Kèʼlo 26 - ŊWÀʼ NYÙY

Aysi wùn Abimelek

¹ Jìŋ nèn lò koò é wòŋ, a yì‑iì dzə̀ ye sən fo yee Abraham ghan. Aysi nèn dù, e beè fon wìr veé Filistia e Gerar, a yír rəə́ dzə̀ ji Abimelek.

² Nyùy Tàr nèn wìy fo Aysi, e sùúy sho jii, «Lá à yòʼ sə̀y é Ejiv, á dzə e wòŋ wo m suuy e wò.

³ Kú a dzə e wòŋ fèn, é m wìy a dzə wòsò, a səə̀vì wò. Kiíy ji m wíy fo woŋ və̀n e dzə̀m e wò, é wáa dzə wó vèn à rám yée. A m kfə̀n wíy yùŋrì ŋkàʼmé wo mò‑oò kàʼàn tàr won Abraham sho, e lìʼ.

⁴ M wíy yiì, é rám yée kuʼ moo mejiy meé yuv, e kfə̀n fo woŋ və̀n e dzə̀m e rám yée. A m wíy shaà fo wò ram, e səə̀vì vitúm veé kitu ke nsay vidzə̀m.

⁵ M wíy yiì bèy, bìʼ fo Abraham‑eè lo yù jí yem, e yiì kinyo ke mò‑oò suuyin e wun, e kfə̀n lèm sa nsər sém, wùn à sáʼ yémé, à ntir sém sí.»

⁶ Aysi ku nèn a dzə e Gerar foo fèy.

⁷ Wír vee fóo yén wíiy və, a sòv, wù bìnèr jii, «Dzə̀ jemèr yem.» Wù‑uù fan fó yòŋ ji dzə̀ á wíiy və, kwaʼtì jii, a tàm wír vee fóo yùyrí á wun bìʼ Rebeka wo wù‑uù bòŋèn é ŋàŋ.

⁸ Aysi dzə̀ʼə̀m fo, ntàm dàr, Abimelek woo fon wìr veé Filistia lòo leéy fó ndzə fo shùu wundu, e kishiíy kímóʼ kí, e yèn, a Aysi léŋri Rebeka woo wíiy və.

⁹ Fòn Abimelek nèn tòóy Aysi, e sùúy sho jii, «M yèn ne rú ji Rebeka dzə̀ á wiiy wò. Kì yiì ka, é bo à wáa yòŋ ji jemèr yè?» Aysi bìnèr jii, «M kì kwaʼtì ji tàm m ràn á dzəʼə̀m yém bìʼ wun.»

¹⁰ Abimelek nèn yòŋ jii, «Ke à yiìn e vèr ben ki dzə̀ ka? A kì tàm wír fo wír vìne, wù lò lì wiiy wò, áà wiy e lòné e věr kitu.»

¹¹ Abimelek nèn kàntì wir dzə̀m, e sùúy jii, «A wìr kùm wír və̀n, kìn wíiy və, bo ŋgaàŋ kpù á ne.»

¹² Aysi‑iì wày vifá e nsay foo fèy e kiya kee shooy, e kàv kirə́ʼ wií, e shaà mo wù‑uù wayin. Nyùy Tàr kú a səə̀vì wun,

¹³ wù wáa ker kéŋ, yí wáa kuy, wù wáa dzə ŋgaà bùʼ.

¹⁴ Wù‑uù kér ŋgoo se bvəy wùn à sé nyàm si, kfə̀n kér vé lìme anín. Bìʼ kee shooy, wír veé Filistiàa nèn a bàn wun.

¹⁵ Vé‑eè lò, e nèn lì nsay, e sə̀tí ndzə́v se vé lìm Abraham woo tàr à Aysi‑iì tuŋen e wùn ghan.

¹⁶ Abimelek suúy e Aysi jii, «Lò fo věr mvəm, à kùʼ ne e shaà ver.»

¹⁷ Aysi nèn lò fo fo, e dù tùy kibàn kfə́ é kiwoóy keé Gerar, e nèn a dzə fo.

