Maak 1 - ŊWÀʼ NYÙY

Ntum Joon woo Ŋgaà Wáyndzəv

¹ Kin ki dzə̀ sáʼka wo juŋ woo kùm Jesus Kristu woo Wan Nyùy.

² Wù‑uù kèʼ mo Aysaya woo ŋgaà ntum Nyùy‑iì saŋen ji Nyùy suuy a jii: «Yuúrí, e yù, m wíy tsənsí ŋgaà wom ntum fo wò mbìy, é wù wiy, e nàŋsín dzə́ə yè.

³ Jì wìr fúŋ fo kwaʼ jii, ‹Á náŋsín dzə́ə Tàr, e naàrì, é bo wù wáa wìy.› »

⁴ Wìr wùmòʼ nèn wìy fəə̀, aá yoŋ ji Joon, a shiíy e kwaʼ, a fìʼtì e wíri ji á wáa bìnèr melív mev, é wun wáa way áwune é ndzəv, é Nyùy laysin á vinyo vév ve bi ví.

⁵ Wír veé Jerusaleme nèn a fəəkír, a dù ji á yú á kinyo ke Joon. Á kfə́n a wìykìr fo ntèʼ seé wòŋ woo Juda foo fèy símóʼ sí sidzə̀m, a tuúne ajay vév, Joon wáa way áwune é ndzəv ye dzəə̀n Jordan.

⁶ Joon‑eè dzə́ e kwaʼ, kúr ndzə̀y se vé‑eè baan a dzə̀ e wuy nyàm ye á yoŋ ji *kamer, síŋ e kikuúví kí. Vifá və́ vé yi vi‑iì dzə̀ ŋguùmé, a wù kfə́r, kfə̀n lá dòŋ.

⁷ Wù‑uù fiʼtì jii, «Wìr wùmòʼ wiy fo mǒ bàm, a wù kùʼ feyì, e shaà mo. A bó m yoʼ fə̀m ghèén fó gvəʼə́m e si wo, e bvə̀tì alábáʼ və́.

⁸ M wáy wíri é ndzəv lèn, a kù dzə̀ cáʼ ji mendzə́v, a ŋgaàŋ wíy wìy kfə́, a way wíri a dzə̀ e Kiyoy ke Ranén kí kiwo.»

Jesus sí keʼ lim rə́

⁹ Wáa dzə e ghan see shooy, Jesus nèn lò fo Naasarer e mbìv wòŋ yee Galeli, e wìy, e yèn Joon, wù wáy wun e ndzəv yee Jordan.

¹⁰ Jesus lòo fəə fo ndzəv, e kù nèn yèn, a shúu yuví mvə́ʼə́m, Kiyoy ke Nyùy ki sə́ʼə́y fó fo e njà kibìŋ, e tìím e wùn kitu.

¹¹ Jì wìr súŋnín fó yuv jii, «À dzə̀ Wán wom, m koŋ wò feyì, m shéʼri wò e ŋàŋ.»

¹² Mo Kiyoy ke Ranén kí wìyìn fo Jesus, e kù nèn bàyrí, e dù sho e kwaʼ.

¹³ Wù dù, e shìíy fo kishiíy mkweè, a dzə fo wùn à nyám se kwaʼ si, Satan wáa wìy, a mùm wun ji wù jáy kinyo, nshèelav se Nyùy si wáa leéy fo wun.

Jesus lí wón lìm akweè

¹⁴ Ghán sí wìy lòo koʼtí, á koó Joon, e wày é sháŋ, a dzə̀ ghán se Jesus‑eè kèʼèn, a ghan e mbìv wòŋ yee Galeli, a fìʼtì sáʼka Nyùy wo juŋ fo.

¹⁵ Wù‑uù fiʼtì jii, ghán se Nyùy‑iì sìysìn sí ghèén ne, a wù sí lo, a saʼ vifon və́. Wíri biner á melív mev, e biìmé sáʼka Nyùy wo juŋ və̀n.

¹⁶ Wìy lòo dzə e kishiíy kímóʼ kí, Jesus wáa shaà e ghaa kibaŋ keé Galeli, e yèn wír ámóʼó fó abaà, Simon wùn fər və Andru, aá maʼ lálán, bìʼ fo kéŋ yéví‑iì dzəə̀n sə́.

¹⁷ Jesus suúy aáwune jii, «Vèn wiy, é vèsən wáa ghan, é m yii, é vèn wáa baʼtí lèn a dzə̀ wíri.»

¹⁸ Áwune ku nèn shwèy alálán vév, wùn à Jesus wáa ghan.

¹⁹ Wù kfən lòo koʼtí shishàr, e yèn sá wír ámóʼó abaà, a dzə̀ fə́r wùn fə̀r, aá yoŋ ji Jeem wùn Joon, a wùn à Sebedi woo tàr wov dzə́ e kikoŋ, náŋsin alálán vév.

²⁰ Wù kfən jàŋ sa áwune. Á nèn màʼtì tàr wov wùn à vé lìme é kikoŋ, e dù, a ghan wùn à Jesus.

Jesus júm *nyùy wo wù jívir wír

²¹ Wùn à Jesus ku nèn a ghan, e wìy dù, e mèé e ntèʼ yee Kapeenahum. Kishiíy kév ké bam ki gheén, Jesus ku nèn dù e ŋgày bùnrì yee fó, a yeʼéy wíri.

