Matio 12 - ŊWÀʼ NYÙY

Jesus naárí kinyo ke *kishiíy ké bam

¹ Wáa dzə e ghan see shooy, Jesus wùn à wón və́ lìme lò, e dù, a shaà e mvə̀m sǔm saŋ wúmóʼó. Jìŋ wáa yar wón və́ lìm, áwune nèn a tinrí vitú ve saŋ, a səʼsí, a kfər. A kishiíy kee shooy ki‑iì dzə̀ kishiíy kév ké bam.

² Wír veé mbìv *Farasi ámóʼó yén, e nèn sùúy e Jesus jii, «Ku yèn kinyo ke wón vé lìme yii ki, a kí kér nsər fo wìr yii é kishiíy ké bam.»

³ Jesus dzə́r kfə́ jii, «Vèn yòʼ‑oò yiì ne yòŋ fo ŋwàʼ mo jìŋ‑eè loòn, e yàr Fòn Davir wùn aàŋgaà və́ ŋgoo, wù yiì à?

⁴ Wù‑uù nə̀ə́ é lav cù, e lì kibán ke vé‑eè cuùn Nyùy sho, wùn aàŋgaà və́ ŋgoo yí, a dzə̀ nsər feyì fo wìr yí, e shaà taà cù.»

⁵ Wù kfən dzə̀r jii, «Vèn yòʼ yii yoŋ Ŋwàʼ Nsər Mooser à? Kí suuy fo jii, atàá cùu kér fó a yiì lim yév é lav cù e vishiíy vé bam, a bó yòʼ dzə̀ á wàa saʼ áwune ji á bívir kishiíy ké bam.

⁶ M nén a suúy e vèn jii, wìr wùmòʼ dzə̀ fen lèn, a kinyo kfə́ kí kùʼ, e shaà ké lav cù.

⁷ Vé‑eè sàŋ ji Nyùy suuy a jii, ‹Bó m yòʼ koŋ ji wìr wáa rəsí, a seerí nyám si, a cù mo shó. Ke m koŋ ki dzə̀ ji wìr wáa sham wùmòʼ woo wír.› A vèn‑eè yoŋ kinyo kìn, kiiy mo kí dzəə̀n, bo bó á yòʼ kì báshi wír vìn, a bó á yoʼ jày kinyo.

⁸ Ke kí dzəə̀n kí dzə̀ jii, dzə̀ ŋgaà wo yírí dzəə̀n *Wanwìr wo dzə̀ wù wày kinyo ke dzə̀ á yiì é kishiíy ké bam.»

Jesus fér wír e kishiíy ké bam wo kiwó ki‑iì kpuun

⁹ Jesus lò fo fo, e dù, e nə̀ə́ e ŋgày bùnrì yeé ntèʼ fóo fèy.

¹⁰ Wìr wùmòʼ wáa dzə fo, a kiwó ki kpú ne. Wír veé mbìv *Farasii lòo tàʼ lor wóo lor Jesus sho, e nèn dzə̀r shó jii, «A wìr fèr wír e kishiíy ké bam, bo wù shòʼór nsər moo ŋgáŋ á?»

¹¹ Jesus bìnèr jii, «A wìr fo vèn kér njiì, wù gbu é bii a dzə̀ é kishiíy ké bam, la ŋgaàŋ yòʼ fə̀ə́r à?

¹² Wìr kùʼ feyì, e shaà njiì. Kí nén a dzə jii, bó yòʼ dzə̀ jay fo wìr yii kinyo ke juŋ ki e wìr e kishiíy ké bam.»

¹³ Wù nèn sùúy e wìr və̀y jii, «Nàsì kóy wóo.» Wù nàsì, kiwó kfə́ kí kfə́n fó, e tàv, a dzə réŋréŋ moo ke tin ki.

¹⁴ Kí gháʼ wír veé Farasi vìy, á nèn fəə̀, e dù, a taŋ mo dzə̀ áwune ghàn, e bóo yuyrí Jesus.

¹⁵ Á lòo taŋ, Jesus nèn kìíy, e lò fo ntèʼ fóo fèy. Wù lòo dù, wíri lò fo bàm anín, aámóʼó joykìrì, wù wáa fèr vee shooy adzə̀m,

¹⁶ a kàntì jii, á wáa yen a fó yiì, é wìr kiíy.

¹⁷ Wù yiì bèy, kí nèn ghèén e kinyò ke *ŋgaà ntum Nyùy woo Aysaya‑aà suuyin ji Nyùy suuy a jii:

¹⁸ «Vèn yén ŋgaà wom lìm wo m shoʼon. M koŋ wun e ŋàŋ, a shilív shém shí tíy a dzə̀ é wùn wó. M wíy fo Kiyoy kém shó, é wù wáa fìʼtì sáʼ ye dzəə̀n yee réŋ e vitúm ve bó yòʼ dzəə̀n wír veé Isray vi.

