Kintaŋ 31 - ŊWÀʼ NYÙY

Ŋkfə́tír woo wír veé Midiané kitu

¹ Nyùy Tàr yòŋ e Mooser jii,

² «Siìr ŋkfə́tír e wír veé Midiané kitu. Kee shooy ki shaa, áà nèn kpù, e dù, e tàtí atàr vé ve vé‑eè duùn ne fo mbìy.»

³ Mooser nèn sùúy e wír veé Israyi jii, «Vèn báʼtí vilum ámóʼó fo věn mvəm, aá du, e màʼ wír veé Midian e rə́r sí, e siìr ŋkfə́tir Nyùy Tàr aáwuné kitu.

⁴ Vèn yíi a fəə́r wíri nsə̀kì nsə̀kì fo věn ram sí, bìʼ rə́r see shooy.»

⁵ Wír veé Israyi ku nèn fə̀tí vé rərí nsə̀kì e mòʼón mòʼón fo ram yee shó. Vé rər adzə̀me nèn a dzə ansə̀kì nshòv sibaà e ghvə̀m.

⁶ Mooser nèn tsə̀nsí áwune é shùu rər wír nsə̀kì nsə̀kì fo ram yee shó, e wày e Finehas wo dzəə̀n wan taà cù Eleasar kiwo, wù wáa dù, a ker vikáŋ veé lav cù, à sóŋ se vé‑eè yíi a dù, a toŋ si.

⁷ Á nèn dù, e fùnèn wír veé Midian, e yùyrí vilum adzə̀m, kù mo Nyùy Tàr‑iì yòŋèn e Mooser.

⁸ Vé‑eè yùyrí wíri fó, e tàtí afon veé Midian atàn, aá dzə̀ jii, Evi wùn à Rekem, à Tsur, à Hur, e lì Reba. Vé‑eè yùyrí sá Balaam woo wan Beor.

⁹ Wír veé Israyi nèn koòrí vikìy veé Midian wùn à wóné, e kùúy ŋgoo se nyàm sév sidzə̀m, e lì sé bvəy, e kùúy káv woo fó e dzə̀m.

¹⁰ Áwune‑eè tòn ŋkà se laʼ see fo wír veé Midiane‑eè dzə́ sidzə̀m e və́yí, e kfə̀n tòn sa viláʼáy vév vidzə̀m.

¹¹ Vé‑eè kùúy kéŋ yév e dzə̀m ji nsàʼmboʼ, e tàtí nyám si wùn à wíri,

¹² e nèn dù e wír ve vé‑eè kooriné wùn à vifá ve vé‑eè kuuyin ví, e yèn Mooser wùn taà cù Eleasar sho, à màŋgòŋ woó Isray, aá dzə̀ é kibeèy é mboʼ yeé Moav e ŋguùŋè Jordan, a fóo dzə̀ é ŋkìʼnìn Jeriko.

Shúu rərí kfə́n é bàm

¹³ Á lòo wìy, Mooser wùn à taà cù Eleasar, à vilìmbìy veé Isray vi nèn fəə̀ kibeey, e fíʼ səəsí áwune.

¹⁴ Mooser nèn lò, e shwìíy kilòŋ wùn à vitú ve rər ve ví‑iì wiy fo shùu rər ví, aámóʼó dzə̀ ve vé‑eè wám wír nsə̀kì nsə̀kì, aámóʼó wám wír wií wií.

¹⁵ Wù dzə́r aáwune jii, «Vèn yèe, e bóo màʼtì vikìy adzə̀m atin?

¹⁶ Dzə̀ áwune vin ve vé‑eè jùmrìn ntir Balaam, e lèvtí wír veé Isray, á bìn ndzə̀m e Nyùy Tàr, é bo kifə̀ʼ ki wiy, e teè màŋgòŋ wìr Nyùy Tàr.

¹⁷ Bo dzə̀ lèn jii, vèn yúyrí wón vee vilum adzə̀m, e yùyrí vikìy wùn à wónlě ŋgòn ve á kiiyin ne lumène adzə̀m.

¹⁸ Yii bèy, a vèn yíi bavtí wónlě ŋgòn ve á yóʼ ne kìíy lumèn adzə̀m, e lèm atin ji vén.

¹⁹ Wìr dzə̀m fo věn mvəm wo wù kì yuyrin wír, kìn wo wù kì kùmèn dzə́n wìr yíi dzə̀ʼə̀m e shweesí kibeèy kishiíy saàmbà. Lóo dzə e kishiíy kee taár wùn à kee saàmbà ki, é vèn *kfə́mrí vitú vén, e kfə̀mrí vé wìr ve vèn koorin.

