Kintaŋ 10 - ŊWÀʼ NYÙY

Sóŋ see kisha ke mbàm ke fəvír kí

¹ Nyùy Tàr lò, e yòŋ e Mooser jii,

² «Fèr sóŋé e baà e *kisha ke mbàm ke fəvír, ke á dzə̀vtìn kí. Á wíy a toŋ sóŋ é ghan se á báʼti wír veé Isray, a toŋ e ghan se wír veé Israyi sí yiì a ŋaʼáy, a dù.

³ Á wíy lòo toŋ sóŋ yee baà e dzə̀m, bo dzə̀ ji màŋgòŋ woó Isray e dzə̀m ku bàʼtí e wò si e shùu *kibàn ké ntàsín.

⁴ Yii bèy, aá tòŋ sóŋ e mòʼón cáʼ, bo ló baʼtí vilìmbìy ve wìr veé Isray ve dzəə̀n atǎr ram e wò si.

⁵ A sóŋé dìy, e tònén, bo rám se sí dzəə̀n é kibeèy e mbìv yee fo shùy yii tó si lo, e ŋaʼáy, a dù.

⁶ Sóŋé diy, e tònén fo kàŋ wo wù meen ji baà, bo rám se sí dzəə̀n é kibeèy é mbìv yee tsə́n sí lo, e ŋaʼáy, a dù. Sóŋ yee dìy, e tònéne dzə̀ kisəəm kee ji á sí ŋáʼay, a dù.

⁷ Yii bèy, lóo dzə e ghan se á taʼ e baʼtí màŋgòŋ báʼtín, bo á tóŋ sóŋ, á bèy, e làa yòʼ toŋ, é yí diy, e tònén.

⁸ «Kù wíy a toŋ wón Aaron sóŋ, áwune ve dzəə̀n atàá cù. Sóŋ ye toŋéné kù wíy a dzə nsər ye yì jòʼsìn fo vèn mo ŋgwàʼ sén sí wíy a dzə.

⁹ Vèn wíy lòo dzə e věn nsay, aŋgaà vén vibàné lóo ghiʼ ven, vèn áwune lóo tam, é vèn wáa toŋ sóŋ, é yí wáa dìy, a tonén, é mo woo Nyùy Tàr woo Nyùy won nèn kuùmé ven, e sə̀ ven fo aŋgaà vén vibàné wo.

¹⁰ Wíy lóo dzə e ghan se vèn banen, a sheʼrí Nyùy, kìn dzə̀ ŋkàʼ wo á lèmèn ji woó ghan see shó, kìn dzə̀ woo bìʼ ŋwee wo fíyi, vèn tòŋ sóŋ é kitu ke cù ye tonèné, e kfə̀n tòŋ é kitu ke cù kikòŋnìn, é mo woo Nyùy Tàr wáa kuumé ven, a sə ven. Kù dzə̀ mo Nyùy Tàr woo Nyùy won.»

Wír veé Israyi ŋáʼáy fó Gwan Sinay

¹¹ Yì‑iì dzə̀ é kishiíy kee mbaà fó ŋwee wo wú‑uù meen ji baà, e kiya ke kí meen ji baà mo wír veé Israyi‑iì loòn fó Ejiv, mbàʼ nèn lò fo kitu ke kibàn ké ntàsín.

¹² Áwune nèn ŋàʼáy fo woʼ yee Sinay fèy, a dù. Mbàʼ nèn wìy dù, e gbù e woʼ yee Paran.

¹³ Vé‑eè kèʼ ghán, a fəə, kù mo Nyùy Tàr‑iì yòŋèn, e shaà fo Mooser.

¹⁴ Káŋ wo wù‑uù fəən mbìy‑iì dzə̀ rám se sí‑iì dzəə̀n e rám Judàá kilaʼáy, aáwuné sar cícíwàr, a kilìmbìy kév kí dzə̀ Naashon woo wan Amminadav.

¹⁵ Kilìmbìy ke rám Issakar ki nén a dzə Netanel woo wan Tsuyar,

¹⁶ a ké rám Sebulun ki dzə̀ Eliav woo wan Helon.

¹⁷ Vé‑eè shòʼóy kibàn ké Nyùy, wír veé kfəə Gershon wùn à veé kfəə Merarìi nèn ŋàʼáy, e bèʼèy, a dù.

