Kintaŋ 11 - ŊWÀʼ NYÙY

Wír veé Israyi káykirì

¹ Wír veé Israyi nèn yiì lò, e kèʼ a kànkìr, a toŋ ŋgeʼ sév, Nyùy Tàr wáa yu. Nyùy Tàr yú bey, dòʼshwíiy və kóʼ, wù tsə́nsí və́y və́ aáwuné nsàn, wú koó, e tòn mbìv sé kibeèy símóʼ sí.

² Wíri tóŋ, e bì Mooser. Wù yiì bunrì e Nyùy Tàr, və́yí ndzə́mén.

³ Á nèn yòŋ yír kirə̀ʼ kin ji Tabera, bìʼ fo və́y Nyùy Tàrí‑iì loòn, e koò fó, e tòn wíri.

⁴ Atókíshwáŋ ve vé‑eè dzəə̀n e wír veé Israyí mvəmé nèn lò kèʼ, a ker shií é nyàm yée yi. Wír veé Israyi ló sá, e nèn a dìy, a suúy jii, «Bèn‑éè fó la ver nyám, é bo vèr yí?

⁵ Vèr kuúme sə́ se vèr‑iì bvə́ʼ e wùn é Ejiv kisáŋ, kfə̀n kuúme bóʼ yee *kukumba wùn à bóʼ yee *melon, à vifoórí ví moo, liks wùn à hanyor, à galiks.

⁶ Lèn á dzə a vèr yòʼ dzəə́ kér kitar, a kifá kée yòy, e tiír sho ki kù jòʼsì *manna və̀n.»

⁷ Manna woo shooy‑iì dzə̀ moo ŋgoòy kifa ke ŋeerín kí bey, a wù fəə́si fəə̀sín.

⁸ Wíri‑iì lo, á wàa ghan, a baʼtí, e nèn a jò e tiy, kìn á tsə́y a dzə̀ é vikoŋ, e nèn a naá e kìŋ sí. Lo, á wàa fèr a dzə̀ vifá ve tonèn veé mentuʼ sho, a kí koó moo kibán keé mentuʼ ke á tònèn, aá tóv e meŋgvə́r me *oliv mè.

⁹ Ŋweʼe‑eè lóo gbù e kibeèy vitsə́ʼə́, yí nèn a gbù wùn à manna.

¹⁰ Mooser yú mo wíri diy e melav melav, a wìr dzə́ e wun shùu kibàn, káykirì, a dòʼshwiiy Nyùy Tàr sí ŋáʼayì, wù wáa yu nyár,

¹¹ e nèn a taŋnín, a dzətí e Nyùy Tàr jii, «À wìy e ŋgeʼ see ben si e kwàn wóo kitu ji ka? M yèe, é bo à leéy mo ntéŋ, e lì kibeʼèy ké màŋgòŋ, a rəʼə́y mo shó.

¹² Yì‑iì bòŋ mo bvəm wìr vìn a? Yì‑iì dzə̀ə́ mo áwune a? À yèe, e bóo way áwune e mǒ koy, mo á wày wán wo bór e lìywǎn koy? A dzə̀ m kòytí áwune é le, e bó a dù sho e wòŋ wo wò‑oò yiìn kilìʼ, e kàʼ ji à wíy fo aàtǎr ram yéví.

¹³ A dzə̀ m lì nyám fo feé, e bóo fo e màŋgòŋ və̀n? Áwune kù tóŋ, kan mo ji m fó nyám, aáwune yí.

¹⁴ Bó yòʼ dzə̀ m yù fó bèʼèy màŋgòŋ və̀n vèr mòʼón. Dzə̀ kibeʼèy, a kí dzər, gháʼ mo.

¹⁵ A dzə̀ ji á mo à yíi a yiì e mò ben, à kù si rə̀r ri mendzən mem, e yùyrí mo yúyrín, é la m yòʼ kfə̀n a yen ŋgeʼ sìn e sí yémé.»

Mooser koóy vé ntome msaàmbà

¹⁶ Nyùy Tàr suúy e Mooser jii, «Báʼtí visən ve wìr veé Isray vi msaàmbà, ve à kiìn ji dzə̀ á vilìmbìy, a kfə̀n dzə̀ vé saʼa e wírí mvəm. Báʼti, à wìy aáwune é shùu *kibàn ké ntàsín, é vèn áwune siysi wún, e tìím fo.

¹⁷ M yíi səʼə́y fo, e suŋnín wòsò, e fàr kiyoy ke kí bee e wò wùn, e fo mbìv yìmòʼ aáwune, aá fíʼ a sə wò, é vèn áwune wáa beʼ kibeʼèy ke dzəə̀n wíri kin, é la à yòʼ dzə́ə a beʼ vèn mòʼón.

¹⁸ Ké wíri kí dzə̀ jii, à yíi yòŋ aáwune ji á *kfə́mrí á vitú vév, a kìʼ kibvəə́shí. Áwune wíy yi a nyám. Áwune tòŋ ne, Nyùy Tàr yú á tóŋ yév ye á tóŋ, suuy jii, ‹Bèn‑éè fó la ver nyám ye vèr yí? Dzə́ yér yeé Ejivi‑iì dzə̀ yé vijùŋe.› Mo wun woo Nyùy Tàr yuun ne bèy, bo wun sí lo, e fo a áwune nyám ye á wáa yi.

