Kintaŋ 30 - ŊWÀʼ NYÙY

Ntir see kùm kilìʼ ke wiíy lo, e lìʼ

¹ Mooser suúy e vilìmbìy ve ram sé wìr veé Isray vi jii, «Kinyo ke Nyùy Tàr yòŋèn kí dzə̀ jii,

² ‹a wìr yiì kilìʼ ji wun fó a kifá e Nyùy Tàr, kìn wù yiì kilìʼ kímóʼ kí, e kùr kitú kfə́ shó, bo bó yòʼ dzə̀ wù yàʼáy. Wù kù yíi yiì mo wù kì lìʼìn.›

³ «A wánlè ŋgòn wo wù dzə̀ə́ e tàr wóv lav lòo dzə, e yiì kilìʼ ji wun fó á kifá e Nyùy Tàr, kìn wù yiì kilìʼ kímóʼ kí, e kùr kitú kfə́ shó,

⁴ tàr wov yú kilìʼ kfə́ ke wù lìʼìn, à kinyo ke wù kàʼàn kí, e làa yòʼ ghay, bo kinyo kidzə̀m ke wù lìʼìn, à kinyo ke wù kàʼàn kidzə̀m, e kùr kitú sho ki kù yíi a tiy fo.

⁵ Yii bèy, tàr wov yú, e shàʼnín, bo bó kinyo ke wù kì lìʼìn, à ke wù kì kàʼàn, e kùr kitú kfə́ shó ki yòʼ kfə̀n tíy fo. Nyùy Tàr yíi màʼày jay və, bìʼ fo shaʼnin tàr wov fo wù yii mo wù lìʼìn.

⁶ «Wáa dzə a wù sí kér lúm, e lò, e yiì kilìʼ, kìn wù lò, e kàʼ kiyúŋ ké kinyò e kimbùmmbúm,

⁷ lum və yú, e làa yòʼ yòŋ kinyo e kishiíy fó, bo kinyo ke wù lìʼìn, kìn ke wù kàʼàn, e kùr kitú kfə́ shó ki kù tíy fo.

⁸ Yii bèy, a lum və yù, e shàʼnín, bo wù tsə̀ʼ ne kilìʼ kee shooy, kìn kiyúŋ ké kinyò ke wù kì kàʼàn é kimbùmmbúm, e kùr kitú kfə́ shó. Bìʼ bey, é Nyùy Tàr yiì màʼày jay və.

⁹ «Yii bèy, a wiíy ŋkfə, kìn kimfəə ke wiíy ki lòo dzə, e lìʼ kinyo, kìn wù kàʼ kinyo, e kùr kitú kfə́ shó, bo kí tíy fo.

¹⁰ «A wiíy lò a dzə e lum və́ lav, e yiì kilìʼ, kìn wù kàʼ a dzə̀ kinyo, e kùr kitú kfə́ shó,

¹¹ lum və yú, e làa yòʼ kìnèn, kìn e làa yòʼ yòŋ kinyo kée shaʼnín wun sho, bo kilìʼ kfə́ kí kù tíy fo, a kinyo ke wù kàʼàn, e kùr kitú kfə́ shó ki kù tíy sa fo.

¹² Yii bèy, a lum və yù, e shàʼnín ŋkuuŋkùŋ, bo kinyo ke wù kì kàʼàn, e kùr kitú kfə́ shó ki yòʼ yíi a tiy fo. Lum və yiì ne, kí láy kisáŋ, a Nyùy Tàr yíi màʼày jay və.

¹³ A dzə̀ kinyo, fə̀m kee ka, ke wiíy lìʼìn, kìn ke wù kàʼàn, e kùr kitú kfə́ shó, bo a dzə̀ lum və biìmé, kìn wù shàʼnín.

¹⁴ Yii bèy, a lum lò, e làa yòʼ yòŋ kinyo e wiíy, vishiíy ví wáa liysín, bo dzə̀ ji wù biìmé a kinyo ke wiíy lìʼìn, kìn ke wù kàʼàn, mo bó wù yoʼ ghày kinyo, e kèʼ fo kishiíy ke wù kì yuun.

¹⁵ Á bèy, lum lo, a shaʼnín, a vishiíy ve wù kì yuun ví líysín ne, bo lǒn jay wiíyi sì a dzə̀ e lum kitu.»

¹⁶ Á nsər se Nyùy Tàr‑iì yòŋèn e Mooser kùm lumèn wùn wiiy və, à see kùm kitàr wùn wan və woo wiíy wo wù dzə̀ə́ e lav.