Maak 12 - ŊWÀʼ NYÙY

Ŋgàn yee kùm wír ve vé‑eè tirin súm aáwune

¹ Jesus nèn lò, a yòv a dzə̀ ŋgàn e wír vee shooyí wùn, a fèr jii, «Wìr‑iì mvə̀ʼ súm vitiír vé *vayin, e bòm kay, e kaàrí sho, e tàr, e kfə̀n bùʼ bií é kilan wo á wáa kòy báŋ se vitiír vee shooy, a nyèŋ sho, é meluʼ mè wáa fəə. Wù kfən bòm kitaàtì ke ŋgaà shìy wáa dzə sho. Wù màysì súm woo shooy, e nàŋsín, e nèn tìr wír ámóʼó shó, e dù ghán e wòŋ wúmóʼó.

² Ghán se á yii káv vifá si gheén, wù tsə́nsí ŋgaà və lìm wùmòʼ fo vé vintir vìyi ji wù sə́ á rə́ə yee mbìv vifa.

³ Áwune nèn dù, e dzə̀v ŋgaà lìm və̀y, e jùm wó wó.

⁴ Ŋgaà sùm və̀y kfən tsə̀nsí ŋgaà lìm wùmòʼ. Wù dù, á shoór, e dzə̀v, e lèmér kitú.

⁵ Wù kfən tsə̀nsí wùmòʼ, á yúyrí, e kfə̀n lòvtí sa aámóʼó bey, e dzə̀v ámóʼó dzə́vin, e yùyrí ámóʼó.

⁶ Wìr wo wù‑uù jòʼsìn e wùn kiwo cáʼcáʼ nèn a dzə wán və, a wù‑uù kòŋ é ŋàŋ. Fo bàm, wù gér wán və̀y, e tsə̀nsí, a wù‑uù kí ji á yíi a ghvəm a wán və.

⁷ Wír vee shooyi dù, e sùŋnín jii, ‹Və̀sə dzə̀ njìlaʼ ŋgaà sùm, vèsən yúyrí, e yòv súm.›

⁸ Á nèn bàm wán və̀y e sum, e yùyrí, e fəə̀, e màʼ dzə́n é bǎm kày.»

⁹ Jesus fèr bèy, e dzə̀r jii, «A kí kòóy bèy, ŋgaà sùm yèe le? Ke dzə̀ wù yiì kí kù dzə̀ ji wù yíi wìy, e yuyrí wír vee shooy, e tir súm e wír ve səné.

¹⁰ Bó vèn yòʼ‑oo yií ne yòŋ kinyo kee shooy fo Ŋwàʼ Nyùy à? Vé‑eè sàŋ jii: « ‹Tíy ye vé kimbome leeyin ntéŋé sì yíwun ye yí loòn ne, e tòm kór lav.

¹¹ Kù yiì Nyùy Tàr kinyo kìn, vèsən wáa leéy, a ker gháʼ.› »

¹² Wír vìyi yuúrí ŋgàn rə̀n, e kìíy ji Jesus yòv a dzə̀ á bìʼ áwune, e nèn a bam, e bóo fàn màŋgòŋ wo wù‑uù dzəə̀n fó, e màʼtì, e lò.

Á wooy Jesus fo mbàm se maʼàn sí

¹³ Á wìy tùm wír veé mbìv *Farasi wùn à vé Fòn Heror ámóʼó ji á du, a woóy Jesus, a yùtì a shuu və́.

¹⁴ Áwune dù, e yòŋ jii, «Ŋgaà Yèʼey, vèr kì ji à kù yii suuy a dzə̀ kinyo ke ru kí, a bó à yòʼ yii leey sí wìr, kìn ŋgaàŋ dzə̀ la. À kù yéʼey kinyo ke Nyùy réŋréŋ mo kí dzəə̀n. Vèr nén a tàʼ, e kiíy jii, nsər yèsən sa biìmé ji á wáa màʼ mbàm, a shwi Fon woó *Rom sho, moo ŋgáŋ á?

¹⁵ Vèsən wáa màʼ, mo la á yòʼ a màʼ a?» Jesus kiíy kinyo ke vé‑eè woóne sho, e bìnèr jii, «Vèn wooy mo bìʼ ka? Vèn wiy e sí mbàm yee *danarìi, é m yén.»

¹⁶ Á wìy sho, e fò shó. Wù dzə́r jii, «Kitú ke kí dzəə̀n shó ki dzə̀ ké la? Yírí dzə̀ yé la?» Áwune bìnèr jii, «Dzə̀ kitú ke Fòn woó Rom, a yírí kù dzə̀ rə́.»

