Kèʼlo 9 - ŊWÀʼ NYÙY

Nyùy gwár mensaŋ wùn Noa

¹ Nyùy nèn səə̀vì Noa wùn à wón vəə́, e sùúy aáwune jii, «Vèn dzəə́ wóné, aá kuʼ, e rùn é kitu ke nsay.

² Vifá ve ŋeʼèn ví vidzə̀m vi wíy a fàn ven. M wày ne vidzə̀m e věn sar, nyám si wùn à menə́n mè, à vifá ve ví ŋaŋrì ŋàŋrìn é kitu ke nsay vi, e lì sə́ si.

³ Vifá vidzə̀m ve ví ŋeʼ, kfə̀n gháné vi wíy a dzə viyíkìr vén, e tatí vikwiíy ve shoòŋ vi ve mò‑oò foon ne. M kù fò ne kifá kidzə̀m e vèn.

⁴ Dzə̀ cáʼ ji lá vèn yòʼ yì á nyám, a mensə́ mè dzə̀ə́ sho, bìʼ fo dzəə̀n dzəʼə̀m rə́ bey.

⁵ Fo ké dzə̀ʼə̀m wìr ki, a wìr yùyrí wír, bo m kù wíy dzər e ŋgaàŋ, é wù fiʼti. Nyàm yúyrí wír, bo m kù wíy laàr yìwun.

⁶ A wìr yùyrí wír, á yùyrí ŋgaàŋ, bìʼ fo mò‑oò bomen wír a dzə̀ e mǒ nshwìnín.

⁷ Fo vèn lèn, vèn dzəə́ wóné anín ji kiŋgoòy kén kí kuʼ, a dzə nyanyày, e ràm kitú ke nsay kidzə̀m.»

⁸ Nyùy nèn kfə̀n sùúy e Noa wùn à wóné jii,

⁹ «Vèn kiíy ji m sí gwar *mensaŋ lèn vèsən à rám yéné,

¹⁰ à vifá ve ŋeʼèn ví vidzə̀m ve vèn áwune dzəə̀n, vifá vidzə̀m ve ví fəən fó kikoŋ, menə́n wùn à nyám seé laʼ si, à seé kwaʼ si.

¹¹ M sí gwar mensaŋ vèsən ji m yòʼ kfə̀n dzəə́ wìy laàr kifá ke ŋeʼèn kí kidzə̀m e ndzə́ví. A bó yí yòʼ dzəə́ wìy run, e laàr kitú ke nsay.»

¹² Nyùy nèn kfə̀n sùúy jii, «M lèm ne sa kisəəm ké mensàŋ me m gwar vèsən à vifá ve ŋeʼèn ví vidzə̀m ve ví dzəə̀n vèn áwune, à ŋgwàʼ ye yì wíy a wìy.

¹³ Rə́m yémé sì é mbàʼ, a yí wíy a dzə kisəəm ké mensàŋ me m gwar vèr à wír veé kitu ke nsayi adzə̀m.

¹⁴ M fəər mbàʼ e kitu ke nsay, rə́mé daa sho,

¹⁵ é m wáa kuumé mensaŋ me mò‑oò gwàrìn vèsən à vifá ve ŋeʼèn ví vidzə̀m. A bó ndzə́ví yòʼ kfə̀n dzəə́ wìy run, e sùm kitú ke nsay, e laàr kifá ke ŋeʼèn kí kidzə̀m.

¹⁶ Rə́mé daa e mbàʼ, m leeyì, é m wáa kuumé mensaŋ mee là may me mò‑oò gwàrìn vèr à kifá keé kitu ke nsay ke ŋeʼèn kí kidzə̀m.»

¹⁷ Nyùy màysì sùúy e Noa jii, «Á kisəəm ké mensàŋ me m gwàrìn vèr à kifá ke ŋeʼèn kí kidzə̀m.»

Noa wùn à wón vəə́

¹⁸ Wón Noa‑aà dzə̀ jii, Shem wùn à Ham, à Jafet, a kù dzə̀ áwune ve wùn à Noa‑aà fəən fó kikoŋ. A wàn Ham‑eè dzə̀ Kanan.

¹⁹ Rám wìr veé nsayi‑iì ràm a dzə̀ fo wón Noa vee ataár vìne, vee Shem, Ham, à Jafet.

²⁰ Noa‑aà dzə̀ wir sùm, a yì‑iì tòmbìy wun, e bìy vitiír vé *vayin, aá yii fer meluʼ e báŋ sə́ sí.

²¹ Wáa dzə e kishiíy kímóʼ kí, wù nó meluʼ me wù‑uù fèrìn, mè koó, wù nèn neèm kilor e wun kibàn ke vé‑eè tamen támén.

²² Ham woo tàr à Kanan nəə́ é kibàn, e yèn bey, e nèn fəə̀ kfə́, a bi afə́r və́ vee abaà biín.

²³ Yii bèy, Shem wùn Jafet túʼ ndzə̀y, e nàsì, e tàár e mbèʼ, e nə̀ə́ kindzə̀msìbàm, e sə̀tí kinshóʼ ke tàr wov shó, e làa yòʼ mùm fóo shov e si gheéy.

²⁴ Meluʼ mè yiì raàné fo Noa si, wù kiíy ji á kinyo ke wan və bàm woo Ham waà mùmèn,

²⁵ e nèn sùúy jii: «Lòné shòv ne Kanan. Wù kù sí wìy a dzə kwàn, a rèŋ vikwàn fo afə́r vəə́ ŋkuuŋkùŋ.»

²⁶ Wù nèn kfə̀n yòŋ jii: «Á wáa burí Nyùy Tàr wo Shem ghvə́mé. Wun woo Nyùy Tàr ku yiì, é Kanan wáa rèŋ vikwàn fo Shem.

²⁷ Nyùy ku kùʼùr nsay Jafet, é rám rəə́ wáa dzə wùn à yé Sheme shuu e mòʼón, e kfə̀n yiì, é Kanan wáa rèŋ vikwàn fo Jafet.»

²⁸ Noa kfə̀n‑eè dzə̀ʼə̀m viyá kishóv mtàn e ghiì taár (350), kèʼ mo ndzə́v rəyi‑iì màyìn.

²⁹ Wù‑uù dzə̀ʼə̀m viyá kishóv mtàn e ghiì bvə̀ʼə̀ (950), e nèn kpù.