Kintaŋ 3 - ŊWÀʼ NYÙY

Wón Aaron

¹ Kfə́ə Aaron wùn Mooseri rə̀ne mo vé‑eè saŋen, a yì‑iì dzə̀ é ghan se Nyùy Tàr‑iì súŋnin e Mooser e Gwan Sinay.

² Wón Aaron vee vilume dzə̀ jii, Nadav woo wan mbìy, e lì Abihu wùn à Eleasar, à Itamar.

³ Á yír sé wón Aaron, a kù dzə̀ áwune ve vé‑eè yoʼon, e lèm ji á wáa lìm ji atàá cù.

⁴ Yii bèy, Nadav wùn Abihu nèn lò, e kpùkír, aá wíy é kibàn, a cù Nyùy e woʼ yee Sinay, a dzə̀ e və́y wo Nyùy yoʼ biìmée. Mo bó áwune yòʼ‑oò ló a ker wón, ku nèn bèr Eleasar wùn Itamar ve vé‑eè lim ji atàá cù e tàr wov Aaron ghaŋ.

Á shóʼ rám Levi ji wón lìm atàá cù

⁵ Nyùy Tàr lò, e sùúy e Mooser jii,

⁶ «Wìy e rám Levìi fó mentsə̀m, e kòʼór áwune e taà cù Aaron si, aá fíʼ a lìm fo wun.

⁷ Áwune wíy a lìm fo wun, à fo màŋgòŋ woó Isray e dzə̀m mó a leéy fo *kibàn ké ntàsín, a yiì antàʼtìn vee fó.

⁸ Áwune wíy a leéy fo vifá ve ker veé kibàn ké ntàsín ví vidzə̀m, a lìm lim seé kibàn ké Nyùy, a kù dzə̀ e wír veé Israyí kiliŋ.

⁹ Ku wày wír veé ram Levi vìne e Aaron wùn à wón vəə́ kiwo ji wír ve á shoʼon ne fo wír veé Israyí mvəm, e fò aáwune ŋkuuŋkùŋ.

¹⁰ Ké Aaron wùn à wón vəə́, ku lèm áwune, aá kú a lìm lim yév ji atàá cù. Kí nén a dzə jii, a wìr woo və̀y shaà e mentsə̀m me kibàn ké Nyùy, bo wù kpú.»

¹¹ Nyùy Tàr kfən sùúy e Mooser jii,

¹² «Yén ri mbà, mo woo Nyùy, shòʼ mo wír veé ram Levi fo wír veé Israyí mvəm ji á li kilíŋ ke wón wìr veé Isray ve dzəə̀n dzə́ə mbìyi. Wír veé ram Levìi ku nèn a dzə vém,

¹³ bìʼ fo wón adzə̀m ve dzəə̀n dzə́ə mbìyi kù dzə̀ vém. Mò‑oò yùyrí wón vee dzəə́ mbìyi é wòŋ Ejiv e kishiíy fóo fèy, e nèn shòʼ kifá kidzə̀m keé Isray ke dzəə̀n dzəə́ mbìyi ji kém. Kìn dzə̀ wan wìr, kìn wo nyàm, bo kù sí wìy a dzə vém. Dzə̀ mo Nyùy Tàr.»

Á táŋ rám Levi

¹⁴ Nyùy Tàr lò, e sùúy e Mooser e woʼ yee Sinay fèy jii,

¹⁵ «Táŋ rám Levìi mo kfə́ə sév sí dzə̀kìn e vitǎr vitàr. Ku tàŋ wón vee vilum adzə̀m vee kèʼ fó ŋwee, a dù duùn fó mbìy.»

¹⁶ Á bèy, Mooser ku nèn tàŋ áwune mo Nyùy Tàr‑iì yòŋèn.

¹⁷ Yír sé wón Levi si‑iì dzə̀ jii, Gershon wùn à Kohat, à Merari.

¹⁸ Yír sé wón Gershon mo kfə́ə sév sí dzə̀kìn sí dzə̀ ji Libni wùn Shimey.

¹⁹ Vé Kohat vee wón mo kfə́ə sév sí dzə̀kìn, á wáa dzə ji Amram wùn à Ishar, à Hebron, à Ussiel.