¹⁹ A bó áwune yòʼ fə̀m wíy yi a dzə̀ kishiíy kimòʼón cáʼ, kìn vibaà, kìn vitàn, kìn e ghvə̀m, kìn mbaà.

²⁰ Áwune kù wíy a yi ŋwee e fur, e meé mo ví wíy a fàmtìn, a fəə fo yuy, e kfə̀n a kùʼnìn, a koʼóy áwune. A kí dzə̀ bey bìʼ fo áwune ŋwayin Nyùy Tàr wo wù dzəə̀n aáwuné mvəm, a toŋ e wun si, a suúy jii, ‹Yì‑iì fə̀ə́r ka ver fó wòŋ Ejiv feyì.› »

²¹ Mooser bìnèr e Nyùy Tàr jii, «M tsəə́ne wír vìn, a vé rərí dzə̀ nsə̀kì ghií ntuùfú, aà yoŋ ji à yíi fo nyám ye dzə̀ áwune yì ŋwee fur à?

²² Aá seèrí ŋgoo se nàʼ wùn à sé bvəy si, sí ghèén wír vìn a? Aá kùúy sə́ seé ndzəv sidzə̀m, sí kù yòʼ ghèén áwune á?»

²³ Nyùy Tàr yòŋ e Mooser jii, «Dzə̀ ji kiwó ke Nyùy Tàr kí tsə̀mér à? À yíi yen lèn ji kinyo ke m yoŋ ki sà yíi gheén moo ŋgáŋ á.»

²⁴ Á bèy, Mooser nèn fəə̀, e naàrì jí se Nyùy Tàr e wíri, e bàʼtí visən ve wìr vév msaàmbà, e lèmrì e ghaŋ se kibàn ké Nyùy, e kaàrí, e tàr.

²⁵ Nyùy Tàr nèn sə̀ʼə́y e mvə̀m mbàʼ, e sùŋnín e wun, e fàr mbìv kiyòy rə yìmòʼ, e fò e vilìmbìy vee msaàmbà vìy vi. Mo kiyoy ki beèn aáwuné wùn, á nèn a tiisí ntum ye yì lo fo Nyùy. Á tiísí, yì ku nèn ghèén bèy.

²⁶ Kinyo kìn ki‑iì kooy bèy, a vilum ámóʼó kì gòʼ é kibeèy abaà, a yír wùmòʼó dzə̀ ji Eldad, yé wùmòʼ ji Medad. Áwune kù‑uù dzə̀ é mvə̀m wìr ve vé‑eè taŋen, é bo á goʼ kév, e làa yòʼ dù e shùu kibàn. Kiyoy ki ku nèn beè sa aáwuné wùn, á ku nèn a tiisí ntum Nyùy a dzə̀ é kibeèy.

²⁷ Wánlè nsùm wùmòʼ nèn lèʼ, e bì Mooser ji Eldad wùn Medad lò ne, a tiisí a ntum Nyùy e kibeèy.

²⁸ Joshua woo wan Nun, wun woo Joshua wo yì‑iì siìn ŋgaà sə Mooser, e kèʼ fo meterí, nèn yòŋ e Mooser jii, «Tàr wor Mooser, ku sə̀r wír vìne.»

²⁹ Mooser bìnèr jii, «Shii wò dzə̀ ka é kinyò ke kí kùmèn a dzə̀ mo? Kì yée fo wáa dzə ji wír Nyùy adzə̀me kì tiísi ntum rə? Wìr ku lì ji Nyùy Tàr kì wày á kiyoy kfə́ e wìr dzə̀m wùn féyì.»

³⁰ Mooser suúy bey, wùn à vilìmbìy ve wìr veé Isray vìy vi nèn kfə̀n é kibeèy.

Nyùy Tàr tsə́nsí menə́n mee búmér

³¹ Nyùy Tàr yiì lò, e fə̀ə́r shwér, wú wìy e menə́n mee búmér mè fo mbìv rìbà ndzə̀v. Mè wìy, e sə̀ʼə́y, a feŋ e shùu nsay, a bér moo ntàm se kiwo sikweè bèy. Mè gbù, e kaàrí kibeey, e tàr, e dù, e bàʼ kwaʼda moo ghán yee kishiíy kifur bèy.

³² Wíri lò e kishiíy fóo fèy, e dù, a koo búmér və̀y, à shùy, à vitsə́ʼə́, e koò bey, e lìysín e kishiíy ke kí‑iì batin. Wìr wo wù‑uù koon shishàr‑iì koò vigátí wií. Á koó, e sàŋ, e kaàrí kibeey shó, e tàr.

³³ Mo á yí nyám, a bó á yóʼ ne tòʼ é ntìntìn, dòʼshwiiy Nyùy Tàr nèn lò, e kòʼ bìʼ wíri, wù tsə́nsí kifə̀ʼ, kí teè wíri.

³⁴ Bìʼ bey, á nèn yòŋ yír kirə̀ʼ kin ji Kibrot‑Hattaava, a dzə̀ ji «Say se aŋgàa shií», bìʼ fo vé‑eè dzəə̀mèn wíri fó, ve vé‑eè kér shií é nyàm.

³⁵ Wír veé Israyi siíy, e lò fo Kibrot‑Hattaava fèy, e dù e Haserot, e nèn a beè fo.