Kintaŋ 34 - ŊWÀʼ NYÙY

Bìíy se wòŋ Kanan

¹ Nyùy Tàr suúy e Mooser jii,

² «Yòŋ wír veé Israyi, e sùúy aáwune jii, vèn yíi nəə́ e wòŋ Kanan wo dzəə̀n woŋ wo wíy a dzə ji vitsə́ʼ vén, é bìíy si wáa dzə.

³ A sí wíy a dzə jii, bìíy yee tsə́n wíy nàsì fo woʼ yee Tsin, a gwàmrì fo mbìv Edom, a yì wíy kèʼ mo Ndzə́v Shiŋgwaŋe ndzə̀yìn, e mbìv yee fo shùy yii tó,

⁴ e nèn a səy, e shaà kiŋgwàmrì ke Gwan Akrabbim fo mbìv yee tsə́n, e tosín wóʼ yee Tsin, e səy, e dù, e meé e Kadesh‑Barnea. Lo fo fo, é yì nèn kòʼ é Hasar‑Addar, e dù duùn é Asmon.

⁵ Yì lo fo Asmon, é yì du, e mèé e mbuŋ ndzə̀v yeé Ejiv, e nèn dù, e ndzə̀y e Rìbà Ndzə̀v woo Mediteranean.

⁶ «Fo bìíy yeé mbìv yee fo shùy yii nəə, é wáa dzə Rìbà Ndzə̀v woo Mediteranean, e dù bèy e ŋguùŋè ndzə̀v.

⁷ «Fo mbìv wòŋ yee kuy, é bìíy keʼ fó Rìbà Ndzə̀v woo Mediteranean, e nèn dù bèy, e dù, e bàʼ e Gwan Hor.

⁸ Yì lo fo Gwan Hor, é yì nèn dù e Lebo‑Hamat, e shaà, e dù, e bàʼ e Tsədad.

⁹ Yì wíy ràm, e shaà e Sivron, e dù, e ndzə̀y e Hasar‑Enan. Yee shooy wíy a dzə bìíy yeé mbìv wòŋ yee kuy.

¹⁰ «Bìíy yen yeé mbìv yee fo shùy yii tó wíy kèʼ fo Hasar‑Enan, e nèn dù e Shefam.

¹¹ Yì lo fo Shefam, é yì sə́y é Ribla, a wù dzə̀ é ghaa Ayin, e mbìv yee fo shùy yii tó. Bìíy wíy səy, e gwaàmè e babá seé agwan veé ghaa kibaŋ keé Kineret, e mbìv yee fo shùy yii tó.

¹² Yì wíy səy bèy, e nəə́ e ndzəv yee Jordan, e səy, e dù, e ndzə̀y e Ndzə́v Shiŋgwaŋe. Á mo nsay yen wíy a dzə bèy, mo bìíy kaarin, e tàr.»

¹³ Mooser nèn yòŋ wír veé Isray, e sùúy aáwune jii, «Nsay rə̀n dzə̀ ye Nyùy Tàr yòŋèn ji á fó á e rám see bvə̀ʼə̀ si, e fò e yee kintoʼnìne. Dzə̀ nsay ye vèn wíy tàr, e jàv ji vitsə́ʼ vév.

¹⁴ Ké rám Ruben wùn à yé Gadi, e lì kintoʼnìn ke rám Manasse mo lav sév sí dzə̀kìn e vitǎr vitàr kí dzə̀ jii, áwune sí kér nsay ji vév vee vitsə́ʼ.

¹⁵ Rám sin si‑iì sə̀ ne vév vee virə́ʼ, a dzə̀ é ndzə̀n Jordan yeé mbìv yee fo shùy yii tó, e ŋkìʼnìn Jeriko.»

Vilìmbìy ve ví‑iì yíi jàv nsay

¹⁶ Nyùy Tàr yòŋ e Mooser jii,

¹⁷ «Wír ve á wíy sə wò, e tàr nsay, e jàv ji vitsə́ʼ véné wíy a dzə taà cù Eleasar wùn Joshua woo wan Nun.

¹⁸ Vèn wíy lì kilìmbìy fo ram yee shó kimòʼón, aá sə́ ven, e tòʼtí nsay, e bó a jàv.

¹⁹ Wír vee shooyi dzə̀ jii: Fo rám Juda, á lì Kalev woo wan Jefunne.

²⁰ Fo rám Simeon, á lì Shemuel woo wan Ammihud.

²¹ Fo rám Benjamin, á lì Elidad woo wan Kislon.

²² Fo wìr vee rám Dan, á lì Bukki woo wan Jogli.

²³ Ké wón Joosev, á lì Haniel woo wan Efod, fo ram ye dzəə̀n yé Manasse,

²⁴ e lì Kemuel woo wan Shiftan fo ram ye dzəə̀n yé Efrayim.

²⁵ Fo rám Sebulun, á lì Elisafan woo wan Parnak.

²⁶ Fo rám Issakar, á lì Paltiel woo wan Asan.

²⁷ Fo rám Asher, á lì Ahihud woo wan Shelomi.

²⁸ Fo rám Navtali, á lì Pedahel woo wan Ammihud.»

²⁹ Á wír ve Nyùy Tàr‑iì yòŋèn, á tóʼtí nsay Kanan, e fò e wír veé Israyi ji vitsə́ʼ vév.