²⁰ A wón Merari mo kfə́ə sév sí dzə̀kìné dzə̀ ji Maali wùn Mushi. Á kfəə́ see rám Levi mo vitàr vév ví‑iì dzə̀kìn.

²¹ Kfəə́ se sí‑iì ràmèn fo Gershon si wáa dzə ji wír Libni wùn à vé Shimeyi. Á kfəə́ se sí‑iì ràmèn fo Gershon.

²² Lùmèn woo fó e dzə̀m woo kèʼ fó ŋwee, a dù duùn fó mbìy‑iì dzə̀ kishóv ghii tàn aànsə̀kìi saàmbà (7,500).

²³ Kfə́ə Gershon e dzə̀me kù‑uù tàm vibàn vév a dzə̀ é mbìv kibàn ké Nyùy yee fo shùy yii nəə, a kù dzə̀ fó bàm.

²⁴ Taà kfəə wìr vee vé Gershone wáa dzə Eliasav woo wan Lael,

²⁵ a ntàʼtìn wov woo kùm *kibàn ké ntàsín‑eè dzə̀ ji á wáa leéy a fo wúntí kibàné, à vifá ve á sum sho vi, à nshìy ye á sə́ti shúu kibàn ké ntàsín shó,

²⁶ à ndzə̀y se á keerì, kaári maàndzə kibàn ké ntàsín wùn à kíy cùu shó, à nshìy ye yì dzəə̀n é shuù wo wú nəə e maàndzə, e lì akfəə̀ vee fó. Aá kú a yiì vinyo vidzə̀m ve ví kùmèn vifá vìn.

²⁷ Kfəə́ se sí‑iì ràmèn fo Kohat si wáa dzə jii, wír Amram wùn à vé Ishar, à vé Hebron, à vé Ussieli. Á kfəə́ se sí‑iì ràmèn fo Kohat.

²⁸ Lùmèn woo fó e dzə̀m woo kèʼ fó ŋwee, a dù duùn fó mbìy‑iì dzə̀ kishóv ghií ntuùfú aànsə̀kìi waamé (8,600) mo vé‑eè lèmèn ji á wáa yiì antàʼtìn veé kibàn ké Nyùy.

²⁹ Wír veé ram Kohati nèn tàm vibàn vév é mbìv kibàn ké Nyùy yee tsə́n,

³⁰ a taà kfəə wov dzə̀ Elisafan woo wan Ussiel.

³¹ Lim yéví‑iì dzə̀ ji á wáa leéy a fo ŋkùv mensàŋ, à fo kidàŋ ki wùn à kitiir ke làm ki. Á kfə́n a leéy sa kíy se cù, à vifá ve ker vee kùm kibàn ké Nyùy, ve atàá cùu yii yii lim sho vi, à raŋ yeé mvə̀m kibàné, a yiì antàʼtìn vee kùm vifá vìn.

³² Taà cù wo wù‑uù leey vilìmbìy ve wìr veé ram Levi wáa dzə Eleasar woo wan Aaron. Kù‑uù leey wun wír ve á yii antàʼtìn vee kùm kibàn ké Nyùy.

³³ Kfəə́ se sí‑iì ràmèn fo Merari si wáa dzə ji wír Maali wùn à vé Mushìi. Á kfəə́ se sí‑iì ràmèn fo Merari.

³⁴ Lùmèn woo fó e dzə̀m woo kèʼ fó ŋwee, a dù duùn fó mbìy‑iì dzə̀ kishóv ghii baà aànsə̀kìi ntuùfú (6,200),

³⁵ taà kfəə wov wáa dzə Tsuriel, a dzə̀ wan Abihail. Áwune‑eè tàm vibàn vév é mbìv kibàn ké Nyùy yee kuy.

³⁶ Vé‑eè shòʼ áwune ji á wáa leéy a fo vintàràŋ ve kibàn ké Nyùy wùn à mbàŋ si, à vitóm vi, à viyiy vi, à vifá vee kùm vifá vìn vi vidzə̀m, a yiì ntàʼtìn e dzə̀m woo kùm vifá vee shooy,

³⁷ e kfə̀n a leéy sa fo vitóm ve kày ye yí kaarin maàndzə vi, e lì viyiy vév, à viŋkùm vév ví, e bóo lì akfəə̀.

