Maak 3 - ŊWÀʼ NYÙY

Jesus fér wír e *kishiíy ké bam

¹ Jesus kfən dù, e nə̀ə́ e ŋgày bùnrì yìmòʼ, a wìr wùmòʼ dzə̀ fó, a kiwó ki kpú ne.

² Wír ámóʼó nèn a shweʼ ji á koóy á lor wóo lor Jesus sho, a leéy ji a wù lòo dzə, e fèr wír woo shooy e kishiíy ké bam, bo áwune kòóy ne a kinyo.

³ Jesus nèn sùúy e wìr wo kiwó ki‑iì kpuun və̀y jii, «Lò é yuv, e kòʼtí fo mbìy.»

⁴ Wù kóʼtí, Jesus dzə́r e wíri jii, «Kinyo ke nsər biíme ji wìr yii é kishiíy ké bam ki dzə̀ kiné kí? Ji wù yii kinyo ke juŋ ki moo ke bi kí á? Ji wù luŋer wír, mo wù yúyrí yuyrín á?» Áwune nèn gòʼ kisə́sə.

⁵ Kinyo kee shooy ki bír Jesus, wù wáa yu nyár bìʼ shilív shév she bi shí. Wù leéy áwune sí sí, e nèn lò, e sùúy e wìr və̀y jii, «Nàsì kóy wóo.» Wù nàsì, kiwó kfə́ kí kfə́n fó.

⁶ Kí gháʼ wír veé mbìv *Farasi, á ku nèn fəə̀ fó ŋgày bùnrì foo fèy, e dù, a kar menàŋ wùn à wír Fòn Herori mo dzə̀ á yiì, e bóo yuyrí Jesus.

Wíri lo virə́ʼ vidzə̀m, wiy, yén Jesus

⁷ Jesus wùn à wón və́ lìme nèn lò, a dù e ghaa kibaŋ keé Galeli, wíri lò fo Galeli foo fèy aneénín e wùn bàm.

⁸ Ámóʼó kfən wìy sa fo Jerusalem wùn à ntèʼ seé wòŋ woo Juda símóʼ sí sidzə̀m. Ámóʼó wìy fo mbìv wòŋ yee Idumia, ámóʼó fó ndzə̀n ndzə̀v yee Jordan, ámóʼó fó ghaa Taya wùn Sidon. A màŋgòŋ və̀n‑eè wiy bèy, bìʼ fo vé‑eè sí yú vinyo ve Jesus yii vidzə̀m, e nèn a tàʼ ji á yén á wír woo shó.

⁹ Wíri kùʼ e ŋàŋ, Jesus suúy e wón və́ lìme ji á taʼ kikóŋ, é wun nəə́ shó, fo wíri wáa far a wun.

¹⁰ A vé‑eè fárnin bèy, bìʼ fo wù‑uù sí fer wíri anín, vé yàsíi nèn a ghem wíri, a dù, a kùm wun ji á fíʼ a bonén.

¹¹ Wír ve *anyùyi‑iì jívir áwuneé wáa yen Jesus, a gbù e si wo, anyùyi wáa yiì, á wáa rəəmé jii, «À dzə̀ Wan Nyùy.»

¹² Á lóo rəəmé bèy, wù nèn a kàntì anyùy vìy kitávín ji lá á yòʼ a suúy a ji wun dzə̀ Wan Nyùy.

Jesus shóʼtí *aŋgàa ntum və́ vee nshòv sibaà e ghvə̀m

¹³ Jesus lò fo fo, e kòʼ é gwan wùmòʼ, e yòŋrì wír ve wù‑uù taʼ ji və́. Á wìy,

¹⁴ wù shóʼtí wír nshòv sibaà e ghvə̀m ji wáa dzə a aŋgaà və́ ŋgoo, é wun wáa túm áwune, aá wáa ghan, a fìʼtì a kinyo ke Nyùy.

¹⁵ Wù kfən fò áwune vitaáví, á wáa kàntì anyùy ve á jívir wíri, á wáa màʼtì áwune.

