Maak 4 - ŊWÀʼ NYÙY

Ŋgàn wìr wo wù maʼ ŋgoòy

¹ Jesus kfən wìy kèʼ, a yeʼéy wíri é ghaa kibaŋ keé Galeli. Màŋgòŋ wìy, e bànén e wùn ghaŋ nyanyày. Wù nèn nə̀ə́, e dzə̀ʼə̀m a dzə̀ é kikoŋ e ndzəv, wíri wáa tiy kév é ghaa ndzəv.

² Wù wáa yeʼéy áwune vinyo vinín, a yòv a dzə̀ é ŋgàn.

³ Wù fèr kímóʼ kí jii, «Vèn yuúrí, e yù, wìr‑iì dù, a màʼ ŋgoòy kifa e sum.

⁴ Wù lòo màʼ, símóʼ sí túmkír é dzəə, menə́n mè wìy, e tàyrí see shooy.

⁵ Símóʼ see ŋgoòy si túmkír é woʼ, a nsay dzə̀ fó shishàr. Á lòo kom, sí gòʼ e yuv, e nèn tàv fəə̀.

⁶ Yii bèy, shùy kèʼ bán, sí nèn yòvrí, e yùm, bìʼ fo gháŋé yòʼ‑oò dzəə̀n.

⁷ Símóʼ see ŋgoòy si túmkír é mvə̀m vikwìíy. Vikwiíy ví nèn kùy, e shaàsìn, vifá vee shooy vi saásí, e làa yòʼ dzə́ə wayrí.

⁸ Símóʼ see ŋgoòy si nèn tùmkír e nsay ye juŋ, e fəə̀, e kùy, e wàyrí kijuŋ. Á dù fomóʼó, e kàv vifá kilíŋ mtaár, e shaà mo vé‑eè wayin, e kàv fómóʼó kilíŋ mntuùfú, e dù fomóʼó, e kàv kilíŋ wií.»

⁹ Jesus fèr bèy, e màysì jii, «Vituʼùr ví dzə̀ vibaà, kímóʼ kí tén fó yu, kímóʼ kí yù.»

Kinyè ké kinyò ke Jesus súŋnin a dzə̀ é ŋgàn

¹⁰ Wíri lòo taʼrí fo Jesus ghaŋ, ámóʼó gòʼ wùn à wón və́ vee nshòv sibaà e ghvə̀me, e sìíy, e dzə̀r shó ji wù ku naàrì a nsàv ŋgàn ye wù kì màʼàn rə̀y.

¹¹ Jesus bìnèr jii, «Nyùy yiì ne, ven víne kiíy sáʼ rə́ ye yí dzəə̀n é kilìr. A wír ve bó á yòʼ dzəə̀n é mvə̀m saʼ foo fène kù yú kév cáʼ ji ŋgàn.

¹² A kí dzə̀ bey ji kí fíʼ a dzə mo vé‑eè saŋen jii: «Áwune kù wíy a leéy leeyín, e làa yòʼ a yen. Áwune kù wíy a yuurí yuurín, e làa yòʼ a yu. Aá yii bèy, fó kfən fo Nyùy, é wù laysin ajay vév.»

Nsàv ŋgàn yee kùm ŋgaà ŋgoòy

¹³ Jesus lò, e dzə̀r e wír vìyi jii, «Vèn méŋ nsàv ŋgàn rə̀n, é vèn wìy yèe, e bóo kiíy símóʼ sí?»

¹⁴ Wù nèn a naàrì jii, «Wìr wo wù maʼ ŋgoòy kifa e sum dzə̀ wír wo wù fiʼtì kinyo ke Nyùy.

¹⁵ Ŋgoòy ye yì tumkin é dzəə dzə̀ wír ve á yú kinyo ke Nyùy, Satan nèn wìy, e fə̀ə́r kinyo kee shooy fo áwuné meliv.

¹⁶ Ŋgoòy ye yì tumkin é woʼ dzə̀ wír ve á yú kinyo ke Nyùy, á kù nèn biìmé e kishéʼrì ki, e làa yòʼ way melív mev shó.

¹⁷ Áwune nén a dzə moo kifá kee là gháŋ, e làa yòʼ a tiytíy. Ŋgeʼ wùn à vibàn ví keʼ bìʼ kinyo ke Nyùy kee shooy, áwune nèn bìn ndzə̀m.

^18-19 Ŋgoòy ye yì tumkin é mvə̀m vikwìíy wáa dzə wír ve á yú kinyo ke Nyùy, á wàa kwàʼtì a dzə̀ dzəʼə̀m yeé nsay fèn, a tàʼ vikuʼùy, e kfə̀n a siimé vifá vímóʼ ví vinín. Kí nèn yiì, kinyo ke Nyùy ki bùŋ kirə́ʼ aáwuné meliv, e lày kisáŋ.

²⁰ Ŋgoòy ye yì tumkin é nsay ye juŋ nén a dzə wír ve á yú kév kinyo ke Nyùy, á biìmé, a yiì mo kí dzəə̀n. Ámóʼó wàa yiì mensəʼ mtaár, ámóʼó mensəʼ mntuùfú, ámóʼó e dù, e meé mensəʼ wií.»

