Maak 6 - ŊWÀʼ NYÙY

Á káy Jesus aáwuné ntèʼ yee Naasarer

¹ Jesus lò fo ntèʼ fóo fèy, wùn à wón və́ lìme wáa dù e Naasarer fo wù‑uù kuyin.

² Á meé fó, wìy lòo dzə e kishiíy ké bam, wù nèn dù e ŋgày bùnrì, a yeʼéy wíri. Wír aníne yú kinyo ke wù yéʼeyì, a ker gháʼ, a ghaynín jii, wìr və̀n sà yèʼéy vin vee vinyo fo feé á? Wù sà lì vifií vee ben fo gha á? Wù sà ghàn é le, e bó a yiì viŋgaʼnìn ve vinyò ve wù ghán, yii vìn a?

³ Bó sà yòʼ dzə̀ ŋkom vicì woo wan Maria wo afə́r vəə́ dzəə̀n Jeem, wùn à Joser, à Judar, à Simon a? Bó jemèr sə́ sí sà yòʼ dzə̀ aáwuné ntèʼ fen a? Áwune gháy bey, e nèn kèʼ a meŋ wun.

⁴ Jesus nèn lò, e sùúy aáwune jii, «Á yii ghvə́m *ŋgaà ntum Nyùy virə́ʼ vidzə̀m, a bó á yòʼ yii ghvə́m aáwuné ntèʼ, kìn aáwuné kfəə, kìn aáwuné lav.»

⁵ Mo áwune meŋen wun, kí nèn ghàʼ fo wù kfə́n a yiì viŋgaʼnìn ve vinyò vímóʼ ví, e shaà ji wù neer wó rə́ e vé yàsií wùn ashàr, e fèr áwune.

⁶ Kí wáa tarír wun mo wír véví tenen fó way shilív e wun wùn. Jesus nèn yiì lò, a ghan ntèʼ see fó sidzə̀m, a yeʼéy wíri.

Jesus túm wón və́ vee nshòv sibaà e ghvə̀m

⁷ Wù wìy lò, e yòŋrì wón və́ lìm vee nshòv sibaà e ghvə̀m, a tum áwune é virə̀ʼ abaà abaà, e fò vitaáví, á wáa jùm *anyùy ve á jívir wíri.

^8-9 Wù kfən sùúy aáwune jii, «Vèn lóo ghan, lá vèn yòʼ lì kifá. Vèn li a dzə̀ mbàŋ, e wày alábáʼ. Lá vèn yòʼ lì vifá ve yi, lá vèn yòʼ lì kibam. Lá vèn yòʼ wày mbàm e věn vifam. Lá vèn yòʼ màʼ vikúm vibaà.»

¹⁰ Jesus kfən sùúy aáwune jii, «Vèn nəə e ntèʼ, á wáy ven é lav ye á wayin shó, vèn gòʼ shó, e meé e ghan se vèn wíy a lò fo fo.

¹¹ A ntèʼ yìmòʼ tèn fó səəsí ven, e yu kinyo kén, vèn wàa lò fo fo. Vèn lóo lò, á tèr nsay fo bàm, é wáa dzə kisəəm ké kinyò ke wír vee shooyi yiìn.»

¹² Á nèn fəə̀, a ghan, a fìʼtì kinyo ke Nyùy ji wíri wáa bìnèr a melív mev.

¹³ Áwune kfə́n a jùm anyùy anín ve vé‑eè jívir wíri, á wáa màʼtì áwune, a dòn aŋgàa yàsí anín e meŋgvə́r mè, á wáa bonén.

Á yùyrí Joon woo Ŋgaà Wáyndzəv

¹⁴ Wíri nèn a yu léŋ Jesus virə́ʼ vidzə̀m, Fòn Heror yú sá. Wír ámóʼó wáa suúy ji Jesus və̀n dzə̀ á ŋkfə Joon woo Ŋgaà Wáyndzəv mo wù fəən ne fo kpu. Á kinyo ke kí yiìn, bo wù wáa ker vitaáví, a shoʼ a virom vee ben.

¹⁵ Aámóʼó suuy kév ji dzə̀ á ŋkfə Elija mo wù kfənen ne, ámóʼó ji dzə̀ á *ŋgaà ntum Nyùy wùmòʼ moo vee fó ŋgùʼ.

¹⁶ Heror yú vinyo vìn, e sùúy kfə́ ji dzə̀ á Joon woo Ŋgaà Wáyndzəv wo wun‑eè shoʼon kitú mo wù fəən fó kpu.

¹⁷ A kí‑iì dzə̀ jii, Heror‑iì tùm wíri, á koó Joon, e fìn e lav bìʼ Herodia woo wiíy fər və Filiv, wo wù‑uù cemen,

¹⁸ Joon wáa shaʼnín ji nsər yoʼ biìmé a ji wù faasi wiíy fər və.

