Kèʼlo 49 - ŊWÀʼ NYÙY

Jakov fó ntìr kpu e wón və́ vee nshòv sibaà e ghvə̀me

¹ Jakov jàŋ wón və́ vee vilum, e sùúy jii, «Vèn báʼtí adzə̀m, é m suúy ven kinyo ke kí wíy koóy ven é ghan se sí wíy a wìy.

² «Ven vee wón Jakov, vèn báʼtí, e yuùrí. Vèn yuúrí tàr won Isray.

³ «Ruben, à dzə̀ wan wom mbìy, dzəə́ yém féyì, wán wom vinsùm. À tíy mbìy fo viwìr, tíy fo vitaaví.

⁴ Moo ndzə́v ye yí tsə́yninè, wò‑oò gùynìn, e kòʼ e tàr wón kikun, e bìvír, a bó à yòʼ dzəə́ wìy a tiy mbìy.

⁵ «Simeon wùn Levi kér liì wov e mòʼón. Nyùy sév sí dzə̀ vifá ve rər.

⁶ Nyaa mò, bó m yòʼ wíy way kiwó aáwuné ntaŋ. Nyaa mò, bó m yòʼ wíy tatí ŋgoo yev menàŋ. Vé‑eè yúyri wíri é mvə̀m dòʼshwiíy, kotì anàʼ e mvə̀m kiŋar.

⁷ Dòʼshwíiy wov dzə̀ e biíbí, melív mev mè sə́n é ŋàŋ, a lòné dzə̀ wóv. M wíy bvəə́r áwune, aá sáŋrí e wír Jakoví mvəm. M wíy taʼár áwune é nsay Isray.

⁸ «Wò woo Juda, afə́r vée wíy a burí wò. À wíy a ker aŋgaà vé vibàn a dzə̀ fó asìʼ. Wón tàr woné wíy a fo ghvə́m e wò.

⁹ Wan wom Juda, à dzə̀ ji bvərə̀ʼ. À kfə̀n ne e bàm fó kwaʼ jwim, à koò ne nyám sé, e kfə̀r. À kfə̀n ne e bàm, e nyàʼám, e nàsì vikoy ji á wò bvərə̀ʼ féyì. Yeè bvərə̀ʼ, a dzə̀ yùʼtí la wún, e sə̀ʼ wò?

¹⁰ Kitoómé ké vifòn ki yòʼ wíy buú fo Juda. Kitoómé ké saʼ ki yòʼ wíy buú fo wun nsàn vibìy, e dù, e meé e ghan se ŋgaà kitoòmé wiyì, a dzə̀ wun wo vitúm vidzə̀m vi wíy a yunín.

¹¹ Juda lo, wù tsəə̀r kimbèʼbìy kfə́ é kitiír ké *vayin, e tsəə̀r wan kimbèʼbìy və é tam wo juŋe. Wù su ndzə̀y sə́ e meluʼ me mè ján fo mè, su kikúm kfə́ e meluʼ me baar mè.

¹² Sí rəə́ wíy a bàŋ meluʼ meluʼ, é sóŋ rəə́ wáa fər vín vín.

¹³ «Sebulon wíy a dzə e ghaa *rìbà ndzə̀v, é wáa dzə kibeèy ké amàkìkoŋ. Ŋgvən rə wíy dù, e mày e Sidon.

¹⁴ «Issakar dzə̀ ji kintav ke kimbèʼbìy, a wù néŋ e nsàn aŋkém.

¹⁵ Wù‑uù yèn, a kirə́ʼ ké meèmè ki dzə̀ kijuŋ, a nsay yee fó bóŋ é ŋàŋ, e nèn gvə̀ʼə́r ndzə̀m rə, e lì kibeʼèy, e fò kitú kfə́ ji kwǎn lìm woo fó.

¹⁶ «Dan wíy a saʼ wír və́, a dzə̀ rám yeé Isray yímóʼó.

¹⁷ Dan wíy a dzə ji yó e dzəə, a dzə ji búv e kiwuù ké dzəə, búv wo wù té nsən se wuù sé nyàmŋkoʼ, a ŋgaà koʼ gbu fo bàm.