¹⁹ A bó wù yòʼ wíy a fìʼtì, a taŋnín, a ghan, a yòr. A bó á yòʼ wíy a yu jí rə é mentàrnín.

²⁰ Wù yén nsàŋ, a yì sí bvə́ʼəmè, é la wù yòʼ màysì, e bvə̀ʼtí. A bó kikaʼày kí yòʼ wíy lòo shwi ji làʼrì làʼrì, é wù maysi, e ndzə̀mér. A wù kù wíy a yiì bèy, e meé e ghan se wù wíy so ndzə, e neèr sáʼ yee réŋ.

²¹ Vitúm vidzə̀m vi wíy tiír vifií a dzə̀ e wun wùn ji á fíʼ lùŋ.»

Vé wòŋe ghəvrì Jesus ji wù dzə̀ wùn Satan

²² Wír ámóʼó nèn dù wìy e wìr, a dzə̀ mfìr, kfə́n a dzə kindzə̀mer, a jívir nyùy wùmòʼ. Jesus fèr wír və̀y, wù wáa suŋnín, e kfə̀n a yen virə́ʼ.

²³ Màŋgòŋ wo wù‑uù dzəə̀n fó yén, a ker gháʼ, a ghaynín jii, wìr və̀n sà dzə̀ rú Wan Fòn Davir wo vé‑eè shiyì a?

²⁴ Wír veé mbìv *Farasi ámóʼó yú mo wíri gháynin bèy, e nèn a toyír ji fó a *Beseber wo dzəə̀n fon anyùy vitaáví e Jesus, bo wù wáa kàntì anyùy, aá wáa màʼtì wíri.

²⁵ Jesus kiíy kinyo ke vé‑eè woóne sho, e nèn sùúy jii, «Vèn kì sá jii, a woŋe lò, e jàvsìn, a taŋ kóy, bo bó yòʼ dzə̀ wú wìy tìím. A wír veé laʼ, kìn veé ntèʼé kfə̀n lò, a taŋ kóy, bo bó yòʼ dzə̀ áwune wìy tìím.

²⁶ Kí nén a dzə sa réŋréŋ moo, a Satan lò, e kfə̀n a taʼár wír və́, bo sáʼ rəə́ bvəə̀rí ne, a bó yòʼ dzə̀ yí dzəə tìím.»

²⁷ Jesus nèn kfə̀n dzə̀r e wír vìyi jii, «Mo vén vee wíri yii jum sa anyùy, a dzə̀ ji m sə́ vitaáví a dzə̀ fo Beseber mo vèn suuyì, bo vee shooyi sə́ kév a dzə̀ fo la? A vèn yèn ji á sə́ fo Nyùy, bo dzə̀ sá fo m sə́.

²⁸ Wáa dzə, a m jum rú anyùy a dzə̀ e vitaáví ve Kiyoy ke Nyùy ki fó e mò, bo dzə̀ ji sáʼ Nyùyi kèʼ ne lèn e nsay a dzə̀ e sén see ghán sí.

²⁹ A kù dzə̀ réŋréŋ sá mo bó yòʼ dzə̀ wír, wù nə̀ə́ e ntav lav, e shòŋ vifá və́, a bó wù tómbìy kùr ntav woo shooy, e bóo shoŋ.»

³⁰ Jesus kfə́n a suúy jii, «A wìr tèn fó a tiy e mǒ kinyò, bo ŋgaàŋ bívir bìvìrín. Wìr tén fó sə mo, aá wáa lì wíri e Nyùy wùn, bo ŋgaàŋ táʼar kfə́ tàʼàrín.

³¹ M nén a suúy e vèn jii, a dzə̀ Nyùy wìy làysìn vinyo ve bi ve wíri buʼtì vidzə̀m, e kfə̀n làysìn sa liy se á kuurì wun sho, a bó yòʼ dzə̀ wù wìy làysìn ké wìr wo wù kuu a dzə̀ Kiyoy ke Ranén kí.

³² A kí dzə̀ jii, a dzə̀ Nyùy wìy làysìn jay wìr wo wù kuurì ŋgaà wo yírí dzəə̀n *Wanwìr və̀n. Yii bèy, a wìr kuù kfə́ a dzə̀ Kiyoy ke Ranén kí, bo bó yòʼ dzə̀ Nyùy wìy làysìn jay ŋgaàŋ feyì, kìn dzə̀ é ndzə yee lèn, kìn ye yì wíy a wìy.

Á kiiy kicí a dzə̀ fó kifa ke kí koom sho

³³ «Á yii kiiy kicí ke dzə á yì a dzə̀ fó kifa ke kí koom sho. Kí koom kifá ke juŋ ki, la kí yòʼ dzəə kòóm ke bi kí. Kí koóm ke bi kí, la kí yòʼ dzəə kòóm ke juŋ ki.