²⁰ Vèn yíi kfəmrí ndzə̀y sidzə̀m, à kifá kidzə̀m ke á fèrìn e jùv, kìn e wúy bvəyi, kìn e kicí kí.»

²¹ Taà cù Eleasar nèn a naàrì nsər se Nyùy Tàr yòŋèn e Mooser e vé rər ve á kì dzəə̀n é shùu rərí.

²² A sí dzə̀ jii, kifá ke á fèrìn e kisha ki, kìn dzə̀ ké mbàm ke baar kí, kìn ke fəvír kí, kìn kee *brons, kìn dzə̀ kisha kee kiy, kìn kee tin, kìn kee *led,

²³ kifá kidzə̀m ke yòʼ dzə̀ və́yí tòn, á kù lì, é kí shaa é və̀y, e bó a dzə kiránén, là *kifàn. Yii bèy, aá kù kfə́mri sa e mendzə́v me ŋkfəmrì mè. Kifá kidzə̀m ke a dzə̀ kí shwì é və̀y, aá kfə́mrí kee shooy e mendzə́v me ŋkfəmrì mè cáʼ.

²⁴ Lóo dzə e kishiíy kee saàmbà, é wíri ku sù ndzə̀y sév, e nèn a dzə aránén là kifàn. Bo a dzə̀ lèn, á nə̀ə́ é kibeèy.

Kijav ke nsàʼmboʼ

²⁵ Nyùy Tàr suúy e Mooser jii,

²⁶ «Vèn à taà cù Eleasar, à vilìmbìy ve kfəə seé Isray vi yíi taŋ vifá ve á kuuyin fó kwaʼ rər vidzə̀m, e wìy sho. Á ku tàŋ wíri, e tàŋ nyám si.

²⁷ Á táŋé, aá tóʼnín é ntìntìn, é mbìv yìmòʼ du e vé rərí, é yìmòʼ du e kibér ke màŋgòŋ ki.

²⁸ Fo mbìv vifa ye yì du e vé rərí, aá fəə́r nsùʼ Nyùy Tàr fó fo. Á yíi fəə́r kifá kimòʼón fo vee ghii tàn vi. Á ku fə̀ə́r, kìn dzə̀ fo wíri, kìn dzə̀ fo anàʼa, kìn dzə̀ fo vimbèʼbìy ví, kìn dzə̀ fo bvə́y si.

²⁹ Á fəə́r nsùʼ və̀n fo áwuné mbìv vifa, e fò e taà cù Eleasar ji cu Nyùy Tàr.

³⁰ Fo mbìv vifa ve ví du e màŋgòŋ woó Isray, aá fəə́r kifá kimòʼón fo vee mtàn vi. Á ku fə̀ə́r, kìn dzə̀ wíri, kìn anàʼ, kìn dzə̀ vimbèʼbìy, kìn dzə̀ bvə́y si, kìn dzə̀ nyám símóʼ sí. Á fəər bèy, á fò e wír veé ram Levìi, áwune ve á leey fo kibàn ké Nyùy Tàr kí.»

³¹ Á bèy, Mooser wùn taà cù Eleasar ku nèn yiì mo Nyùy Tàr‑iì yòŋèn e Mooser.

³² Vé‑eè tàŋ vifá ve vé‑eè kuuyin fó kwaʼ rər, e wìy sho, a bó á yoʼ wày ve wìr mòʼón mòʼón‑eè turin, ví wáa dzə jii, bvə́y see njiì kishóv ghií ntuùfú aànsə̀kìi nshòv sitàn e msaàmbà e ghiì ntuùfú (675,600),

³³ anàʼ nsə̀kì nshòv sibaà e msaàmbà (72,000),

³⁴ vimbèʼbìy nsə̀kì nshòv mòʼón e mntuùfú (61,000),

³⁵ e bóo lì vikìy ve á yóʼ ne kìíy lumèn nsə̀kì nshòv sibaà e mtaár (32,000).

³⁶ Kintoʼnìn ke vé‑eè foon e wír ve vé‑eè duùn rə́r kí nèn a dzə jii, bvə́y see njiì kishóv ghii tàn aànsə̀kìi nshòv saàmbà e mtaár e ghii taár (337,500),

³⁷ a nsùʼ Nyùy Tàr fó mbìv fen dzə̀ njiì nshòv sitàn e msaàmbà e ghiì ntuùfú (675).

