Kèʼlo 35 - ŊWÀʼ NYÙY

Jakov kfə́n é bàm é Betel, Nyùy səə́ví wun fo

¹ Nyùy nèn sùúy e Jakov jii, «Lò fó fèn, e kòʼ é Betel, a dzə fo. Ku bòm kíy cùu fó, *kíy cù mo woo Nyùy, mo wo mò‑oò dìnèn kitú kém e wò e ghan se wò‑oò léʼ fər wò Esav.»

² Jakov nèn sùúy e kfə́ə rəə́ wùn à wír ve wùn áwune‑eè dzəə̀né jii, «Vèn tsəʼ mebvə̀m me anyùy vitume fo věn ghaŋ, mebvə̀m me vèn kérí. Vèn bvəti vishí vén, e màʼ ndzə̀y se ranén sí.

³ Vèsən ku kòʼ é Betel, é m du, e bòm kíy cù fo, kíy cù Nyùy wo wù‑uù səən mo, a m yén ŋgeʼ. Wù kù‑uù dzə̀ vèr wun kirə́ʼ kidzə̀m ke mò‑oò du sho.»

⁴ Á yú bey, e nèn bàʼtí mebvə̀m mev, à shív se vé‑eè sə́ŋri e vitùʼùr sí, e fò e Jakov, wù dzəə̀mè e sar kici ké *terebint ke kí‑iì dzəə̀n é ŋguùŋè Shekem foo fèy.

⁵ Áwune lòo dù, Nyùy yiì, fáne nəə́ e wír ve vé‑eè dzə́ e ŋkà se laʼ see fo vé‑eè shaa vìyí meliv, la á yòʼ dzəə shèm aáwuné bàm.

⁶ Vishiíy ví lòo liysín, Jakov wùn à wír və́ adzə̀me nèn mèé e Lus fo á yoŋ lèn ji Betel, a kù dzə̀ é wòŋ Kanan foo fèy.

⁷ Mo wù meen fó, e nèn bòm kíy cù, e fò yír kirə̀ʼ ké cù kìy ji Nyùy woó Betel, bìʼ fo dzəə̀n fo Nyùy‑iì dìnèn kitú kfə́ e wun, e ghan se wù‑uù léʼ fə́r və Esav.

⁸ Debora wo wù‑uù lìyìn Rebeka woo yìy à Jakov nèn lò kpù, á dzəə̀mè e ghaa kici kee *oak ke kí‑iì dzəə̀n é mbìv tsə̀n Betel. Á nèn shù yír kici kee shooy ji Kicí ké Mensiy.

⁹ Nyùy nèn kfə̀n dìn kitú kfə́ e Jakov, a sì ji akàŋ abaà mo wù‑uù kfənen fó Paddan‑Aram. Nyùy səə̀vì wun,

¹⁰ e sùúy sho jii, «Yír yée dzə̀ Jakov, a bó á yòʼ dzəə́ yiì a yòŋ wò bèy. E kèʼ fo lèn, á sí yiì a yòŋ wò ji Isray.» Á ku nèn a yòŋ wun bèy.

¹¹ Wù kfən sùúy sho jii, «M dzə̀ Nyùy woo Ŋgaà Vitaàví Vidzə̀m. Á dzəə́ wóné, aá wáa dzə nyanyày. Vitúm vinín wùn aàfone wíy ràm fo wò.

¹² Woŋ wo mò‑oò foon e Abraham wùn Aysìi sì wó lèn, wùn à wó ram yé ye yí wíy a wìy fo bàmé.»

¹³ Nyùy súŋnín bey, e nèn màʼtì wun.

¹⁴ Jakov siíy, e tùúy tíy é kirə̀ʼ kee fo Nyùy‑iì suŋnin e wun kìy, e sə̀r meluʼ sho, e yòʼ e meŋgvə́r mè,

¹⁵ e nèn shù yír kirə̀ʼ kiy ji Betel.

Racel dzəə́ Benjamin, e nèn kpù

¹⁶ Jakov wùn à kfə́ə rəə́ lò fo Betel, a dù. Lòo dù, aá dzə̀ə́ ntàmda fo ntèʼ yee Efrat, ghán sí nèn ghèén se Racel‑iì yíi dzəə́, wù wáa lum, a lum ntéŋ.

¹⁷ Nyár wané távkír, máŋkooy wáa rəə̀r wun, a suúy jii, «Kúr tímé, à kfə̀n lo, e dzəə́ wán lumèn.»

¹⁸ Mo wù dzəən, ghàʼkpu nèn lò, a kiv wun, wù jeétí, e shù yír wan ji Ben‑Oni Jakov woo taà wàn shù kfə́ ji Benjamin.

¹⁹ Racel kpú, á dzəə̀mè e ghaa dzəə yeé Efrat fo á yoŋ lèn ji Betlehem.

²⁰ Jakov tuúy tíy e Racel kitu ke sày, a yí dzə̀ə́ fo, e shem lán.

²¹ Wù tuúy bey, e tòsín, a dù, e tùy kibàn kfə́ é ghaa kitaàtì keé Eder.

Wón Jakov wo dzəə̀n sá ji Isray

²² Isray wáa dzə e ŋgvən fèy, Ruben lì Bilha wo tàr wov‑iì lemè, wùn wun shiíy, kí nèn tò e tàr wov Isray kitùʼùr. Jakov‑iì kér wón vee vilum nshòv sibaà e ghvə̀m.

²³ Vé Leàa‑aà dzə̀ jii, Ruben woo wan Jakov mbìy, bám sə́ sí nén a dzə jii, Simeon wùn à Levi, à Juda, à Issakar, e lì Sebulon.

²⁴ Vé Racel vee vilume‑eè dzə̀ jii, Joosev wùn Benjamin.

²⁵ Vé Bilha woo kwǎn Raceli‑iì dzə̀ Dan wùn Navtali.

²⁶ Vé Silpa wo yì‑iì dzəə̀n kwǎn Leàa‑aà dzə̀ jii, Gad wùn Asher. Víne dzə̀ wón Jakov ve wù‑uù dzəən é Paddan‑Aram.

Kpú Aysi

²⁷ Jakov nèn kfə̀n é bàm fo tàr wov Aysi wùn é Mamre, e ŋguùŋè Kiriat‑Arba ye á yoŋ sa ji Hebron, a dzə̀ fo Abraham‑eè dzə̀ʼə̀mèn sá, é bo Aysi siíy, a dzə fo.

²⁸ Aysi‑iì dzə̀ʼə̀m kiyá kishóv mwaamé é wiì (180).

²⁹ Wù‑uù kpú, a sì ŋgàywìr feyì, a wù yén ne vishiíy vinín. Esav wùn Jakov vee wón və́ vee abàá nèn dzəə̀mè wun.