³⁴ Vèn dzə̀ rám abúv. Bó yòʼ dzə̀ aŋgàa vinyò ve bi ví moo ven ben, á sùúy kinyo ke dzəə̀n ke juŋ ki, bìʼ fo wìr kù yii suuy kinyo a dzə̀ ke kí runen e wùn shiliv.

³⁵ Lóo dzə wír wo runen vinyo ve juŋ vi e wùn shiliv, wù nèn a suúy sa vinyo a dzə̀ ve juŋ vi. Lóo dzə wo runen vinyo ve bi ví e wùn shiliv, nèn a fəə kinyo ke bi kí fó shuù wo.

³⁶ A m suuy e vèn jii, wíy lòo dzə e kishiíy ké nsaʼ, é wìr kú a taŋrí jí se kisaŋ si se sí‑iì fəə́ fo wùn shuù. Wù kù wíy taŋrí feyì e mòʼón, e mòʼón, a yì fə̀m dòr é le.

³⁷ Á kù wíy a lì a dzə̀ vinyo ve ví‑iì fəə́ fo wìr shuù, e bó a saʼ ŋgaàŋ sho, kìn wù gbù nsaʼ, kìn wù ràn.»

Jesus tén fó dìn kisəəm

³⁸ Wír veé mbìv *Farasi ámóʼó wùn à ve vé‑eè duŋrì nsər Nyùyi nèn yòŋ Jesus jii, «Ŋgaà Yèʼey, vèr taʼ ji à yii kiŋgaʼnìn ke kinyò ke kí wáa dìn vitaáví vé Nyùy.»

³⁹ Jesus bìnèr jii, «Wìr woó ndzə yee lèn dzə̀ wir kisaŋ. Á méŋ Nyùy méŋén, kfə̀n dzə́r kisəəm ji ké gha? Bó yòʼ dzə̀ féyì, m dìn. Kisəəm kév kí kù dzə̀ ké Jona woo *ŋgaà ntum Nyùy.

⁴⁰ Mo Jona‑aà shiiyin e sə bvə̀m vishiíy vitaár, à shùy, à vitsə́ʼə́, dzə̀ sá réŋréŋ mo ŋgaà wo yírí dzəə̀n *Wanwìr wíy shiíy e loònsay vishiíy vitaár.

⁴¹ «A wíy lòo dzə e kishiíy ke Nyùy wíy a tinén nsaʼ, é wír veé Ninevèe wáa roòmè wír woo lèn və̀n, a dzə̀ bìʼ fo áwune‑eè yuun kinyo ke Jona fiʼtì, e bìnèr melív mev. Wìr wùmòʼ wáa dzə fèn lèn, a kfə́ kee kinyo ki shaà ké Jona, la á yòʼ a yu gheéy.

⁴² A Yaà wo wù‑uù sáʼ woŋ Sheba kfə̀n wíy a roòmè sa wír vìn e kishiíy fóo fèy. Wù‑uù yù ji Solomon kér vifií ve ghaʼán ví, e lò fo ndzəywoŋ, a wìy ji wun yén e sí rəə́. Wùmòʼ woo wír wíy lèn, a və́ vee vifií ví shaá vé Solomon, la á yòʼ a yen.

^43-45 «Wìr woó ndzə yee lèn dzə̀ wir kisaŋ. Wù dzə̀ moo wír wo *nyùy wùmòʼ jívirì, á jum fo wùn wó, wù dù é kwaʼ, a tàʼ fó beè. Wù taʼ ntéŋ, wù nèn sùúy ji wun‑éè wáa kfən a fo wun‑eè fəən. Wù lóo kfən, yén, a lav tíy kisáŋ, aá siíy ne, e yèr, e nàŋsín, wù nèn dù, e bàʼtí anyùy ámóʼó saàmbà ve á birin, e shaà wun, wùn áwune nèn nə̀ə́, e sìysì wún é lav fèy. Kinyo ki nèn màysì, e fòy e wìr və̀y kitu, e shaà mo kí‑iì dzəə̀n fó mbìy.»

Jesus wùn à kfə́ə rəə́

⁴⁶ Kù mo Jesus dzəə́ súŋnin e wír vìyi bey, a wùn áwune dzə́ e lav, yè wov wùn aàfə́r vəə́ nèn wìy, e tìím fo ndzə, a suúy jii, áwune taʼ, e yen Jesus, é wùn áwune wàá súŋnín.

⁴⁷ Wìr wùmòʼ dù, e sùúy sho jii, «Yè won wùn aàfə́r vée taʼ wò fo ndzə.»

⁴⁸ Wù bìnèr jii, «Yè wor dzə̀ la, afə́r vém ala?»

⁴⁹ Wù nèn a ròm wón və́ lìm, a suúy jii, «Yè wor wùn aàfə́r vémé vìne.

⁵⁰ Wìr wo wù yii kinyo ke Tàr wor wo wù dzəə̀n é yuv taʼ ji wù wáa yiì, dzə̀ wo dzəə̀n jemèr yem, e kfə̀n a dzə lúmér yem, a dzə yè wor.»