³⁸ Anàʼa‑aà dzə̀ nsə̀kì nshòv ntuùfú e mtaár (36,000), a nsùʼ Nyùy Tàr‑iì dzə̀ fó fo, anàʼ nshòv sibaà e msaàmbà (72).

³⁹ Vimbèʼbìy ví‑iì dzə̀ kishóv ghii tàn aànsə̀kìi mtaár (30,500), nsùʼ Nyùy Tàr wáa dzə fo fo, vimbèʼbìy nshòv mòʼón e mntuùfú (61).

⁴⁰ Wíri wáa dzə nsə̀kì nshòv ntuùfú e ghvə̀m (16,000), nsùʼ Nyùy Tàr wáa dzə fo fo, wír nshòv sibaà e mtaár (32).

⁴¹ Mooser nèn lì nsùʼ Nyùy Tàr, e fò e taà cù Eleasar, kù mo Nyùy Tàr‑iì yòŋèn e wun.

⁴² Kintóʼ ke kí‑iì duùn e wír veé Israyi, ke Mooser‑iì toʼnin vifá, e bày fo ké vé rər kí,

⁴³ kí nen a dzə jii, bvə́y see njiì, kishóv ghii tàn aànsə̀kìi nshòv saàmbà e mtaár e ghiì taár (337,500),

⁴⁴ anàʼ nsə̀kì nshòv ntuùfú e mtaár (36,000).

⁴⁵ Vimbèʼbìy kishóv ghii tàn aànsə̀kìi mtaár (30,500).

⁴⁶ Wíri wáa dzə nsə̀kì nshòv ntuùfú e ghvə̀m (16,000).

⁴⁷ Fo vintóʼ ve vifa ve ví‑iì duùn e wír veé Israyi vin, Mooser‑iì fə̀ə́r kifá kimòʼón kimòʼón fo vee mtàn vi. Wù fəə́r fó mbìv wíri, e fə̀ə́r fo mbìv nyàm, e nèn fò e wír veé ram Levìi, áwune ve á leey fo kibàn ké Nyùy Tàr réŋréŋ mo Nyùy Tàr‑iì yòŋèn e wun.

⁴⁸ Á bèy, vitú ve rər ví nèn yèn Mooser,

⁴⁹ e sùúy sho jii, «Aŋgàa lìm vée tàŋ ne vé rər ve á dzəə̀n e věr sar adzə̀m, a bó wìr mòʼón yoʼ lày fo věr mvəm.

⁵⁰ Vèr nen wìy e vifá ve sùsù vi ve dzəə̀n *kisha ke mbàm ke baar kí ji cu Nyùy Tàr. Kù dzə̀ vifá ve wìr mòʼón mòʼón‑eè toon shó, e kwaʼ rər, e tùr, a ví dzə̀ jii, visáʼ wùn à mfuy si, andzə̀ŋgwáŋ, ayèreŋ, e lì ashàŋ. Vèr nén a wìy sho, e fo e Nyùy Tàr ji vèr tín á vitú vér bìʼ kiŋ ye wù kìŋsìn ver.»

⁵¹ Mooser wùn taà cù Eleasar ku nèn sə̀ vifá vee kisha ke mbàm ke baar kí viy fo áwune, a vidzə̀m vi kù‑uù dzə̀ vifá ve kisù ke wùn.

⁵² Vé‑eè fìʼ vifá vee kisha ke mbàm ke baar kí, ve vitú ve rər ví‑iì foon ji cu Nyùy Tàr, ví wáa dzə e shùu akilu ghii baà. Kù‑uù fò vitú ve rər ve ví‑iì wám wír nsə̀kì nsə̀kì, à ve ví‑iì wám wír wií wií ví.

⁵³ Kù dzə̀ vifá ve wìr mòʼón mòʼón‑eè tùrìn kitú kfə́, e bòŋ fó kwaʼ rər.

⁵⁴ Á vifá vee kisha ke mbàm ke baar kí ve Mooser wùn taà cù Eleasar‑iì səən fo vitú ve rər ve ví‑iì wám wír nsə̀kì nsə̀kì, à ve ví‑iì wám wír wií wií ví. Áwune sə́, e dù lèm e *kibàn ké ntàsín ji vifá ve ví wíy a yiì, é Nyùy Tàr wáa kuumé wír veé Isray.