Kintaŋ 23 - ŊWÀʼ NYÙY

Balaam tiísí ntum Nyùy fo kàŋ wo mbìy

¹ Balaam yiì lò, e sùúy e Balak jii, «Bóm kíy cùu fen saàmbà, e fò e mò, e nèn tàʼ anàʼ vee vilum saàmbà, wùn à viyáʼ vi saàmbà, e wìy sho, e fò e mò.»

² Balak ku nèn yiì mo Balaam suuyin. Wùn wun nèn a lì nàʼ e mòʼón wùn à kiyáʼ ki, a yiì cu sho e kiy mòʼón, e kù yiì bèy, kíy woo saàmbà e dzə̀m.

³ Balaam lò, e sùúy e Balak jii, «Tiím e wò ghaa cù ye tonèné, é m du, e yèn ó ji vèr Nyùy Tàr sà‑áà tárnín á? Kinyo ke wù dìnèn e mò, bo dzə̀ kíwun ke m yíi suúy e wò.» Wù suúy bey, e nèn ŋàʼáy, e kòʼ é ntoò gwan.

⁴ Nyùy wìy fo, wùn wun tárnín. Balaam suúy shó jii, «M bòm ne kíy se cù saàmbà, e yiì cu sho sidzə̀m mo sí dzə̀kìn, e yiì e nàʼ woo lumèn wùn à e kiyáʼ ki mo kíy se cù si dzə̀kìn.»

⁵ Nyùy Tàr nèn yòŋ kinyo e Balaam ke wù kfə́n, e sùúy e Balak.

⁶ Balaam kfə́n, e yèn, a Balak kù tíy e wun ghaa cù ye tonèné wùn aàtǎr saʼ veé Moavi adzə̀m.

⁷ Balaam nèn lò, a tiisí ntum rə, a suúy jii: «Lì Balak woo fon woó Moav mo fó Aram, e wìy sho, wù lì fo agwan veé mbìv yee fo shùy yii tó, e yòŋ jii, wìyi, e shòv Jakov, e fò e mò, ku mèŋ Isray méŋén.

⁸ A dzə̀ m shòv wír ve Nyùy yoʼ shòv é le? A dzə̀ m mèŋ wír ve Nyùy yoʼ mèŋ é le?

⁹ M dzə́ e kitu ke virùmèn, yén áwune, dzə́ aàgwan, leey áwune. M yén wíri, aá dzə́ kév áwune áwune, wíri, aá bár vitú vév jeéy fo vitúm vímóʼ ví.

¹⁰ A dzə̀ tàŋ la màŋgòŋ woó rám Jakov? A dzə̀ tàŋ la kintóʼ kimòʼón fo vee vikweè vee Jakov kfəə? Màʼtì, é m kpú kpú a dzə̀ yé anjiì vinyò vee tìítiy, e yiì, é kimaysì kém keé kitu ke nsay ki wáa dzə moo kév.»

¹¹ Balak lò, e sùúy e Balaam jii, «À yiì kee ben e mò a dzə̀ ka? Mò‑oo li wò ji à wiy, e shòv aŋgaà vém vibàn, yii bèy, la à yòʼ yiì kifá. À ló, e səə̀vì áwune sə́əvin.»

¹² Balaam bínér jii, «Bo dzə̀ ji lá m yòʼ sùúy kinyo, a dzə̀ ke Nyùy yòŋèn e mò a?»

Balaam tiísí ntum Nyùy ye yì meen ji baà

¹³ Balak kfən lò, e sùúy e Balaam jii, «Wìy, é wòsò du é kirə̀ʼ kímóʼ kí fo à yíi tiím, e yen áwune ashàr, áà ku shòv vee shooy, e fò e mò.»

¹⁴ Wù suúy bey, e nèn lì Balaam, e dù sho e kwaʼ woó Tsofim, e kòʼ shó e kitu ke Gwan Pisga, e bòm kíy cù saàmbà, e nèn a lì nàʼ woo lumèn e mòʼón wùn à kiyáʼ ki kimòʼón, a yiì cu sho e kiy cù e mòʼón mòʼón.

