Kintaŋ 15 - ŊWÀʼ NYÙY

Nsər see kùm cu

¹ Nyùy Tàr yòŋ e Mooser ji

² wù fó á ntò se vinyò e wír veé Israyi, e naàrì a jii, «Vèn wíy nəə e nsay ye Nyùy Tàr fó e vèn ji kirə́ʼ kén ké dzə,

³ lóo cù Nyùy Tàr e cu ye və́yí bin fo fo, ji kirəm ki wáa rə̀ʼtìn, a bòŋ wun, á kù tàʼ nyam cù a dzə̀ fó ŋgoo nàʼ, kìn fó ŋgoo bvəy. Kú a dzə kíwun, kìn dzə̀ cu ye á ton nyám e dzə̀m, kìn dzə̀ ye á rúner kilìʼ, kìn dzə̀ yé kimbòŋwùn, kìn dzə̀ yee bìʼ ŋkàʼ se á yí e ghan see shó.

⁴ Wìr wo wù wiy e cúu, é wù wiy sá e meŋkfəŋ me kpuún mè kilu e mòʼón, aá shwír e meŋgvə́r me *oliv mè lita e mòʼón ji cu vifa ve yi.

⁵ Wù lóo wìy e wàn njiì ji cu ye tonèné, kìn ji ye seeríné, wù wàa ker sa lita melùʼ ji cu melùʼ.

⁶ «Lóo dzə kiyáʼ, á yiì cu vifa ve yi a dzə̀ e meŋkfəŋ me kpuún mè akilu abaà, aá shwír lita meŋgvə̀r me oliv sho e mòʼón e kimbéʼ ki,

⁷ e kfə̀n fò cu melùʼ sa lita e mòʼón e kimbéʼ ki. Á kú a yiì cu sìn ji kirəm ki wáa rə̀ʼtìn, a bòŋ Nyùy Tàr.

⁸ «Vèn li nàʼ woo lumèn, lóo cù Nyùy Tàr shó ji cu ye tonèné, kìn ji ye seeríné, ye á yii bìʼ kilìʼ, kìn ji cu kikòŋnìn,

⁹ bo á yíi tatí wùn à cu vifa ve yii akilu meŋkfə̀ŋ me kpuún mè ataár, aá shwír meŋgvə́r me oliv sho alita abaà,

¹⁰ e fo cu melùʼ sa alita abaà. Kù dzə̀ cu ye və́yí bin fo fo, a kirəm kfə́ kí boŋ Nyùy Tàr.

¹¹ «Á mo á yíi naŋsín nàʼ, kìn kiyáʼ, kìn dzə̀ wan njiì, kìn bvə́y ji cu Nyùy Tàr.

¹² Á ku yiì bèy, e nyàm cù e mòʼón mòʼón, a nyám si fə̀m dzə̀ sisìʼín, bo kù dzə̀ mo á bár vifá vìn sho.

¹³ Wàn nsay lóo yiì cu ye və́yí bin fo fo, ji kirəm kfə́ kí wáa rə̀ʼtìn, a bòŋ Nyùy Tàr, bo wù kù yii a dzə̀ é dzəə fen.

¹⁴ «Kiŋgwìy ki lóo dzə vèn áwune, kìn dzə̀ beèshaà, kìn dzə̀ ke kí sí dzə́ dzəə́n, kí lóo kòŋ ji wun wiy e cu ye və́yí bin fo fo, ye kirəm kfə́ kí rəʼtìn, boŋ Nyùy Tàr, bo wù kù yii sa réŋréŋ mo vèn yii. A sì nsər bèy, mo ŋgwàʼ sén sí wíy a dzə.

¹⁵ Nsər kù wíy a dzə e mòʼón ye wìr dzə̀m jumrì mo ŋgwàʼ sén sí wíy a dzə, kìn dzə̀ wan nsay, kìn dzə̀ kiŋgwìy ke kí dzə́ vèn áwune. Kiŋgwìy wùn à wàn nsay kù dzə̀ réŋréŋ e Nyùy Tǎr si.

¹⁶ Nsər kù dzə̀ e mòʼón, à fo vèn, à viŋgwìy ve ví dzə́ e věn mvəm ví. A sáʼ Nyùyi kù dzə̀ sá réŋréŋ bey.»

¹⁷ Nyùy Tàr kfən yòŋ e Mooser ji

¹⁸ wù fó á ntò se vinyò símóʼ sí e wír veé Israyi jii, «Vèn wíy nəə e nsay yee fo Nyùy Tàr li ven, e dù sho,

¹⁹ vèn keʼ, lóo laár vifá ve yi veé nsay foo fèy, vèn bàr vímóʼ ví ji cu Nyùy Tàr.

²⁰ Vèn ton kibán ke mbìy ki, vèn fə̀ə́r ntuʼ fo fo, e yiì cu ye nanèné shó réŋréŋ mo vèn yii e cu ŋgòn se vifa vee lò fó riimé ví.

²¹ Mo ŋgwàʼ sén sí wíy a dzə, kù dzə̀ mo vèn wíy a yiì bèy, a fo kibán ke mbìy ki e Nyùy Tàr ji cu ye nanèné.

Cu yee bìʼ jay woo yiì là kiíy

²² «A dzə̀ kí kòóy ji vèn lo, e jày kinyo là kiíy, e làa yòʼ jùmrì nsər se Nyùy Tàr foon e Mooser sidzə̀m.

