Maak 14 - ŊWÀʼ NYÙY

Á táŋ menàŋ me Jesus

¹ Ghán sí nèn wìy ghèén, a vishiíy ví bér ne vibaà, é wír veé Israyi wáa yi ŋkàʼ wo á yoŋ ji *Ŋkǎʼ Yáʼayshaà, a dzə̀ ghán sin se áwune yii yí *kibán kee là nyaà. Vitú ve atàá cù wùn à wír ve vé‑eè duŋrì nsər Nyùyi nèn a shweʼ dzə́ə ye dzə̀ á nyàʼáy, e koò Jesus sho, e yùyrí,

² bìʼ fo vé‑eè sí kfəynìn jii, aá màʼtì ji á wíy koo a dzə̀ é kishiíy ké kiŋkàʼ, a wíri sí nyornìn fo anín, aá keʼ á melaà.

Maria yóʼ Jesus e Betani

³ Wáa dzə e ghan see shooy, a Jesus dzə̀ é ntèʼ yee Betani. Wù dù kiŋgàn e wìr wùmǒʼ lav, aá yoŋ ji Simon woo ŋgaà shìvnsay. Á lòo yikír, wiíy wùmòʼ nəə́, a wù kér kiyóʼóy ké bìʼ ye juujùŋ yímóʼó, aá fér e *nard, a yí lùm e kav e ŋàŋ. Wù dù fo Jesus wùn, e kòy kiyóʼóy, e bòr biʼ rə̀y e Jesus kitu.

⁴ Wír ámóʼó nèn a ŋeèy, a sə̀mnìn jii, wiíy və̀n sà jìvír biʼ rə̀n kisáŋ bèn ji ka á?

⁵ A dzə̀ réŋ, bo á kì fiìnè fíinen, e kòóy mbàm nyanyày, e shaà *danari ghii taár, a sə a vé ŋgeʼe shó. Á nèn lò, a saʼ wiíy və̀y sáʼán.

⁶ Jesus suúy jii, «Vèn maʼti wiíy woo shoon. Vèn sáʼ wun fo gha? Wù yiì a dzə̀ kinyo ke juŋ ki e mò féyì.

⁷ Vèn wíy a dzə vèn à vé ŋgeʼe ghán sidzə̀m, lóo kòŋ ji vèn sə́ áwune, aá sə́. A bó vèn yòʼ wíy a yen mo.

⁸ Wiíy və̀n yiì ne kinyo ke dzə̀ wù yiì. Wù nàŋsín ne wún wóm lèn, e yòʼ, é bo ghán sé dzəə̀mè si wìy a gheén.

⁹ Vèn wáa kiíy rú jii, virə́ʼ ve á wíy a fìʼtì sáʼka Nyùy wo juŋ sho kitú ke nsay kidzə̀m, á wíy a fìʼtì sa kinyo ke wiíy və̀n yiìn, a kuumé wun.»

Judar kávnin Jesus

¹⁰ Judar Iskariyor wo yì‑iì dzəə̀n wír wùmòʼ fo wón lìm Jesus vee nshòv sibaà e ghvə̀me nèn dù, e yèn vitú ve atàá cù ji wùn áwune kúr menàŋ, e koò á Jesus.

¹¹ Áwune yú, a sheʼrí, e kàʼ ji á yíi làʼ a wun. Judar nèn kèʼ, a shweʼ mo dzə̀ wù ghàn, e bóo way Jesus aáwuné wo.

Jesus wùn à wón və́ lìme yíkir, e jòʼsì

¹² Ghán sé Ŋkǎʼ Yáʼayshaà sìy si nèn wìy ghèén, a dzə̀ kishiíy ké mbìy ke vé‑eè yíi yi *kibán kee là nyaà, e kfə̀n see wan njiì. Wón lìm Jesuse dzə́r shó jii, «À taʼ ji vèr du, e nàŋsín njiì woo shooy fèé, é bo à yiì yì?»

¹³ Wù nèn tùm wón və́ lìm ámóʼó abaà, e sùúy jii, «Vèn du é mvə̀mlaʼ, lóo dù, yén wír, a wù béʼ mbǐʼ mendzə̀v, vèn wàa jùmrì ŋgaàŋ.

¹⁴ Wù nəə e lav ye wù nəən shó, vèn dù, e sùúy e ŋgaà lav jii, Ŋgaà Yèʼéy tùm ven ji vèn wiy, e dzə̀r á ji wùn à wón vəə́ sà yíi beè fèé, e bóo yi njiì woó kishiíy ké kiŋkàʼ fèn a?

¹⁵ Vèn dzə́r bèy, é wù nèn dìn ven lav ye kuʼùn yìmòʼ, aá bóm fó yuv. Vèn yíi yen, a vifá vidzə̀m vi sì shó vibáʼtín, é vèn nèn a fèr vifá ve yi vee shooy a dzə̀ fó.»

