Maak 2 - ŊWÀʼ NYÙY

Jesus fer ndzə́m

¹ Vishiíy ví lòo tumsín, Jesus kfə́n é ntèʼ yee Kapeenahum. Wíri yú ji wù sì á fo laʼ,

² e nèn wìy, e bàʼtí e wùn shùu lav aneénín, la fó tiím yòʼ a dzə. Wù wáa fìʼtì kinyo ke Nyùy aáwune.

³ Wír ámóʼó nèn a wìy, a vee akwèe toór wír, a shwín sí ndzə́m ne, a dù ji á yén Jesus sho.

⁴ Wíri kùʼ e ŋàŋ, kí nèn ghàʼ fo á nəə́ fó shùu lav, e mèé e Jesus ghaŋ. Á nèn kòʼ dzə́ə fó yuv, a shùʼ kikfə́v ke lav. Á shùʼ, e nèn sə̀yír ndzə́m və̀y e Jesus si, e kifa ke wù‑uù néŋ sho.

⁵ Jesus yén mo áwune wayin shilív e wun wùn é ŋàŋ, e nèn sùúy e ndzə́m və̀y jii, «Ŋkàr yem, á làysìn ne vinyo vé ve bi ví.»

⁶ Wír ve á yii duŋrì nsər Nyùy ámóʼó wáa dzə fo, á yú bey, e nèn a ghvə̀vrì fo áwuné bvə̀m jii,

⁷ «Wìr və̀n súŋnin e le ben? Wù táŋ kilíŋ ke dzəə̀n ké Nyùy. A dzə̀ làysìn la vinyo ve wìr ve bi ví, e shaà Nyùy?»

⁸ Jesus ku nèn kìíy kinyo ke vé‑eè kwaʼtì, e dzə̀r jii, «Vèn kér lám woo bey e bvə̀m bìʼ ka?

⁹ Vèn yén ji m mèér a dzə̀ ké cér ki fó shuù fó suúy e ndzə́m və̀n ji á làysìn ne ajay və́, a bó yòʼ dzə̀ m sùúy ji wù li kifá ke wù néŋ sho, a dù à?

¹⁰ A m kù suuy lèn, e dìn e vèn ji ŋgaà wo yírí dzəə̀n *Wanwìr kér vitaáví é nsay fèn fó làysìn ajay wìr.» Wù nèn sùúy e ndzə́m və̀y jii,

¹¹ «M suuy e wò ji à lo á e yuv, e lì kifá ke à néŋ sho kìy, a dù fo laʼ.»

¹² Wù ku nèn lò e yuv, e lì vifá və́, a dù, a wìr dzə̀m yéné. Á wáa ker gháʼ, a burí Nyùy, a suúy jii, «Vèr yòʼ‑oo yií ne yèn kinyo kímóʼ kí moo kin.»

Jesus lí Levi ji wán və lìm

¹³ Jesus kfən wìy dù e ghaa kibaŋ keé Galeli, màŋgòŋ wìy, e yèn wun fo, wù wáa yeʼéy áwune.

¹⁴ Wù yiì lò, e lòo dù, e yèn wír wùmòʼ, aá yoŋ ji Levi woo wan Afiyur, a dzə̀ wír wo wù yii báʼti mbàm se bàràʼ, a wù dzə́ e wùn kirə̀ʼ ké lìm. Jesus suúy shó jii, «Wìyi, é wòsò wáa ghan.» Levi ku nèn lò, wùn à Jesus wáa ghan.

¹⁵ Wáa dzə e kishiíy kímóʼ kí, Jesus wùn à wón və́ lìme dù, a yikír e Levi lav. Wír ámóʼó wáa yikír wùn áwune anín, a dzə̀ ve vé‑eè koó mbàm se *bàràʼ wùn à wír ámóʼó ve wír veé Judàa yii nyaysì nyàysìn sá ji ve bií, bìʼ fo wír vee shooyi‑iì rə́si ghán e Jesus bàm anín.

¹⁶ Wír ve vé‑eè tíy e mbìv *Farasi ámóʼó wáa dzə fo, a dzə̀ ve á yii duŋrì nsər Nyùy. Á yén, a Jesus yíkir wùn à wír vee shooyi, e dzə̀r e wón və́ lìme jii, wù sà yíkir wùn à kfə́ə wìr vìne bìʼ ka á?

