Kintaŋ 1 - ŊWÀʼ NYÙY

Kintaŋ ke wìr veé Isray ke mbìy ki

¹ Mo wír veé Israyi‑iì dzə́ e woʼ yee Sinay, lòo dzə e kiya ke kí‑iì meen ji baà mo áwune‑eè loòn fó Ejiv, wáa dzə e kishiíy ké mbìy ki é ŋwee woo baà, Nyùy Tàr nèn lò, e sùŋnín e Mooser e mvə̀m *kibàn ké ntàsín.

^2-3 Wù wáa suŋnín, a yòŋ jii, «Vèn Aaron ku tàŋ wír veé Israyi adzə̀m mo rám sév sí dzə̀kìn, e vitǎr vitàr, e sàŋ yír sé vilum adzə̀m e kitu kitu. Á ku tàŋ vilum veé Isray adzə̀m ve á gheenen, ve dzə̀ á dù é shùu rər, a dzə̀ vee kèʼ fó kiya mbaà, a dù duùn fó mbìy, e sìysì, aá wáa dzə aàkáŋ aàkáŋ.

⁴ Vèn ku lì wír e mòʼón mòʼón fo ram se sí dzəə̀n, aá wáa sə ven. A wìr wo á li, kù dzə̀ kilìmbìy e wun kfəə.

⁵ Yír sé wìr ve á yíi a sə ven sí dzə̀ jii: Fo rám Ruben, aá li Elisur woo wan Shedeur.

⁶ Fo yé Simeone, aá li Shelumiel woo wan Tsurishadday.

⁷ Fo yé Judàa, aá li Naashon woo wan Amminadav.

⁸ Fo yé Issakari, aá li Netanel woo wan Tsuyar.

⁹ Fo yé Sebulune, aá li Eliav woo wan Helon.

¹⁰ Ké wón Joosev ki dzə̀ jii: Fo ram ye dzəə̀n yé Efrayim, aá li Elishama woo wan Ammihud. Fo ram ye dzəə̀n yé Manasse, aá li Gamaliel woo wan Pedasur.

¹¹ Fo rám Benjamine, aá nèn lì Abidan woo wan Gidiyone.

¹² Fo yé Dane, aá li Ahiyeser woo wan Ammishadday.

¹³ Fo yé Asheri, aá li Pagiel woo wan Okran.

¹⁴ Fo yé Gadi, aá li Eliasav woo wan Deyuel.

¹⁵ Fo yé Navtalìi, aá li Ahira woo wan Enan.»

¹⁶ Á wír ve vé‑eè liìn fo wír veé Israyí mvəm, wir mòʼón fo ram yee shó, a wìr dzə̀m‑eè dzə̀ kilìmbìy e wun kfəə.

¹⁷ Mooser wùn Aaron nèn lì wír ve Nyùy‑iì yòŋèn vin,

¹⁸ wáa dzə e kishiíy ké mbìy ki fó ŋwee woo baà, wùn áwune báʼtí wír veé Isray adzə̀m, á táŋ áwune é kfəə sí kfəə si, mo rám sév sí dzə̀kìn. Á wáa taŋ, a saŋ yír sé vilum e kitu kitu, vee kèʼ fó kiya mbaà, a dù duùn fó mbìy,

¹⁹ mo Nyùy Tàr‑iì yòŋèn e Mooser. Mooser ku nèn tàŋ áwune bey, e woʼ yee Sinay fèy.

²⁰ Fo rám Ruben woo wan Isray mbìyi, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

²¹ á wáa dzə wír kishóv ghii tàn aànsə̀kìi nshòv ntuùfú e mkweè (46,500).

²² Fo rám Simeon, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

²³ á wáa dzə kishóv ghii taár aànsə̀kìi nshòv bvə̀ʼə̀ e mtàn (59,300).

²⁴ Fo rám Gad, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn, e vitǎr vitàr,

²⁵ á wáa dzə wír kishóv mtàn e ghiì ntuùfú aànsə̀kìi nshòv sitàn e mkweè (45,650).

²⁶ Fo rám Juda, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

²⁷ á wáa dzə wír kishóv ghií ntuùfú aànsə̀kìi nshòv sikweè e msaàmbà (74,600).

