Matio 15 - ŊWÀʼ NYÙY

Ntò se wìr vee fó mbìy

¹ Wír veé mbìv *Farasi wùn à ve vé‑eè duŋrì nsər Nyùy ámóʼó nèn dù wìy fo Jerusalem, e dzə̀r e Jesus jii,

² «Wón vé lìme shóʼor liì wòŋ wo atàr vesən vee fó mbìyi‑iì lèmèn bìʼ ka? Áwune yòʼ su wó e dzəə ye dzə̀ wìr sù shó, e bó a yikír.»

³ Jesus nèn bìnèr jii, «Vèn shóʼor kén nsər ye dzəə̀n ye Nyùy, jumrì a dzə̀ vén vee vinyo bìʼ ka?

⁴ Nyùy‑iì sùúy jii, ‹Wìr ghvə́m tàr wov wùn yè wov. A wìr kuù tàr wov, kìn yè wov, á kù yùyrí ŋgaàŋ yúyrín.›

⁵ Yii bèy, vèn nén a toyír kén jii, a wìr lò, a ker kifá ke dzə̀ wù sə̀ tàr wov wùn yè wov shó, e sùúy jii, kifá kee shooy ki sì ké Nyùy, bo bó wù yòʼ dzəə́ kér a fó lì, e sə tàr wov wùn yè wov shó.

⁶ Á mo vèn yii bèn, semèr nsər Nyùy, yii a dzə̀ vén vee vinyo.

⁷ Vèn dzə̀ abìnbìnteʼnsə́m. Aysaya‑aà lo tòʼ rú mo liì won dzəə̀n. Wù‑uù sùúy ji Nyùy suuy a jii:

⁸ « ‹Wír vìne ghvə́m mo a dzə̀ fó shuù, a bó melív mev mè yòʼ tíy e mǒ wùn.

⁹ Á ghvə́m mo kisáŋ, bìʼ fo á li vinyo ve bomen wír, yéʼey ji nsər sém.› »

Vinyo ve ví yii bívir wír

¹⁰ Jesus nèn lò, e yòŋ màŋgòŋ wo wù‑uù baʼtin fó, e sùúy jii, «Vèn yuúrí kinyo kìn ki, e səə̀m.

¹¹ Kifá ki yòʼ dzə̀ shó ke kí nəə nə̀ə́n e wìr shuù ke dzə̀ kí bìvír ŋgaàŋ. A dzə̀ kù bìvír kinyo ke kí fəə́ fəə́n fo wìr shuù.»

¹² Wù suúy bey, wón və́ lìme yiì lò, e kòʼtí, e sùúy sho jii, «À kì ji wír veé mbìv *Farasii kì yù kinyo ke à suuyin, kí bír áwune á?»

¹³ Jesus bìnèr jii, «A dzə̀ kifá, a bó yòʼ‑oò bìy Tàr wor wo wù dzəə̀n é yuv, bo á kù kér fó wìy dzə̀n kidzə̀m, à gháŋé shó.

¹⁴ Vèn maʼti dzə́ə wìr vee shooy, dzə̀ amfìr. A mfìr lò, a caàcà mfìr, bo wùn wun yíi tatí, e gbùkìr e bii wír adzə̀m.»

¹⁵ Pita nèn lò, e sùúy e Jesus jii, «Ku naàrì nsàv ŋgàn ye à kì yòvìn, wíri wáa yu nyár rə̀y.»

¹⁶ Jesus dzə́r shó jii, «Vifií vén ví kù dzə̀ə́ vitsə́m moo vé wìr vee shooy à?

¹⁷ Vèn wáa kiíy jii, kifá ke kí nəə e wìr shuù ki du a dzə̀ é kitur, tósin tòsín.

¹⁸ Kifá ke kí bívir wír ki dzə̀ kinyo ke kí fəə́ fo ŋgaàŋ shuù, bìʼ fo kí lo a dzə̀ fó shiliv.

¹⁹ Kí kù yii lo a dzə̀ fó shiliv, bo wìr wáa kwàʼtì vinyo ve bi ví, lo, wù yùyrí wír, lo, wù lì wiiy wìr, e kfə̀n a jàŋ kinjàŋ, a ghan viŋkar. Wù lo, wù wàa shoŋ vishóŋ, e kfə̀n a toy wír e kinyò kisáŋ, a suʼ kinsuʼ.

²⁰ Á vinyo vìn ve ví bívir wír, a bó yòʼ dzə̀ wìr bìr ji bìʼ fo wù yikin e wóo e dzə̀ne.»