³⁸ Wír ve vé‑eè tám vibàn vév a dzə̀ é mbìy kibàn ké Nyùy, e mbìv yee fo shùy yii tóo nén a dzə Mooser wùn à Aaron, à wón vəə́. Kù‑uù yii áwune vinyo veé mvə̀m kibàn, a fə̀m dzə̀ ka ke vé‑eè yii fo bìʼ wír veé Isray. A yì‑iì dzə̀ ji wìr woo və̀y kóʼtí fó, bo á yúyri ŋgaàŋ.

³⁹ Mooser wùn Aaron‑eè tàŋ wír veé ram Levi mo Nyùy Tàr‑iì suuyin ji á táŋ e kfəə sí kfəə si. Vé‑eè tàŋ lumèn e dzə̀m woo kèʼ fó ŋwee, a dù duùn fó mbìy, wù wáa dzə nsə̀kì nshòv sibaà e mbaà (22,000).

Rám Levìi lí kirə́ʼ ké wón Isray vee dzə́ə mbìyi

⁴⁰ Nyùy Tàr lò, e sùúy e Mooser jii, táŋ wón mbìyi vee vilum veé Isray adzə̀m vee kèʼ fó ŋwee, a dù duùn, a way mfìʼ taŋ e yír yir.

⁴¹ Áà nèn fò wír veé ram Levi vìn e mò ji ŋkùvtu wón Isray ve dzəə̀n dzə́ə mbìyi, e kfə̀n fo sa nyám se wìr veé ram Levi e mò ji ŋkùvtu nyàm se wìr veé Isray sidzə̀m see dzə́ə mbìyi. Dzə̀ mo Nyùy Tàr.

⁴² Á bèy, Mooser nèn tàŋ wán woo lumèn e dzə̀m woó Isray wo dzəə̀n dzəə́ mbìyi mo Nyùy Tàr‑iì suuyin e wun.

⁴³ Vé‑eè tàŋ é yír yir, e kèʼ fo woó ŋwee, a dù duùn fó mbìy, á wáa dzə nshòv sitaár e msaàmbà e ghiì baà aànsə̀kìi nshòv sibaà e mbaà (22,273).

⁴⁴ Nyùy Tàr nèn sùúy e Mooser jii,

⁴⁵ «Lì wír veé ram Levi vìne, e fò e mò ji ŋkùvtu wón Isray vee dzə́ə mbìyi, e lì sa nyám se wìr veé ram Levi, e fò e mò ji ŋkùvtu nyàm se wìr veé Isray. Wír veé ram Levìi yíi a dzə vém. Dzə̀ mo Nyùy Tàr.

⁴⁶ Fo ké wón Isray vee vilum vee nshòv sitaár e msaàmbà e ghii baà ve á kùʼnìn, e shaà wón Levi, á yíi tin áwune tínén.

⁴⁷ À yíi a sə kisha ke mbàm ke fəvír kí *ashekel atàn atàn, e kitu kitu mo mfìʼ shekel woó lav cù yii dzə́, a vidzəəsì ví dzə̀ *gera mbaà.

⁴⁸ Á yíi sə mbàm se á tinen wón Isray vìn sho, áà nèn fò e Aaron wùn à wón vəə́.»

⁴⁹ Á bèy, Mooser nèn sə̀ mbàm se kintin fo wír vìn ve vé‑eè kùʼnìn, e shaà vee shooy ve vé‑eè tinen, e kùv a dzə̀ e wír veé ram Levìi.

⁵⁰ Wù‑uù sə̀ mbàm fo wón Isray vìn ve dzəə̀n dzə́ə mbìyi, kisha ke mbàm ke fəvír kí ashekel nshòv sitàn e mntuùfú e ghiì taár e nsə̀kì (1,365), a kù‑uù dzə̀ mo mfìʼ shekel woó lav cù yii dzə́.

⁵¹ Mooser ku nèn fò mbàm se kintin sìn e Aaron wùn à wóné mo Nyùy Tàr‑iì suuyin e wun.