Kèʼlo 17 - ŊWÀʼ NYÙY

Kisəəm ké mensàŋ me Nyùy wùn Abram

¹ Abram meé kiyá nshòv bvə̀ʼə̀ e mbvə̀ʼə̀ (99), Nyùy Tàr wìy fo wun wùn, e sùúy sho jii, «M dzə̀ Nyùy woo Ŋgaà Vitaàví Vidzə̀m. Á yunín mo, a yiì vinyo vee tìítiy vi, a dzə là nsem,

² é m wìy a yùŋrì *mensaŋ mem wòsò, e fo wò rám e neénín.»

³ Abram tsə́m ndzəə́, e làʼ kitú e nsay, Nyùy suúy shó jii,

⁴ «Leéy ri yèn, kee mǒ mbìv, m gwàr ne mensaŋ wòsò, aà wíy a dzə tàr à rám sé vitum vineénín.

⁵ Yír yée yòʼ kfə̀n dzəə́ yiì a dzə ji Abram. Yí sí yiì a dzə ji Abraham, bìʼ fo m lèmèn ne wò ji tàr à vitum vineénín.

⁶ M wíy fo wò rám e neénín, é yí wìy kùʼ, e fèr vitúm, aámóʼó wáa dzə afon.

⁷ M wíy a yùŋrì mensaŋ mem wòsò, e kfə̀n a yùŋrì vèr à rám yé ye yí dzəə́ wìy a wìy fo bàm, é ŋgwàʼ sí ŋgwàʼ si, é wáa dzə mensaŋ me mè gòʼòn ne ŋkuuŋkùŋ. A dzə̀ jii, m wíy a dzə Nyùy wò, e kfə̀n a dzə wo ràm yé.

⁸ M wíy fo woŋ wo à dzəə̀n kiŋgwìy sho və̀n e wò. Wóŋ Kanan e dzə̀me sì wó vèn à rám yée ŋkuuŋkùŋ, à rám yé yee mo yí wíy a dzə fo bàmé. A m wíy a dzə Nyùy wov.»

⁹ Nyùy kfən sùúy e Abraham jii, «Fo wò mbìv, à kù wíy a lèm mensaŋ mem, é rám yé ye yí wiy fo bàmé ku wìy a lèm sa, ŋgwàʼ yìmòʼ e yìmǒʼ bàm.

¹⁰ Dzəə̀ ye vèn kér fóo wìy a lèm mensaŋ mem shó dzə̀ jii, vèn wíy a saŋ mbèʼ se won vee vilum adzə̀m. Á mensaŋ me m gwàrìn wòsò, wùn à rám yé ye yí wíy a wìy fo bàmé.

^11-12 Kèʼ fo lèn və̀n, wan woo lumèn mee vishiíy waamé, á sàŋ mbèʼ sə́. Kìn dzə̀ wan wò, kìn dzə̀ wo kwàn wo wú‑uù kuyin e wò lav, kìn wo kwàn wo à yunen e mbàm si fo viŋgwìy vi, a bó á yoʼ kùm kfə́ə yén, á sàŋ mbèʼ sə́, é wáa dzə kisəəm ké mensàŋ me m gwàrìn wòsò.

¹³ Á kù wíy a saŋ mbèʼ se won vén vee vilum adzə̀m, aàkwàné shó, kìn veé laʼ, kìn ve à yunen e mbàm si. Á kisəəm ke vèn kù wíy a ker e věn wùn, é kí wáa dìn ji mensaŋ me m gwàrìn wòsò mè dzə̀ me mè kù wíy a tiy fo ghán sidzə̀m.

¹⁴ A dzə̀ lumèn, aá yoʼ sàŋ mbèʼ sə́, bo á wíy fəə́r wun fo wír vémé mvəm, bìʼ fo wù ŋwayin mensaŋ mem.»

¹⁵ Nyùy nèn kfə̀n sùúy e Abraham jii, «Fo ké Saray woo wiiy wò ki, à yòʼ dzəə́ yiì a yòŋ yír rə́ ji Saray. Kèʼ fo lèn, yír rəə́ sì Sara.

¹⁶ M wíy səə̀vì wun, áà koóy wán lumèn, a dzə̀ wo vèn wun, e kfə̀n səə̀vì Sara, é wù wáa dzə yìy à vitum. Afone wíy a fəə fo wun ram.»

¹⁷ Abraham nèn tsə̀m ndzəə́, e làʼ kitú e nsay, e shèʼ, e ghày jii, «A dzə̀ wír, a wù sì kiyá wií, wù wàa ker wán a? A dzə̀ Sara wo wù siìn kiyá mbvə̀ʼə̀ dzə̀ə́ a?»

¹⁸ Wù nèn sùúy e Nyùy jii, «La à kù si biìmé a dzə̀ Ishmael ji njìlaʼ wom a?»

¹⁹ Nyùy bìnèr jii, «Àáy, Sara woo wiiy wò wíy dzəə́, é vèn wun koóy wán lumèn, aá wíy shù yír rə́ ji Aysi. M wíy yùŋrì mensaŋ mem a dzə̀ vèr wun, wùn à rám rəə́, ye yí dzəə́ wìy a dzə, é wáa dzə mensaŋ me mè gòʼòn ne ghán sidzə̀m.

²⁰ Fo ké Ishmael ki, m dzə̀ a m yú. Yuúrí, e yù, m wíy səə̀vì wun, e yiì, é wù wáa tèʼ, a ràm e ŋàáŋàŋ. Wù wíy a ker wón nshòv sibaà e ghvə̀m, aá wíy a dzə vé saʼa. M wíy yiì, é rám rəə́ fer kitúm ke wiy kí.

²¹ Yii bèy, m wíy yùŋrì mensaŋ mem a dzə̀ vèr Aysi wo Sara wíy dzəə́ e ghan fen, e kiya ke kí wiyì.»

²² Nyùy máysí, e sùŋnín wùn Abraham, e nèn kfə̀n é yuv.

²³ Abraham siíy, e lì Ishmael woo wán və, e kfə̀n lì akwàn və́ vee vilum, e sàŋ mbèʼ sév é kishiíy fóo fèy mo Nyùy‑iì suuyin e wun. Wù‑uù sàŋ sé akwàn və́ adzə̀m, kìn dzə̀ wo vé‑eè dzəən e wun laʼ, kìn wo wù‑uù yunen yúnén e mbàm si.

²⁴ Abraham‑eè sì kiyá nshòv bvə̀ʼə̀ e mbvə̀ʼə̀ e ghan sin se vé‑eè saŋen mbèʼ sə́,

²⁵ a Ishmael woo wán və sì kiyá nshòv sitaár e ghvə̀m.

²⁶ Vé‑eè sàŋ mbèʼ sév, a kù dzə̀ é kishiíy fóo fèy,

²⁷ e kfə̀n sàŋ sé vilum adzə̀m vee wun laʼ, kìn dzə̀ ve vé‑eè dzəən e wun lav, kìn ve wù‑uù yunen e mbàm si fo vitúm vi.