Kolosia 2 - ŊWÀʼ NYÙY

¹ M nén a tàʼ ji vèn kiíy mo m rə́si ghitìr e ven vee wír veé Kolosiàá vinyò, ghitìr fo veé Ladisiàa, kfə̀n ghitìr sa fo wír Nyùy ámóʼó adzə̀m ve bó vèr áwune yóʼ ne yènnín sí.

² A m ghitìr bèy ji Nyùy wáa tavír melív men, a yiì, é vèn maysi, e suùsín, a dzə a kitú kimòʼón. A m taʼ ji vèn gwarir kinyo kidzə̀m ke Nyùy‑iì sìysìn, e tìír e Kristu wùn, kí wáa fəəsín a dzə̀ lèn. Vèn kiiy kijuŋ mo kí dzəə̀n, é la vèn yòʼ dzə́ə a meŋnín kímóʼ kí gheéy.

³ Kù mày wun woo Kristu wo dzə̀ wù mvə̀ʼ vifií vé wìr, bo wù yén rán, e kìíy kinyo ke dzəə̀n ke ru kí.

⁴ M tòʼtí ne vinyo vìn e vèn ben fo wìr du, e wìy e kfə́ kee kinyo ki, a fèr fo shuù, é kí wáa bòŋ, e boʼtí ven shó.

⁵ Vèn wáa kiíy jii, mo bó m yòʼ fə̀m dzəə̀n vèsən fó si, m kù kwaʼtì ven ghán sidzə̀m, a m shéʼri mo m yén ji vèn tíy a kitávín vèn à Jesus Kristu, dzə́ shuu mòʼón.

Wír Kristùu bòy ne fo Satan kiwo

⁶ Mo vèn biimen ne ji Tàr won sì Jesus Kristu, vèn ku nèn a yiì vinyo a dzə̀ vé wìr ve dzəə̀n və́.

⁷ Vèn wáy gháŋ e wun wùn, é yí táv, a yu vinyo vidzə̀m a dzə̀ fó fo. Vèn maysi, e ghàr kinyo kfə́ ke vé‑eè yeʼeyin ven shó ki, a beèrì wun ghán sidzə̀m fo vinyò ve wù rə́si yii e vèn vidzə̀m.

⁸ Vèn wáa yen rì fo wìr li vifií ve dzəə̀n veé ndzə fèn, e bòʼtí ven, é vèn kfə́n a rèŋ vikwàn fó vinyò veé ndzə. Vifií veé ndzə ve ví yénsin vigháʼán vin vi kù dzə̀ vinyo ve bóm wíri, aá kù bóm a dzə̀ mo yén wíri ji á mo ndzə yii gháné, a bó yòʼ dzə̀ vifií ve ví lo fo Kristu gheéy.

⁹ Kristu dzə̀ kinyo kidzə̀m ji Nyùy. Mo wù‑uù liìn mbom wìr, vinyo ve Nyùy vi nén a yensín e wun wùn vidzə̀m.

¹⁰ Dzə̀ wun wo wù shaàn vifá ve ví kér vitaáví vé saʼ e ndzə fèn vidzə̀m, a vèn nə̀ə́ ne e dzəʼə̀m ye dzəə̀n dzəʼə̀m, bìʼ fo vèn à Kristu siìn kintatì.

¹¹ Mo vèn áwune tatin, wù nen nàŋsín ven ji wír Nyùy. A bó wù yoʼ nàŋsín ji wun səə̀m a dzə̀ wún fó ndzə mo wír veé Judàa yii səəmè. Kristu nàŋsín kfə́ a dzə̀ shilív, la shí yòʼ dzəə́ a tiy e vinyò ve mensə́ mè taʼà.

¹² A kí dzə̀ jii, vé‑eè wày ven é ndzəv ji wír Kristu, kí nèn a dzə mo vèn‑eè kpù, á dzəə̀mè vèn à Jesus Kristu. Nyùy kfən fə̀ə́r ven ve vèn à Kristu tatin e kpù vin fo kpu, bìʼ fo vèn‑eè wayin shilív e wun wùn ji dzə̀ wù fə̀ə́r sá ven mo wù‑uù fəərin Kristu fo kpu.