¹⁸ «Éè Nyùy Tàr, m leey a dzə̀ wò. Kù luŋèr wò wír vé.

¹⁹ «Ashóŋé wíy nəə́ Gad, é wù binkir, e jùm áwune é nsənnsən.

²⁰ «Nsay Asher wíy a fəə́r vifá ve yi ve juŋ vi. Wù wíy a ker viyíkìr ve ví gheenen fo afone.

²¹ «Navtali dzə̀ ji shishùy. Wù ghán mo wù koŋè, dzəə wón ve juŋe.

²² «Joosev dzə̀ ji kitiír ke kí koomè. Kí koom e ghaa ndzəv, a tám sə́ sí sə́ti kirə́v ké kày.

²³ Vé mvə̀ne‑eè nə̀ə́ wun e dzəə ye bi, vé‑eè tè wun, e nə̀ʼsì wun, e lèmér,

²⁴ yii bèy, kinte ki yòʼ‑oò lo wèʼ fo wun kiwo, kóy sə́ sí‑iì gòʼ sicaʼàn. A yiì Nyùy Jakov woo Ŋgaà Vitaàví Vidzə̀m, wun woo Nshìy wo dzəə̀n Kilán keé Isray.

²⁵ Kù yiì Nyùy wo tàr won‑eè ghvə́mé, wun wo wù wíy a sə wò. Wù kù wíy a səə̀vì wò, wun woo Nyùy woo Ŋgaà Vitaàví Vidzə̀m, é wuú wùn à ŋweʼe wáa gbù fo yuv, é ndzə́ví wáa koʼ fo loònsay, é kidzəə́y kí kuʼ, ké wìr wùn à ké nyàm ki.

²⁶ Kisəəvì ké tàr won kí kùʼ, e shaà ké agwan fo jíyí dzəə̀n ghán sidzə̀m, e kfə̀n shaà vijuŋ veé aŋkoŋ ve á tíy fo, e wìy dù, e mày. Kisəəvì kin ki kú a dzə e Joosev kitu, a dzə e wun vishi ji wan ntoʼ aàfə́r vəə́ nsàn.

²⁷ «Benjamin dzə̀ ji koosàʼ wo biibí. Lóo dzə kijàvndzə, wù wàa kfər nyám se wù koon, lóo dzə e ŋkuùr, wù nèn a jàv kibér.»

²⁸ Á kinyo ke Jakov‑iì suuyin é ghan se wù‑uù fó ntìr kpu e wón vəə́. A wù suuy ké wìr mo kí dzəə̀n, a wón vin adzə̀me dzə̀ rám Isray yee nshòv sibaà e ghvə̀m.

Kpú Jakov

²⁹ Jakov nèn kfə̀n a tinén kinyo aáwune, a suúy jii, «M sí lo, a jùmrì atàr vém. Vèn dzəəme mo aáwuné ghaŋ e nsay Kanan. Á ku dzəə̀mè mo a dzə̀ é mbvə̀ʼ ye yì dzəə̀n é kwaʼ wo yì‑iì dzəə̀n wó Efron woo wan wìr Hit.»

³⁰ A kwáʼ və̀ne dzə̀ é Mak‑Pela wo wù dzəə̀n é ghaa Mamre e mbìv yee fo shùy yii tó. Abraham‑eè yùn kwáʼ wùn à mbvə̀ʼ rə̀n fo Efron woo wan wìr Hit ji kirə́ʼ ké kindzəə̀mèwìr.

³¹ Dzə̀ fó fo vé‑eè dzəə̀mèn Abraham wùn Sara woo wíiy və, e kfə̀n dzəə̀mè Aysi wun wiiy və woo Rebeka. Mò‑oò dzəə̀mè sá Lea fo.

³² Á kù‑uù yùn kwáʼ woo shooy wùn à mbvə̀ʼ ye yì dzəə̀n shó fo wón Heti.

³³ Jakov màysì, e tìr wón və́, e nèn kòʼór wuú rə́ é kikun, e nèn shèm, á báʼtí wun.