²⁸ Fo rám Issakar, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

²⁹ á wáa dzə wír kishóv ghii kweè aànsə̀kìi nshòv sikweè e mtàn (54,400).

³⁰ Fo rám Sebulun, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

³¹ á wáa dzə wír kishóv ghii kweè aànsə̀kìi nshòv saàmbà e mtàn (57,400).

³² Fo wón Joosevi vee rám Efrayim, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

³³ á wáa dzə wír kishóv ghii tàn aànsə̀kìi mkweè (40,500).

³⁴ Vee rám Manasse, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

³⁵ á wáa dzə wír kishóv ghii baà aànsə̀kìi nshòv sikweè e mtaár (34,200).

³⁶ Fo rám Benjamin, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

³⁷ á wáa dzə wír kishóv ghii kweè aànsə̀kìi nshòv sitàn e mtaár (35,400).

³⁸ Fo rám Dan, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

³⁹ á wáa dzə wír kishóv ghií saàmbà aànsə̀kìi nshòv sibaà e mntuùfú (62,700).

⁴⁰ Fo rám Asher, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

⁴¹ á wáa dzə wír kishóv ghii tàn aànsə̀kìi nshòv mòʼón e mkweè (41,500).

⁴² Fo rám Navtali, wìr dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù rə́r, á sáŋ yír sév é kitu kitu mo kfə́ə sév sí dzə̀kìn e vitǎr vitàr,

⁴³ á wáa dzə wír kishóv ghií kweè aànsə̀kìi nshòv sitaár e mtàn (53,400).

⁴⁴ Á wír ve Mooser wùn Aaron‑eè taŋen, a sə́ vilìmbìy veé Isray áwune. A vilìmbìy vìn vi‑iì dzə̀ nshòv sibaà e ghvə̀m, a kee shó ki tíy e rám rəə́ yir.

⁴⁵ Á bèy, lùmèn woó Isray e dzə̀m woo kèʼ fó kiya mbaà, a dù duùn fó mbìy, wo yì‑iì dzə̀ wù dù é shùu rər, wo vé‑eè taŋen mo kfəə́ si‑iì dzə̀kìn

⁴⁶ nèn a dzə kishóv mtàn e ghiì tàn aànsə̀kìi nshòv sitaár e ghií ntuùfú (603,550).

⁴⁷ Yii bèy, á yòʼ‑oò lo tàŋ wír veé ram Levi e mvə̀m kintaŋ fèn.

⁴⁸ Kí‑iì dzə̀ bey, bìʼ fo Nyùy Tàr‑iì yòŋèn ne e Mooser jii,

⁴⁹ «Kù wíy jòʼsì rám Levi ye bó á yòʼ wíy taŋ, e tatí e kintaŋ ke wìr veé Isray.

⁵⁰ Á kù wíy lèm wír veé ram Levi, aá wáa leéy fo *kibàn ké mensàŋ, a leéy fo vifá ve ker veé mvəm wó vi, à kifá kidzə̀m kee fó ki, a geʼ sho. Á lóo ghan, aáwune wáa beʼ kibàn ké mensàŋ, à vifá ve ker və́ ví, lóo tam kibeey, á tùúy vibàn vév é ghaa kibàn ké mensàŋ.

⁵¹ Lóo dzə, aá sí shóʼoy kibàn ké mensàŋ, a dù sho fomóʼó, bo kù shóʼoy wír veé ram Levi. Lóo dzə ji á sí tuuyì, bo kù tuuy áwune. A wìr wo bó yòʼ dzəə̀n rám Levi kòʼtí e ghaŋ wo, bo á kù laar ŋgaàŋ láarin.

⁵² Wír veé Israyi wíy a tam vév vee vibàn, e ram sí ram sí mo kfəə́ si dzə̀kìn, wir mòʼón mòʼón e wun káŋ, aáwuné sar cícíwàr.

⁵³ Wír veé ram Levìi wíy tam vév, e kaarí kibàn ké mensàŋ, e tar ji lá ŋgeʼ si yòʼ gbù e wír veé Israyí kitu. Wír veé ram Levìi wíy a leéy fo kibàn ké mensàŋ ki.»

⁵⁴ Wír veé Israyi kù‑uù yiì kinyo kidzə̀m réŋréŋ mo Nyùy Tàr‑iì suuyin e Mooser.