Kèʼlo 23 - ŊWÀʼ NYÙY

Kpú Sara

¹ Sara‑aà dzə̀ʼə̀m kiyá nshòv saàmbà e mbaà e wiì (127).

² Wù‑uù kpù é wòŋ Kanan, e kirə̀ʼ ke á yoŋ ji Kiriat‑Arba, a dzə̀ lán ji Hebron. Abraham wáa toŋ, a dìy kpú rə́.

³ Abraham lò fo dzə́n wiiy vəə́ ghaŋ, e dù, e yèn wón Hit, e sùúy aáwune jii,

⁴ «M dzə̀ kiŋgwìy, a m bee beèn e věn mvəm. Vèn taʼ kirə́ʼ kímóʼ kí e věn ŋgvən, e fò mo, é m dzəəme wíiy wom fó.»

⁵ Wón Hiti bìnèr e Abraham jii,

⁶ «Ŋgàywìr, yuúrí. À dzə̀ wan ntoʼ wo kuʼùn e věr nsàn. Dzəə̀mè ŋkfə wò e věr kirə̀ʼ ke kí gheenen wò. Wìr fo vèr yòʼ dzə̀ wù shàʼnín fo à dzəəme ŋkfə wò e kirə̀ʼ ke ŋgaàŋ naŋsin, a dzəə̀mè wír və́ shó.»

⁷ Abraham lò, e gvə̀ʼtí, e fò ghvə́m e wón Hit vìyi, áwune ve á kér nsay,

⁸ a suúy jii, «A vèn bèn koŋ ji m tsəʼ ŋkfə wom fo mǒ si, e dzəə̀mè, vèn sə̀ mo, e sùŋnín e Efron woo wan Tsohar

⁹ kùm mbvə̀ʼ yeé Mak‑Pela ye yì dzəə̀n e wun kor sum. Vèn ku lòn ji wù maʼti á mbvə̀ʼ yee shooy e mò. Wù ku màʼtì a e kav wo wù koŋè, é m laʼ, a vèn yéné, e fíʼ a ker kirə́ʼ ké a dzəə̀mè wír vém fó.»

¹⁰ Efron‑eè dzə̀ wír woo Hit ram, a wù kì dzə́ sa e wír vəə́ mvəm, aá dzə́ e kirəsí keé shùu ŋkàlaʼ. Wù nèn a bìnèr e Abraham, aàfə́r vəə́ yú, a suúy jii,

¹¹ «Àáy taàtá wòm, yuúrí, m fò ne wò kwáʼ wùn à mbvə̀ʼ ye yì dzəə̀n shó. M fò ne e wò. M fò ne e wír vém víné si. Dzəə̀mè ŋkfə wò fo.»

¹² Abraham kfən gvə̀ʼtí, e fò ghvə́m e wón nsayi,

¹³ e nèn sùúy e Efron, aáwuné si jii, «Kii wò, m yíi làʼ súm láʼan. Ku sə̀ káv sumé fo mǒ kiwo. Ku biìmé bèy, é m wáa ker kirə́ʼ ké a dzəə̀mè wír vém shó.»

¹⁴ Efron suúy e Abraham jii,

¹⁵ «Yuúrí taàtá wòm, súm woo shooyi dzə̀ moo kisha ke mbàm ke fəvír kí *ashekel ghii kweè bèy. A dzə̀ kee shooy ki jìvír wòsò e gha? Dù dzəə̀mè ŋkfə wò fo.»

¹⁶ Abraham biímé jí Efron, e nèn fìʼ kisha ke mbàm ke fəvír kí ashekel ghii kweè réŋréŋ mo mfìʼ kav wónlě way‑iì dzəə̀n é ghan fóo fèy.

^17-18 Á nèn fò súm Efron wo wú‑uù dzəə̀n é Mak‑Pela e Abraham ji sì á kifá kfə́, a Mak‑Pela dzə̀ é ghaa Mamre, e mbìv yee fo shùy yii tó. Vé‑eè fò súm wùn à mbvə̀ʼ, à vicí ve ví‑iì dzəə̀n fó vi vidzə̀m. Aá fó bèy, a wón Hiti yéné, a wìr dzə̀m wo wù‑uù dzəə̀n é kirəsí keé shùu ŋkàlaʼ yén sa.

¹⁹ Abraham nèn dzəə̀mè wíiy və Sara é mbvə̀ʼ foo fèy, ye yì dzəə̀n é kwaʼ woó Mak‑Pela e ghaa Mamre, e nsay Kanan.

²⁰ Á mo Abraham‑eè kooyin kwáʼ woo shooy wùn à mbvə̀ʼ ye yì dzəə̀n shó fo wón Hiti ji kirə́ʼ kfə́ ké kindzəə̀mèwìr.