Kèʼlo 46 - ŊWÀʼ NYÙY

Jakov wùn à kfə́ə rəə́ dú é Ejiv

¹ Á bèy, Isray báʼtí kifá kfə́ kidzə̀m, e nèn a dù. Wù meé é Beersheba, e cù Nyùy, wun woo Nyùy wo tàr wov Aysi‑iì ghvə́mé.

² Lòo dzə vitsə́ʼə́, Nyùy wìy fo wun wùn é njà njèm, e yòŋ ji Jakov, Jakov. Wù biímé ji mo və̀ne.

³ Nyùy nèn sùúy jii, «Dzə̀ mo Nyùy, Nyùy wo tàr won‑eè ghvə́mé. Lá à yòʼ a fàn fóo səy e Ejiv, bìʼ fo m wíy yiì, áà wáa dzə kitúm ke kuʼùn kí fó.

⁴ M yíi səy e Ejiv wòsò, e kfə̀n lì rám yé, e kfən sho e bàm. À wíy kpu, é Joosev báʼtí wò e kiwó kfə́ kí.»

⁵ Jakov nèn lò fo Beersheba ji wun du á e Ejiv. Wón vəə́ bèʼèy wun e kitentén, e kfə̀n bèʼèy vikìy vév wùn à wón ve terií, a dzə̀ é vitentén ve Farao‑oò tsənsin ji ví beʼey á áwune, e wìy sho e Ejiv.

⁶ Á lòo lò, e lì sa nyám sév wùn à kéŋ yév ye vé‑eè kooyin é wòŋ Kanane, e sə̀y shó e Ejiv.

⁷ A Jakov kì lóo dù bèy, e lì kfə́ə rə́ e dzə̀m. Wù‑uù lì wón və́ vee vilum, wùn à vee vikìyí, à wón woné.

⁸ Yír sé won veé Isray ve wùn à tàr wov Jakov‑iì səyin é Ejiv si sìne. Ruben woo wan mbìy.

⁹ Wón Ruben vee vilume‑eè dzə̀ jii, Hanok wùn à Pallu, à Hesron, à Karmi.

¹⁰ Wón Simeon vee vilume‑eè dzə̀ jii, Jemuel wùn à Jamin, à Ohad, à Jakin, à Tsohar, e lì Shaul wo yè wov dzəə̀n wír woó Kanan.

¹¹ Wón Levi vee vilume‑eè dzə̀ jii, Gershon wùn à Kohat, à Merari.

¹² Wón Juda vee vilume‑eè dzə̀ jii, Er wùn à Onan, à Shela, à Peres, à Sera. Yii bèy, a Er wùn Onan‑eè kpùkír é wòŋ Kanan. Wón Peres vee vilume‑eè dzə̀ jii, Hesron wùn Hamul.

¹³ Wón Issakar vee vilume‑eè dzə̀ jii, Tola wùn à Pua, à Jashuv, à Shimron.

¹⁴ Wón Sebulun vee vilume‑eè dzə̀ jii, Sered wùn à Elon, à Jaaleel.

¹⁵ Á lav se won vee vilum ve Lea‑aà dzəən wùn Jakov e Paddan‑Aram, e bóo lì Dina woo wán woo wiíy. Wón və́ vin adzə̀me‑eè dzə̀ nshòv sitaár e mtaár.

¹⁶ Wón Gad vee vilume‑eè dzə̀ jii, Tsifiyon wùn à Haggi, à Shuni, à Esbon, à Eri, à Arodi, e bóo lì Areli.

¹⁷ Wón Asher vee vilume‑eè dzə̀ jii, Imna wùn à Ishva, à Ishvi, à Beria. Jèmèr yev‑iì dzə̀ Sera. Wón Beriàa‑aà dzə̀ jii, Heber wùn Malkiel.

¹⁸ Á lav se wón Jakov vee vilum ve wù‑uù dzəən wùn Silpa wo Laban‑eè foon e wan və woo wiíy woo Lea. Vé‑eè dzə̀ nshòv ntuùfú e ghvə̀m.

¹⁹ Wón Racel woo wiiy Jakovi‑iì dzə̀ Joosev wùn Benjamin.

²⁰ Joosev wùn Asenat dzəə́ Manasse wùn Efrayim e Ejiv. Asenat və̀n‑eè dzə̀ wan Potifera woo taà cù woó On.

²¹ Wón Benjamin vee vilume‑eè dzə̀ Bela wùn à Beker, à Ashbel, à Gera, à Naaman, à Ehi, à Rosh, à Muppim, à Huppim, e bóo lì Ard.

²² Á lav se wón Racel vee vilum ve wù‑uù dzəən wùn Jakov, aá dzə̀ adzə̀m nshòv sikweè e ghvə̀m.

²³ Wan Dan wáa dzə Hushim.

²⁴ Wón Navtali vee vilume wáa dzə jii, Jaaseel wùn à Guni, à Jeser, à Shillem.

²⁵ Á lav se wón Jakov vee vilum ve wù‑uù dzəən wùn Bilha wo Laban‑eè foon e wan və woo wiíy woo Racel, aá dzə̀ adzə̀m saàmbà.

²⁶ Wìr dzə̀m wo wù‑uù duùn wùn Jakov e Ejiv wáa dzə wír nshòv ntuùfú e mntuùfú. Vee shoone‑eè dzə̀ vitó və́, a bó á yoʼ wày vikǐy won və́ fó.

²⁷ Joosev‑iì dzə̀ə́ ne wón é Ejiv abaà. Wìr dzə̀m woo Jakov kfəə nèn a dzə wír msaàmbà e ghan se vé‑eè wìyìn é Ejiv.

²⁸ A Jakov kì tsə̀nsí Juda fo mbìy ji wù du, e yèn á Joosev, é wùn áwune tárnín é nsay Goshen. Áwune meé é Goshen,

²⁹ Joosev báʼtí kiténtén kfə́ ke səŋ nyám si, e nə̀ə́ sho, a dù e Goshen ji wun du, e yèn á tàr wov Isray. Wùn wun tárnín, Joosev baámé wun, e màʼ kitú e mbèʼ wo, e dìy ntàmda.

³⁰ Isray suúy e Joosev jii, «A kòŋ, m kpù lèn mo m yenen sí yé, e kìíy ji à dzə̀ shó e tin.»

³¹ Joosev suúy áàfə́r vəə́ wùn à kfə́ə tàr woví e dzə̀m jii, «M yíi dù, e fìʼtì e Farao ji afə́r vém wùn à kfə́ə tàr wor ye yí‑iì dzəə̀n é Kanane wìy a ne, e nə̀ə́ mo.

³² Aáwune dzə̀ á wír ve á yii lem bvə́y si wùn aànàʼa, aá wìy a ne e bvə́y sév sí wùn aànàʼa, à kifá kév kí kidzə̀m.

³³ Fòn yií tooy ven, dzə́r ji lim yéné sà dzə̀ ka á,

³⁴ vèn bìnèr jii, ven vee akwàn vəə́ yii shiy a nàʼ wùn à bvə́y si, e kèʼ fo meterí, e wìy meé lán, réŋréŋ mo atàr véné‑eè shiyì. Vèn yoŋ bèy, aá nèn màʼtì, é vèn dzəʼəm é mbìv wòŋ yee Goshen, bìʼ fo wír veé Ejivi yòʼ yii tíy aànshìy nyàmé kinyò.»