Wiíy kitum wùmòʼ wáy shilív e Jesus wùn

²¹ Jesus màʼtì Genesarer və̀y, e dù e mbìv mvə̀m sé laʼ see Taya wùn Sidon.

²² Wiíy wùmòʼ wáa dzə fo, a dzə̀ wir kitum kee Kanan. Wù nèn wìy, e yèn Jesus, a toŋ jii, «Tàr woo Wan Fòn Davir, ku shàm mendzən mem mè. M kér wán, a nyùy wùmòʼ jívir wun e ŋàŋ.»

²³ Wù kú a toŋ bèy, la Jesus yòʼ a ghay. Wón və́ lìme nèn kòʼtí, e sùúy sho jii, «Ku kwàŋ kinyo ke wiíy və̀n ki, é wù bér njèʼèr, a dù.»

²⁴ Jesus bìnèr jii, «Nyùy‑iì tùm mo ji m wiy, a sə a dzə̀ wír və́ veé Isray ve á loòn, a jan moo njiì.»

²⁵ Wù bìnèr bèy, wiíy və̀y ku wìy, e tsə̀m é si wo, a lon jii, «Tàr, ku sə̀ mo.»

²⁶ Jesus bìnèr jii, «Kí yoʼ ghèén ji á li kur wòn, a teʼ jwí sho.»

²⁷ Wiíy və̀y bìnèr kfə́ jii, «Dzə̀ rú Tàr, yii bèy, a jwí si yii bóŋri ŋkfə̀ʼ se vifa ve atàr véví yí, a sí túmkir fo nsay.»

²⁸ Jesus yuúrí, e yòŋ jii, «Wiíy və̀n, m yèn ji à wày shilív e mǒ wùn féyì. Kí kú a dzə mo à tóŋé.» Jesus suúy bey, wan wiíy və̀y ku nèn bònén e ghan fóo fèy.

Jesus yiir wír ansə̀kì akweè

²⁹ Jesus yiì lò fo fo, e dù, e shaà e ghaa kibaŋ keé Galeli, e kòʼ, e dzə̀ʼə̀m e gwan.

³⁰ Màŋgòŋ kfən bàʼtí fo e gháʼán. Ámóʼó wáa wìy aàŋkivkìri wùn aàntèŋe, aàmfìri, à vindzə̀mer vi, wùn à vé yàsí ámóʼó sá anín, a yen wun sho, wù wáa fèr áwune.

³¹ Vindzə̀mer vi wáa suŋnín, virə́ʼ vé aŋkivkìr vi wáa kfən fo, antèŋe wáa ghan, amfìri kfə́n a yen sa virə́ʼ. Wíri yén bey, a ker gháʼ feyì, a burí Nyùy wìr veé Isray.

³² Jesus yiì lò, e yòŋ wón və́ lìm, á wìy, wù suúy jii, «Wír vìne sì vèr áwune fen lèn vishiíy vitaár, a bó á yòʼ kér kifá kée yi, a mendzən mè rə́r mo. A bó m yòʼ koŋ ji m maʼti, aá wáa kfənkír fo laʼ e jìŋ fo á kpúkír jíŋ e dzəə.»

³³ Wón və́ lìme dzə́r shó jii, «A dzə̀ vèr lì vifá ve yi ve ví gheén màŋgòŋ və̀n fo feé é kwaʼ fèn, e bóo yiír áwune shó?»

³⁴ Jesus dzə́r jii, «Vèn kér ntuʼ se kiban sìsìʼ?» Á bìnèr jii, «Sí dzə̀ saàmbà wùn à mesəsə̀ mè meshàr bèn.»

³⁵ Jesus nèn sùúy, wíri dzə̀ʼə̀m fo nsay.

³⁶ Wù lì ntuʼ se kiban see saàmbà sìy, wùn à mesəsə̀ mèy mè, e beèrì Nyùy, e bèʼtí, e fò e wón və́ lìme, á jàv e màŋgòŋ və̀y.

³⁷ Wìr dzə̀m yíkír, e kùr. Á màysì, á kfən bàʼtí vimbéʼ ŋkaà saàmbà, sirúnkín.

³⁸ A wír ve vé‑eè yiin kibán kee shooyi‑iì dzə̀ wír ansə̀kì akweè, a bó á yoʼ tàŋ vikìy wùn à wóné.

³⁹ Jesus nèn màʼtì màŋgòŋ və̀y, wù wáa dù, wù nəə́ é kikoŋ, a dù e mbìv wòŋ yeé Magadan.