Maak 15 - ŊWÀʼ NYÙY

Jesus tíy e Payler woo ŋgaà saʼ *bàràʼ si

¹ Ndzə bvəə́shí, e ràn, vitú ve atàá cù wùn à vé wòŋe, à wír ve vé‑eè duŋrì nsəri, à vé saʼ adzə̀me ku nèn dzə̀ʼə̀m, a sìysì mo dzə̀ á yiì e Jesus. Á nèn lò, e kùr Jesus, e dù, e yèn Payler sho.

² Wù dù, e dzə̀r e Jesus jii, «À dzə̀ Fon wìr veé Juda à?» Wù bìnèr jii, «À sùúy ne.»

³ Vitú ve atàá cù vi wáa toy vinyo e bàm wó vinín.

⁴ Payler kfən dzə̀r shó jii, «À yòʼ yú vinyo ve á tóy e wò bàm vin à? Bó à yòʼ kér kinyo kée binèr à?»

⁵ La Jesus yòʼ dzə́ə a ghay gheéy. Kí tárír Payler.

⁶ Mo yii lóo dzə e ghan sé Ŋkǎʼ Yáʼayshaà sìn, wír veé Judàa lòn wir sháŋ wo á lóné, Payler fə̀ə́r.

⁷ Wáa dzə e ghan sin, a wìr wùmòʼ dzə̀ é sháŋ, a yírí dzə̀ Barabar, a dzə̀ wír fo ŋgoo wìr ve vé‑eè wayin é sháŋ, a vé‑eè yúyri wíri ji á fíʼ màʼ sáʼ yeé wòŋ.

⁸ Màŋgòŋ nèn wìy, a lon fo Payler jii, wù ku yiì rì a mo wù yii yii.

⁹ Payler dzə́r jii, «Vèn koŋ ji m fəə́r a dzə̀ Fon wìr veé Juda və̀n à?»

¹⁰ A wù‑uù dzə́r bèy, bìʼ fo wù‑uù kiìn kijuŋ ji vitú ve atàá cù vi ghèʼ Jesus ghéʼen, e bóo lì, e wìy sho e wùn si, a toy e vinyò.

¹¹ Yii bèy, vitú ve atàá cùu kú a bayír màŋgòŋ və̀y ji á wáa lon a ji wù fəə́r a dzə̀ Barabar, e fò aáwune.

¹² Payler yú, aá sí lón a dzə̀ Barabar, wù dzə́r jii, «M yée le lèn e wìr wo vèn yoŋ ji Fon wìr veé Juda və̀n?»

¹³ Wíri nèn a waamé jii, «Á tá taán é kintam.»

¹⁴ Payler dzə́r aáwune jii, «Vèn suuy bèy bìʼ ka? Wù jày ka?» Áwune ku màysì, a waamé waamén jii, «Á tá taán é kintam.»

¹⁵ Payler nèn a tàʼ ji wun yii, é wún wìr veé Judàa fíʼ a bòŋ. Wù nèn fə̀ə́r a dzə̀ Barabar fo lav sháŋ, e fò aáwune, e fò Jesus e vé rərí ji á tám e ŋgwàne, e lì, e dù, e tà é kintam.

Vé rərí shoor Jesus

¹⁶ Vé rərí nèn lì Jesus, e nə̀ə́ sho e mvə̀m ntoʼ, e bàʼtí shúu rər wo wú shiy ntoʼ yee shooy e dzə̀m.

¹⁷ Áwune báʼtí, á lì kikúm ké afòn, e màʼ e Jesus wùn, e kfə̀n kaàrí kicí ké njoŋ ki, e səə̀nè e kitu wo ji ntáráʼ.

¹⁸ Á yiì bèy, e nèn a wìy e si wo, a bùn, a kwa jii, «Caamfoò, Fon wìr veé Juda.»

¹⁹ Á wáa lò, a dzə̀v fo kitu e ŋkoó, a cu mentíy e wùn wó, e kfə̀n a gvəʼtí e si wo, a bùn.

²⁰ Áwune shoór Jesus bèy, e màysì, e nèn shòʼ kikúm ké afòn kìy fo wùn wó, e màʼ sə́ see ndzə̀y, e lì, e fəə̀ shó fóo dù, e ta e kintam.

Á tá Jesus e kintam

²¹ Á lòo dù, wùn à wìr wùmòʼ tárnín, a wù wiy fo kwaʼ, a yír rəə́ dzə̀ Simon woo tàr à Aleŋsanda wùn Rufur, a dzə̀ wír wo wù‑uù yiìn lò fo Serina. Á kàn, wù bèʼèy kicí ké kintam ke Jesus.

²² Wùn à Jesus nèn a dù e kirə̀ʼ ke á yoŋ ji Gorgota, a dzə̀ ji kitú ke wìr.

²³ Á meé fó, e lòo fo meluʼ e Jesus, aá bíŋrí ne e kifú ke á yoŋ ji *mer, a kí yii rəər nyár, wù tén.

²⁴ Á nèn tà wun e kintam, e lì ndzə̀y sə́, a tsəm kàŋ sho ji á fíʼ jàv.

²⁵ A ghán se vé‑eè taan Jesus e kintam sìn si‑iì dzə̀ shúy bvə̀ʼə̀ kijàvndzə.

