Kèʼlo 25 - ŊWÀʼ NYÙY

Kpú Abraham

¹ Abraham‑eè kòóy wiíy wùmòʼ, a yírí dzə̀ ji Ketura.

² Wùn wun dzəə́ Simran wùn à Jokshan, à Medan, à Midian, à Ishbak, à Shuaa.

³ Jokshan nén a dzə tàr à Sheba wùn Dedan. Vitúm ve ví‑iì ràmèn fo Dedan vi dzə̀ jii, wír veé Ashur wùn à veé Letushim, à veé Le‑Ummim.

⁴ Wón Midiane wáa dzə jii, Efa wùn à Efer, à Hanok, à Abida, à Elda. Wír vìn adzə̀me dzə̀ rám Ketura.

⁵ Abraham nèn màʼtì kifá kfə́ kidzə̀m e Aysi.

⁶ Fo ké wón vikìy ve wù‑uù lèmèn lémené, wù‑uù fò áwune afómo é ghan se wù‑uù dzəə̀n e tin, e shàʼàr, e tsə̀nsí e mbìv wòŋ yee fo shùy yii tó ji wun kiír á fo Aysi ghaŋ.

⁷ Abraham shiíy kiyá nshòv sitàn e msaàmbà e wiì (175),

⁸ e kpù, e dù tàtí atàr və́. Wù‑uù dzə̀n ben, e kòŋrí, e yiì vinyo, e bóo kpu.

⁹ Wón və́ vee Aysi wùn Ishmaeli nèn dzəə̀mè wun e mbvə̀ʼ yeé Mak‑Pela ye yì‑iì dzəə̀n é sum wúmóʼó é ghaa Mamre. Súm woo shooyi‑iì tòmbìy a dzə wó Efron woo wan Tsohar, wo yì‑iì dzəə̀n rám Hit,

¹⁰ é bo Abraham yún fo wón Hit vìne. Kù dzə̀ fo vé‑eè dzəə̀mèn Abraham wùn wiiy və Sara.

¹¹ Abraham kpú, Nyùy kú a səə̀vì wán və Aysi, wù wáa dzə e Beer Lahay Roy.

Rám Ishmael

¹² Rám Ishmael woo wan Abraham wo wù‑uù dzəən wùn Hagari rə̀ne. Hagar və̀n‑eè dzə̀ kwǎn Sara wo wú‑uù wìyìn fó Ejiv.

¹³ Yír sé wón Ishmael mo vé‑eè dzəə áwune sí síne. Wan mbìy‑iì dzə̀ Nebayiot, bám sə́ sí wáa dzə Kedar wùn à Adbeel, à Mibsam,

¹⁴ à Mishma, à Duma, à Massa,

¹⁵ à Hadad, à Tema, à Jetur, à Nafish, e bóo lì Kedema.

¹⁶ Wón Ishmael vìne nen fèr rám nshòv sibaà e ghvə̀m, a yír sin si dzə̀ sé ram sév réŋréŋ mo áwune dzə́ aáwuné virə̀ʼ.

¹⁷ Ishmael‑iì shìíy kiyá nshòv saàmbà e mtaár e wiì (137), e kpù, e dù tàtí atàr və́.

¹⁸ Rám rəə́‑əə̀ dzə̀ʼə̀m, e kèʼ fo Havila, e dù, e mèé e Shur, e ghaa Ejiv, e dzəə̀ Assiriya, a bó áwune yòʼ‑oò táti wùn aàfə́r vév ámóʼó vee rám Abraham.

Á dzəə́ Jakov wùn Esav

¹⁹ Rám Aysi woo wan Abrahame rə̀ne. Abraham‑eè dzə̀ə́ Aysi,

²⁰ Aysi meé kiyá mkweè, e nèn kòóy wiíy və woo Rebeka. Rebeka‑aà dzə̀ wan Betuel wo dzəə̀n wír woó Aram e wòŋ woo Paddan‑Aram. Wù kfə̀n‑eè dzə̀ jemèr Laban.

²¹ Rebeka‑aà ndzə̀y fóo boŋ bvəm, Aysi nèn bùnrì, e lòn Nyùy Tàr, wù yú bunrì rə́, e yiì, Rebeka tiím bvəm.

²² Kí nèn lò kòóy ji wón ve vé‑eè dzəə̀n e wun bvə̀me wáa tsəynín. Wù lò, e sùúy jii, «Ke kí kooy mo ben ki dzə̀ ka?» Wù nèn lò, e dù, e beè Nyùy Tàr ji wun tar á kinyo kee shooy.

²³ Nyùy Tàr suúy shó jii: «Wóné dzə̀ e wò bvə̀m abaà, aà wíy dzəə́, aá fer vitúm vibaà. Wo mòʼón wíy tav, e shaà wùmòʼ. Woo ŋgàywìr wíy a yu fo wo terí.»

²⁴ Ghán sé dzəə́ si gheén, a wóné dzə̀ rú e wun bvə̀m abaà.

²⁵ Wo mbìy fəə́, a wù baŋè, a wún vəə́ dzə̀ wuy wuy moo ndzə̀y sé wùy si bey. Á nèn fò yír rə́ ji Esav.

²⁶ Fo bàm, fər Esav nèn a fəə, a wù bám nsən kiwuù Esav, áwune fó rə́ yee yír ji Jakov. A Aysi‑iì dzə̀ kiyá mntuùfú é ghan se Rebeka‑aà dzəən wón vin.

Esav fiíné ghay və́ viŋgày vé wìr

²⁷ Wón víyi kúykír, Esav wáa dzə wir jwim wo tavín, a wù ghán kfə́ a dzə̀ é kwaʼ. Jakov wáa dzə kfə́ wír woo nyaáŋ, a wù rə́si kfə́ a dzə̀ é laʼ.

²⁸ Aysi‑iì koŋ Esav bìʼ nyám se wù‑uù koó, wiy sho, a wù kfə́rí. Yii bèy, a Rebeka koŋ kfə́ a dzə̀ Jakov.

²⁹ Lòo dzə e kishiíy kímóʼ kí, Jakov wáa naá viyíkìr ve nshèv ví, a Esav wíy fó kwaʼ, a jìŋ kóm vitó və́ kómén.

³⁰ Esav suúy e Jakov jii, «Ku fò mo viyíkìr ve nshèv ve baar viy vi, é m yí. Jìŋ kóm vitó vém kómén.» Á kinyo ke kí‑iì yiìn, é bo á kfə́n a yòŋ Esav ji Edom.

³¹ Jakov suúy shó jii, «A dzə̀ à kù fiìnè viŋgày vé ve wìr e mò ŋkuŋén.»

³² Esav bìnèr jii, «A jìŋ yùyrí mo, bo viŋgày vém vé wìr vi sə̀ mo é gha?»

³³ Jakov suúy shó jii, «Ku lìʼ kilìʼ kí wòsò ŋkuŋén.» Esav nèn lìʼ kilìʼ wùn Jakov, e fiìnè viŋgày və́ vé wìr sho bèy.

³⁴ Jakov nèn fò kibán wùn à nshèví e Esav, wù yí, e kfə̀n nò kifá, e nèn ŋàʼáy, a dù du rə́. Á mo Esav‑iì ŋwayin ghay və́ viŋgày vé wìr.