²² Wíri yuúrí, a ker gháʼ, bìʼ fo wù‑uù yéʼey moo wír wo wù kiìn kinyo ke wù suuy a dzə̀ fo wùn vifii. Wù yòʼ‑oò yéʼey moo wír vév ve á yii duŋrì nsər se Nyùy.

²³ Wìr wùmòʼ ku nèn tò é ŋgày bùnrì foo fèy, a dzə̀ wír wo nyùy wùmòʼ‑oò jívirì.

²⁴ Wù nəə́, a rəəmé jii, «Jesus woó Naasarer, à taʼ ji à yée le e vèr? À wìy ne ji à laar ver a? M kìíy ne wò. À lò fo Nyùy, à dzə̀ Wán Nyùy.»

²⁵ Jesus kàntì nyùy və̀y jii, «Sə́sín, e fəə̀ fo wìr və̀n wùn.»

²⁶ Nyùy və̀y nèn màʼ wír və̀y e njà kimgbù, e rəə̀mé, e màʼtì wun.

²⁷ Wíri yén, a ker gháʼ, a ghaynín jii, kee ben ki sà dzə̀ ka á? Sà dzə̀ kfə́ə dùŋrì ye fíy yímóʼó á? Wìr və̀n kér vitaáví, kantì anyùy, aá yú a wun.

²⁸ Á ku nèn sàmèr kinyo kìy, léŋ Jesuse ghánén é ntèʼ seé Galeli foo fèy sidzə̀m.

Jesus fér aŋgàa yàsí

²⁹ Jesus yiì fəə̀ fó ŋgày bùnrì fèy, e dù e Simon wùn Andru lav, a Jeem wùn Joon kì du sa wùn áwune.

³⁰ Á wáa nəə́, a yìy à wiiy Simon néŋ, joy kinjàʼ, á ku nèn bì Jesus sho.

³¹ Wù dù fo, e ghàr é kiwo, e nàn e yuv. Kinjàʼ kfə́ kí bónén, wù lò e yuv, a ker áwune, a yiír.

³² Yiì lòo dzə e ŋkuùr, a ndzə jí ne, wíri lì vé yàsíi, e wìy, e yèn Jesus sho. Á kfən wìy sa e wír ve anyùyi‑iì jívir áwuneé.

³³ Wír veé ntèʼ fóo fèy adzə̀me bánén é shùu lav fo wù‑uù dzəə̀n.

³⁴ Wù wáa fèr wír anín, aá joy kfəə́ se yàsí sinín, e kfə̀n a kàntì anyùy ve vé‑eè jívir wíri, á wáa màʼtì áwune. Wù lóo kàntì, la wù yòʼ a biimé ji anyùy vìne wáa suŋnín, bìʼ fo vé‑eè kiìn wír wo dzəə̀n wun.

Jesus fiʼtì kinyo ke Nyùy e wòŋ Galeli

³⁵ Ndzə bvəə́shí, e jàv vitsə́ʼ vitsə́ʼ, Jesus lò e yuv, e fəə̀, e dù e kirə̀ʼ kímóʼ kí wùn mòʼón, a bùnrì fo.

³⁶ Simon wùn à wír ve vé‑eè dzəə̀n wùn áwuneé nèn sìíy sa, e fəə̀, a tàʼ wun.

³⁷ Á dù, e yèn, e sùúy sho jii, «Wíri sìíy, e wìy anín, a tàʼ wò.»

³⁸ Jesus bìnèr kfə́ jii, «Vèsən shaa sháan, a dù e ntèʼ see fó mbìy, é m fiʼti sá kinyo ke Nyùy fo. Mò‑oò wìy é ndzə fèn, a dzə̀ bìʼ kee shoon.»

³⁹ Wù nèn a ghan woŋ Galeli woo shooy e dzə̀m, a fìʼtì kinyo ke Nyùy e ŋgày se bùnrì, e kfə̀n a kàntì anyùy ve vé‑eè jívir wíri, á wáa màʼtì áwune.

Jesus fér ŋgaà shìvnsay

⁴⁰ Ŋgaà shìvnsay wùmòʼ nèn wìy, e yèn Jesus, e tsə̀m é si wo, a lon, a suúy jii, «M kì jii, aà kòŋ, à fèr mo.»

⁴¹ Mendzən mè rə́r Jesus, wù ràmsì kiwó, e kùm wír və̀y sho, e sùúy jii, «M kòŋ ne, bónén ri.»

⁴² Shìvnsay ku nèn mày fo wìr və̀y wùn, wù bónén.

⁴³ Jesus ku nèn siìr wun e bàm, e kàntì feyì jii,

⁴⁴ «Á yen fó dù, e suúy e wìr. Ku dù duùn tìítiy, e dìn wún wóo e taà cù, e kfə̀n fò kifá ke cù ke Mooser‑iì suuyin ji wìr bónen fo shìvnsay fèn, wù fò. Ku yiì bèy, é wìr dzə̀m fiʼ kìíy ji à bònén ne.»

⁴⁵ Wìr və̀y nèn dù kfə́, a fèr kinyo kee shooy e wáynjáŋ, kí sàmèr virə́ʼ vidzə̀m. Wíri nèn a wìy, a far Jesus ŋkóŋkóŋ, la wù yòʼ dzə́ə a nəə́ e ntèʼ yìmòʼ é nsaànsaá gheéy. Wù nèn a dzə a dzə̀ é ghaŋ se kwaʼ, wíri wáa wìy virə́ʼ vidzə̀m, a yen wun fo.