¹⁹ Herodia ku nèn a ker ŋkfəə́mé wùn Joon, a tàʼ ji á yúyrí, e bó a buŋ dzə́ə,

²⁰ bìʼ fo Heror kù yòʼ‑oò ghvə́m Joon mo wù‑uù kiìn ji Joon dzə̀ wír woo là jay, e kfə̀n a dzə wir Nyùy. Wù nèn a bavtí Joon, a kòŋ fó a yuurí kinyo kfə́, é bo shilív shí kfə́n a saʼ wun.

²¹ Vishí ve Herodia vi nèn wìy bòŋ, Fòn Heror wáa ker kiŋkàʼ e wùn wòŋ wùn à və́ vé wòŋe, à vitú ve rər ví, à wír ve kuʼkìn veé Galeli foo fèyi adzə̀m, á wáa kuumé kishiíy ke vé‑eè dzəən wun.

²² Wàn Herodia woo wiíy nəə́ é lav, e cèŋ kidzə́n, kí bòŋ Fòn Heror wùn à vé kiŋgàné. Wù nèn sùúy e wan və̀y jii, «Ku dzə̀r kifá ke à koŋ ki, a fə̀m dzə̀ ka, é m nə́ŋsí wò sho.»

²³ Wù kfən lìʼ jii, «Aà dzə̀r ka e mò, a fə̀m dzə̀ kintoʼnìn kém ké wòŋ, bo m kù fó.»

²⁴ Wánlè wiíy və̀y nèn fəə̀, e dù, e dzə̀r e yè wov jii, «M suúy, é fòn nə́ŋsí mo e ka kí?» Yè wov bìnèr jii, «Ku dù, e dzə̀r kitú ke Joon woo Ŋgaà Wáyndzəv kí.»

²⁵ Wù nèn nyèŋ, e kfə̀n é lav, e sùúy e fòn jii, «Ku fò mo a dzə̀ kitú ke Joon woo Ŋgaà Wáyndzəv lèn e jùy.»

²⁶ Fòn yú kee shooy, e nèn a rə̀m ntéŋ, a bó yòʼ‑oò dzə̀ wù kfə̀n shàʼnín, bìʼ kilìʼ ke wù‑uù yiìn ne wùn wàn e və́ vé kiŋgàné si.

²⁷ Wù ku nèn tsə̀nsí nshìy rə ji wù du, e wìy a e kitú ke Joon kí. Wù nèn dù e lav sháŋ, e shòʼ kitú ke Joon,

²⁸ e wày é jùy, e wìy sho, e fò e wan və̀y. Wù sə́, e dù, e fò e yè wov.

²⁹ Wón lìm Jooné yiì yù ji á yùyrí ne a tàr wov, e nèn wìy, e lì dzə́n rə́, e dù, e dzəə̀mè.

Jesus yiír wír ansə̀kì atàn

³⁰ Aŋgàa ntum Jesus vìyi kfə́nkír, e yèn wun, e fèr vinyo vidzə̀m ve vé‑eè yii, kfə̀n yéʼey wíri shó.

³¹ Wù nèn sùúy aáwune jii, «Vèn wiy, é vèsən bar wún, e dù, e meèmè fo bó wíri yòʼ dzəə̀n.» A wù‑uù suuy bèy, bìʼ fo wíri‑iì wiy aneénín, ámóʼó lóo lò, ámóʼó wàa wìy, la wùn à wón və́ lìme yòʼ a ker ghán se dzə̀ á yìkír gheéy.

³² Wùn áwune nèn bàr wún, e nə̀ə́ e kikoŋ, a dù e kirə̀ʼ ke kí dzəə̀n ji nyaáŋ.

³³ Á lòo liysín kibáŋ, màŋgòŋ yén áwune, e kìíy, e nèn a nyeŋ e kiwuú kí, a tinér áwune, ntèʼ sidzə̀m si wáa fəə fo bàm. Á dù, e mèé fo, bo Jesus wáa wìy.

³⁴ Wù wìy, e lòo fəə fo kikoŋ, e yèn màŋgòŋ və̀y, kitú ki lùm wun, bìʼ fo áwune‑eè dzəə̀n moo njiì woo là nshìy. Wù nèn kèʼ, a yeʼéy áwune vinyo vinín.

³⁵ Ndzə lòo ji, wón və́ lìme kóʼtí, e sùúy sho jii, «Féne dzə̀ kwáʼ, a ghán sí bàŋrìn ne.

³⁶ Ku màʼtì lèn, é wíri du é laʼ see fó ghaŋ wùn á ntèʼ sí, e yùn vifá vév vé yi.»

