Maak 11 - ŊWÀʼ NYÙY

Á səə́sí Jesus e Jerusalem

¹ Jesus wùn à wón və́ lìme ku nèn a dù e Jerusalem, e lòo meesín, e mèé e gwan wo á yoŋ ji Gwan Vicì vé Oliv, a wù dzə̀ é ghaa ntèʼ see Befage wùn à Betani, Jesus túm wón və́ lìm ámóʼó abaà,

² e sùúy jii, «Vèn du é ntèʼ yee fó mbìy rə̀sə, vèn lóo nəə́, é vèn yén wan kimbèʼbìy, a wù tsə́ŋ fo, a bó wìr yòʼ‑oo yií ne kòʼ é kitu wo, é vèn bvəti, e wìy sho.

³ A wìr dù, a dzər ji vèn yii a dzə̀ ka bey, vèn bìnèr ji Tàr won kér shií shó, a wù kù yíi siìr a lèn lèn.»

⁴ Áwune nèn lòo dù, e yèn kimbèʼbìy kiy, aá tsəə́r é shùu lav yìmòʼ é ghaa dzəə. Áwune dù, e lòo bvə̀tì,

⁵ wír ve vé‑eè dzəə̀n fóo yén, e dzə̀r jii, «Vèn shóʼ kimbèʼbìy kiy, e yiì ka shó?»

⁶ Áwune bìnèr mo Jesus kì suuyin, á nèn màʼtì, á wáa dù sho.

⁷ Áwune dù, e mèé sho fo Jesus wùn, e nèn sàŋrì vikúm vév é kitu wo, Jesus dzə̀ʼə̀m sho, a dù.

⁸ Wù wáa dù, wír aníne wáa sàŋrì vév vee vikúm é dzəə, ámóʼó wáa kivtí tám se vici fó ghaŋ se dzəə, a wìy, a səəsí wun sho.

⁹ Wír ve vé‑eè du fo mbìy wùn à ve vé‑eè wiy fo bàm adzə̀me wáa ndzəʼ jii, «Fòn wor èy, Fòn wor èy, Nyùy Tàr ku səə̀vì wír wo wù wiy e wùn yir və̀n.

¹⁰ Nyùy ku səə̀vì wun wo wù sí wìy a saʼ vifon ve tàr wor Davir. Vèsən wáa burí Nyùy woó ntoò yùv.»

¹¹ Jesus ku nèn a dù. Wù nəə́ é Jerusalem, e tòsín, e dù a dzə̀ é lav ye vé‑eè cu Nyùy sho, a shweʼ vinyo ve á yii fo vidzə̀m. Wù lòo màysì, a ndzə jí ne, wùn à wón və́ lìm vee nshòv sibaà e ghvə̀me nèn lò, a dù e ntèʼ yee Betani.

Jesus shóv kicí

¹² Yì rán kibvəə́shí, Jesus wùn à wón və́ lìme lò fo Betani ji á kfə́n e Jerusalem, jìŋ wáa yar wun.

¹³ Wù màʼ sí, e yèn kicí ké *fig, a kí teʼè, wù dù, e lèéy ji sà dzə̀ wun yèn báŋ sho a, e yèn a dzə̀ vibábár cáʼcáʼ, bìʼ fo bó yòʼ‑oò siìn ghán se kí yii koomè.

¹⁴ Wù nèn shòv kicí kiy jii, «Bó wìr yòʼ dzəə́ wìy kfər wò gheéy.» Wù wáa suúy bèy, a wón və́ lìme yú.

Jesus jum vé wayí fó *lav cù

¹⁵ Wùn à Jesus nəə́ é Jerusalem, wù kfə́n é lav cù fèy, e kèʼ, a jùm wír ve vé‑eè kávnin wáy fó fo adzə̀m, kìn dzə̀ ve vé‑eè fiinè fiìnèn, kìn ve vé‑eè yún yunén. A wù jum bèy, baʼtì visə́r ve wìr ve vé‑eè kúvsin mbàm, yí séʼ, kfə̀n bvəər antaʼ wìr ve vé‑eè fiinè vibìŋ.

¹⁶ A bó wù yòʼ‑oò lo biìmé sa ji dzə̀ wìr kfə̀n bèʼèy kifá, a tosín maàndzə lav cù sho.

