Kintaŋ 21 - ŊWÀʼ NYÙY

Isray tón Arad woo ntèʼ wìr veé Kanan

¹ Fòn woó Arad nèn lò, e yù ji wír veé Israyi wiy a dzə́ə fó Atarim. A Arad‑iì dzə̀ ŋkàlaʼ wìr veé Kanan yìmòʼ é mbìv wòŋ yeé Negev foo fèy. Wù nèn fəə̀, e taàmé wír veé Isray e rə́r sí, e koòrí wír ámóʼó.

² Wír veé Israyi nèn mbaà Nyùy Tàr, e lìʼ jii, a wù wày wír vìn aáwuné kiwo, bo áwune kù yíi yiì, é ŋkà se laʼ se wír vìn si kfə́n á ji nshwǐ Nyùy Tàr, aá laar ŋkuuŋkùŋ.

³ Á bèy, Nyùy Tàr nèn yù tóŋ Isray, e wày wír veé Kanan vìn aáwuné kiwo, á laàr wùn à ŋkà se laʼ sév sí ŋkuuŋkùŋ. Bìʼ kee shooy, á nèn a yòŋ yír kirə̀ʼ kin ji Horma.

Yó yee kisha kee brons

⁴ Wír veé Israyi lò fo Gwan Hor, a dù fo dzəə yeé Rìbà Ndzə̀v wo Baar ji á fiʼ kaàrí a nsay wìr veé Edom. Á lòo dù bèy, wíri nèn kèʼ a yu ntéŋ é dzəə,

⁵ e nèn lò, a ghvə̀vrì, a bashí Nyùy wùn Mooser, a suúy jii, «Vèn‑eè fə̀ə́r ver fó Ejiv ji vèr wiy, e kpùkír e woʼ fen ji ka? Kirə́ʼ, a bó kifá ke yi ki yòʼ dzə̀ fó, a bó mendzə́v mè yòʼ dzə̀. Vèr yòʼ dzəə́ tíy e *manna woo viyíkìr vee là dzə́ə vin.»

⁶ Nyùy Tàr nèn fə̀ə́r yó se ndzəʼ si, sí wáa térí áwune. Sí té bey, wìr woó Isray kpú nyanyày.

⁷ Wíri nèn wìy, e yèn Mooser, e sùúy sho jii, «Vèr yiì ne jay. Vèr kì sí báshi vèn Nyùy Tàr. Ku bùnrì ji Nyùy Tàr tsəʼ á yó sìn fo věr mvəm.» Á bèy, Mooser nèn bùnrì, e lòn bìʼ wíri.

⁸ Nyùy Tàr nèn sùúy e Mooser jii, «Fèr yó e kisha ki, e keèrì e kici ji wìr wo yò teen leeyì, é wù bónén.»

⁹ Mooser nèn fèr yó e kisha kee *brons ki, e keèrì e kici. Wìr wo yò‑oò teen ne leeyì, wù kù nèn bònén.

Ghán yée dù, e meé e Moav

¹⁰ Wír veé Israyi nèn lò fo fo, e dù, e beè e Obot.

¹¹ Áwune lò fo Obot, e beè e Iye‑Abarim e woʼ yeé ŋkìʼnìn Moav, aá kiʼ fo shùy yii tó.

¹² Á lò fo fo, e dù, e beè e Mboʼ Sered,

¹³ e lò, e tùm ndzə́v yee Arnon, e beè e mbìv ye yì dzəə̀n é woʼ ye yí ràmèn fó bìíy nsay wìr veé Amor. Ndzə́v yee Arnon rə̀ne jav bìíy nsay wìr veé Moav wùn à ye wìr veé Amor.

¹⁴ Á kinyo ke kí yiìn, é bo á sáŋ é ŋwàʼ woo kùm rə́r sé Nyùy Tàr jii: «Wahev, wo wù dzəə̀n é Sufa, wùn à viwoóy veé Arnon vi,

¹⁵ à bábá seé viwoóy sí, se sí ràmèn, e dù, e mèé e laʼ yeé Ar, e nànèn, e dù, e mèé e bìíy Moav.»

¹⁶ Áwune ló fó Arnon, e dù, e mèé e Beer, a dzə̀ ji ndzə́v ye tuŋéné. Dzə̀ kirə́ʼ kin fo Nyùy Tàr‑iì yòŋèn e Mooser jii, «Bánén wíri, é m fó áwune mendzə́v.»

¹⁷ Wír veé Israyi nèn a yòv luŋ fo jii: «Éè ntòŋ ndzə̀v, fəə́r mendzə́v mè, é vèr yov luŋ, e səə̀sí sho.

