Kintaŋ 24 - ŊWÀʼ NYÙY

¹ Mo Balaam yenen ji Nyùy Tàr taʼ, e səə̀vì a Isray sə́əvin, la wù yòʼ kfə̀n dzə́ə a dù ji wun du, e tàr a kinyo moó ghan símóʼ sí. Wù tiím fó, e lò, e bìnkìr, a kìʼ wóʼ,

² e lòo nàn sí, e yèn a wír veé Israyi tám é vilaʼáy mo rám sév sí dzə̀kìn. Kiyoy ke Nyùy ki nèn wìy e Balaam wùn,

³ wù wáa tiisí ntum Nyùy, a suúy jii: «Ntum Balaam woo wan Beor, ntum ŋgaà wo wù yén virə́ʼ.

⁴ Dzə̀ ntum ŋgaà wo wù yú jí se Nyùy, ntum wìr wo Ŋgaà Vitaàví Vidzə̀m ghemen ndzə e wun. Wù gbu e nsay, wù wàa yen vinyo.

⁵ Jakov, yén búʼú mo vibàn vé vi boŋkìrì. Isray, ku lèéy búʼú kirə́ʼ ké ke dzə ki.

⁶ Kí dzə̀ moo mboʼ ye yì neèmèn, e dù, a dzə moo kiboó keé mbuŋ ndzə̀v. Kí dzə̀ moo vicí vee *alo, ve bìyìn Nyùy Tàr, a dzə moo vicí vee *sidar, ve ví teʼ e ghaa ndzəv.

⁷ Kirə́ʼ, a wuú sə́y fo ji shàm, aá wáy ŋgoòy, a nsay rə ji tòʼ. Fòn woo fó wíy a ker vitaáví, e shaà Agag, é sáʼ rəə́ wáa dzə e yúʼnín.

⁸ Nyùy fə̀ə́r ne áwune fó wòŋ Ejiv, á máʼ rə́r sév e vitaáví vé nyar vi. Áwune laar vitúm vee aŋgaà vév vibàn, béʼti vighvə́r vé aŋgaàŋ e vimbeʼ vimbeʼ, taŋ aŋwérín e mvən si.

⁹ Áwune lo, á boòtí wún, a neŋ moo mànyàm bvərə̀ʼ, a neŋ moo yeè nyàm bvərə̀ʼ. A dzə̀ jùm la? Kisəəvì kí kú a dzə fo wìr wo wù səəvì áwune, é lòné ku shòv wír wo wù shóv áwune.»

¹⁰ Balak yú vinyo vìn, kilòŋ kí shwiíy wun e ŋàŋ, wù wáa nə̀r kóy, a saʼ Balaam jii, «Bó m bèn jàŋ wò ji à wiy, e shòv vém vé vibàné, à wíy, e kfə̀n səə̀vì áwune sə́əvin ben akàŋ ataár a?

¹¹ Ké lèn ki, wò‑óò du dúun e věn wòŋ mo m yòŋèn ben. Mò‑oò yòŋ ji m yíi ghvəmsín a wò, yii bèy, Nyùy Tàr kìm ne ghvə́msín yee shooy.»

¹² Balaam bìnèr e Balak jii, «Kí à kì kinyo ke mò‑oò suuyin e wír ve wò‑oò tumen ji á yén moó.

¹³ Mò‑oò sùúy ji a Balak fə̀m fò mo lav, a *kisha ke mbàm ke baar kí wùn à ke fəvír kí rún shó, bo yòʼ dzə̀ m yàʼáy á kinyo ke Nyùy Tàr yòŋèn, e yiì kinyo fo mǒ kitu, kìn dzə̀ ke juŋ ki, kìn ke bi kí. Kinyo ke Nyùy Tàr yíi a yòŋ ki dzə̀ á kíwun ke m yíi a suúy.»

Balaam tiísí ntum Nyùy ye bàm

¹⁴ Balaam lò, e sùúy e Balak jii, «Bo mo‑óò du, e yèn wír vém. Yii bèy, wìy ó, m lo, e yiì, áà kiíy kinyo ke wír vìne lo, e yiì e vèn é vishiíy ve ví wiyì.»

¹⁵ Balaam nèn shaà fo mbìy, a suúy jii: «Ntum Balaam woo wan Beor, ntum ŋgaà wo wù yén virə́ʼ.

¹⁶ Ntum ŋgaà wo wù yú kisúŋnìn ke Nyùy, wo wù kiiy vinyo ve Ŋgaà woo Taà Vitu, yén vinyo ve Ŋgaà Vitaàví Vidzə̀m ghemen ndzə e wun. Wù gbu fo nsay, wù wàa yen vinyo.

¹⁷ M yén ŋgaàŋ, a bó wù yòʼ sì lèn. M màʼ sí, a m yén wun ntàmda. Fòn wíy lò fo Jakov ram mo lò sàŋ, kitoómé ké vifòn ki wíy koʼ e Isray. Wù wíy bvəʼtí vitú ve wìr veé Moav, e teè wónlě vilum veé Shet.

¹⁸ Wù wíy tòn Edom woo ŋgaà vibàn və, e laàr Seir, e yòv nsay rə, é Isray kú a kuy kfə́ kuyín.

¹⁹ Ŋgaà saʼ kù wíy fəə fo rám Jakov, a wù wíy laàr wir dzə̀m wo wù tuùtìn, e bòy e ŋkàlaʼ.»

²⁰ Balaam nèn màʼ sí, e lèéy nsay Amalek, a tin kàʼ və jii, «Amalek‑iì dzə̀ kitúm ke mbìy ki e vitúm ví mvəm, yii bèy, a kimaysì kév kí wíy a dzə ji á laar áwune.»

²¹ Wù kfən màʼ sí, e lèéy nsay Ken, a tin kàʼ və jii, «Kirə́ʼ ké ke dzə ki dzə̀ kikiŋsìn, à bàʼrì láʼ yé, a dzə̀ é mvə̀m vilála.

²² Yii bèy, ven vee wír veé Ken, á wíy səʼsí ven fó wòŋ. Asshur wíy a ker ven ji akwàn, e dù, e meé e le?»

²³ Balaam kú a tiisí ntum rə, a suúy jii: «Éè mò, a dzə̀ wìy tìím la é ghan se Nyùy wíy yiì vinyo vìn.

²⁴ Vikóŋ vi wíy a wìy fo Kittim, a wìy, a shwivír Asshur wùn Eber, é wun woo ŋgaà laàr, é wù ku mày sa.»

²⁵ Á bèy, Balaam nèn lò, a kfən e wun wòŋ, Balak wáa dù sa du rə́.