Kintaŋ 29 - ŊWÀʼ NYÙY

Cu yeé Ŋkǎʼ Kiya ke Fíy ki

¹ «Lóo dzə e kishiíy ké mbìy ki fó ŋwee woo saàmbà, vèn bàʼtí, a bùnrì Nyùy Tàr. A bó yòʼ dzə̀ vèn kfə̀n lìm lim ye á yii lim e vishiíy vee viy. Dzə̀ kishiíy ke vèn kú a lò, a toŋ a dzə̀ sóŋ sí.

² Lóo dzə e kishiíy fóo fèy, vèn cù Nyùy Tàr e cu ye tonèné, é kirəm kfə́ kí wáa rə̀ʼtìn, a bòŋ wun. Vèn yii cu rəə́ e wàn nàʼ woo lumèn, e yiì e kiyáʼ ki, e yiì e wón viyaʼa saàmbà, vee kiyá kiyá. Nyám sìn sidzə̀m si kú a dzə see là nsem.

³ Á lóo yiì cu see shooy, á kù a yiì wùn à yé vifa ve yii, a dzə̀ e meŋkfəŋ me kpuún mè, aá shwír meŋgvə́r shó. Á lóo yiì cu e nàʼ, á bàr meŋkfəŋ sho akilu ataár, lóo yiì e kiyáʼ ki, á bàr meŋkfəŋ sho akilu abaà.

⁴ Lóo yiì e wàn kiyaʼ, á bàr meŋkfəŋ kilu e mòʼón.

⁵ Á lóo yiì cu yee shooy, á wàa yiì sa wùn à yé ajayi, e fíʼ manrí ajay vén shó, aá yii a dzə̀ e kibév ki.

⁶ Á ku yiì cu sìn, e bóo lì ye á kù yii yii e kitu ke ŋwee, à ye tonèné, ye á yii kishiíy kidzə̀m, aá táti wùn à yé vifa ve yii, à yé melùʼu réŋréŋ mo kí dzəə̀n ji á wáa yiì. Dzə̀ cu se və́yí bin fo fo, a kirəm kfə́ kí rəʼtìn, boŋ Nyùy Tàr.

Cu yeé Kishiíy ké Kiman

⁷ «Wíy lóo dzə e ŋwee woo saàmbà, e kishiíy ke kí meen ji ghvə̀m, vèn bàʼtí, a bùnrì Nyùy Tàr. Vèn lem jíŋ, e làa yòʼ lìm lim.

⁸ Vèn yii cu Nyùy Tàr ye tonèné, é kirəm kfə́ kí wáa rə̀ʼtìn, a bòŋ wun. Vèn ku yiì cu rə̀n e wàn nàʼ woo lumèn, e yiì e kiyáʼ ki, e yiì e wón viyaʼ vee kiyá kiyáa saàmbà. Nyám sìn sidzə̀m si kú a dzə see là nsem.

⁹ Vèn kú a bar sa cu vifa ve yi sho, a dzə̀ meŋkfəŋ me kpuún mè, aá shwír meŋgvə́r shó. Lóo dzə ye á yii e nàʼ, á bàr meŋkfəŋ sho akilu ataár. Lóo dzə ye á yii e kiyáʼ ki, á bàr meŋkfəŋ akilu abaà.

¹⁰ Ye á yii e wàn kiyaʼ, á bàr meŋkfəŋ sho kilu e mòʼón.

¹¹ Vèn ku yiì sa cu yímóʼó e kibév ki ji yé ajay, e bàr e yé ajay ye á yíi a taŋrí wíri shó, a man ajay vév. Vèn lóo yiì cu sìn, á kù yiì sa ye tonèn ye á yii vishiíy vidzə̀m, e tàtí wùn à yé vifa ve yii, à yé melùʼu fó ghaŋ mo kí yii dzə́.

Cu yeé Ŋkǎʼ Tàv sé Ghan

¹² «Wíy lóo dzə kishiíy nshòv sitàn e ghvə̀m e ŋwee wo wú meen ji saàmbà, vèn kaàrí, a bùnrì Nyùy Tàr. Lá wìr yòʼ lìm lim ye á yii lim e vishiíy vee viy, aá kù wíy a yi ŋkàʼ vən kishiíy saàmbà.