¹⁷ Jesus nèn sùúy jii, «Kifá ke dzə̀ vèn kù a fo e Fòn woó Rom, vèn wáa fo sho, a fo ké Nyùy e Nyùy.» Áwune yú kee shooy, sí yéví sə́n.

Á wooy Jesus, dzə́ti fəə́ yee fó kpu

¹⁸ Wír veé mbìv *Sadusi ámóʼó nèn dù wìy ji á dzə́r a kinyo e Jesus. A dzə̀ mbìv wìr ve á yii yéʼey ji wíri yòʼ wíy fəə fo kpu. Á yòŋ Jesus jii,

¹⁹ «Ŋgaà Yèʼey, Mooser‑iì sàŋ e vèsə́n nsər jii, ‹A wìr kpù, e màʼtì wiíy là wón, bo fər və kér fó lèm wiíy woo shooy, a dzəə́ wón shó, e fíʼ lèm kitsə́ʼ ké ŋkfə fər və.›

²⁰ Kí nén a dzə jii, yì‑iì dzə̀ é ghan símóʼ sí, wíri wáa dzə saàmbà, kitàr kimòʼón, wo mbìy wáa ker wiíy, e kpù là wán.

²¹ Wo wù batin siíy, e lèm wiíy və̀y, e kpù sá là wán. Wo wù‑uù meen ji ataár, kí ku kòóy réŋréŋ bey.

²² Wìr woo saàmbà keérí wiíy və̀y e dzə̀m, e kpùkír là wán. Fo bàm, wiíy və̀y nèn kpù sá.

²³ Mo wìr woo saàmbà‑aà keerin ne wiíy və̀y, bo wíri wíy fəə fo kpu, é wáa dzə wo la lèn?»

²⁴ Jesus bìnèr jii, «Vèn jáy vinyo feyì, bìʼ fo vèn yòʼ kiìn kinyo ke kí dzəə̀n é Ŋwàʼ Nyùy, a bó vèn yòʼ kì sá mo vitaáví vé Nyùy vi dzəə̀n.

²⁵ Ke kí dzəə̀n kí dzə̀ jii, wíy lòo dzə e ghan se wíri fəən ne fo kpu, aá wáa dzə moo nshèelav se Nyùy seé yuv. Lùmèn yòʼ wíy a ker wiíy, a bó wiíy yòʼ wíy a ker lúm.

²⁶ Mo vèn kinèn ji bó wíri yòʼ wíy fəə fo kpu, bó vèn yòʼ‑oo yií ne yòŋ kinyo ke Mooser‑iì saŋen ji Nyùy‑iì sùúy e wun fo mvə̀m və̀y wo wú‑uù shwí e kici à? Wù‑uù sùúy jii, ‹M dzə̀ Nyùy Abraham, à wo Aysi, à wo Jakov.›

²⁷ Wù wáa yòŋ aŋkfə vìn moo wíri, bìʼ fo Nyùy yòʼ yii dzə́ Nyùy aŋkfə, dzə̀ wo wìr ve tine. Vèn jày kinyo kée dzər feyì.»

Nsər ye yì tíy vitú

²⁸ Jesus wùn à wír vìyi wáa bìʼ kinyo kìy bèy, a wìr wùmòʼ kì dzə̀ fó wo wù yii duŋrì nsər Nyùy. Wù yú, a Jesus bínér kijuŋ, e nèn dzə̀r kfə́ jii, «Nsər ye yì shaàn nsər sidzə̀m dzə̀ rəné?»

²⁹ Jesus bìnèr jii, «Nsər ye yì tíy mbìy dzə̀ ye yì dzəə̀n jii, ‹Isray, vèn yú, Nyùy Tàr woo Nyùy wòsən, kù dzə̀ wun Nyùy Tàr wùn mòʼón.

³⁰ Wìr wáa kòŋ Nyùy Tàr woo Nyùy və shilív shidzə̀m, e fò kitú kfə́ shó kidzə̀m, e tìír vifií və́ a dzə̀ é wùn wó, a lìm fo fo vitaáví və́ vidzə̀m.›

³¹ Nsər ye yì batin rə̀n nén a dzə yee jii, ‹Wìr wáa kòŋ fə́r və mo wù koŋ kitú kfə́.› A bó yìmòʼ yee nsər ye yì shaàn see sibaà sin yòʼ kfə̀n dzə̀.»

