mèé e sar gwan, a màŋgòŋ kì dzə́ fo, shiy áwune. Wìr wùmòʼ nèn wìy, e tsə̀m e Jesus si, a lon jii,

¹⁵ «Tàr, ku shàm mendzən me wan wom mè. Wù gbu kimgbù, yén ŋgeʼ ye ghaʼán. Dzə̀ ghán sinín se kí lo, kí màʼ wun e və̀y, kìn é ndzəv.

¹⁶ M wíy shó ji wón vé lìme fer, á múm ntéŋ.»

¹⁷ Jesus yòŋ jii, «Wír vìn, vèn dzə̀ wír kisaŋe. Bó vèn yòʼ lo, vèn wày shilív e Nyùy wùn gheéy. M wíy tsəmrí vinyo vén, e dù meé e le? Vèn taʼ ji m wìy dzə̀ʼə̀m vesən, e mèé e le?» Wù nèn sùúy jii, «Vèn wiy e wan woo shooy, e fò shan.»

¹⁸ Á wìy sho, Jesus kàntì nyùy wo wù‑uù jívir wán, wù màʼtì, wàn bónén kàŋ mòʼón.

¹⁹ Wón lìm Jesus vìyi yiì lò, a dzər e Jesus bámbám jii, «Kì yiì ka fo vèr jum nyùy woo shooy?»

²⁰ Jesus bìnèr jii, «Vèn kì mùm ntéŋ, bìʼ fo bó á yoʼ lò a mùm, a way shilív e Nyùy wùn. Vèn wáa kiíy rú jii, a vèn fə̀m kì wày shilív e Nyùy wùn shishàr, a shí fə̀m dòr moo sám shishùr, bo dzə̀ vèn sùúy e gwan və̀n jii, wù meene fó fèn, e dù, e tìím fèsə, wù kù meènè, a bó yòʼ dzə̀ kinyo kímóʼ kí dzəə ghàʼ ven gheéy. [

²¹ Kee kùm kfə́ə nyùy və̀n ki dzə̀ kfə́ jii, a dzə̀ wìr kù a bùnrì, a lèm jíŋ, e bóo jùm. A bó dzəə̀ yìmòʼ yòʼ kfə̀n dzə̀ shó.]»

Jesus kfə̀n fer kfə́ə kpu ye yí wíy lì wun

²² Mo Jesus wùn à wón və́ lìme kaári e mbìv wòŋ yee Galeli, wù yiì lò, e sùúy aáwune jii, «Á lèn wo á sí yiì way ŋgaà wo yírí dzəə̀n Wanwìr və̀n e wírí wo,

²³ aá yúyrí. Vishiíy ví mee vitaár, é Nyùy fəə́r wun fo kpu.» Wón və́ lìme yú kee shooy, e nèn a sòv kitú.

Á wooy Jesus, dzə́r mbàm se Nyùy

²⁴ Jesus wùn à wón və́ lìme dù, e mèé e ntèʼ yee Kapeenahum, wír ve vé‑eè báʼti mbàm se vé‑eè maʼ e lav cùu nèn wìy, a sòv e Pita jii, «Tàr won kù yii maʼ mbàm se Nyùy à?»

²⁵ Wù bìnèr jii, «Wù yii maʼà.» Pita yiì nə̀ə́ e lav, e lò ji wun fiʼtì a kinyo kee shooy e Jesus, wù nèn sə̀ fó shuù wo, e dzə̀r jii, «Pita, à yèn ké ji ka? Afon veé nsay fène yii báʼti mbàm se maʼàn sí wùn à nshwì wóví a dzə̀ fo ala? Á yii sə́ a dzə̀ fo wón wòŋe, moo fo viŋgwìy vi á?»

²⁶ Pita bìnèr jii, «Á yii sə́ a dzə̀ fo viŋgwìy vi.» Jesus suúy jii, «Bo dzə̀ ji wón wòŋe yòʼ kér fó a làʼ.

²⁷ Yii bèy, a bó yòʼ dzə̀ wòsò yiì kinyo ke wír vee shooyi wáa yu nyár. Ku dù, e màʼ lóvi é kibaŋ, koó sə́ ye à koon, à mvə̀ʼ shuu, áà yén sí mbàm sho, e fə̀ə́r, e dù, e màʼ sesò see mbàm sho.»