Kèʼlo 40 - ŊWÀʼ NYÙY

Joosev tóʼtí njèm se vé sháŋé

¹ Mo Joosev dzəə̀n é sháŋ bey, vishiíy ví lòo tumsín, nshìylav fàáy yee kitú fo se sí yii jav bóm yeé ntoʼ wùn à nshìylav fàáy yee kitú fo se sí yii fer vifá ve yi veé ntoʼ nèn lò jày kinyo e tàr wov woo fon woó Ejiv.

² Fòn shwiíy kilòŋ wùn áwune,

³ e wày áwune é sháŋ wo wù‑uù dzəə̀n e kitú ke vé rər ve vé‑eè shiy ntoʼ kí laʼ, a dzə̀ fo Joosev‑iì dzəə̀n sá.

⁴ Kitú ke vé rər kiy ki nèn shòʼ Joosev ji wù wáa lìm fo áwune. Áwune ku nèn a dzə e làv sháŋ ntàmda.

⁵ Wáa dzə vitsə́ʼ vímóʼ ví, a nsheèlav se faáy sé fòn woó Ejiv sìy si dzə̀ə́ e sháŋ, njèm shí áwune vee wír abaà, nshìylav fàáy ye yì leey fo bom wùn à ye yì leey fo vifa ve yi, a ye wìr yee njèm kù kér nsàv rə jeéy.

⁶ Ndzə bvəə́shí, e jàv, Joosev wìy ji wun yén áwune, e yèn, aáwune dzə́ arəə́yín.

⁷ Wù dzə́r aáwune jii, «Vèn kiʼ lán arəə́yín ben, a dzə̀ ka?»

⁸ Áwune bìnèr jii, «Njèm si sìíy, e shì ver, la vèr yòʼ a ker wír wo wù tóʼtí e vèr.» Joosev suúy jii, «Kù jòʼsì Nyùy wo wù yii fó vifií e wìr, é bo wù wáa toʼtí njèm. Vèn naari ri njèm sén sí e mò.»

⁹ Nshìylav fàáy ye yì leey fo bóme suúy e Joosev jii, «Njèm‑ee siíy, e shì mo, a kitiír ké *vayin ki tíy e mǒ si,

¹⁰ a kí kér tám sitaár. Sí ku nèn tòkír, e sàám, e kòóm, e lò bàŋ,

¹¹ a m kér bóm fòn e mǒ kiwo. M nen kòy báŋ si, e kàm e fòn bom, e fò shó.»

¹² Joosev suúy jii, «Yuúrí nsàv njèm rə̀n. Tám se kitiír see sitaár si din a dzə̀ vishiíy vitaár.

¹³ Kí dzə̀ jii, vishiíy ví yíi shaà vitaár, é Farao fəə́r wò fo sháŋ, e siìr wò, áà kfə́n e wò kiliŋ ke lìm fo wò‑oò dzəə̀n, a fo bóm e fòn.

¹⁴ Kii wò, kinyo ké ki yií boŋè, à kù kuùmé mo. Ku naàrì kinyo kém kí e Farao, é wù fəə́r mo fó sháŋ fen.

¹⁵ Vé‑eè koò mo koón e vitaáví ví fo věr wòŋ, woŋ wìr veé Hibru, e bóo wìy sho e Ejiv fèn. Á kfən wày mo é sháŋ, a bó m yoʼ jày kinyo kímóʼ kí é wòŋ fèn.»

¹⁶ Mo nshìylav fàáy ye yì leey se sí yii fer vifá ve yi veé ntoʼ yuun mo Joosev toʼtin kijuŋ, yì nèn sùúy sho jii, «Njèm‑ee shí sá mo, a m béʼ ŋkaà se kiban sitaár, e kitu,

¹⁷ a kfəə́ se kiban ke tonèn sé Farao si dzə̀ é ŋkaà yee fó yuv, a menə́n mè saʼà, yí fo mǒ kitu.»

¹⁸ Joosev suúy jii, «Yuúrí nsàv njèm rə̀n. Ŋkaà see sitaár si din a dzə̀ vishiíy vitaár.

¹⁹ E bǎm vishiíy vitaár, é Farao fəə́r wò, e shèr kitú ké, e səŋ dzə́n yé e kici, é menə́n mè wáa sàʼ.»

²⁰ Wáa dzə e bǎm vishiíy vitaár, a dzə̀ kishiíy ke Farao‑oò kuúme kishiíy ke vé‑eè dzəən wun, wù yií ŋkàʼ fo vé lìm vəə́ adzə̀m. Wù nèn lò, e fə̀ə́r nshìylav fàáy yee kitú fo se sí‑iì jav bóm wùn à ye yì‑iì leey fo wír ve á fer vifa ve yi si, e tìír e vé lìm vəə́ si,

²¹ e nèn siìr nshìylav fàáy ye yì‑iì leey fo bóme e wun kiliŋ ke lìm fo wù‑uù dzəə̀n, wù kfə́n a fo bóm e fòn.

²² Yii bèy, wù suúy, á keèrì nshìylav fàáy yee kitú fo se sí‑iì fer vifá ve yi veé ntoʼ e kici. Vinyo vìn vi ku nèn kòóy réŋréŋ mo Joosev‑iì suuyin.

²³ Yii bèy, la nshìylav fàáy ye yì‑iì leey fo bóme yòʼ dzəə kuùmé Joosev, e nèn kù làysìn wun láysin.