³² Wìr wo wù yii duŋrì nsər Nyùy və̀y nèn yòŋ jii, «Ŋgaà Yèʼey, à suuy rú féyì. Nyùy Tàr dzə̀ rú e mòʼón, a bó wùmòʼ yòʼ kfə̀n dzə̀.

³³ Aà kfə̀n suuy sa rú ji wìr wáa kòŋ Nyùy Tàr shilív shidzə̀m, a tiír vifií a dzə̀ é wùn wó, a lìm fo fo vitaáví və́ vidzə̀m, e kfə̀n a kòŋ fə́r və mo wù koŋ kitú kfə́. A wìr lò a yiì bèy, bo wù yii kijuŋ feyì, e shaà wír wo wù rə́si seéri nyám si, ton símóʼ sí tónen ji wun cu Nyùy.»

³⁴ Jesus yú mo wìr woo shooy naàrìn kijuŋ, e sùúy sho jii, «À sí kóʼti e ghaa saʼ ye dzəə̀n yé Nyùy.» Jesus bìnèr vinyo ve wìr vìn adzə̀m, kí nèn tìím, á wáa fàn fó kfə̀n dzər kinyo sho.

Jesus tóʼti ajay wìr ve kuʼkìné

³⁵ Jesus kfən lòo yeʼéy wíri é lav cù, a suúy jii, «Wír ve á duŋrì nsər Nyùyi yii suuy ji *Mfə̀ə́r wo Nyùy‑iì kàʼàn wíy a dzə wán woo Fòn Davir ram. A dzə̀ kee shooy ki wàa dzə e le?

³⁶ Vèn kì sá kinyo ke Kiyoy ke Ranén kí‑iì yiìn, Fòn Davir suúy kùm Mfə̀ə́r və̀n. Wù‑uù sùúy jii: « ‹Nyùy Tàr‑iì sùúy e Tàr wor jii, «Dzə̀ʼə̀m e mǒ koy yìyí, e meé e ghan se m wíy neèr aŋgaà vé vibàn e wò si, áà tiír wúu yé sho.»›

³⁷ Mo Fòn Davir yoŋ Mfə̀ə́r ji Tàr wov, a dzə̀ Mfə̀ə́r kfə̀n a dzə wán və é le?» Màŋgòŋ yú kinyo ke Jesus kìn, a kòŋ.

³⁸ Jesus kú a yeʼéy wíri bey, a suúy jii, «Vèn wáa baàmè wír ve á duŋrì nsər Nyùy. Áwune lo, á wàa kòŋ ji á wáa màʼ vikúm vé aŋgàa yeʼéy, a kar sho e virə̀ʼ vé way ji wíri fíʼ a shàʼtì áwune, a bèsìn.

³⁹ Aáwune kfə̀n koŋ sa virə́ʼ vee fó kùy e ŋgày se bùnrì. Á du fo kiŋkàʼ, á kù a tàʼ a dzə̀ shúu kiy.

⁴⁰ A kù kfə̀n dzə̀ áwune vin ve á lo, á wàa kùvrì vikǐy ŋkfə, a faàsì lav sév, a ghan, a rèr bunrì ji á fíʼ a laàrì sí wírí shó. Aá yii bèy, káv a dzə̀ lòn, e wìy nəə́ e ŋgeʼ ye biibí.»

Fómo wiíy ŋkfə

⁴¹ Jesus wáa suŋnín e lav cù bèy, e yìi lò, e kòʼtí, e dzə̀ʼə̀m e ghaa ŋkùv wo vé‑eè wáy mbàm se Nyùy sho, a leéy mo wíri wáyí. Aŋgàa mbàme wáa wìy anín, a way mbàm sikuʼùn.

⁴² Wiíy ŋkfə wùmòʼ nèn wìy kfə́, a dzə̀ ŋgaà kitàn, e wày mbàm se ŋeerín sí shó sibaà.

⁴³ Jesus yén bey, e yòŋ wón və́ lìm. Á wìy, wù suúy jii, «Vèn wáa kiíy rú ji wiíy ŋkfə woo ŋgaà kitàn və̀n wày mbàm, sí kúʼ, e shaà se wìr dzə̀m kì wáyí.

⁴⁴ Wìr dzə̀m kì bay mbàm báyin, a sí bér aáwuné vibàm sikuʼùn. Yii bèy, wiíy və̀n, mo wù fə̀m ghíy ghiyín ben, wù gér kifá ke wù kì kér kidzə̀m, à kùr rə shó.»