²⁶ Á sáŋ njò rə, e bàrír e kintam foo fèy, a yì dzə̀ jii, «Fon wìr veé Juda.»

²⁷ Á kfən tàm sá ashóŋ abaà é vici vímóʼ ví e Jesus ghaŋ, wùmòʼ e wùn koy yìyí, wùmòʼ é koy ŋkoòvìi. [

²⁸ Á yiì bèy, kinyo ke vé‑eè saŋen é Ŋwàʼ Nyùy jii, «Vé‑eè wày wun aàshóŋé ŋgoo,» ki nèn ghèén.]

²⁹ Jesus wáa ker e kintam, wíri wáa shaà, a mèʼ kitú, a te lám é wùn wó jii, «Èhéè, wò‑oò yíi kèr lav cù, e bom ye sən vishiíy vitaár,

³⁰ sə́ ri kitú ké ki lèn, e sə̀ʼə́y fo kintam.»

³¹ Vitú ve atàá cù wùn à wír ve vé‑eè duŋrì nsər Nyùyi wáa sheʼ sa wun, a kfə̀ynìn jii, «Wù‑uù ghán, luŋèr wíri, a bó yòʼ dzə̀ wù lùŋèr kfə́ kee kitú.

³² Wun woo *Mfə̀ə́r woo Fon wìr veé Juda, wù sə́ʼə́y ri fo kintam, é vèr yén, e wày shilív é wùn wó.» A wír ve vé‑eè tamen e Jesus ghaŋe kù shur sa wun e liy si bey.

Kpú Jesus

³³ Yiì lòo dzə e ntìntìn shùy, woŋe sàsìn, e sə̀n e dzə̀m, e meé shúy sitaár.

³⁴ Wáa dzə shúy sitaár, Jesus tóŋ kitávín jii, «Eloy, Eloy, lema sabaktani.» A dzə̀ jii, «Nyùy wom, Nyùy wom, à màʼày mo ji ka?»

³⁵ Wír ve vé‑eè tíy fo ámóʼó yú, e sùúy jii, «Vèn yú, wù sí jaŋ Elija.»

³⁶ Wìr wùmòʼ nyéŋ, e dù, e wày kùshá é kiŋkway ke melùʼ, e sòv e kitu ke mbàŋ, a tsənsí ji Jesus wàá nyoóŋé, a suúy e wíri jii, «Vèsən wáa shìy rì, kìn Elija yíi wìy, e səʼə́r wun fo kintam.»

³⁷ Yii bèy, Jesus lò, e tòŋ kitávín, e nèn shèm.

³⁸ Mo Jesus kpuun, ndzə̀y se vé‑eè tinmen lav cù sho si ku nèn tòʼnín mbìv sibaà, e kèʼ fo kùy, e mèé fo tsən.

³⁹ Kitú ke vé rər ke kí‑iì tíy e Jesus ghaa kintam ki yén kpú ye Jesus kpuun, e sùúy jii, «Wìr və̀n‑eè dzə̀ rú Wan Nyùy.»

⁴⁰ Vikìy ámóʼó wáa tiy sa fo kwaʼda, a leéy. Aámóʼó dzə̀ Maria Magdalen, wùn à Salome, à Maria woo yìy à Joser wùn Jeem wo á yoŋ ji wo terí.

⁴¹ A dzə̀ vikìy ve vé‑eè ghán wùn à Jesus, sə́ wun e ghan se wù‑uù dzəə̀n é Galeli, aá tíy fo wùn à vikìy ámóʼó anín ve wùn áwune‑eè loòn e Jesus bàm, e wìy e Jerusalem.

Á dzəə́mé Jesus

^42-43 Yiì lòo dzə e ŋkuùr, wìr wùmòʼ wìy, aá yoŋ ji Joosev, a dzə̀ wír woó ntèʼ yee Arimatia. Wù‑uù dzə̀ wír wùmòʼ fo vé wòŋé mvəm, a wíri ghvə́m wun feyì, kfə́n a dzə wír, a wù‑uù shiy ghán se Nyùy wíy a saʼ vifon və́ é ndzə fèn. Mo yì‑iì dzəə̀n kishiíy ke vé‑eè sí báʼti *kishiíy kév ké bam, a kí‑iì yíi kèʼ, a shùy nəə́ ne, Joosev nèn kùr shilív, e dù, e yèn Payler, a lon dzə́n Jesus ji wun du, e dzəə̀mè.

⁴⁴ Payler yú, a meŋnín jii, «A dzə̀ kí wàa dzə rú ji Jesus tàv ne kpù ben à?» Wù jàŋ kitú ke vé rər ke kí‑iì duùn e Jesus kìy, e dzə̀r ji Jesus sà kpù ne a?

⁴⁵ Payler yú, a Jesus kpú ne rú, wù nèn biìmé ji Joosev du ri, e shàʼàr a dzə́n.

⁴⁶ Joosev lò, e dù, e yùn kintsə̀m ké ndzə̀y, e sə̀ʼə́r dzə́n Jesus, e boò shó. Wù boó, e lì, e dù, e wày é sày ye vé‑eè bùʼùn é wǔn kilan, e dòm kilán, e sə̀tí shúu sày sho.

⁴⁷ Wù wáa way bèy, a Maria Magdalen wùn Maria woo yìy à Joser yén fo wù wáyí.