¹³ Yì‑iì dzə̀ fó mbìy, a vèn kpú ne fo Nyùy mbìv, bìʼ fo melív men mè kù‑uù yú a dzə̀ fo mensə́ men mè, e làa yòʼ a yu ké Nyùy gheéy. Wáa dzə lèn, a vèsən à Kristu tátí ne, Nyùy nen làysìn ajay vesən, e lì vèsən, e wày é dzə̀ʼə̀m ye fíyi.

¹⁴ A bó Nyùy yòʼ‑oò lo lòvtí e vèsən mo nsər suuyì. Vèsən‑eè bìvír nsər sə́, e lì njò. Wù nèn sù vèsən fó njò fóo fèy, e siìr lòn wósən a dzə̀ e Kristu kitu, á tá shó e kintam.

¹⁵ Wù yiì bèy, e nèn màʼ anyùy wùn à vitú vév vé saʼ vi. Mo Kristu kpuun é kintam, kí nèn a dzə ji Nyùy wày ne áwune é njoy, a toʼnín wáy shó moo wír ve á koon fó kwaʼ rər, a wìy, a binsí mbeeteé.

Wír Kristùu yú kév a dzə̀ fo Kristu

¹⁶ Mo vèn sí yú kinyo a dzə̀ ké Nyùy, lá vèn yòʼ dzə́ə a yuurí kinyo ke wìr ve á suuy ji wír Nyùyi kér fó a nyeŋ vifá ve yi vímóʼ ví, wùn à vifá ve noón ví, e kfə̀n a rəsí kishiíy ké mbìy ki fó ŋwee, a bam vishiíy vímóʼ ví é kiya, e kù a lèm kishiíy ké bam a dzə̀ á ké wìr veé Juda.

¹⁷ Vé‑eè ló a yiì vinyo vìn vidzə̀m fo mbìy, a kù‑uù dzə̀ ji vimfìʼìr ve Kristu wo wù‑uù wíy wìy. Mo wù wìyìn ne, ví nèn shaà, á wáa yu a dzə̀ fo wun.

¹⁸ Lá vèn yòʼ a yuurí sa kinyo ke wìr ve á kóʼor wún ji á yú vinyo a dzə̀ é njèm, nèn nyaysì kén ji bó kí yoʼ ghèén, kan ven ji vèn wáa gvəʼə́r kitú e dzəə ye koŋ áwune, kfə̀n suuy ji vèn kù kér fó a bùnrì sa fo nshèelav se Nyùy si. Wír vìne kóʼor wún kisáŋ, suuy vinyo a dzə̀ mo kwaʼtì wírií dzəə̀n.

¹⁹ Áwune yòʼ dzəə́ yú fo Kristu wo dzəə̀n ji kitú ke kintatì ke wìr Nyùy. A kù dzə̀ wun wo wù fó vitaáví e kintatì ki, bo kí wáa kuy, a dzə mo Nyùy koŋ ji kí wáa dzə, réŋréŋ mo kitú ki tatin wún e dzə̀m, à nsəʼ si, à gháŋé shó, bo wú wáa lìm kijuŋ.

²⁰ Mo vèn kiìn ji vèn à Kristu‑uù tàtí ne, e kpù, vèn bòy fo dzə̀ʼə̀m yeé ndzə fèn, kfən yiì ka, bo vèn wáa yiì moo wír veé ndzə, a yuurí vinyo ve yén wíri ji á mo ndzə yii gháné.

²¹ Aá wáa shìvìr ji lá vèn yòʼ ghàr kin, lá vèn yòʼ a yutí kísə, lá vèn yòʼ a kùm kímóʼ kí.

²² Aá kù shivìr a dzə̀ vifá ve wíri yii kér, a ví shaa shaàn. Kù sìysì wír nsər see ben a dzə̀ mo kwaʼtì rəə́ dzəə̀n.

²³ A wíri kù yòʼ lo, á wàa yen ji vifií ví dzə̀ é vinyò foo fèn, a kwàʼtì ji dzə̀ nsər see shooy si yiì, wìr kìíy mó a bùnrì e dzəə yee réŋ, e kfə̀n kìíy mó a gvəʼə́r kitú kfə́, a nyàʼ vifá vímóʼ ví ji áwune ve á yú fo Nyùy. Á yén bèy, a bó yòʼ dzə̀ vinyo vìn vi sə̀ wír fo mensə́ mè dom wun, é wù yii kinyo ke bi kí gheéy.