¹⁸ Wù kfən fə̀ʼ ndzə́v se tàr wov Abraham‑eè tuŋen, é bo wír veé Filistiàa sə́tí é ghan se wù‑uù kpuun. Wù kú a yòŋ ndzə́v see shooy e yir se tàr wov‑iì yoŋ sho.

¹⁹ Vé lìm Aysìi wìy tùŋ ndzə́v é kiwoóy, e shùʼ ntoò ndzə̀v ye juŋ,

²⁰ anshìy anjiì veé Gerari nèn kèʼ, a nyàm wùn áwune, a suúy ji ndzə́v rə́ne dzə̀ á yév. Aysi nèn shù yír ndzəv yee shooy ji «Kinyam».

²¹ Áwune kfən tùŋ yímóʼó, kinyam ki kfə́n a dzə sa e kitu wo. Wù nèn shù yír ji «Vibàn».

²² Wù lò fo fo, e dù tùŋ yímóʼ yee ndzə́v, la kinyam ki yòʼ a dzə e yee shooyi. Wù nèn shù yír ji «Kirə́ʼ». A wù shu bèy, suuy jii, «Nyùy fò ne ver kirə́ʼ é nsay fèn, a vèr sí yiì a kuy kuyín lèn, a dù fo mbìy.»

²³ Wù lò fo fo, e dù e Beersheba.

²⁴ Wáa dzə vitsə́ʼə́, Nyùy Tàr wìy fo wun wùn, e sùúy jii, «M dzə̀ Nyùy Abraham woo tàr won. Lá à yòʼ a fàn, m dzə̀ wòsò. M wíy bùʼ wò, e yiì, é kfə́ə yée kuʼ bìʼ ŋgaà wom lìm Abraham.»

²⁵ Aysi nèn bòm *kíy cù fo, a cù Nyùy Tàr, a yòŋ yír rə́. Wù túy kibàn kfə́ fó, wón və́ lìme túŋ ndzə́v fó.

Kilìʼ ké Aysi wùn Abimelek

²⁶ Fòn Abimelek nèn lò lì Ahussat woo ŋgaà ntir və wùn Fikol woo mfòómé və rə̀r, wùn áwune lò fo Gerar, e dù, e yèn Aysi.

²⁷ Aysi dzə́r aáwune jii, «Vèn wiy, e yen mo ji ka, a vèn bán ne mo, e jùm fo věn mvəm?»

²⁸ Áwune bìnèr jii, «Vèr‑iì sìíy, e yèn rúrú ji Nyùy Tàr dzə̀ á vèn wun. Bìʼ bey, vèr nén a wìy ji vèsən yii á kilìʼ e vèsə́n nsàn. Vèsən gwar *mensaŋ

²⁹ ji à yòʼ yíi yiì kinyo ke bi kí e vèr, réŋréŋ mo vèr yòʼ‑oò ló a nyàvrì e wò. Vèr‑iì keèrí wò kijuŋ, e tsəə̀né wò ji nyaáŋ. Nyùy Tàr bùʼ ne wò, à kúʼ lèn.»

³⁰ Aysi nèn yiì ŋkàʼ fo áwune, á wáa yikír, a nonín.

³¹ Ndzə bvəə́shí, e jàv, áwune nèn yiì kilìʼ. Aysi tsəə́né áwune, á jàvsìn ji nyaáŋ.

³² Wáa dzə e kishiíy fóo fèy, wón lìm Aysìi wìy, e bì wun kùm ndzə́v ye áwune‑eè tuŋen. Áwune suúy jii, «Vèr dzə̀ a yén mendzə́v.»

³³ Wù nèn shù yír ndzəv yee shooy ji «Shiba», a dzə̀ ji kilìʼ. Á nèn a yoŋ yír ŋkàlaʼ yee fó ji Beersheba, e shem lán.

Esav koóy vikìy a dzə̀ wón veé Kanan

³⁴ Esav meé kiyá mkweè, e nèn kòóy vikìy fo Hit ram. Wùmòʼ‑oò dzə̀ Judit woo wan Beeri, wùmòʼ Basemat woo wan Elon.

³⁵ Áwune‑eè yiì, Aysi wùn Rebeka kú a dzə, a yu a dzə̀ nyár.