²³ Ghanmóʼó wìy sìíy jày wón vén, kìn wón won mo ŋgwàʼ sén sí wíy a dzə, e làa yòʼ ghar nsər sidzə̀m se Nyùy Tàr foon e vèn, e shaà fo Mooser.

²⁴ Kí koóy bey, jay və̀n wáa dzə, a màŋgòŋ woó Isray yii là kiíy, bo màŋgòŋ yíi tatí e dzə̀m, e wìy e nàʼ woo lumèn ji á yii á cu ye tonèné shó, é kirəm kfə́ kí wáa bòŋ Nyùy Tàr. Á ku bàr sá cu vifa ve yi e ghaŋ wo, à yé melùʼu mo nsər naarì, e kfə̀n fò kibév ji cu yee bìʼ jay.

²⁵ Á wiy sho, é taà cù nèn yiì cu, e màn jay màŋgòŋ woó Isray sho. Wù máné, é Nyùy nèn làysìn jay wov, bìʼ fo á yòʼ‑oò lo jày e kúmé, bo taaka mo á kfə̀n wìyìn ne e cu see bìʼ jay wov sí, e cù Nyùy Tàr e cu ye və́yí bin fo foo, e kfə̀n yiì cu ajay.

²⁶ Á bèy, é Nyùy ku nèn làysìn jay wìr dzə̀m woó Isray, e làysìn sa wo viŋgwìy ve ví dzə́ wùn áwune, bìʼ fo jay woo shooy‑iì kùmèn wir dzə̀m.

²⁷ «A lò a dzə, a jáy wir mòʼón kinyo là kiíy, bo wù wiy e kifum ke bvəy kee kiyá kifur ki ji cu jay.

²⁸ Wiy sho, é taà cù nèn màn vinyo ve ŋgaàŋ sho e Nyùy Tǎr si, bìʼ jay wo wù jayin là kiíy, é Nyùy nèn làysìn.

²⁹ Kù dzə̀ nsər yee shó e mòʼón fo wìr wo wù jayin kinyo là kiíy, kìn dzə̀ wir Isray, kìn dzə̀ kiŋgwìy ke kí dzə́ wùn áwune.

³⁰ «Yii bèy, a wìr gbù nsər e kúmé, kìn dzə̀ wan nsay, kìn dzə̀ kiŋgwìy, bo wù tàʼ a dzə̀ Nyùy Tàr ntéŋ, á nèn kù fə̀ə́r wun fo wír vəə́ mvəm.

³¹ Mo wù ŋwayin a dzə̀ jí Nyùy Tàr, e shòʼór nsər rə e kúmé, aá ku fə̀ə́r wun ŋkuuŋkùŋ, é lòn vəə́ kú a dzə e wun kitu.»

Lǒn wìr wo wù shoʼorin nsər kishìíy ké bam

³² Wáa dzə e ghan fen, a wír veé Israyi dzə̀ə́ e woʼ, á nèn koò wír, a wù sív meŋkaʼ e kishiíy ké bam ke Nyùy Tàr.

³³ Wír ve á kì yenen, a wù sív meŋkaʼa nèn lì ŋgaàŋ, e wìy, e yèn Mooser wùn Aaron, à kintatì ki shó.

³⁴ Á nèn lèm wír və̀y e ŋòròʼ mo bó á yòʼ‑oò ló ne kìíy kiránén kinyo ke dzə̀ á yiì e wun.

³⁵ Nyùy Tàr lò, e naàrì e Mooser ji á ku yùyrí a ŋgaàŋ yúyrín. Màŋgòŋ ku lì, e fəə̀ á kibeey shó, e tsə̀mrí e tíyí.

³⁶ Màŋgòŋ nèn lì, e fəə̀ kibeey shó, e tsə̀mrí e tíyí, wù kpú. Á kù‑uù yiì réŋréŋ mo Nyùy Tàr‑iì yòŋèn e Mooser.

Nsər see kùm vijéréŋ veé ndzə̀y

³⁷ Nyùy Tàr lò, e yòŋ e Mooser jii,

³⁸ «Súŋnín e wír veé Israyi, e yòŋ aáwune jii, vèn kù wíy a fèr vijéréŋ e věn shuù se ndzə̀y, a fèr bèy, mo ŋgwàʼ sén sí wíy a dzə. Vèn lóo fèr, aá wáy làv wùmòʼ shó, a dzə̀ wo wù səə́ne moo yúv bey.

³⁹ Vèn wíy lóo yen vijéréŋ vin, é vèn nèn a kuumé nsər se Nyùy Tàr sidzə̀m, a yiì mo sí dzəə̀n, e làa yòʼ dzə́ə a jùmrì a dzə̀ liì kisaŋ wo melív men mè tíy sho. Yii bèy, é la vèn yòʼ dzə́ə a yiì mo síi lévti ven.

⁴⁰ Bo vèn sí wìy a kuumé nsər se Nyùy Tàr sidzə̀m, a yiì mo sí dzəə̀n, e nèn a dzə jeéy ji wír Nyùy won.»

⁴¹ Suuy wun woo Nyùy Tàr woo Nyùy won wo wù‑uù fəərin ven fó wòŋ Ejiv ji wun wáa dzə Nyùy won. Dzə̀ wun Nyùy Tàr woo Nyùy won.