¹⁶ Áwune nèn lò, e dù e mvə̀mlaʼ fèy, e yèn vifá vidzə̀m mo Jesus kì suuyin, e nèn a fèr vifá ve yi ve kiŋkàʼ kìy fo.

¹⁷ Yiì lòo dzə e ŋkuùr, Jesus wùn à wón və́ lìm vee nshòv sibaà e ghvə̀me tár fó adzə̀m.

¹⁸ Wùn áwune lòo yikír, Jesus suúy jii, «M suuy e vèn rú ji wìr wùmòʼ dzə̀ e věn mvəm wo vèsən áwune yíkir lèn, a wù yíi fo mo áàŋgaà vém vibàné.»

¹⁹ Wón və́ lìme yú bey, e nèn a sòv kitú, a dzətí amòʼón amòʼón jii, «A dzə̀ wáa dzə rú mo á?»

²⁰ Wù bìnèr jii, «Kù dzə̀ wír fo vèn vee nshòv sibaà e ghvə̀mé mvəm, a dzə̀ wír wo vèr wun səʼ nshèv láŋ e mòʼón.

²¹ Ŋgaà wo yírí dzəə̀n Wanwìr və̀n sí yìi dù mo Ŋwàʼ Nyùyi‑iì suuyì. Yii bèy, a lòné dzə̀ wó wìr woo shó wo wù yíi fo wun aàŋgaà və́ vibàné ji á yúyrí. Kí bòŋ ji bo bó á yòʼ‑oò lo dzə̀ə́ ŋgaàŋ.»

Jesus fó ntò se vifa və́ vé yi

²² Wùn áwune ku nèn a yikír. Jesus yiì lò, e lì ntuʼ kiban, e beèrì Nyùy, e bèʼtí, e jàv e wón və́ lìme, e sùúy jii, «Vèn ko, dzə̀ wún wóm.»

²³ Wù kfən lì sa bàr, e beèrì Nyùy, e fò aáwune, á nó fó fo adzə̀m.

²⁴ Wù suúy aáwune jii, «Kin ki dzə̀ mensə́ mem me Nyùy gwar *mensaŋ sho, a mè leem fo wíri anín.

²⁵ Vèn wáa kiíy rú ji bó m yòʼ dzəə́ wìy no meluʼ me *vayin mèn, e meé e ghan se Nyùy wíy a saʼ vifon və́, é bo m nó meé ndzə ye fíy.»

²⁶ Wùn à Jesus nèn yòv luŋ, e sùyrì Nyùy sho, e fəə̀, a koʼ e Gwan Vicì vé Oliv.

Jesus tóʼ ji Pita yíi meŋ a wun

²⁷ Á lòo dù, Jesus wáa suúy aáwune jii, «Vèn yíi bìn ndzə̀m e mò adzə̀m mo vé‑eè saŋen ji Nyùy suuy a jii, ‹M wíy yuy nshìy, é njiì táʼrí.›

²⁸ Yii bèy, Nyùy wíy fəər mo fó kpu, é m du fó mbìy, é vèsən tár é mbìv wòŋ yee Galeli.»

²⁹ Pita yú vinyo vìn, e sùúy sho jii, «A wìr dzə̀m fə̀m bìn ndzə̀m e wò, bo bó yòʼ dzə̀ m bìn gheéy.»

³⁰ Jesus nèn sùúy e Pita jii, «Kú a kiíy rú jii, kù yíi a dzə vitsə́ʼ vé lán vi, é bo kiyuú ki wáa toŋ ji akàŋ abaà, aà méŋ ne mo akàŋ ataár.»

³¹ A Pita kù tíy kfə́ féyì jii, «A fə̀m dzə̀ ji m kpú wòsò, la m yòʼ mèŋ wò gheéy.» Wón lìm Jesuse ku nèn bìnsí sa bèy adzə̀m.

Jesus bunrì e kày yeé Gesemane

³² Wùn áwune dù, e nə̀ə́ e kày ye á yoŋ ji Gesemane, Jesus suúy jii, vèn dzəʼəm fen, é m du, e bùnrì.

³³ Wù lì Pita wùn à Jeem à Joon, wùn áwune bàr wún. Wù nèn kèʼ a rə̀m ndzə, shilív sə́ shí wáa buʼ, wù wáa yàʼ.

³⁴ Wù suúy aáwune jii, «Kindzə́m ke kí dzəə̀n e mǒ shiliv kí dzə̀ ke dzə̀ kí yùyrí mo. Vèn kú a dzə fèn e mǒ ghaŋ, a kìʼ, a bùnrì.»