¹⁷ Wù jùm, á mày, wù nèn a yeʼéy wíri jii, «Vé‑eè sàŋ ji Nyùy suuy a jii, ‹Á wíy a yòŋ lav yem ji lav bùnrì fo vitúm vi vidzə̀m.› Nyùy suúy bey, vèn nen bìnèr kén ji mbvə̀ʼ ashòŋ.»

¹⁸ Vitú ve atàá cù wùn à wír ve vé‑eè duŋrì nsər Nyùyi yú kinyo kìy, e nèn a tàʼ dzə́ə ye dzə̀ á yùy Jesus sho. A vé‑eè fan fo wù səŋri wíri adzə̀m, bìʼ fo wìr dzə̀m‑eè sí yuúri yéʼéy rə́, kér gháʼ.

¹⁹ Yiì lòo dzə e ŋkuùr, Jesus wùn à wón və́ lìme nèn kfə̀n lò fo Jerusalem fèy.

Jesus fiʼsìn mo dzə̀ á wàa bùnrì

²⁰ Wáa dzə kijàvndzə, Jesus wùn à wón və́ lìme kfən lòo shaà e ghaa kici fey, e yèn, a kí yúm ne, à gháŋé shó.

²¹ Pita ku nèn kuùmé kinyo ke kí‑ii kooyin, e sùúy e Jesus jii, «Tàr, ku lèéy, e yèn. Kicí ke wò‑oo shovin kiy ki yùm ne.»

²² Jesus yòŋ áwune adzə̀m, e sùúy jii, «Vèn lóo yiì kinyo ke á yii kidzə̀m, á wày a dzə̀ shilív e Nyùy wùn.

²³ Vèn wáa kiíy rú jii, a wìr sùúy e gwan və̀n jii, meènè fó fèn, e gbù e rìbà ndzə̀v fésə, wù kù meènè, a ŋgaàŋ fèn suuy bèy, biíme fo wùn shiliv ji kinyo ke wun suuy ki yíi koóy, e làa yòʼ a meŋnín.

²⁴ Bìʼ bey, m nén a suúy ji vèn lóo bùnrì, lóo lon ka fo Nyùy, vèn wàa way shilív é wùn wó ji wù kù yíi fo, é vèn wáa ker kíwun.

²⁵ Vèn kfə́n lóo bùnrì, vèn wàa làysìn kinyo ke wíri‑iì jayin e vèn, é Tàr won wo wù dzəə̀n é yuv wáa làysìn sa vén vee ajay. [

²⁶ A vèn dzə̀ là fó a làysìn ajay wìr ámóʼó, la Tàr won wo wù dzəə̀n é yuv yòʼ a làysìn sa vén.]»

Vé wòŋe dzə́ti fo Jesus sə́ vitaáví

²⁷ Jesus wùn à wón və́ lìme mày e Jerusalem, wù nèn kfə̀n dù, e nə̀ə́ e lav cù. Wù lòo ghan fo, vitú ve atàá cù wùn à wír ve vé‑eè duŋrì nsər Nyùyi, aàtǎr wòŋe wìy, e yèn wun fo,

²⁸ a saʼ jii, «Vinyo ve wò‑oò mùmèn é lav fèn vìy, wò‑oò yii moo la? Fò la wò dzə́ə?»

²⁹ Jesus bìnèr jii, «M taʼ, e dzər kém kinyo kimòʼón, vèn binèrì, é m nèn sùúy fo m kér vitaáví, e bó a yiì vinyo vee shooy.»

³⁰ Wù nèn dzə̀r jii, «Kinyo ke Joon‑eè fiʼtì, wáy wíri é ndzəv kí‑iì lò fo Nyùy moo fo wìr a? Vèn biner.»

³¹ Áwune nèn a kìŋnìn jii, «A vèsən bìnèr ji kí‑iì lò fo Nyùy, é wù nèn dzə̀r ji sà‑aà yiì ka lèn fo vèsən biímé kinyo ke Joon á?

³² A vèsən bìnèr ji kí‑iì lò a dzə̀ fo wìr, é kí shém á?» A vé‑eè fan a dzə̀ wíri, bìʼ fo wír adzə̀me‑eè biíme ji Joon‑eè dzə̀ rú á *ŋgaà ntum Nyùy.

³³ Á nèn bìnèr jii, «Vèr yoʼ kìíy.» Jesus nèn sùúy jii, «Bo bó m yòʼ suuy sa fo m sə́ vitaáví, e bó a yiì vinyo vee shooy.»