¹⁸ Kaŋ wìr ve vé‑eè dzəə̀n e rám Ruben kilaʼáyí nèn ŋàʼáy, a dù e viŋkǎŋ viŋkàŋ, aáwuné sar cícíwàr. Kilìmbìy kév kí‑iì dzə̀ Elisur woo wan Shedeur.

¹⁹ Kilìmbìy ke rám Simeon ki nén a dzə Shelumiel woo wan Tsurishadday,

²⁰ a ké rám Gad ki dzə̀ Eliasav woo wan Deyuel.

²¹ Wír veé ram Levi ve dzəə̀n kfə́ə Kohati nèn fəə̀, a dù, aá béʼ vifá vee jeéy ví veé mvə̀m kibàn. Á yiì lòo meé fo vé‑eè du, aá tuúy ne kibàn.

²² Káŋ wo wù‑uù jùmrìn nén a dzə wo wìr ve vé‑eè dzəə̀n e rám Efrayimé kilaʼáy. Á fəə́, a dù e viŋkǎŋ viŋkàŋ, aáwuné sar cícíwàr, a kilìmbìy kév kí dzə̀ Elishama woo wan Ammihud.

²³ Kilìmbìy ke rám Manasse ki nén a dzə Gamaliel woo wan Pedasur,

²⁴ a ké rám Benjamin ki dzə̀ Abidan woo wan Gidiyone.

²⁵ Káŋ wo wù‑uù sərin bám nén a dzə wo wìr ve vé‑eè dzəə̀n e rám Dané kilaʼáy. Á fəə́, a dù aáwuné sar cícíwàr, a kilìmbìy kév kí dzə̀ Ahiyeser woo wan Ammishadday,

²⁶ a ké rám Asher ki dzə̀ Pagiel woo wan Okran,

²⁷ a ké rám Navtali ki dzə̀ Ahira woo wan Enan.

²⁸ Á dzə́ə ye vé‑eè sìysìn wír veé Isray sho, á wáa fəə e ŋgoo sí ŋgoo si.

²⁹ Mooser lò, e yèn sə́ və Hobav. Hobav‑iì dzə̀ wan Ruel woo wir Midian, a dzə̀ tàr à wiiy Mooser. Mooser suúy shó jii, «Vèr sí du e kirə̀ʼ ke Nyùy Tàr‑iì yòŋèn ji wun wíy fo e vèr. Wìy ri, é vèsən du fó, é vèr yiì a leéy fo wò kijuŋ. Nyùy Tàr kàʼ ne ji wun yíi a leéy a fo wír veé Israyi.»

³⁰ Hobav bìnèr jii, «M yòʼ du. M lo, a kfən a dzə̀ e věr wòŋ, e dù, e yen wír vém.»

³¹ Mooser kú a lon wun jii, «Kii wò, lá à yòʼ màʼtì ver. A dzə̀ kù kìíy wò fo vèr yíi lòo dù, aá wáa tam e woʼ. À yíi a dzə moo sí yér bey.

³² Aà wìy, vèsən du, bo kifá ke juŋ ke Nyùy Tàr yíi a yiì e vèr, kìn dzə̀ kee ka, bo vèr yíi a yiì sa e wò.»

³³ Áwune nèn lò fo Nyùy Tǎr gwan, e ghàn vishiíy vitaár. Aá ghán bèy, a ŋkùv mensàŋ Nyùy Tàr du aáwuné mbìy, taʼ kirə́ʼ ke áwune bee shó.

³⁴ Á yií lóo fəə fo kibeèy, mbàʼ Nyùy Tàr kù a daà aáwuné kitu e shùy.

³⁵ Á yií lóo bèʼèy ŋkùv mensàŋ ji á waà sí du, Mooser nèn yòŋ jii: «Éè Nyùy Tàr, ŋáʼáy, e tàʼár aŋgaà vé vibàné, é wír ve á dzə wúu yée léʼkír.»

³⁶ Mbàʼ yií du, tiimè, kìn dzə̀ é ghàn ka, Mooser yòŋ jii, «Éè Nyùy Tàr, kfə́n é bàm fo wír vée wùn, wír veé Isray ve á dzəə̀n ansə̀kì ansə̀kì.»