Kintaŋ 12 - ŊWÀʼ NYÙY

Miriam wùn Aaron say Mooser

¹ Miriam wùn Aaron yiì lò, e nèn a sày Mooser bìʼ wan wìr Kush wo wù‑uù liìn ji wíiy və.

² Á wáa sày bèy, a suúy jii, «Dzə̀ ji Nyùy Tàr kù sùŋnín, e shaà a dzə̀ fo Mooser cáʼcáʼ à? Dzə̀ ji bó wù yoʼ sùŋnín sa, e shaà fo vèr a?» Aá say bèy, a Nyùy Tàr yú.

³ A Mooser‑iì dzə̀ kfə́ wir kiman feyì, a bó wìr kiman wùmòʼ yòʼ kfə̀n‑eè dzə̀ shó e kitu ke nsay moo wun.

⁴ Nyùy Tàr ku nèn lò, e jàŋ Mooser wùn à Aaron, à Miriam, e sùúy jii, «Ven vee wír ataári fəə́, e wìy e shùu *kibàn ké ntàsín.» Áwune vee wír ataári nèn fəə̀.

⁵ Nyùy Tàr nèn sə̀y é mvə̀m mbàʼ ye yì dzəə̀n moo kitóm, e tìím e shùu kibàn ké ntàsín, e yòŋ Aaron wùn Miriam, áwune kóʼtí, e wìy.

⁶ Wù suúy jii, «Vèn yuúrí kijuŋ. *Ŋgaà ntum wom yii lóo dzə e věn mvəm, m wàa dìn kitú kém shó e njà vinjeenjèm, e kfə̀n a suŋnín sho e njèm.

⁷ A bó ké Mooser woo ŋgaà lìm wom kí yòʼ dzə̀ bey. Wír vén veé Isray adzə̀me kù sì e wun kiwo.

⁸ Lóo dzə wun, vèr wun wàa suŋnín fo si kiránén, là vindzəv, wù wàa yen shwínín yém, mo woo Nyùy Tàr. Vèn mùm a dzə̀ ka, e bó a sày Mooser woo wír wom lìm?»

⁹ Nyùy Tàr shwiíy kilòŋ é ŋàŋ bìʼ áwune, e nèn màʼtì áwune, e dù.

¹⁰ Kù mo mbàʼ lo fo kitu ke kibàn, yàsí woó jùv wùn nèn koò Miriam, wù nèn lò, a fər moo mentíy bèy. Mo Aaron bìnkìn, e lòo leéy, e yèn a Miriam sí kér yàsí woó jùv wùn ŋkuuŋkùŋ,

¹¹ wù nèn yòŋ e Mooser jii, «Éè taàtá wòm, lá à yòʼ lèéy kiyúŋ kér ke kí yiìn, vèr tó é jay.

¹² Lá à yòʼ màʼtì é Miriam wáa dzə moo kimkpú ke kifa ke kí fəə́ fo yè wóv bvə̀m, a mbìv yìmòʼ fóy ne.»

¹³ Mooser nèn bùʼ wó e Nyùy Tàr jii, «Éè Nyùy, kii wò, ku fèr wun.»

¹⁴ Nyùy Tàr bìnèr e Mooser jii, «A kì cù tàr wov mentíy e si wo, bo bó woómé si yòʼ kì yíi koo wun kishiíy saàmbà à? Bo dzə̀ ji á fəə́r á wun fo kibeèy, é wù goʼ é ndzə kishiíy saàmbà, e bóo kfən e bàm.»

¹⁵ Á nèn tsə̀ʼ Miriam fo kibeèy, e lèm e ndzə, wù dzə̀ʼə̀m kishiíy saàmbà. Wíri ku gòʼ fo vé‑eè dzəə̀n e meé mo wù‑uù kfənen é bàm.

¹⁶ Kee shooy ki shaà, wír veé Israyi nèn lò fo Haserot, e dù, e tàm kibeey é woʼ yee Paran.