¹⁶ A wír ve wù‑uù shoʼtin víne dzə̀ jii, Simon wo Jesus‑eè yoŋ yír yímóʼó ji Pita,

¹⁷ Jeem wùn fər və Joon vee wón Sebedi ve wù‑uù yoŋ yír yímóʼó ji wón kishèv.

¹⁸ Aámóʼó dzə̀ Andru wùn Filiv, à Batolome, à Matio, à Tomar wùn Jeem woo wan Afiyur, à Taadiyor, à Simon woo ntom wòŋ,

¹⁹ e lì Judar Iskariyor wo wù‑uù loòn, e kàr menàŋ e Jesus bàm.

Wíri ghvəvrì Jesus ji ŋgaà ŋgoo Satan

²⁰ Jesus dù fo laʼ, wíri kfən bàʼtí fo aneénín, la wùn à wón və́ lìme yòʼ a ker ghán se dzə̀ á yìkír gheéy.

²¹ Kfə́ə rəə́ yú, e nèn a suúy ji kitú ki waà sí kárí. Á du á, e dù, e lì.

²² A wír ve vé‑eè duŋrì nsər se Nyùy ámóʼó kì wìy fó Jerusalem, aá suuy ji nyùy wo á yoŋ ji *Beseber wo dzəə̀n fon anyùy dzə̀ á e Jesus wùn. Wù sə́ vitaáví a dzə̀ á fo fo, e bó a kàntì *anyùy, aá wáa màʼtì wíri.

²³ Jesus nèn yòŋ wír vee shooy, a yòv lám aáwune jii, «A dzə̀ Satan kfə̀n a jùm kitú kfə́ é le?

²⁴ A woŋe lò, e jàvsìn, a taŋ kóy, bo bó yòʼ dzə̀ wú wìy tìím.

²⁵ A wír veé laʼa kfə̀n lò, e jàvsìn, a taŋ kóy, bo bó yòʼ dzə̀ láʼ yee shooyi wìy tìím.

²⁶ A Satan lò, e kfə̀n a fùnèn kitú kfə́, bo wù jàv ne, a bó yòʼ dzə̀ wù wìy tìím.

²⁷ Yii bèy, a bó yòʼ dzə̀ wìr nə̀ə́ e ntav lav, e shòŋ vifá və́, a bó wù kúr ntav woo shooy ŋkuŋén, e bóo shoŋ.

²⁸ «Vèn wáa kiíy rúrú jii, a dzə̀ Nyùy wìy làysìn vinyo ve bi ví ve wíri yii vidzə̀m, e kfə̀n làysìn liy se wíri kuu wun sho,

²⁹ a bó yòʼ dzə̀ wù wìy làysìn jay wìr wo wù kuu kfə́ a dzə̀ Kiyoy ke Ranén kí, bìʼ fo ŋgaàŋ yii a dzə̀ kinyo ke bi kee là may.»

³⁰ A Jesus suuy bèy, bìʼ fo wír vee shooyi‑iì suuy jii, wù sə́ vitaáví a dzə̀ á fo anyùyi.

Yìy à Jesus wùn aàfə́r vəə́ wìy, a tàʼ wun

³¹ Yìy à Jesus wùn aàfə́r vəə́ nèn wìy, e tìím fo ndzə, e tùm wír ji á jaŋ á Jesus.

³² A wùn à wíri kì dzə́ anín, á suúy shó jii, «Yè won wùn aàfə́r vée taʼ wò fo ndzə.»

³³ Wù bìnèr jii, «Yè wor wùn aàfə́r vémé dzə̀ ala?»

³⁴ Wù leéy wír ve vé‑eè dzəə̀n e wùn ghaŋ, e kaàrí, e tàr, e sùúy jii, «Yè wor wùn aàfə́r vémé vìne.

³⁵ Wìr wo wù yii kinyo ke Nyùy taʼ ji wù wáa yiì, dzə̀ wo dzəə̀n yè wor, e kfə̀n a dzə fə́r wom, a dzə jemèr yem.»