³⁵ Wù nèn kòʼtí fo mbìy shishàr, e gbù fo nsay, a bùnrì, a lon ji a fèn dzə̀ ji dzə̀ Nyùy tèér ŋgeʼ rə̀n fo wun wùn, wù kù waà tèér.

³⁶ Wù wáa bùnrì jii, «Éè Tàr wor, a dzə̀ kù yiì wò vinyo vidzə̀m. Ku yiì, é la m yòʼ nò fó bàr ŋgeʼ fèn. Yii bèy, ku yiì a dzə̀ ke koŋ wò ki, lá à yòʼ yiì ke koŋ mo.»

³⁷ Jesus bùnrì bèy, e lòo kfən fo wón və́ lìm vee ataár vìyi, e yèn, aá sí buúne. Wù yòŋ Pita jii, «Simon, à buúne ji ka? Bó yòʼ dzə̀ à wàa kìʼ shishàr à?

³⁸ Vèn wáa kìʼ, a bùnrì fo vinyo ve ví mum ven ví gháʼ ven. Vèn wáa kiíy ji mo shilív shí fə̀m koŋ fó yiì kinyo, wúné waà sháʼninè.»

³⁹ Wù nèn kfə̀n dù, a bùnrì réŋréŋ mo wù kì bunrì.

⁴⁰ Wù lòo kfən, e yèn, aá kù dzəə́ buúne, bìʼ fo mbuùné sí‑iì dzəə̀n aáwuné si ŋkóŋkóŋ. Áwune yìmèn, e mèŋ kinyo kée suúy.

⁴¹ Wù kfən lòo kfən fo akàŋ vee ataár, e dzə̀r aáwune jii, «Vèn kù sìíy, a buuné ji á meemè à? Kí ghèén ne. Sì ghán se á sí wáy ŋgaà wo yírí dzəə̀n Wanwìr və̀n e wír ve bií wo.

⁴² Vèn nanen, é vèsən wáa dù, ŋgaà wom menàŋ sí wiyì.»

Á koó Jesus

⁴³ Kù mo Jesus suuy bèy, Judar woo wír wùmòʼ fo vee nshòv sibaà e ghvə̀me nèn bvə̀y. A wù wiy wùn à ŋgoo wìr ye vitú ve atàá cù wùn à wír ve vé‑eè duŋrì nsər Nyùy, à vé wòŋe tumen, aá kér nyùy sí wùn à vibur vi.

⁴⁴ A ŋgaà menàŋ və̀y kì sìysì ne wùn à wír vìyi jii, «M yií wiy, shaʼtì wír, baáme, bo dzə̀ ŋgaàŋ. Vèn ghàr kijuŋ, a dù sho, a yen fo wù nyéŋ.»

⁴⁵ Mo wù wìyìn, e shaà, e dù fo Jesus wùn, e baàmé, e yòŋ jii, «Tàr.»

⁴⁶ Á nèn bàm Jesus, e suù ben kitávín.

⁴⁷ Wìr wo wù kì dzəə̀n e Jesus ŋgoo wùmòʼ, dzə̀n nyùy ji wun gwar wír sho, e shaà, e shòʼ a dzə̀ kituʼùr ké wìr, a ŋgaàŋ dzə̀ kwǎn taà cù wo kuʼùn.

⁴⁸ Jesus nèn lò, e dzə̀r e wír vìyi jii, «Vèn kì wiy ji á koó mo, kér nyùy sí wùn à vibur vi mo m dzə̀ shóŋ ji ka?

⁴⁹ Mò‑oò rə́si dzə́ vèsən é lav cù, yéʼey wíri vishiíy vidzə̀m, la vèn yòʼ a koo mo ji ka? Yii bèy, kinyo kìn ki kooy bèn ji kinyo ke vé‑eè saŋen é Ŋwàʼ Nyùy ki fíʼ gheén.»

⁵⁰ Mo á gharin Jesus, wón və́ lìme nèn shwèy wun adzə̀m, e nyèŋkír.

⁵¹ Yii bèy, wánlè nsùm wùmòʼ kú a dù e Jesus bàm, a wù tám ndzə̀y támén.

⁵² Á lòo bam sa wun, ndzə̀y sí shóʼóm, wù màʼtì, e nyèŋ kinshóʼ.

Vé wòŋe wáy nsaʼ Jesus

⁵³ Á nèn a tsəəné Jesus, a dù sho e taà cù wo kuʼǔn laʼ. Á wáa dù, vitú ve atàá cù wùn à vé wòŋe, à wír ve á yii duŋrì nsəri kì bàʼtí ne fo adzə̀m.

⁵⁴ Á lòo dù, Pita wáa jùmrì fo bàm kwaʼda. Wù dù, e mèé e taà cù wo kuʼùn və̀y maàndzə, e nèn dzə̀ʼə̀m, a yor və́y wùn à nshèelav si.

