Kolosia 3 - ŊWÀʼ NYÙY

Wír Kristùu kér dzəʼə̀m ye fíyi

¹ Mo vèn tatin Kristu e kpu ye wù‑uù kpuun, Nyùy fəə́r vèn áwune fó fo, vèn ku nèn wày shilív shén a dzə̀ é vinyò veé yuv fo Jesus Kristu dzə́ lèn e Nyùy koy yìyí.

² Vèn tiír ri vifií vén ví a dzə̀ é vinyò foo fèy. Lá vèn yòʼ tìír e vinyò veé nsay.

³ Vèn wáa kuumé ji vèn‑eè kpù ne fo ndzə fèn, a dzəʼə̀m yéné dzə̀ lèn a dzə̀ e Jesus Kristu kiwo mo Nyùy lèmèn shó, a bó á yòʼ sí yéné.

⁴ Yii bèy, mo dzəʼə̀m yéné dzəə̀n yé wun woo Jesus Kristu, wù wíy lòo kfən, a wù sí kér vikuʼùy və́ veé yuv, é vèn nèn nə̀ə́ sa e wùn mvə̀m vikùʼùy fóo fèy.

⁵ Vèn ku nèn lì vitú vén ji á kpù ne a fo mbìv vinyò ve mensə́ men mè taʼ vidzə̀m. Lá vèn yòʼ a jàŋ kinjàŋ, a ghan viŋkar, a shii vinyo vee bey, kìn dzə̀ liì kisaŋ woo ka. Lá vèn yòʼ a way vifií é vinyò ve ví kér lóm, é la wìr yòʼ a tàʼ kifàʼ. Wìr wo wù taʼ kifàʼ lì ne vifá ve wù koŋ vee shooy ji Nyùy və.

⁶ Vèn wáa kiíy ji Nyùy wíy màʼ ŋgeʼ e wír ve á méŋ wune a dzə̀ bìʼ vinyo vee shooy.

⁷ A vèn kù‑uù ló a dzə fo mbìy, a yiì sa vinyo vee shooy, bìʼ fo vèn‑eè dzə́, yú a dzə̀ fo mensə́ men mè.

⁸ Yii bèy, lèn və̀n, vèn kér fó shoʼtí wó fo vinyò foo fèn vidzə̀m. Lá wìr yòʼ a shwiíy kilòŋ fo wùmòʼ, e làa yòʼ a nyarnín. Vèn maʼti melív me bi mè, e làa yòʼ a suʼ kinsuʼ, e màʼtì sa vimfèr ve bi ví.

⁹ Lá wìr yòʼ a boʼtí fə́r və. Vèn wáa kuumé ji vèn yòʼ dzə̀ə́ a mo vèn‑eè dzə́ fo mbìy, a melív men mè tíy a dzə̀ é vinyò ve mensə́ mè taʼà.

¹⁰ Vèn sí kér melív me fíy mè lèn, kér a dzə̀ liì wo fíy. A yì‑iì nàŋsín Nyùy melív men, a kù sheŋrì wun ghán sidzə̀m ji vèn wáa ker liì a dzə̀ á və́ə, e nèn màysì, e kiíy mo wun woo Nyùy dzəə̀n ŋkuuŋkùŋ.

¹¹ Mo Nyùy naŋsin ne melív me wìr və́ adzə̀m, bo bó wùmòʼ yòʼ dzə̀ə́ jeéy ji woó Juda wo vé‑eè naŋsin ji wir Nyùy, kìn woó kitum ke sən kí wo bó á yoʼ nàŋsín bèy. A bó yòʼ dzə̀ á kfə̀n a yen wùmòʼ ji kiŋgwìy, kìn ji wír woó mfùŋ, kìn ji kwàn, e bó a yen wùmòʼ ji wan nsay. Á sí yén lèn a dzə̀ Kristu. Kér wun wír vìn adzə̀m.

