Kèʼlo 2 - ŊWÀʼ NYÙY

¹ Á mo Nyùy‑iì màysìn, e bòm yúv wùn à nsay, à vifá ve ví dzəə̀n shó vi vidzə̀m.

² Mo Nyùy màysìn lim rə́, lòo dzə e kishiíy kee saàmbà, wù nèn meèmè fo wun lìm ye wù‑uù lìmèn e dzə̀m,

³ e səə̀vì kishiíy kee saàmbà kìy, e lèm jeéy ji kishiíy ke dzəə̀n kfə́. A Nyùy‑iì lem bèy, bìʼ fo dzəə̀n kishiíy ke wù‑uù meèmèn fo wun lìm ye wù‑uù lìmèn e dzə̀m, a dzə̀ ndzə ye wù‑uù bómé.

Kiboó keé Eden

⁴ Kin ki dzə̀ kimfèr mo yúv wùn à nsay‑iì dzəə̀n é ghan se Nyùy-iì bomen. A kí dzə̀ jii, Nyùy, wun woo Nyùy Tàr‑iì fèr nsay, e fèr yúv,

⁵ a bó kikwiíy, kìn kifá kímóʼ kí yóʼ ne fəə̀ é kwaʼ, bìʼ fo wù yòʼ‑oò ló ne yiì ji wuú wàá ló é kitu ke nsay, a bó wìr wo dzə̀ wù wàa lìm nsay yòʼ fə̀m sì sá.

⁶ Yii bèy, mendzə́v mè wáa koʼ fo nsay e virə̀ʼ vímóʼ ví, a yiì, nsay wáa rə̀ e dzə̀m.

⁷ Nyùy Tàr nèn ŋèʼ nsay, e fèr wír sho, e feèsí kiyoy kfə́ é yuy wo, e fíʼ yiì, é wù wáa dzə e tin. Wìr nèn a yòy, a dzə e tin.

⁸ Nyùy Tàr nèn nàŋsín kiboó é kirə̀ʼ ke á yoŋ ji Eden, a kí dzə̀ é mbìv ye shùy yii tó fo fo. Wù náŋsín, e lèm wír wo wù‑uù fèrìn və̀y fo.

⁹ Nyùy Tàr‑iì yiì, vicí ve juŋ vi wáa kuy fo, kfəə́ si kfəə́ si, a ví bóŋ fó si, kfə̀n boŋ e shuù. Vímóʼ vee vicí ví kfə́n a tiy e kintìntìn ke kiboo vibaà. Kee kimòʼón ki‑iì dzə̀ ke kí fó dzəʼə̀m, kímóʼ kí, ke dzə̀ kí yiì, wìr wàa kiíy jeéyjeéy fó kinyò ke juŋ ki wùn à ke bi kí.

¹⁰ Ndzə́v yímóʼó‑oò fəə́ e Eden foo fèy, səv kiboó kiy, lòo leŋ, lòo fəə fo fo, e nèn jàv nshwàn sikweè.

¹¹ Yír nshwǎn ndzə́v mbìyi dzə̀ Pishon, a yí léŋ, goókir, ghánen mvəm wòŋ woo Havila e dzə̀m. *Kisha ke mbàm ke baar kí‑iì dzə̀ fó,

¹² a dzə̀ ke yì‑iì dzəə̀n wúntí kíwun. A kfə́ə làm wúmóʼó wo wú yii rəm, rəʼtìnèe‑eè dzə̀ sá fo, wùn à kfə́ə tiy ye á fer *síbaŋ shóo, aá yoŋ ji oniks.

¹³ Yír nshwǎn ndzəv woo bàá dzə̀ Gihon, a yí léŋ, goókirì, shaa e wòŋ wo á yoŋ ji Kush.

¹⁴ Yír nshwǎn ndzəv woo taárí wáa dzə ji Tigris, a yí léŋ e wòŋ woo Assiriya, e mbìv ye shùy yii tó fo fo. Yír nshwǎn ndzəv woo kwèe nén a dzə ji Yufret.

¹⁵ Nyùy Tàr nèn wày wír wo wù‑uù bomen və̀y e kiboo keé Eden fèy ji wù wáa lìm, a leéy a fo fo.

¹⁶ Wù lò, e yòŋ wun, e fò nsər sho ji a dzə̀ wù wàa yi a vicí veé kiboo fóo fèy vidzə̀m mo wù koŋè.

¹⁷ Yii bèy, wù wáa yen a fóo wìy yi kicí ke dzə̀ kí yiì, wìr kìíy jeéyjeéy fó kinyò ke juŋ ki wùn à ke bi kí. Kishiíy ke wù yí, bo wù kpù á ne.

¹⁸ Nyùy Tàr nèn lò sùúy jii, «Kí yoʼ bòŋ ji wìr wáa dzə wùn mòʼón. M yíi fèr kifá ke kí gheén fó a dzə wùn wun, a sə wun.»

¹⁹ Nyùy Tàr nèn lì nsay, e fèr nyám seé kwaʼ sho sidzə̀m, e kfə̀n fèr sa menə́n. Wù nèn lò, e wìy sho ji wìr wàá shuri á yír sév. Wù fó yír e nyàm, kìn e shinə́n shí, bo kù sì yíwun.

²⁰ Wìr ku nèn a shùrì yír sé nyàm seé laʼ wùn à seé kwaʼ si sidzə̀m, e kfə̀n shùrì sa sé menə̀n. Yii bèy, fo mvə̀m vifa vìn vidzə̀m, bó á yòʼ‑oò lo yèn kifá ke kí gheén fó a dzə e wìr ghaŋ, a sə wun.

²¹ Á bèy, Nyùy Tàr nèn yiì, wìr buúné, e tònén. Wù nèn shòʼ kighvə́r kímóʼ kí fo wìr buu nsaŋ, e sə̀tí fó e jav.

²² Nyùy Tàr lì kighvə́r ke wù‑uù fəərin fo wìr buu nsaŋ kìy, e nàŋsín, e fèr wiíy sho, e dìn e lùmèn.

²³ Wù yén, e bìnsí jii: «Á lèn, á lèn, á kighvə́r kee mǒ kighvər, á jáv yee mǒ jav wùn. Á yíi a yòŋ ji wiíy, bìʼ fo wù loòn fo wìr.»

²⁴ Á kinyo ke kí yiìn, é bo lùmèn maʼti tàr wov wùn yè wov, e tàtí wùn wiiy və, wùn wun wáa dzə wún e mòʼón.

²⁵ Yì‑iì dzə̀ é ghan fóo fèy, a lùmèn wùn wiíy dzə́ kinshóʼ, a bó wìr yòʼ woóme wùmòʼ.