Kintaŋ 13 - ŊWÀʼ NYÙY

Á tsə́nsí vé ŋkiyi é Kanan

¹ Nyùy Tàr suúy e Mooser jii,

² «Túm wíri, aá du, e shwèʼ woŋ Kanan wo m sí yìi fo e wír veé Israyi. À yíi tum wír e mòʼón mòʼón fo ram yee shó, a kù dzə̀ wír wo dzəə̀n kilìmbìy e wun ram.»

³ Á bèy, Mooser nèn tùm wíri, aá dzə̀ é woʼ yee Paran, a wìr dzə̀m kù dzə̀ kilìmbìy kímóʼ kí fo kfəə́ se wìr veé Isray si.

⁴ A yír sév sí‑iì dzə̀ jii: Fo rám Ruben, yì‑iì dzə̀ Shammua woo wan Sakkur.

⁵ Fo rám Simeon, wáa dzə Shafat woo wan Hori.

⁶ Fo rám Juda, wáa dzə Kalev woo wan Jefunne.

⁷ Fo rám Issakar, wáa dzə Igal woo wan Joosev.

⁸ Fo rám Efrayim, wáa dzə Hoshea woo wan Nun.

⁹ Fo rám Benjamin, wáa dzə Palti woo wan Rafu.

¹⁰ Fo rám Sebulun, wáa dzə Gaddiel woo wan Sodi.

¹¹ Fo kfə́ə Joosev ye dzəə̀n rám Manasse, wáa dzə Gaddi woo wan Susi.

¹² Fo rám Dan, wáa dzə Ammiel woo wan Gemalli.

¹³ Fo rám Asher, wáa dzə Setur woo wan Mayker.

¹⁴ Fo rám Navtali, wáa dzə Nahbi woo wan Vofsi.

¹⁵ Fo rám Gad, wáa dzə Gewuel woo wan Maki.

¹⁶ Á yír sé agwèy ve Mooser‑iì tumen ji á du, e shwèʼ woŋ. Ké Hoshea woo wan Nun, Mooser‑iì lò, e shù kfə́ yír rə́ ji Joshua.

¹⁷ Mooser‑iì lóo tum áwune ji á du, e shwèʼ á woŋ Kanan, e naàrì jii, «Vèn kóʼ, e shaà Negev, e dù fo mbìy, e kòʼ, e nə̀ə́ fo agwane dzəə̀n.

¹⁸ Vèn leéy, e yèn mo woŋ woo shooyi dzəə̀n, e kfə̀n lèéy ji wíri sà dzə̀ ashàr moo akuʼùn á? Sà dzə̀ antav moo anjoó á?

¹⁹ Vèn ku kfə̀n lèéy ji nsay ye áwune dzə́ sho sà bòŋ mo yì bìr á, e kfə̀n lèéy ji ŋkà se laʼ se áwune dzə́ sho si sà dzə̀ tèéter mo sí kér vikum ve kày a?

²⁰ Vèn ku shwèʼ ji nsay yee fó sà bòr mo yì bìr á, e kfə̀n lèéy ji kóv sí sà dzə̀ fó mo sí yòʼ dzə̀ á? Vèn ku kùr tímé, e kàv báŋ se vici símóʼ sí fó nsay foo fèy, e wìy sho. A wù yoŋ bèy, a sì é ghan se á yii koy ŋgòn se baŋ se *vayin.»

²¹ Á bèy, aŋgàa ŋkiy vìyi nèn kòʼ, e shwèʼ woŋ, e kèʼ fo woʼ yeé Tsin, e dù, e bàʼ e Rehov, fo á sí lò, a nəə́ e nsay Hamat.

²² A vé‑eè lò, e kòʼ é Negev, e nèn wìy e Hebron. A Hebron‑eè sì ŋkàlaʼ yee fó ŋgùʼ, a vé‑eè bòm, viyá vi shaà saàmbà, bo á wìy bom Tsoan woó Ejiv. Á meé fó, e yèn viŋgáʼ ve wìr veé kfəə Anak, aá dzə̀ rám sitaár, yé Ahiman wùn à yé Sheshayi, e lì yé Talmay.

²³ Á wìy, e mèé e Kiwoóy ké Eshkol, e gwàr tám kitiír ké vayin, a báŋ si koóm shó e ŋkàŋkaʼ. Á gwàr bèy, wíri toór abaà. Á kfən kòy sa *grenadin wùn à *fig, e wìy sho.

²⁴ Vé‑eè yoŋ kiwoóy kee shooy ji Eshkol bèy, a dzə̀ bìʼ ŋkàŋkaʼ tútúʼ melùʼ wo wír veé Israyi‑iì gwàrìn fó fo.

²⁵ Vé‑eè dù, e shwèʼ woŋ bèy, kishiíy kí shaà mkweè, bo áwune kfə́n é bàm.

²⁶ Á wìy, e yèn Mooser wùn à Aaron, à màŋgòŋ e dzə̀m, aá dzə̀ é Kadesh e woʼ yee Paran, e naàrì mo ghán yéví‑iì dzəə̀n, e dìn báŋ se vici seé nsay foo fèy.

²⁷ Vé‑eè naàrì e Mooser jii, «Vèr dù e wòŋ fo wò‑oò tumen ver rúrú, a dzə̀ woŋ wo vín nàʼ wùn à vilu vi tsəətìn fo tsə́ətin. Báŋ se vici see fó si síne.

²⁸ Yii bèy, a wír ve á dzə́ e nsay foo fèyi dzə̀ antav, bo taaka rám Anak ye vèr yenen fó. Ŋkà sév sé laʼ si dzə̀ vikum, e kfə̀n a dzə sikuʼkìn.

²⁹ Wír veé Amaleki dzə́ e nsay Negev, a veé Hit wùn à veé Jebus, à veé Amori dzə́ kév é wòŋ agwan, a veé Kanane dzə́ e ŋguùŋè rìbà ndzə̀v, e kfə̀n a dzə e ghaŋ se ndzəv yee Jordan.»

³⁰ Kalev nèn lò kfə́, e sə̀r wíri mo vé‑eè baʼtin e Mooser si, e sùúy jii, «Vèsən kóʼ fó kàŋ mòʼón, e dù, e yòv fó. A dzə̀ vèsən tòn fó, e sə̀.»

³¹ Yii bèy, wír ve wùn áwune‑eè duùné nèn nyàysì nyàysìn jii, «A dzə̀ la vèsən yòʼ yiì kifá aáwune. Á tàvkír, e shaà vèsən.»

³² Áwune nyàysì bèy, e nèn sàmèr sáʼka kisaŋ e wír veé Israyí mvəm kùm nsay ye vé‑eè duùn, e shwèʼ, e sùúy jii, «Nsay yee fó dzə̀, a yì senèr wíri sénerin. Kímóʼ kí ji vèr yèn wíri fó, a kù dzə̀ vigha ve wíri.

³³ Vèr kfən yèn wír veé Nefilim fo, vimà vé wìr ve dzəə̀n kfə́ə Anak. Vèr‑iì dzə̀ kér fó moo vintàn, a kù dzə̀ sá mo áwune‑eè yén ver bey.»