¹⁷ Jesus yú, e yòv lám aáwune jii, «Wír ve tavkíné yòʼ yii taʼ ŋgaà shìv, kù yii taʼ vé yàsíi. M yòʼ wìy e nsay fèn ji m kfə́n a bi wír ve á yén vitú vév ji vé Nyùyi. M wìy ji m bí a dzə̀ vé jayi.»

Á dzə́ti kinyo kee kùm jíŋ ye á lem bìʼ Nyùy

¹⁸ Wáa dzə e ghan símóʼ sí, a wón lìm Joon wùn à wír veé mbìv Farasii lem jíŋ bìʼ Nyùy. Wír ámóʼó nèn wìy, e dzə̀r e Jesus jii, «Wón lìm Joon wùn à wón lìm wìr veé Farasii lem jíŋ, la vé vee wóné yòʼ a lèm bìʼ ka?»

¹⁹ Jesus bìnèr jii, «A dzə̀ wíri dù vijín, wùn à lum jìn wáa dzə, á kfə̀n a leʼ vifá ve yi à? Aá dzə̀ wùn à lum jìn, bo bó yòʼ dzə̀ á kfə̀n a lèm jíŋ.

²⁰ Yii bèy, ghán sí wíy gheén, á faasì lum jìn woo shoon fo áwune, aáwune nèn a dìy, a lèm jíŋ e ghan fóo fèy.

²¹ «Bó wìr yòʼ yii li kinsàr ke ndzə̀y ke fíy ki, tsə́mri ndzə̀y se mvə sí shó. A wù yiì bèy, bo se fíy sìy si yíi màysì, e saàsì se mvə sí mo sí ŋwaan ne, é kirə́ʼ kiy ki bír, e shaà mo kí‑iì dzəə̀n.

²² «A bó yòʼ dzə̀ sá wìr wày meluʼ me fíy mè e vitem vee júv ve mvə ví. A wìr wày shó, bo meluʼ me yíi fə̀ʼ, e waarí vindzə̀n ve jùv vìy, é meluʼ wùn à vitém vi tátí, e lày kisáŋ. Meluʼ me fíy mè kù yii dzə́ wùn à vitém ve fíy vi.»

Jesus naarì kinyo ke *kishiíy ké bam

²³ Wìy lòo dzə e kishiíy kímóʼ kí, Jesus wáa shaà e mvə̀m sǔm saŋ wúmóʼó, a dzə̀ kishiíy kév ké bam. Wón və́ lìme nèn lò, a tinrí vitú vímóʼ ví, a səə́y, a kfər.

²⁴ Wír veé mbìv *Farasi ámóʼó yén, e dzə̀r e Jesus jii, «Wón vée yii kinyo ke kí kér nsər fo wìr yii é kishiíy ké bam bìʼ ka?»

²⁵ Jesus lò, e dzə̀r kfə́ jii, «Vèn yòʼ‑oo yií ne yòŋ fo ŋwàʼ mo jìŋ‑eè loòn, e yàr Fòn Davir wùn aàŋgaà və́ ŋgoo, wù yiì à?

²⁶ Yì‑iì dzə̀ é ghan se Abiyatar‑iì dzəə̀n taà cù wo kuʼùn, Davir nəə́ é lav cù, e lì kibán ke vé‑eè cuùn Nyùy sho, e yì, e kfə̀n fò sá aŋgaà və́ ŋgoo, a kí kér nsər fo wìr yí, e shaà taà cù.»

²⁷ Jesus nèn kfə̀n sùúy e wír vìyi jii, «Nyùy‑iì lèm kishiíy ké bam ji kí wáa sə wír. Wù yòʼ‑oò bòm wír ji wù wáa yu a dzə̀ fo kishiíy ké bam ki.

²⁸ Kí nén a dzə jii, dzə̀ ŋgaà wo yírí dzəə̀n *Wanwìr wo dzə̀ wù wày kinyo ke dzə̀ á yiì é kishiíy ké bam.»