¹⁸ Ndzə́v ye wón ntoʼo tuŋen, ndzə́v ye atǎr wòŋe tuŋen, aá túŋ e kitoómé kí, e tùŋ e mbàŋ sév sí.» Áwune siíy, e lò fo woʼ fóo fèy, e dù e Mattana,

¹⁹ e yiì lò fo Mattana, e dù e Nahaliel, e lò fo Nahaliel, e dù e Bamot,

²⁰ e lò fo Bamot, e dù e mboʼ ye yì dzəə̀n é nsay Moav, e ghaa Gwan Pisga wo wù kiʼ wóʼ é mbìv ròŋ.

Isray tón Fòn Sihon wùn Fòn Og

²¹ Wír veé Israyi nèn yiì lò, e tsə̀nsí aŋgàa ntum fo Fòn Sihon wùn, a dzə̀ fon wìr veé Amor.

²² Á dù, e lòn jii, fòn ku biìmé a, aáwune shaa e wun nsay. Bó áwune yòʼ yíi bìn a e wír vəə́ sum sé vifa ve yi, kìn e sé vitiír vé vayin si. A bó áwune yòʼ yíi no a mendzə́v fó ndzəv se wír vəə́‑əə̀ tuŋen. Á kù yíi shaà a tìítiy, a dzə̀ fó màdzəə̀ ye dzəə̀n ye afòn, e meé mo áwune yíi tosín a kitúm ke fòn.

²³ Yii bèy, la Fòn Sihon yòʼ biìmé ji wír veé Israyi shaa e wun nsay. Wù báʼtí shúu rər və́, e fəə̀, e dù, e taàmé Isray e rə́r sí é Jahas, e kirə̀ʼ ké woʼ kí. Wùn à Isray fùnèn fo.

²⁴ Sí màʼ, Isray tòn áwune, e yòv nsay yev, e kèʼ fo ndzəv yee Arnon, e dù, e meé e yee Jabboki, e dù, e bàʼ e wír veé Ammoné nsay, e làa yòʼ nəə́ fo, bìʼ fo bìíy yev‑iì dzə̀, aá lím, yì táv.

²⁵ Isray ku nèn faàsì ŋkà se laʼ se wìr veé Amor sidzə̀m, a dzə fo. A vé‑eè lo faàsì sa Heshbon wùn à ntèʼ se sí kaarin fó si sidzə̀m.

²⁶ Heshbon‑eè dzə̀ ŋkàlaʼ wìr veé Amor fo Fòn Sihon‑eè sáʼá. Wù‑uù tòn ne fon woó Moav, e faàsì nsay rə rə̀y e dzə̀m, e faàsì bèy, e dù, e bàʼ e ndzəv yee Arnon.

²⁷ Á kinyo ke kí‑iì yiìn, é bo vé yòv taŋe wáa yòv, a taŋ jii: «Vèn wiy, aá baʼri Heshbon, e wìy, aá baʼri ŋkàlaʼ Fòn Sihon.

²⁸ Və́yí‑iì lo sàʼ fó Heshbon, kiliímé ke və̀y fó ŋkàlaʼ Sihon, e dù, e tòn ŋkàlaʼ yee Ar e wòŋ Moav, e tòn vé wòŋ e virə̀ʼ vé cù veé taa Arnon.

²⁹ Yìiy Moav, lòné shòv ne ven. Vèn ve á cu *Kemosh, á laàr ne ven. Kemosh yiì ne, wón vén vee vilume kfə́n ji alàŋgày, vee vikìyí kfə́n ji akwàn, akwǎn Fòn Sihon, fon wìr veé Amor.

³⁰ Á bèy lèn, vèr laàr ne rám yév, e kèʼ fo Heshbon, e dù, e bàʼ e Dibon. Vèr sə̀ʼsí ne fó, e dù, e bàʼ e Nofa woó ghaa Medeba.»

³¹ Á mo wír veé Israyi‑iì taʼamen e wír veé Amorí nsay bèy.

³² Mooser yiì lò, e tsə̀nsí vé ŋkiyi é ŋkàlaʼ Jaser ji á du, e shwèʼ, e yèn á mo dzə̀ á ghàn, e bóo tòn fó. Wír veé Israyi nèn dù, e tòn, e tòn sa ntèʼ see fó ghaŋ, e jùm wír veé Amor ve vé‑eè dzə́ fo.

³³ Á tòn bèy, e nèn bìnkìr, e kìʼ dzəə Bashan. Fòn Og wùn à vé rər vəə́ fəə́ adzə̀m, e taàmé áwune é Edrey e rə́r sí.

³⁴ Yii bèy, Nyùy Tàr suúy e Mooser jii, «Lá à yòʼ fàn wun. M wày ne wun e wò kiwo wùn à vé rər vəə́ adzə̀m, à nsay rə. Ku lòvtí sho lóvtín mo wò‑oò lovtin e Sihon woo fon wìr veé Amor wo wù‑uù sáʼ e Heshbon.»

³⁵ Á bèy, á nèn yùyrí wun wùn à wón və́ vee vilume, à wír vəə́ adzə̀m, la kintiʼ ke wìr ki yòʼ bèr fó, e nèn yòv nsay rə.