Ŋgàn yee kùm lam Sáʼ Nyùyi‑iì dzə̀ é kilìtì, Jesus fəə́r fó meranén

²¹ Jesus nèn dzə̀r jii, «A dzə̀ wír, wù sə̀ʼ lam, e kfə̀n lì mbìʼ, e sùm sho, kìn wù wáy a dzə̀ é ntsə́nkun á? Wù kù yii tiir a dzə̀ é kitu ke kifa.

²² Vèn wáa kiíy jii, vinyo ve vé‑eè lìtìn vidzə̀m, vé‑eè lìtì ji ví fíʼ wìy yènsín, é ve ví dzəə̀n fó mesənér vidzə̀m vi fəə́sín fó meranén.

²³ Vituʼùr ví dzə̀ vibaà, kímóʼ kí tén fó yu, kímóʼ kí yù.»

²⁴ Wù kfən sùúy jii, «Vèn lóo yuurí kinyo ke Nyùy, vèn wàa kiíy, a səə̀m ke kí dzəə̀n, a kiíy jii, mo wìr səəmè, kù dzə̀ mo Nyùy yíi siìr e ŋgaàŋ, e kfə̀n dzə̀sì.

²⁵ Wìr wo wù kér kifá, á yíi dzə̀sì, wìr wo wù buŋen, aá maysi shishàr wo wù kérí, e gèr gérín.»

Ŋgàn ŋgoòy ye yì kúyí

²⁶ Jesus kfə́n a fèr kímóʼ kí jii, «Sáʼ Nyùyi dzə̀ moo ŋgoòy kifa ye wìr wayin é sum.

²⁷ Mo wù wayin, e nèn dù, a yiì vinyo və́, a shaà, a shiíy, ŋgoòy rə̀y ku sòv, e fəə̀, e kèʼ, a kuy, a bó wù yòʼ kì kifá ke kí yii, é bo yì wáa kuy.

²⁸ A kù yii nsay, bo yì wáa kuy. Ke kí fəə́ fo mbìy ki dzə̀ vav, ke kí batin, kitiír wùn à kitú ki. Ke kí jòʼsìn kí wáa dzə ŋgoòy.

²⁹ Vifá vìy vi bíyí, ŋgaà sùm nèn tùm kfə́ a dzə̀ wíri ji ghán sí ghèén ne, á du, e kàv á vifá və́.»

Ŋgàn ŋgoòy shishùr

³⁰ Jesus nèn kfə̀n dzə̀r jii, «A dzə̀ á fìʼsìn sáʼ Nyùy moó le? A dzə̀ á fèr kimfèr kiné kí ke dzə̀ kí naàrì?

³¹ Sáʼ Nyùyi dzə̀ moo ŋgoòy shishùr shímóʼ shí, a yì ŋeèrí feyì, e shaà ŋgoòy se vifa vímóʼ ví é nsay fèn.

³² Yii bèy, á wáy e nsay, yì fəə̀, e kùy, e dàr, e shaà tíŋ se vifa vidzə̀m. Tám sə́ sí kfə̀n rə̀ŋsìn mo dzə̀ menə́n mè wàa bàʼrì sho fo kindzə̀ə́ndzəm.»

³³ Kù dzə̀ mo Jesus‑eè fiʼtì kinyo ke Nyùy e wíri, fiʼsìn e vimfèr vi vinín moo vin, e meé mo dzə̀ áwune yù.

³⁴ A bó yòʼ‑oò dzə̀ wù sùúy kinyo aáwune, a bó wù yóv a dzə̀ é ŋgàn. Wù yíi lóo dzə wùn à wón və́ lìme, wù nèn a màysì, a sanrí nsàv ŋgàn see shooy sidzə̀m.

Jesus wám kinsəm

³⁵ Jesus yéʼéy wíri é kishiíy fóo fèy, yiì lòo dzə e ŋkuùr, wù suúy e wón və́ lìme jii, «Vèsən túmsín kibáŋ, e kfə̀n é ndzən və̀sə.»

³⁶ Áwune nèn màʼtì màŋgòŋ wo wù‑uù dzəə̀n fó, e nə̀ə́ e kikoŋ ke Jesus kì dzə́ sho súŋnin e wíri kiy, a dù. Vikóŋ vímóʼ ví wáa jùmrì fo bàm.

³⁷ Á lòo dù, kinsəm ki nèn sàsìn, a shaà kitávín, a tsəy ndzə́v, mendzə́v mè wáa liy, a nəə́ e kikoŋ, a tàʼ e run.

³⁸ A Jesus kì neèr kitú kfə́ é mbuùy, a buuné e bǎm kikoŋ. Wón və́ lìme wáa yìm wun jii, «Ŋgaà Yèʼey, vèsən lay e ndzəv, la à yòʼ a ghay à?»

³⁹ Jesus yìmèn, e wàm kinsəm kìy, e kfə̀n wàm ndzə́v jii, «Tiím ji nyaáŋ.» Kinsəm ki kpúrín, ndzə́ví rə̀sìn, a tiy ji nyoòŋ.

⁴⁰ Wù nèn dzə̀r e wón və́ víyi jii, «Vèn kì fan ka? Vèn yòʼ sí wáy shilív e mǒ wùn a?»

⁴¹ A wún wóví kù beéme beèmén, aá gháynin jii, wìr və̀n sà dzə̀ woó le wo ndzə́v wùn à shwéri yúnin wun a?