¹² Mo Nyùy shoʼon ne ven, e nàŋsín ji və́ vee wír, a rəsí, a kòŋ ven ghán sidzə̀m, vèn ku nèn a ker liì a dzə̀ və́ə. Wìr wáa sham fə́r və, a yiì kinyo ke juŋ ki shó. Wìr kú a lì kitú kfə́ shishàr, a ker wir dzə̀m ji weè, a lò ji nyaáŋ,

¹³ a kfəmén. Fə̀r wìr fə́m jáy ka e wìr, wù kù làysìn. Mo Kristu‑uù làysìn vén vee ajay, a dzə̀ sá vèn wàa làysìn vé afə̀r vén.

¹⁴ Vèn lóo yiì vinyo vìn vidzə̀m, vèn kù a tiír a dzə̀ kikoŋnìn fo mbìy, bìʼ fo vinyo vìn vidzə̀m vi tatin rú a dzə̀ é kitu ke kikòŋnìn.

¹⁵ Vèn lóo sìysì kinyo, melív men mè kù a yu a dzə̀ fo Kristu, é vinyo vén ví fíʼ a dù ji nyaáŋ. A dzə̀ mo Nyùy‑iì liìn ven, e tàtí amòʼón ji á wáa dzə a ji nyaáŋ. Vèn ku nèn a beèrì wun woo Nyùy ghán sidzə̀m.

¹⁶ Vèn kú a kuumé kinyo a dzə̀ ké Jesus Kristu ghán sidzə̀m, é kí wáa lìm e věn vifii, é wìr wáa yeʼéy fə́r və, a tir e vifií ve ví lo a dzə̀ fo Nyùy vi. Vèn kú a sheʼrí Nyùy fo věn meliv ghán sidzə̀m, a yòv luŋ se sí fəə́ fo wùn ŋwàʼ, kìn dzə̀ se Kiyoy kfə́ kí fó e ŋgaàŋ, e kfə̀n a yòv símóʼ sí, a sùyrì wun sho.

¹⁷ Vèn lóo yiì vinyo ve vèn yii vidzə̀m, kìn dzə̀ ve vèn suuy suùyín, vèn kù a yiì e Tàr wòsən Jesus Kristu yir, a beè wun, a beèrì Nyùy woo Tàr wov wo wù tatin vèn áwune.

Mo dzə̀ wír Kristu, á wàa yunín

¹⁸ Ven vee vikìy, vèn wáa fo vitú vén áàlúm véné moo wír ve á yú fo Tàr wov wo dzəə̀n Jesus Kristu.

¹⁹ Ven vee vilum, vèn kú a kòŋ vikìy vén, a geʼ sho, e làa yòʼ a shevkír.

²⁰ Ven vee wón, vèn kú a yu atàr vén wùn aàyìy véné ghán sidzə̀m. Á kinyo ke Nyùy koŋ ji vèn wáa yiì.

²¹ Ven vee atàr wùn aàyìyí, lá vèn yòʼ a nyàm nyàm wón, fo á wáa tùʼtìn, a meŋ fo á dzəə̀n.

²² Ven vee akwàn, vèn wáa kuumé jii, wìr lóo lìm fo wìr e nsay fèn, wù kù a yu vinyo vidzə̀m a dzə̀ á fo tàr wov woo shooy, a lìm fo fo shilív shimòʼón, e làa yòʼ a lìm a dzə̀ é ghan se wù tíy fo si ji wù fíʼ a yen ji wun yii búʼ. Wù wáa lìm ghán sidzə̀m, é wáa yen Nyùy.

²³ Wìr lóo lìm kifá ke wù lim kidzə̀m, wù wày ŋàŋ, a lìm ji wun lim a dzə̀ á fo Jesus Kristu, bó wun yòʼ lim a fo wìr.

²⁴ Tàr won lìm kù mày wun woo Jesus Kristu, a kù wíy laamé wun wír fo lìm ye ŋgaàŋ lìmèn. Wù wíy lì ŋgaàŋ, e way e wùn mvə̀m vijùŋ veé yuv.

²⁵ A wù kù wíy lovtí e wìr wo wù‑uù lim, bóʼ wún, réŋréŋ mo ŋgaàŋ‑eè yii, a fə̀m dzə̀ la.