³⁷ Jesus bìnèr kfə́ jii, «A dzə̀ kù yìír ven wír vee shoon.» Áwune dzə́r jii, «A dzə̀ vèr yìír é le? A dzə̀ á kù yùn vifá ve yi e shùu danari ghii baà, e bóo yiír wír vìn sho.»

³⁸ Jesus dzə́r jii, «Vèn kér ntuʼ se kiban sìsìʼ? Vèn du, e lèéy.» Á dù, e lèéy, e wìy, e sùúy ji ntuʼ se kiban si dzə̀ sitàn, a sə́ si dzə̀ fó ghaŋ a sibaà.

³⁹ Jesus nèn sùúy, wìr dzə̀m dzə̀ʼə̀m e kiyèʼ e viliŋ viliŋ.

⁴⁰ Áwune dzə̀ʼə̀m, vilíŋ vímóʼ ví wír wií wií, vímóʼ ví wír mtàn mtàn.

⁴¹ Jesus lì ntuʼ se kiban see sitàn wùn à sə́ see sibaà siy si, e lèéy yúv, e beèrì Nyùy, e bèʼtí kibán kìy, e fò ji wón və́ lìme jav, é wíri yí. Wù kfən lì sa sə́ see sibaà siy, e fò, á jàv e wìr dzə̀m.

⁴² Wìr dzə̀m yí, e kùrkír.

⁴³ Á báʼtí vimbéʼ ve kiban wùn à sə́ se sí‑iì berin sí ŋkaà nshòv sibaà e ghvə̀m.

⁴⁴ Màŋgòŋ wo wù‑uù yiin vifá ve yi vee shooy‑iì dzə̀ e gháʼán. Mbìv vilum cáʼ wáa dzə wír ansə̀kì atàn.

Jesus ghán e kitu ke ndzəv

⁴⁵ Jesus ku nèn sùúy e wón və́ lìme jii, á wáa dù shùy, e nə̀ə́ e kikoŋ, a liysín e mbìv laʼ yeé Besayda, é wun siíy, e shàʼtì wíri, aá wáa kfən a fo laʼ.

⁴⁶ Jesus siíy, e shàʼtì wír vìy, e nèn kòʼ é gwan, a bùnrì.

⁴⁷ Ndzə yiì sə̀n, a kikóŋ ki sì é ntìntìn kibàŋ, a Jesus kù dzə̀ə́ e kwaʼ wùn mòʼón.

⁴⁸ Wù kú a yen mo wón və́ lìme kiy kikóŋ, mum ntéŋ, bìʼ fo shwéri‑iì wiy fo mbìy kitávín, tsə́y kikóŋ. Ndzə yiì kàʼ, Jesus nèn a wìy, a wù ghán a dzə̀ é kitu ke ndzəv, gwaamè áwune gwáamen.

⁴⁹ Áwune yén, a wìr ghán e kitu ke ndzəv, e nèn a kwàʼtì ji dzə̀ á kimalèŋ, a rəəmé.

⁵⁰ Mo á yenen, a wù wiy bèy, wún wóví wáa yàʼ feyì. Jesus ku nèn yòŋ aáwune jii, «Dzə̀ mo, vèn ghár shilív shí, lá vèn yòʼ a fàn.»

⁵¹ Wù suúy bey, e nə̀ə́, e dzə̀ʼə̀m wùn áwune é kikoŋ, kinsəm ki ku nèn kpùrín. Áwune yén, shuu wóví yúm,

⁵² bìʼ fo vifií vév ví kù‑uù dzə̀ə́ vitsə́m, a bó á yòʼ‑oò lo səə̀m sa kinyo ke Jesus‑eè yiìn e ntuʼ se kiban si.

Jesus fer wíri é Genesarer

⁵³ Áwune líysín kibáŋ, e meèsín e mbìv wòŋ ye á yoŋ ji Genesarer, e tsəə̀r kikóŋ fo.

⁵⁴ Á fəə́ fó kikoŋ, wíri ku nèn kìíy Jesus,

⁵⁵ a nyeŋnín, a fèr ntèʼ see fó sidzə̀m. Wíri yúʼnín, a lì aŋgàa yàsí, a toór, a dù sho fo vé‑eè yú, a Jesus dzə̀.

⁵⁶ A wù fə̀m‑eè du fèé, kìn wù du a dzə̀ é mvə̀mlaʼ, kìn wù du e ŋgvə̀n kwaʼ, kìn wù du e ntèʼ, wíri kù a dù, a neèr vé yàsíi é virə̀ʼ vé way, Jesus lòo shaà, á wàa lon ji wù ku màʼtì, é vé yàsíi wáa kùm a dzə̀ á shúu və́ ndzə̀y. Wíri nèn a kùm, a bonén adzə̀m.