¹⁵ Balaam lò, e sùúy e Balak jii, «Tiím fen e wò ghaa cù ye tonèné, é m líysín, é vèr Nyùy Tàr tárnín fésə.»

¹⁶ Nyùy Tàr nèn wìy, wùn Balaam tárnín, wù wáy kinyo kfə́ e Balaam shuù, e yòŋ sho jii, «Kfə́n, e yèn Balak, e tiìsí kinyo kìn ki shó.»

¹⁷ Balaam kfə́n, e yèn a Balak kù tíy e wun ghaa cù ye tonèné wùn aàtǎr saʼ veé Moavi. Balak nèn dzə̀r ji Nyùy Tàr sà yòŋ ji ka á?

¹⁸ Balaam nèn lò, a tiisí ntum rə, a suúy jii: «Balak, ŋáʼáy, e yuùrí. Wan Tsippor, yuúrí kinyo ke m suuy e wò ki.

¹⁹ Nyùy yòʼ dzə̀ wir msòŋ, e bó a boʼtí kimboʼtì. Wù yòʼ dzə̀ wan wìr msòŋ, e bó a kuvsín kwaʼtì rə́. Wù‑uù yiì ne sùúy kinyo, e làa yòʼ wìy yiì a? Wù‑uù yiì ne kàʼ kinyo, e làa yòʼ wiy yiì kíwun a?

²⁰ Leéy, e yèn, wù sùúy ne ji m səəvi. Wù səə̀vì ne, a bó yòʼ dzə̀ m kùvsín.

²¹ Bó wù yoʼ dìn lòn wúmóʼó e Jakov dzə̀ʼə̀m, a bó wù yoʼ dìn ŋgeʼ símóʼ sí e Isray mvəm. Nyùy Tàr woo Nyùy wov dzə̀ wùn áwune, aá kù ndzə́ʼ wun ji fon wov.

²² Nyùy fə̀ə́r ne áwune fó wòŋ Ejiv, a màʼ rə́r sév e vitaáví vé nyar vi.

²³ Fú wóo màʼ ji á ton Jakovi yòʼ dzə̀, kinyo kee shwéŋ ji á maʼ Isray ki yòʼ dzə̀. Á yíi a yòŋ kùm Jakov wùn Isray jii, Á yén á kiŋgaʼnìn ke kinyò ke Nyùy yiìn kí.

²⁴ Yén búʼú, kitúm kee Isray ki ŋáʼay moo yeè bvərə̀ʼ, naarì vikoy moo lúm bvərə̀ʼ. Bó yòʼ dzə̀ wù yù fóo meèmè, a bó wù koó kintàn kfə́, e kètí, e màysì mensə́, e nò.»

²⁵ Balak lò, e sùúy e Balaam jii, «A dzə̀ bey, lá à yòʼ dzəə shòv áwune, kìn ji à wáa səə̀vì səə̀vìn.»

²⁶ Balaam bìnèr jii, «Bó m yoʼ lò sùúy e wò ji m kù kér fó yiì kinyo kidzə̀m a dzə̀ ke Nyùy yòŋèn e mò a?»

Balaam tiísí ntum Nyùy ye yì meen ji taár

²⁷ Balak nèn kfə̀n sùúy e Balaam jii, «Wìy, é m li wò, é wòsò du é kirə̀ʼ kímóʼ kí. A tàm é wúné boŋ Nyùy foo fèy, é wù yii, áà shóv áwune, e fò e mò.»

²⁸ Á bèy, Balak nèn lì Balaam, wùn wun kóʼ é ntoò Gwan Peor, e ŋkìʼnìn kirə̀ʼ ké woʼ kí.

²⁹ Á meé fó, Balaam suúy e Balak jii, «Bóm kíy se cù si saàmbà, e tàʼ anàʼ vee vilume saàmbà, wùn à viyáʼ vi saàmbà, e wìy sho.»

³⁰ Balak ku nèn yiì mo Balaam‑eè suuyin, e yiì cu aànàʼ vee saàmbà wùn à viyáʼ vee saàmbà vi, li nàʼ wùn à kiyáʼ ki, wù yiì cu e kiy wo mòʼóne.