Kèʼlo 20 - ŊWÀʼ NYÙY

Abraham wùn Sara, à Abimelek

¹ Abraham nèn wìy lò fo Mamre, e sə̀y é Negev, a dzə e ŋkìʼnìn Kadesh wùn Shur, e wìy lò, e dù, e beè e Gerar.

² A wù dzə́ bèy, yoŋ Sara woo wíiy və ji jemèr rə. Abimelek woo fon woó Gerar nèn lò, e tùm wíri ji á du, e lì Sara, e wìy sho ji wù wáa dzə a wíiy və.

³ Wáa dzə vitsə́ʼ vímóʼ ví, Nyùy súŋnín e Abimelek e njèm jii, «Á yen, à sì ŋkfə bìʼ wiíy wo à liìn və̀y. Wù dzə̀ ben, a dzə̀ wiiy wìr.»

⁴ Mo bó Abimelek yòʼ‑oò ló ne shìíy e Sara, wù nèn a dzər e Nyùy Tàr jii, «Tàr, à yíi laàr wír wùn à kitúm kfə́ kí là jay à?

⁵ Bó yòʼ kì sùúy Abraham e mò ji Sara dzə̀ jemèr rə, Sara bínsí sá ji wù dzə̀ lúmér rə a? M yiì kinyo kìn vèr à shilív she ranén shí, là kindzə́m.»

⁶ Nyùy nèn kù a suúy sho e njèm jii, «Rúrú, m kì ji à kì yiì kinyo kìn a vèn à shilív she ranén shí. Á kinyo ke kí kì yiìn, é bo m kim wò fo à jáy kinyo, e shìíy e wiíy və̀n. Aà kì lóo dzə, e yiì bèy, bo dzə̀ kinyo ke bi kí fo mò.

⁷ Siìr ri wiiy lumèn və̀y sho. Wù dzə̀ *ŋgaà ntum wom. Wù yíi bùnrì fo wò, áà wáa dzə e tin. Aà lòo dzə, e làa yòʼ siìr, à wàa kiíy ji vèn à wír vée kù waà yíi kpukír.»

⁸ Ndzə bvəə́shí, lòo jàv, Abimelek toóy atǎr ntoʼ və́, e fèr aáwune kinyo ke kí‑ii kooyin. Áwune yú, a fàn feyì.

⁹ Abimelek nèn tòóy Abraham, e dzə̀r shó jii, «À yiì kee ben a dzə̀ ka e vèr? M jày ka e wò, é bo à wiy e lòn woo bene e vèr à woŋ wómé kitu? À mùm kinyo e mò, a yòʼ dzə̀ ke a dzə̀ wìr yiì.»

¹⁰ Abimelek kfən dzə̀r e Abraham jii, «À kì mùm kinyo kìn bèn bìʼ ka?»

¹¹ Abraham bìnèr sho jii, «Mò‑oò rəm jii, bó fan Nyùyi yòʼ dzə̀ á e wòŋàn, fə̀m à shishàr sho. A yì‑iì dzə̀ á yùyrí mo bìʼ wíiy wom.

¹² Á naʼ kee ji wiíy, wù dzə̀ rúrú jemèr yem. Vèr wun tàtí fo kitàr, e jàvsìn fo kiyìy, m nen lì ji wíiy wom.

¹³ Yì‑iì dzə̀ é ghan se Nyùy‑iì fəərin mo fo tàr wór lav, m wáa ghan ghanén é wòŋ, m nèn sùúy e Sara jii, ‹Aà bèn koŋ mo rúrú, wòsò du a fə̀m dzə̀ feé, à kù a yòŋ mo e wìr dzə̀m ji lúmer yè.› »

¹⁴ Abraham màysì kisúŋnìn kfə́, Abimelek lì anjiì, anàʼ, wùn aàkwàn vee vikìyí, à vee vilume, e fò shó, e nèn siìr Sara e wun.

¹⁵ Abimelek kfən sùúy e Abraham jii, «Kér mo nsay rə̀n, dzə̀ʼə̀m fo à koŋè.»

¹⁶ Wù nèn sùúy ké Sara jii, «M sí fó *kisha ke mbàm ke fəvír kí nsə̀kì e lùmer yè. A m fó ji m su liy fo wò wùn, e koʼór wò e wír vée si, e dìn ji à dzə̀ á là shilóm.»

¹⁷ Abraham nèn bùnrì Nyùy, Abimelek bónén. Nyùy kfən mvə̀ʼ kidzəə́y ké wiiy Abimelek wùn à ké akwàn və́ vee vikìyí, á wáa dzəəkír,

¹⁸ bìʼ fo vé‑eè dzə́, a Nyùy sə́tí ne kidzəə́y ké vikìy vee Abimelek ntoʼ adzə̀m bìʼ kinyo ke Sara woo wiiy Abraham.