⁵⁵ Mo wùn à Jesus nəən, vitú ve atàá cù wùn à vé saʼ adzə̀me nèn a tàʼ kinyo ke dzə̀ á lòr Jesus sho, aá fíʼ tinén ji á yúy, e tàʼ kinyo ntéŋ.

⁵⁶ Aá kì jàŋrì ne wír anín, á wìy, a toy vinyo e Jesus bàm, la ké wìr ki yòʼ a shemsín wùn à ké wìr ki gheéy.

⁵⁷ Wír ámóʼó nèn lò ji á tóy kév kee kinyo, a suúy jii,

⁵⁸ vé‑eè yù, a wù suuy a ji wun wíy kèr lav cù ye yì‑iì bomen wíri rə̀n, vishiíy ví lóo meé vitaár, é wun siir ye sən, a bó yòʼ dzə̀ á ye bomen wír.

⁵⁹ Yii bèy, mo vin vee wíri wìyìn e kin ki, la jí sév sí yòʼ fə̀m shèmsín gheéy.

⁶⁰ Taà cù wo kuʼùn nèn nànèn, e kòʼtí fo mbìy, e dzə̀r e Jesus jii, «À kù yòʼ yú vinyo ve á suuy e wò bàm vin a? À yòʼ kér kinyo kée bìnèr à?»

⁶¹ Jesus ku nèn a tiy, e làa yòʼ a ghay. Wù nèn kfə̀n dzə̀r jii, «Dzə̀ wò *Mfə̀ə́r woo Wan Ŋgaà wo á suyrì à?»

⁶² Jesus bìnèr jii, «Dzə̀ mo woo shó. A ghán sí wíy gheén, é vèn yén ŋgaà wo yírí dzəə̀n *Wanwìr və̀n, a wù sí dzə́ e Nyùy woo Ŋgaà Vitaàví koy yìyí. Aá kfə̀n wíy yen, a wù wiy e mvə̀m mbàʼ.»

⁶³ Taà cù wo kuʼùn və̀y yú kee shooy, kí nyár wun, wù sàr ndzə̀y fó wùn, e sùúy jii, «Bó shií wo á kfə́n a tàʼ wír ji wù suúy kinyo yòʼ kfə̀n dzə̀.

⁶⁴ Vèn yù ne mo wù tsə́y kóy wùn Nyùy. Vèn tìnén kén ji ka?» Wìr dzə̀m ku nèn bìnèr jii, «Wù gbù ne nsaʼ, á yúy yuyín.»

⁶⁵ Wír ámóʼó nèn kèʼ, a cu mentíy e Jesus si, e kùr sí rə́, a fùn, a te lám jii, wò woo njen, suúy ri wír wo wù fun wò. Vé rərí yiì lò, e shàʼàr Jesus fo fo, a dù, a dzə̀v.

Pita méŋ Jesus

⁶⁶ Pita kú a dzə e maàndzə fèy. Wánlè wiíy wùmòʼ wo wù‑uù lim fo taà cù wo kuʼùn wìy,

⁶⁷ e yèn wun fo, a wù yór və́y, e tùy sí e wùn wó, e sùúy jii, «À dzə́ bèn, a wò‑oò dzə̀ sá vèn à wìr woó Naasarer woo Jesus və̀y.»

⁶⁸ Pita nèn shàʼnín jii, «Bó m yoʼ kìíy kinyo ke à táŋri kìn.» Wù suúy bey, e nèn kòʼtí fo fo, e dù, a tiy e shùu kishem. Mo wù kù tiim fo, kiyuú ki nèn tòŋ.

⁶⁹ Wánlè wiíy və̀y yiì lòo shaà, e kfə̀n yèn wun fo, e sùúy e wír ve vé‑eè tíy foo jii, «Dzə̀ wùmòʼ woo wír», réŋréŋ mo wù kì suuyin fó mbìy.

⁷⁰ Pita kfən kìnèn. Shintàm shi lòo dàtìr, wír ve vé‑eè tíy fo vìyi kfən sùúy sa e Pita jii, «À dzə̀ rú é ŋgoo fo, bìʼ fo à dzəə̀n sá wír woó Galeli.»

⁷¹ Pita nèn a kàn kitú kfə́, a lìʼtì feyì jii, m yòʼ kì wír wo vèn yoŋ və̀n.

⁷² Kù mo wù suuy bèy, kiyuú ki nèn tòŋ ji akàŋ abaà. Wù yú, e kuùmé kinyo ke Jesus kì suuyin jii, «Kiyuú ki yíi lòo toŋ ji akàŋ abaà, aà méŋ ne mo akàŋ ataár.» Wù nèn tsə̀m wó e si, a dìy.