¹³ Á keʼ e kishiíy ké mbìy ki, a yiì cu ye tonèné, cu ye və́yí bin fo fo, é kirəm kfə́ kí wáa rə̀ʼtìn, a bòŋ Nyùy Tàr. Vèn yii e wón nàʼ vee vilume nshòv sitaár e ghvə̀m, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

¹⁴ Vèn ku yiì sa cu vifa ve yi ye dzəə̀n meŋkfəŋ me kpuún mè, aá shwír meŋgvə́r shó. Lóo dzə cu ye á kì yii e nàʼ, á lì meŋkfəŋ akilu ataár, e bàr shó. Lóo dzə ye á kì yii e kiyáʼ ki, á lì meŋkfəŋ akilu abaà, e bàr shó.

¹⁵ Lóo dzə ye á kì yii e wàn kiyaʼ, é meŋkfəŋ mè wáa dzə kilu e mòʼón.

¹⁶ Vèn wáa yiì sa cu ajay e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

¹⁷ «E kishiíy ke kí meen ji baà, vèn yiì cu aànàʼ vee vilume nshòv sibaà e ghvə̀m, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

¹⁸ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

¹⁹ Vèn yii sá cu ajay e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

²⁰ «E kishiíy ke kí meen ji taár, vèn yiì cu aànàʼ vee vilume nshòv mòʼón e ghvə̀m, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

²¹ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

²² Vèn yii sá cu ajayi e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

²³ «E kishiíy ke kí meen ji kweè, vèn yiì cu aànàʼ vee vilume e ghvə̀m, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

²⁴ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

²⁵ Vèn yii sá cu ajay e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

²⁶ «E kishiíy ke kí meen ji tàn, vèn yiì cu aànàʼ vee vilume bvə̀ʼə̀, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

²⁷ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

²⁸ Vèn yii sá cu ajay e kibév ki, e bóo lì cu ye tonèné ye á yii vishiíy vidzə̀m wùn à yé vifa ve yii, à yé melùʼu fó ghaŋ.

²⁹ «E kishiíy ke kí meen ji ntuùfú, á yiì cu aànàʼ vee vilume waamé, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

³⁰ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

³¹ Vèn yii sá cu ajay e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

³² «E kishiíy ke kí meen ji saàmbà, vèn yiì cu aànàʼ vee vilume saàmbà, e yiì e viyáʼ vi vibaà, e yiì e wón viyaʼ vee kiyá kiyáa nshòv sikweè e ghvə̀m. Nyám sìn sidzə̀m si kú a dzə see là nsem.

³³ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

³⁴ Vèn yii sá cu ajay e kibév ki, e bóo lì cu ye tonèné, ye á yii vishiíy vidzə̀m wùn à yé vifa ve yii, à yé melùʼu fó ghaŋ.

³⁵ «Lóo dzə e kishiíy kee waamé, é vèn kaárí, a bùnrì Nyùy. Lá wìr yòʼ lìm lim ye á yii lim e vishiíy vee viy.

³⁶ Vèn yii cu Nyùy Tàrí e cu ye tonèné, cu ye və́yí bin fo fo, é kirəm kfə́ kí wáa rə̀ʼtìn, a bòŋ wun. Á yii cu rə̀n e wàn nàʼ woo lumèn, e yiì e kiyáʼ ki, e yiì e wón viyaʼ vee kiyá kiyáa saàmbà. Nyám sìn sidzə̀m si kú a dzə see là nsem.

³⁷ Á lóo yiì cu see nyám sìn si, á bàr yé vifa ve yi wùn à yé melùʼu e kitu kitu, aá ku bàr mo nsər din ji á yii e nyàm yee shó.

³⁸ Vèn yii sá cu ajayi e kibév ki, e bóo lì cu ye tonèné ye á yii vishiíy vidzə̀m wùn à yé vifa ve yii, à yé melùʼu fó ghaŋ.

³⁹ «Á cu se vèn kú a yiì, a ghvəm Nyùy Tàr shó mo ŋkàʼ sí dzə̀kìn, a yiì cu yee shó, e ŋkàʼ woo shó, kìn dzə̀ ye tonèné, kìn yé vifa ve yi, kìn yé melùʼ, kìn yé kikòŋnìn. Vèn ku yiì cu sìn, e bóo lì se á yii ji á yiì ne a kilìʼ, e lì sé kimbòŋwùn.»

⁴⁰ Mooser‑iì naàrì vinyo vìn vidzə̀m e wír veé Israyi, kù réŋréŋ mo Nyùy Tàr‑iì yòŋèn e wun.